ကျာ်မြဟ်၊ အဝ်ဂါတ် (၁၉)
ပ္ဍဲပွိုၚ်ဍုၚ်ကျာ်မြဟ် တွဵုရးဍုၚ်မန် သွက်ကွာန်ဍာ်ဇၞော်ဍာ်ဗၠိုက်တံဂှ် နွံပၟိက်မံၚ်ကဵု အရီုဗၚ် ဍာ်သုၚ်ဍာ်လွပ်တံ ကေုာံ ဂဥုဲဇဗတံ ကာမံက်တိုန်ရောၚ်ဂှ် ဂကောံပရဟိတ မရီုဗၚ်ရေၚ်တၠုၚ်ကဵုဒၟံၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲပွိုၚ်ဍုၚ်ကျာ်မြဟ်ဂှ် စနူဂိတုအဝ်ဂါတ် (၁၅) တေံတုဲ ဗြဲဂူဟွံပိုတ်သ္ကုတ်ဂှ်ရ ဍာ်ၜဳသၠုၚ်တိုန်ကၠုၚ်တုဲ ကွာန်ဗဒါဲဗဒါဲ ၜဳကဍတ်(အတ္တရံ) ဂမၠိုၚ် မပ္တံ ကွာန်( ဦးလေး) ၊ ၜါသွာၚ်၊ ကဍတ်၊ ကြုၚ်ကွေဟ် မပါလုပ် ကွာန် ၜိုတ်(၇) ကွာန်တံဝွံ ဍာ်ကလေၚ်စှ်ေလဝ် ဟွံမွဲတုဲ ဍာ်ဇၞော်ဍာ်ဗၠိုက်ဒၟံၚ်ဖိုဟ်ရ။
ဒၟါနူဍာ်ဇၞော်ဗၠိုက်ဒၟံၚ်ဂှ်ရ ဍာ်ကမၠိုၚ်မၞုံအပ္ဍဲကွာန်တံ ဍာ်ဗၠိုက်ဒၟံၚ်အိုတ်တုဲ ဒးဆေၚ်ဒၟံၚ်မုက်ကဵု အခက်အခုဲဍာ်သုၚ်ဍာ်လွပ်တံဂှ်ကီု၊ ဟိုတ်နူပြသၞာပရေၚ်ဆက်စၠောံအာကၠုၚ်တံတုဲ ဒးဆေၚ်ဒၟံၚ်မုက်ကဵု ဂဥုဲဇဗ ဟွံရုမ်ဂပ်တံ ဇၞော်ကဵုဇြဟတ်ရ။
စပ်ကဵုအကာဲအရာဏံတုဲ ညးတာလျိုၚ် ဂကောံရီုဗၚ်ဟံၚ်ပြာ် မွဲတၠ ဟီုလဝ် ဗီုဏံရ။
“ကွာန်လ္ပာ်တေံဂှ် ဗၠိုက်ဒၟံၚ်ဖိုဟ်ရ၊ လ္ပာ်ကွာန်တံဂှ်တှ်ေ ဍာ်စှ်ေဟွံမာန်ဏီပုဟ်၊ မုဒှ်ရောဟီုမ္ဂး ဍာ်ဗြဲတံဂှ် ဒုၚ်လဝ်တၟာဂလိုၚ်တုဲ စှ်ေဟွံမာန်ဏီရ၊ ဍေံဟွံတုပ်ကဵု အရိုဟ်ဟ်သၞာံပုဟ်၊ အရိုဟ်အလန်တှ်ေ သၟာပရဟိတဟီုဂှ် နူကဵုလ္တူဍုၚ်ပိုယ်တံ သၟးဟွံသေၚ်ပုဟ်၊ ကၠုၚ်နူလဵု နူလဵုတုဲ ကဵုဒၟံၚ်ဒါန် ပရအ်ဒၟံၚ်အိုတ်ရ၊ သၞာံဏံဂှ်တှ်ေ ၝတံဏံဂှ် ဟွံမွဲဏီ၊ နွံပၟိက်ဂှ်တှ်ေ ပြဟ်ဟ်ဏံ သ္ၚိဗၠိုက်ဏောၚ်ဟီုမ္ဂး ဗီုလဵုဂွံဟီုရောတှ်ေ သ္ဂောံဍုန်တိုပ်တံဂှ် ဒှ်ဒဒိုက်၊ ပၟတ်ဟွံမွဲပုဟ်၊ ဍေံဂှ် ဍာ်ၜဳကဍတ်တေံ တိုန်အာမ္ဂး ဍာ်သုၚ်ဍာ်လွပ်တံဂှ် ဒှ်အခက်အခုဲဟဂှ်ရ၊ မူဟိုတ် ဍာ်သုၚ်ဍာ်လွပ် ဂွံဒှ်အခက်အခုဲရောဟီုမ္ဂး ဍာ်ပလိုၚ်တံဂှ် ဗၠိုက်အာအိုတ်၊ ဂဥုဲဇဗဂှ်တှ်ေ တၚ်နွံပၟိက်ဂှ် နွံဏောၚ်၊ မုဒှ်ရောတှ်ေ လ္ပာ်ကွာန်တံဏံဂှ် ရုၚ်ဂဥုဲတံ မုတံ ဟွံမွဲ၊ ၜိုတ်ရုၚ်ဂဥုဲ ဗ္ဒမ်ဂဥုဲရဂှ် ဟွံမွဲပုဟ်” သာ်ဝွံ သ္ဂးရ။
ကွာန်ဍာ်ဗၠိုက်တံဂှ် သၞာံတုဲကၠုၚ်တေံလေဝ် နူကဵုဂကောံရီုဗၚ်ဟံၚ်ပြာ်တံ ကေုာံ ညးဒေသတံ ကၠုၚ်စိုပ်ကဵုလဝ်ဒါန်တံ နွံကီုလေဝ် သၞာံဏံဂှ် မၞိဟ်ကၠုၚ်စိုပ်ကဵုဒါန် စဵုကဵုဟွံမွဲ အောန်ကြဳဒၟံၚ်ရ။
ပ္ဍဲကဵုကွာန် ဍာ်ဇၞော်ဍာ်ဗၠိုက်ဒၟံၚ်တံဂှ် ဒၟါနူပံက်လဝ် ဗ္ဒိုပ်ပရေၚ်ဟံၚ်ပြာ်ယာယဳ ဟွံမွဲဂှ်ရ ညးဍုၚ်ကွာန်ဒးဘဲဍာ်တံဝွံ ဒးအာမံၚ်ဒၟံၚ် ပ္ဍဲကဵုဘာလကျာ်တံ ကဵု သ္ၚိမသကလောကောဒေံ မကြပ်တံဂှ်ရ။
ပ္ဍဲတွဵုရးဍုၚ်မန်ဂှ် ဟိုတ်နူဗြဲဂူဟွံပိုတ်သ္ကုတ်တုဲ ပ္ဍဲကဵုပွိုၚ်ဍုၚ် မတ်မလီု၊ ပံၚ်၊ ၜါသွာၚ်၊ ကျာ်မြဟ် ကေုာံ မုဟ်ဍုၚ်တံ ဒးဒုၚ်လဝ် ဘဲဍာ်ဇၞော်ဍာ်ဗၠိုက်၊ တိဒဵုလာ် ကေုာံ ကျာသ္ကာတ်ပိုက်တံတုဲ အခါလၟုဟ်ဂှ်တှ်ေ ပ္ဍဲပွိုၚ်ဍုၚ်ဗွဲမဂၠိုၚ်ဂှ် ဍာ်ကလေၚ်စှ်ေဒၟံၚ်အိုတ်ရ။
ဒၟါနူဍာ်ဇၞော်ဍာ်ဗၠိုက်၊ တိဒဵုလာ် ကေုာံ ကျာသ္ကာတ်ပိုက်တံတုဲ ဗ္ဒမ်ဂဥုဲပ္ဍဲကွာန်တံ မပါလုပ် သ္ၚိမၞိဟ်ဒၟံၚ် နူအပ္ဍဲတွဵုရးတံ ဟွံအောန်နူကဵု (၃၀) မ မ္ဒးဇီုကပိုက်လီုလာ်လဝ်ရ။
ပရိုၚ်−သြၚ်လောန်တိုၚ်(မ်)