ဇြပ်ဗု၊ အဝ်ဂါတ် (၁၉)
ပ္ဍဲကဵုပွမလုပ်ဗ္တိုက် ဗ္ဒိုပ်ဗၠာဲသၟိၚ်ၝောံဍုၚ် ကံၚ်ဇြဳပၞာန် လဒေါဝ်ဍုၚ်ဇြပ်ဗု တွဵုရးဍုၚ်မန်ဂှ် ဂကောံဒပ်စဵုဒၞါညးဍုၚ်ကွာန် PDF မွဲတၠ ဒးပြဟ်လလုဲအာလဝ်ဂှ် ညးမစုက်လုက်ကဵု ဂကောံဒပ်စဵုဒၞါညးဍုၚ်ကွာန်ဇြပ်ဗု မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ဗၠာဲသၟိၚ်ၝောံဍုၚ် ကံၚ်ဇြဳပၞာန်ဂှ် ပ္ဍဲဂိတုအဝ်ဂါတ် စၟတ်တ္ၚဲ (၁၇) ဗ္တံ ၜိုတ် (၈) နာဍဳဂှ် နူဂကောံဒပ်စဵုဒၞါညးဍုၚ်ကွာန်ဇြပ်ဗု PDF ပန်တၠ ကၠုၚ်စိုပ်နကဵု ကွဳလိုန်ဓာတ် (၂) ဖ္ဍိုက်တုဲ ကၠုၚ်ပန်ပှော်ဗ္တိုက်လဝ် နကဵုဗမ်တဲ မပါလုပ် သီုကဵုသေနာတ်တံရ။
လက္ကရဴဂှ် က္တဵုဒှ်လဝ် ပရေၚ်ပန်ပှော်တုဲ PDF မွဲတၠ ပြဟ်လလုဲ၊ မွဲတၠ ဂွံဝပ်ဇီုကပိုက်နွံတုဲ ဂကောံဒပ်ဗၠာဲသၟိၚ်ကံၚ်ဇြဳပၞာန်တံ ဟွံအောန်နူကဵု (၃) တၠ ဇီုကပိုက်ချိုတ်မာန်ဂှ် ညးဒေသမွဲတၠ ဟီုလဝ်ရ။
ကြဴနူဗ္ဒိုပ်ဗၠာဲသၟိၚ်ၝောံဍုၚ် ဒးဒုၚ်ဗ္တိုက်တုဲ လ္ပာ်ကံၚ်ဇြဳပၞာန်တံ ကၟာတ်ထောံဂၠံၚ်လုပ်တိတ်ဍုၚ်တံ လွာဲဂှ်တုဲ ဂၠိုက်ဂၠါဲစၟဳစၟတ်လဝ်ရောၚ်ဂှ် သ္ဂးလဝ်ရ။
ဂကောံဒပ်ဗၠာဲသၟိၚ် မဂွံဝပ်ဇီုကပိုက်လဝ် ပ္ဍဲပွမဗ္တိုက် ဗ္ဒိုပ်ဗၠာဲသၟိၚ် ၝောံဍုၚ်ဂှ် ကံၚ်ဇြဳပၞာန် ပလံၚ်ဗစိုပ်ကဵုလဝ် ရုၚ်ဂဥုဲ နကဵုကွဳစက်ရီုဗၚ်ဟံၚ်ပြာ်တံတုဲ အကာဲအရာလက္ကရဴအိုတ်ဏံဂှ် ဟွံဂွံတီကေတ်ဏီရ။
ပ္ဍဲပွိုၚ်ဍုၚ်ဇြပ်ဗုဂှ် ဗွဲကြဴဒပ်ပၞာန်သီအဝဵုတုဲ ကုဗ္ဒိုပ်ဗၠာဲသၟိၚ်ကံၚ်ဇြဳပၞာန်တံ မပါလုပ် ရုၚ်ဌာနမဆေၚ်စပ် သၟဝ်တဲကံၚ်ဇြဳပၞာန်တံ ကဵု ရုၚ်သ္ကိုပ်ပရေၚ်အုပ်ဓုပ်တံဂှ် ဂကောံဒပ်စဵုဒၞါညးဍုၚ်ကွာန်တံ ဗ္တိုက်ဗ္တိုဟ်ဒၟံၚ်ဗမ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)