မတ်မလီု၊ အဝ်ဂါတ် (၁၇)
ဟိုတ်နူကံၚ်ဇြဳပၞာန် ကၞာတ်ဂစိုတ်လဝ် မူဝါဒသြန်သၠုဲတံဂှ်တုဲ မွဲကရောံကဵု ၚုဟ်ဒဝ်ဠာတံဂှ် ၚုဟ်သြန်ၝာတ်သေံလေဝ် သၠုၚ်တိုန်ကၠုၚ်ဒၟံၚ် ကဵုဆဂှ်ရ ကမၠောန်ပရေၚ်သွံရာန်ဗၞိက် သေံ−ဗၟာ ၜါကၟိန်ဍုၚ် ဗွဲမဂၠိုၚ် ဒေါအ်ဇူလဝ်ဂှ် သၟာဗၞိက်ပယျဵုတံ ဟီုရ။
သြန်သေံဝွံ အပ္ဍဲဂိတုအဝ်ဂါတ် သတ္တာဟဒုတိယဂှ် မွဲၝာတ် ၚုဟ်သၠုၚ်တိုန်ကၠုၚ် စဵုကဵု သြန်ဒ္ကေဝ်ဗၟာ (၈၀) ပြၚ်တုဲ ကမၠောန်ပရေၚ်သွံရာန်ဗၞိက်ပယျဵု ဗွဲမဂၠိုၚ် ဒေါအ်ဇူကၠုၚ်အိုတ်ရ။
အခိၚ်လၟုဟ်ဂှ် ဟိုတ်နူသြန်ၝာတ်သေံ သၠုၚ်တိုန်ကၠုၚ် ကဵုဆဂှ်ရ ကမၠောန်ပရေၚ်သွံရာန်ဗၞိက်ဗွဲမဂၠိုၚ် ဒေါအ်ဇူလဝ်တုဲ မၚ်ရံၚ်ဒၟံၚ် အကာဲအရာတံရောၚ်ဂှ် သၟာဗၞိက်ပယျဵု မွဲတၠ ဟီုရ။
“အခိၚ်လၟုဟ်ဂှ် ဇူထောံအိုတ်ယျ၊ သၟာဗၞိက်ဗွဲမဂၠိုၚ်လေဝ် ဇူထောံယျ၊ တၠကမၠောန် ဟွံဒေါအ်ဟွံဂွံ ဒးသွံတံလေဝ် ရံၚ်ဒၟံၚ် အကာဲအရာအိုတ်ရ” ဂှ် သ္ဂးရ။
အခိၚ်လၟုဟ်ဂှ် ဒၟါနူၚုဟ်သြန်ၝာတ်သေံတုဲ ပရေၚ်ပၠောပ်ပ္တိုန် ကပေါတ်ဗၞိက်တံ စှ်ေကၠုၚ်တီတီတုဲ ကပေါတ်ဗၞိက် မပလံၚ်ပ္တိုန်ဒၟံၚ် နူကၟိန်ဍုၚ်ဗၟာတံဂှ်လေဝ် ဒၟါနူတၚ်ကၞာတ်ဂစိုတ် ကံၚ်ဇြဳပၞာန်တံဂှ်တုဲ ပွမပလံၚ်ပ္တိုန်တံ စဵုကဵုဟွံမွဲ အောန်ကြဳဒၟံၚ်ရ။
အတိုၚ်ဂလာန် သၟာဗၞိက်ပယျဵုဂှ်မ္ဂး ၚုဟ်သြန်ၝာတ်သေံဂှ်ဝွံ ဆက်စပ်ဒၟံၚ်ကဵု အကာဲအရာ ပလံၚ်ပ္တိုန် ကပေါတ်ဗၞိက် နူကၟိန်ဍုၚ်ဗၟာ အပ္ဍဲဍုၚ်သေံ လောဲလောဲသွာသွာ ဟွံဂွံတံ အဓိကရဂှ် သ္ဂးရ။
သၟာဗၞိက်မွဲတၠဂှ်လေဝ် ဒၟါနူသြန်ၝာတ်သေံ သၠုၚ်တိုန်ကၠုၚ် ကဵုဆဂှ်ရ ပရေၚ်သွံရာန်ဗၞိက်ပယျဵုဝွံ စိုပ်ကၠုၚ် အကာဲအရာ ပရေံပရေံမွဲမာန်ရောၚ်ဂှ် ဟီုရ။
“ဒၟါနူ သြန်ၝာတ်သေံ တိုန်အာ တၟာဂလိုၚ်ဂှ်ရ ပိုယ်တံ သၟာဗၞိက်လ္ပာ်ဏံတံ ပရေၚ်သွံရာန်ကပေါတ်ဗၞိက် ယအ်စှ်ေအာ ကွေံကွေံရ၊ လၟုဟ်ဂှ် သြန်ၝာတ်သေံ တိုန်ဒၟံၚ်ကွေံကွေံတုဲ ကဵုဇြဟတ်သွံရာန်ပိုယ်တံကဵု အကာဲအရာထပ်ဂွံပရေံကၠုၚ်တံဂှ် ဒးဟီုမ္ဂး ထပ်ပရေံနူဏံဟီုတှ်ေ ပရေၚ်သွံရာန်ဗၞိက် ယအ်စှ်ေအာ တၟာဂလိုၚ်ရောၚ်ဂှ် ညာတ်ဒၟံၚ်ရ” သာ်ဝွံ သၟာဗၞိက်မွဲတၠ ဟီုဂးလဝ်ကဵု သြၚ်လောန်တိုၚ်(မ်) အကာဲအရာလၟုဟ်ရ။
ကၟိန်ဍုၚ်ဗၟာဝွံ နူကဵုပယျဵုမြဝတဳ မွဲကဆံၚ် ပလံၚ်ပ္တိုန်ဒၟံၚ် ပ္ဍဲကၟိန်ဍုၚ်သေံ မပ္တံကဵု သတ်ဂန်၊ကပေါတ်တိတ်နူ ပရေၚ်တဵုလွဳတံတုဲ လ္ပာ်ဍုၚ်သေံဂှ်တှ်ေ ပၠောပ်ပ္တိုန်ဒၟံၚ် ပ္ဍဲကၟိန်ဍုၚ်ဗၟာ ဗၞိက်စၞစသ္ဇိုၚ်တံ၊ ဂဥုဲဇဗ၊ ဗၞိက်ပယျေဝ်၊ ကပေါတ်အရပ်စပ်မၞိဟ်တံကဵု ကပေါတ်ဗၞိက်အပြောံ သွက်ပရေၚ်သိုၚ်ခၞံတံ အဓိကရ။
ဆ္ဂး အကာဲအရာပရေၚ်သွံရာန်ဗၞိက် သေံ−ဗၟာဂှ်ဝွံ ဒၟါနူမူဝါဒသြန်လှုဲ ကံၚ်ဇြဳပၞာန် မပတေၚ်ဓရတ်လဝ်ဂှ်ကဵု တၚ်ကၟာတ်လဒဵု ပရေၚ်သွံရာန်ဗၞိက်တံတုဲ ပရေၚ်သွံရာန်တံ စှ်ေကၠုၚ်ဒၟံၚ် တီတီရ။
ပရိုၚ်−သြၚ်လောန်တိုၚ်(မ်)