ပေကျေန်၊ အဝ်ဂါတ် (၁၅)
အပ္ဍဲဂိတုနဝ်ဝေမ်ဗာဏံ သမ္မတကြုက် ယှဳကျေန်ဖျေန် သွက်ဂွံအာစိုပ် ဍုၚ်အာယှဒိုဟ်အဂၞဲတံ နွံတုဲ ကောံဓရီု သ္ဂောံဆဵုဂဗအာ ကဵုသမ္မတ ဂျဵုဗိုၚ်ဒေန်လေဝ် ပါလုပ်ဂှ် သၟိၚ်တၠအဝဵုကြုက်တံ ဟီုဂးလဝ်ရောၚ် Wall Street Journal ဒုၚ်လဝ်စဳရေၚ်ရ။
ဟိုတ်နူပရေၚ်ထာဲဝါန်၊ ပရေၚ်သၠာဲဂတးဗၞိက် ကေုာံ ကိစ္စတၞဟ်သ္အာၚ်တံတုဲ အကာဲအရာမကြံၚ်မ္ၚိုဟ်တံ မၞုံဒၟံၚ်ဂှ် ညံၚ်ဂွံအောန်စှ်ေ သက်သာအာတုဲ ကောံဓရီုဆဵုဂဗအလဵုမၞိဟ် မကၠောန်ဗဒှ်အာ အကြာက္ဍိုပ်သ္ကိုပ်ၜါတၠဂှ် နကဵုဂကောံမေဿတာဗိုၚ်ဒေန် သ္ပဒတန်လဝ် ဟွံမွဲဏီရ။
ညးမစုက်လုက်ကဵု ကိစ္စဏံမွဲတၠဂှ် ဗိုၚ်ဒေန်ဝွံ မ္ၚးနူကောံဓရီု G-20 ပ္ဍဲဍုၚ်အေန်ဒိုဝ်နဳယှာ ဂိတုနဝ်ဝေမ်ဗာဂှ် သွက်ဂွံဆဵုဂဗညးသ္ကအ်ဂှ်လေဝ် ပံက်လဝ်ဂၠံၚ်တုဲ နကဵုသ္ၚိဗု စပ်ကဵုကိစ္စဏံတုဲ ဗက်ရေၚ်တၠုၚ်ဒၟံၚ်ရောၚ် ဟီုဂးလဝ်ရ။
“ပ္ဍဲကဵုပိုယ်တံ အခိၚ် ကေုာံ ဒၞါဲ တၚ်နၚ်သောဲသောဲဗြဲဗြဲသာ်ဏံ ဟွံမွဲဏီပုဟ်” သာ်ဝွံ သၞာဲဒဴအမေရိကာန် မွဲတၠ ဟီုဂးလဝ်ရ။
ပ္ဍဲဂိတုဂျူလာၚ်ကြပ်အိုတ်တေံ အကြာက္ဍိုပ်သ္ကိုပ်ၜါတၠ မဆက်စၠောံဟီုဂးလဝ် ကဵုဖုၚ်ဂှ် တၠုၚ်လအာသွက်ဂွံဆဵုဂဗ အလဵုမၞိဟ်ဂှ်လေဝ် သ္ပဒတန်လဝ်မာန်တုဲယျဂှ် မေဿတာ ကာမ်ဗဴ(လ်) ညးမရေၚ်တၠုၚ် ကေၚ်ကာအေန်ဒိုဝ်−ပသိဖေတ်(ခ်) ဂှ် ဟီုဂးလဝ်ရ။
မေဿတာ ကာမ်ဗဴ(လ်) သွက်ဂွံလလောၚ်ပ္တိတ်ဂှ် တၚ်နၚ်ဗွဲလစှ်ေ ဟွံမွဲလဝ်ကီုလေဝ် က္ဍိုပ်သ္ကိုပ်သီုၜါတၠဂှ်ဝွံ သွက်ဂွံတိုန်စိုပ် ကောံဓရီု G-20 မကၠောန်ဗဒှ်အာ ပ္ဍဲဗာလဳ အပ္ဍဲဂိတုနဝ်ဝေမ်ဗာဏံဂှ် စၟဳစလဝ်ရောၚ် ဟီုဂးလဝ်ကဵု ဌာန်ပရိုၚ် Guardian ရ။
အပ္ဍဲပရေၚ်ဆဵုဂဗ ပ္ဍဲဂိတုဂျူလာၚ် (၂၈) တုဲကၠုၚ်တေံ လလအ်ပွိုၚ် (၂) နာဍဳပြၚ် အကြာမေဿတာယှဳ ကဵု မေဿတာဗိုၚ်ဒေန် သီုကဵုမပါလုပ် ပရေၚ်ထာဲဝါန် ကေုာံ ဂလာန်သ္ကာတ်တ်မြဟ်ဟ်တံဂှ် သွက်ဂွံဆဵုဂဗညးသ္ကအ် နအလဵုမၞိဟ်မာန် သဳကၠဳဟီုဂးကၠုၚ်လဝ်ဂှ် ဂွံတီကေတ်ရ။
လ္တူထာဲဝါန် ကြုက်မဂၠါဲကၠုၚ်သၞဂှ် နကဵုကၟိန်ဍုၚ်ပံၚ်ကောံအမေရိကာန် ဍုၚ်တ္ကအ်ဏံ ညံၚ်ဂွံဂေတ်ဂြိပ် ဗွဲမစှ်ေကဵုသၞောတ်ဒဳမဝ်ကရေဇြဳမာန်ဂှ်ကဵု သွက်အခေါၚ်အရာ စပ်ကဵုအခေါၚ်အာကၠုၚ် ဂၠံၚ်ကျာ၊ ဂၠံၚ်ဍာ်တံ ဂွံချိုတ်ပၠိုတ်ဂှ်တုဲ အခန်ကဏ္ဍပရေၚ်သၠာဲဂတးဗၞိက်တံဂှ် သၠုၚ်ပ္တိုန်ထံက်ပၚ်အာရောၚ် ဂွံတီကေတ်ရ။
အပ္ဍဲကၠုၚ်စိုပ်ခြာဟွံလအ်ဏံ အခိၚ်ကောန်ဒပ်အမေရိကာန်တံ မပြံၚ်ကၠောအ်ကၠုၚ်ဒၟံၚ် ကလိုဟ်ၜဳထာဲဝါန်ဂှ် အပ္ဍဲမွဲၜါတ္ၚဲ ထ္မံက်ပ္တိတ်အာ အစဳဇန်ပရေၚ်သၠာဲဂတးဗၞိက်တၟိတံရောၚ် မေဿတာကာမ်ဗဴ(လ်) ဟီုဂးလဝ်ရ။
သ္ပဟိုတ်ကဵု လၟေၚ်တရဴနာန်ဇြဳပဳလဝ်ဇြဳဂှ်တုဲ သ္ဇိုၚ်ဒၟံၚ်ဍုၚ်တ္ကအ် မဟွံပြံၚ်လှာဲ မၞုံတန်တဴဒၟံၚ်ဂှ် ကြုက်ဝွံ သွက်ဂွံပြံၚ်လှာဲကၠေံဂှ် ဂ္စါန်ဒၟံၚ်ရောၚ် ဟီုဂးလဝ်ကဵု အ္စာပရိုၚ်တံရ။
Ref: The Straits Time