လ္ဂုၚ်၊ အဝ်ဂါတ် (၁၇)
ပ္ဍဲသၞေဟ်က္ၜၚ် (သီလဝါ) လ္ဂုၚ်ဂှ် ၜိုန်ရက္ၜၚ်ဖ္ဍိုက်ကၠေၚ်စက်တံ လုပ်စိုပ်ဒၟံၚ်ကီုလေဝ် ဟိုတ်နူသၞောတ်ဒးပရအ်ကဵုအရၚ် ကံၚ်ဇြဳပၞာန်တံဂှ်ရ သ္ဂောံဂွံကၠေၚ် လအ်လဒၟံၚ်ဂှ် တၠကမၠောန်ပရေၚ်သွံရာန်ကၠေၚ်စက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အလုံမွဲကၟိန်ဍုၚ်ဂှ် ပပ္တံနူဂိတုအဝ်ဂါတ် (၁၁) တေံတုဲ ဟိုတ်ဒၟါနူ ပရေၚ်ထိၚ်ဒက်သြန်ဒဝ်ဠာ ကဵု သၞောတ်ဒးပရအ်ကဵုအရၚ်တံဂှ်ရ ဒးဆေၚ်ဒၟံၚ်မုက်ကဵု ပြသၞာကၠေၚ်စက်ပိုတ်အိုတ်တုဲ ညးဍုၚ်ကွာန် ဗွဲမဂၠိုၚ်တံလေဝ် သွက်ဂွံဂွံကၠေၚ်ဂှ် ဖအိုတ်အခိၚ်တုဲ ဒးမၚ်ရာန်ဒၟံၚ်အိုတ်ရ။
ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန်ဂှ် က္ၜၚ်ဖ္ဍိုက်ကၠေၚ်စက်တံဝွံ ပ္ဍဲဂိတုအဝ်ဂါတ် (၁၄) ကဵု (၁၅) တံဂှ် လုပ်စိုပ်ကၠုၚ် သၞေဟ်က္ၜၚ်(သီလဝါ) လ္ဂုၚ်ဂှ်တုဲ ဖျေံကဵုဒၟံၚ်ကၠေၚ် ဗဒါဲ (၁၃) ဂါလာန်ပြၚ်ရောၚ် ဟီုဂးလဝ်ရ။
စပ်ကဵုဂလာန်ကံၚ်ဇြဳပၞာန် ဟီုဂးလဝ်တုဲ တၠကမၠောန်ပရေၚ်သွံရာန်ကၠေၚ်စက်မွဲတၠဂှ် လ္ပာ်ကံၚ်ဇြဳပၞာန် ပ္ဍဲအရာမဖျေံကဵုကၠေၚ်ဂှ် ဟိုတ်နူရေၚ်တၠုၚ်ဒၟံၚ် နကဵုသၞောတ်ကဵုက္ဍိုပ် နေဗျဳဒဝ်၊ လ္ဂုၚ်၊ မာန္တလေဝ် တံသၟးဂှ်ရ ပ္ဍဲကဵုရးဒေသ ကေုာံ တွဵုရးလ္ၚဵုတံ သ္ဂောံကလိဂွံကၠေၚ်ဂှ် ဒးဂဗဒၟံၚ် အခက်ရောၚ် သာ်ဝွံ ဟီုတဴရ။
“(သီလဝါ) ဂှ် ဒးတြးအလုံကၟိန်ဍုၚ်ဗၟာတုဲ လၟုဟ်ဂှ်တှ်ေ ပိုတ်မံၚ် မွဲတွဵုရး၊ ၜါတွဵုရးဓဝ် ဟွံသေၚ်၊ ဒှ်ဒၟံၚ် အလုံကၟိန်ဍုၚ်တုဲ ဍေံတံဂှ် ဒးကဵုဒၟံၚ် ကဵုအလန်ဟီုတှ်ေ မွဲမွဲတ္ၚဲ ကွဳစက်ဂၠိုၚ်ကဵုလ္ၚီ နဒဒှ်မကဵုက္ဍိုပ် ဍုၚ်လ္ဂုၚ်၊ မာန္တလေဝ်၊ နေဗျဳဒဝ် ပိရးဏံဓဝ်တုဲ တွဵုရး ကေုာံ ရးဒေသ မသှ်ေဒၟံၚ်တံဂှ် ကဆံၚ်ဒုတိယ သာ်ဏံဏောၚ်ဟီုတှ်ေ ဟွံပြေပြံၚ် လောဲလောဲပုဟ်၊ ဂေတ်ဟွံကၠောံဏီပုဟ်၊ ဒှ်ဒၟံၚ် သာ်ဏံရ” သာ်ဝွံ ညးသ္ဂးရ။
