ရေဝ်၊ အဝ်ဂါတ် (၁၄)
ပ္ဍဲပွိုၚ်ဍုၚ်ရေဝ်၊ တွဵုရးဍုၚ်မန်ဂှ် ဗွဲကြဴဒပ်သၟဝ်တဲကံၚ်ဇြဳပၞာန်တံကဵု ရုၚ်နူဌာနမဆေၚ်စပ်တံ ဒးဒုၚ်ဗ္တိုက်ပန်ပှော် မွဲဏှမွဲဏှတုဲ ကံၚ်ဇြဳပၞာန်တံ ပဠေဝ်ပဠေတ်ဒၟံၚ် သွက်ဂွံထ္ပက်ကရောၚ်ပၞာန် ဒၞါဲ PDF တံ မၞုံမာန်ရောၚ်ဂှ် ညးမၞုံတာလျိုၚ် ဂကောံဒပ်စဵုဒၞါညးဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ဇြဟတ် (၁၀၀) ပြၚ်ဂှ်ဝွံ ပပ္တံနူ ဂိတုအဝ်ဂါတ် (၁၁) တေံတုဲ သွက်ဂွံလုပ်စိုပ်ချဳဒရာၚ်ဂှ် ကေတ်လဝ်ဒၞါဲ ပ္ဍဲကဵုကွာန် တၞေၚ်တၟအ်၊ တၟံကၞေၚ်၊ (လိမ္မော်ခြံ)၊ (အောၚ်သပြေ)၊ ( ရွာသာအေး)၊ (ပိန္နဲတော) မပါလုပ် သီုကဵုကွာန်ဗဒါဲဂၠံၚ်ကာ ရေဝ်−ဇြပ်ဗုတံဂှ်ရ။
ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ရေဝ် ဗိုလ်ယာန်နာၚ်တံဂှ် ဒဒှ်ရ ဒပ်ကံၚ်ဇြဳပၞာန် ပဠေဝ်ပဠေတ်ဒၟံၚ် သွက်ဂွံထ္ပက်ကရောၚ်ပၞာန်ဂှ် ဂွံလဝ်ပရိုၚ်တုဲ မၚ်ကျောဝ်ဒၟံၚ် အကာဲအရာတံရောၚ်ဂှ် ဟီုရ။
သ္အာၚ်နူဂှ်ပၠန် နကဵုညးဍုၚ်ကွာန်ဒေသတံ ဟွံဒေါအ်ဟွံဂွံ သွက်ဂွံဒ္ဂေတ်ဗက်ကဵု တၚ်လလောၚ်တြး ဂကောံဒပ်စဵုဒၞါညးဍုၚ်ကွာန်ဒေသတံ မလလောၚ်ပ္တိတ်လဝ်တံဂှ် ကဵု ညံၚ်ဂွိုအ်ဒးဒုၚ်ရပ် နဒဒှ်ဇွောံစဵုဒၞါပၞာန်တံဂှ် သွက်ဂွံဒစးဒုၚ်ပဠေဝ်ပဠေတ်လဝ်အိုတ်ဂှ် ညးဖ္တိုက်ဖ္အောဝ်လဝ်ရ။
ဒၟါနူဒပ်ကံၚ်ဇြဳပၞာန်တံ ပဠေဝ်ပဠေတ်ဒၟံၚ် သွက်ဂွံထ္ပက်ပၞာန် ပ္ဍဲကဵုကွာန် နူပွိုၚ်ဍုၚ်ရေဝ်တံဂှ်ရ ပေါဲဗ္တိုက်ၜါလ္ပာ် က္တဵုဒှ်ကၠုၚ်ဂှ် ဒှ်ဓဝိၚ်ဂွိၚ်ဂွါဲစံၚ်တူ ဒၟံၚ်အိုတ်ရ။
ပ္ဍဲပွိုၚ်ဍုၚ်ရေဝ်ဂှ် တုဲကၠုၚ်ဂိတုအဝ်ဂါတ် စၟတ်တ္ၚဲ (၃) တေံ ဂကောံလကိုဟ်ဍုၚ်ရေဝ်(ရေးဘီလူး) တံ ကၠုၚ်စိုပ်ပန်ပှော်လဝ် ရုၚ် (လဝက) သၟဝ်တဲကံၚ်ဇြဳပၞာန်တံဂှ်ရ သီုကဵုဒုသ္ကိုပ်(လဝက) ပွိုၚ်ဍုၚ် မပါလုပ် ပိတၠချိုတ်အာတုဲ မွဲတၠ ဂွံလဝ်ဝပ် သ္ကာတ်မြဟ်ရ။
အခိၚ်လၟုဟ်ဂှ် ကံၚ်ဇြဳပၞာန်ဝွံ အပ္ဍဲဍုၚ်ရေဝ်ဂှ် ပတေၚ်ဂြတ်လဝ် ပရေၚ်ဂီုကၠီုတုဲ ပ္ဍဲဂၠံၚ်ဇၞော် ရုၚ်ဌာနမဆေၚ်စပ်တံ မၞုံတံဂှ်လေဝ် ကၟာတ်ဂဒဵုလဝ် အခေါၚ်တတ်ကၠောံအာကၠုၚ်တံရ။
ပရိုၚ်−သြၚ်လောန်တိုၚ်(မ်)