တယိတ်ချံၚ်၊ အဝ်ဂါတ် (၁၁)
ပ္ဍဲဒေသတံၚ်ပျံက်(တောၚ်ပျောက်) ၊ ပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳဂှ် အပ္ဍဲတ္ၚဲအကြာဏံ ဗြဲဂၠိုၚ်တုဲ ဍာ်ဇၞော်ဒၟံၚ်ဂှ်ရ ညးပါဲဒဴဘဲပၞာန်တံ ဒှ်ဒၟံၚ်အခက်အခုဲ ပရေၚ်စသုၚ်မံၚ်စံၚ်တံရဂှ် ညးမၞုံတာလျိုၚ် ဂကောံမရီုဗၚ်ကဵုဒၟံၚ် ညးပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဒေသတံၚ်ပျံက်ဂှ် ဗြဲဂၠိုၚ်တုဲ ဍာ်ကြုၚ်တံ တိုန်ကၠုၚ်ဂှ်ရ စဵုကဵုဒၞါဲညးပါဲဒဴဘဲပၞာန်တံမံၚ်ဂှ် ဍာ်စိုပ်ကၠုၚ်တုဲ နွံပၟိက်ဒၟံၚ်ကဵု အခက်အခုဲစသုၚ်မံၚ်စံၚ် ကေုာံ ဒၞါဲမံၚ်ဖ္ဍာန်တံတုဲ သွက်ဂွံယိုက် ဇွောံမစၞစတံဂှ် ဒးဂဗဒၟံၚ် အခက်အိုတ်ရ။
“လၟုဟ်ဂှ် ဗြဲဂၠိုၚ်တုဲ ဍာ်ဇၞော်ဒၟံၚ်ဂှ်ရ ယိုက်ဇွောံမစၞစ ဟွံဂွံပုဟ်၊ လ္ပာ်ကွာန်ဍာ်ဇၞော်ဒၟံၚ်တံဂှ် ကြုၚ်ဂၠိုၚ်တုဲ ဒၞါဲမံၚ်ဖ္ဍာန်တံ ဟွံရုမ်ဂပ်ပုဟ်၊ ဒၞါဲလ္ၚဵုတံဂှ် ဍာ်လုပ်တုဲ ဒးပြံၚ်ဆုဲအာတံလေဝ် နွံ” ဂှ် ညးမၞုံတာလျိုၚ် ဂကောံရီုဗၚ်ဟံၚ်ပြာ် ညးပါဲဒဴဘဲပၞာန်ဒေသ တံၚ်ပျံက် မွဲတၠ ဟီုရ။
သ္အာၚ်နူဂှ်ပၠန် လ္ပာ်ကံၚ်ဇြဳပၞာန် ဒၟါနူထပိုတ်ထောံလဝ် လာၚ်ဖုၚ်ကဵု လာၚ်အေန်တာနိတ်လ္ၚဵုတံဂှ်ရ သွက်ဂွံအာတ်အရီုဗၚ်ဂှ် အခက်အခုဲနွံဒၟံၚ်တုဲ မၞိဟ်ကၠုၚ်စိုပ် ရီုဗၚ်တံလေဝ် စဵုကဵုဟွံမွဲ အောန်ကြဳဒၟံၚ်ဂှ် သ္ဂးရ။
အခိၚ်လၟုဟ် ပ္ဍဲကဵုညးပါဲဒဴဘဲပၞာန်တံၚ်ပျံက်တံဂှ် ညးက္တဵုဒှ်ယဲဇွဟ်ဂစေံကဵု ယဲဇွဟ်ချာံ ဗက်ရာသဳတံ ဟွံအောန်နူကဵု (၂၀) တၠ မၞုံဒၟံၚ်တုဲ သွက်ညးတံ ဒးဆေၚ်ဒၟံၚ်မုက်ကဵု ပြသၞာဂဥုဲဇဗ ဟွံရုမ်ဂပ်တံရ။
ပ္ဍဲကဵုညးဒေသတံၚ်ပျံက်ဂှ် ဗွဲကြဴဒပ်ပၞာန်သီအဝဵုတုဲ ဟိုတ်နူပေါဲဗ္တိုက်ၜါလ္ပာ် ဒပ်ကံၚ်ဇြဳပၞာန်ကဵု ဒပ်စဵုဒၞါဒေသတံဂှ်ရ ညးဍုၚ်ကွာန်ဒေသ ဗဒါဲ (၆၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ်တုဲ ဒဵုကဵုအခိၚ်လၟုဟ် ကလေၚ်စဴဌာန်ဒၟံၚ်ဟွံမာန်ဏီရ။
ပရိုၚ်−သြၚ်လောန်တိုၚ်(မ်)