ဆ္ဂး ကမ္မတဳဗဟဵု ပရေၚ်သွံရာန်ဗၞိက် ကေုာံ ကပေါတ်ဗၞိက်ဂေတ်ဂြိပ် ဂွံမြက်ဇက်ဍာံစၟတ် နူသၟဝ်ကံၚ်ဇြဳပၞာန်ဂှ်တှ်ေ ကၠေၚ်စက်တံဂှ် နူကဵုကမ္မတဳပရေၚ်ကောပ်ကာဲကမၠောန် ပၠောပ်ကြိုၚ်သွံတြးကၠေၚ်စက်ဂှ်မွဲကဆံၚ် ဒဵုကဵုဂိတုအဝ်ဂါတ်အိုတ် ရုမ်မ်ဂပ်ပ် ဍိုက်က်ပေၚ်ၚ် ပၠောပ်ပ္တိုန်သွံတြးလဝ်တုဲဂှ်လေဝ် လလောၚ်ပ္တိတ်လဝ်ရ။
ဟိုတ်ဂှ်ရ ဆေၚ်သွံကၠေၚ်စက်တံ ယဝ်ရဒေါအ်ဒေၚ်လဝ် ပရေၚ်သွံတံ၊ သွံကဵုဒၟံၚ် ကဵုအပိုၚ်အခြာတံဂှ် ဆဵုဒးမ္ဂး အာတေၚ်ကဵု ရးဒေသ ကေုာံ တွဵုရးမဆေၚ်စပ်တံမာန်ရောၚ် လလောၚ်တြးလဝ်ရ။
ညးဒုၚ်တာလျိုၚ် ဆေၚ်သွံကၠေၚ်စက်မွဲတၠဂှ်လေဝ် လ္ပာ်ကံၚ်ဇြဳပၞာန် ၜိုန်ရဟီုဂးဒၟံၚ် သွံကဵုဒၟံၚ်ကၠေၚ်စက် ရုမ်မ်ဂပ်ပ်ကီုလေဝ် ပ္ဍဲကဵုဆေၚ်ကၠေၚ်တံဂှ် ကၠေၚ်သွက်ဂွံသွံ ဟွံမွဲဂှ်ရ ဒးဆေၚ်ဒၟံၚ်မုက်ကဵု ပွပိုတ်အိုတ်တံရောၚ်ဂှ် ဟီုလဝ်ရ။
“ပ္ဍဲဆေၚ်တံဂှ် လၟုဟ် ၜိုတ်ကၠေၚ်လုပ် သွံကဵုဒၟံၚ်ရ၊ ကၠေၚ်နွံမံၚ်ဖိုဟ် ဆေၚ်ဟွံသွံကဵုတံဂှ်တှ်ေ ဒးဒုၚ်ကေတ်အရေဝ်တွဵုရ၊ နူဌာနမဆေၚ်စပ်တံ လုပ်စၟဳစၟတ်ဒၟံၚ်လၟိုန်ရ၊ ဆ္ဂး ကၠေၚ်နွံတုဲ ဆေၚ်ဟွံသွံကဵုတံဂှ်ရ ဒးဒုၚ်ကေတ်အရေဝ်ရောၚ်၊ အခိၚ်လၟုဟ် ပိုတ်ဒၟံၚ်ဂှ် ဍာံဍာံဂှ် ပ္ဍဲဆေၚ်တံ ကၠေၚ်ဟွံမွဲတုဲ ပိုတ်ဒၟံၚ်ဏောၚ်၊ ကၠေၚ်လုပ်တှ်ေ ဇၟာပ်ပ်ဆေၚ် သွံတွဵုရ၊ ကၠေၚ်နွံတုဲ ဆေၚ်ဟွံသွံဂှ် ဟွံမွဲပုဟ်” သာ်ဝွံ ညးသ္ဂးရ။
ကၟိန်ဍုၚ်ဗၟာဝွံ တၚ်နွံပၟိက်ကၠေၚ်စက် ၜိုတ် (၁၀) တၟံကၠံဟေၚ် ကၠောန်ပ္တိတ်နူကဵုအပ္ဍဲကၟိန်ဍုၚ်မာန်တုဲ သှ်ေ ဗဒါဲ (၉၀) တၟံကၠံဂှ် ပၠောပ်ဒၟံၚ် နူဍုၚ်မ္ၚးတံတုဲ ဒးရပ်စပ်စကာဒၟံၚ်ရ။
ၚုဟ်ကၠေၚ်စက်တံဝွံ စနူဂိတုအဝ်ဂါတ် (၁၀) ဒဵုစိုပ်တ္ၚဲဏံဂှ် ၚုဟ်ထ္ပက်တိုန်ကၠုၚ် အဆက်က်တုဲ အခိၚ်လၟုဟ်ဂှ်လေဝ် ကၠေၚ်ဓာတ် အံက်တုၚ် ၉၂ မွဲလဳတာဂှ် စဵုကဵု (၂၄၀၀) ဒ္ကေဝ်ပြၚ် ၚုဟ်ဆက်သၠုၚ်တိုန်ကၠုၚ်ရ။
ဆ္ဂး နကဵုညးဍုၚ်ကွာန်တံ ပ္ဍဲကဵုဆေၚ်ကၠေၚ်စက်တံဂှ် မ္ၚးနူရာန်ကၠေၚ်စက် ၜိုတ်နွံပၟိက် ဟွံဂွံဂှ် သီုကဵုၚုဟ်တိုန်ဒၟံၚ် ကဵုဆဂှ်ရ ဒးဒုၚ်စသိုၚ်ဒၟံၚ် ပြသၞာကၠေၚ်စက်တံ ဇၞော်ကဵုဇြဟတ်ရ။
ပရိုၚ်−သြၚ်လောန်တိုၚ်(မ်)