မြဝတဳ၊ အဝ်ဂါတ် (၁၉)
ပ္ဍဲပွိုၚ်ဍုၚ်ကအ်ကြိက် တွဵုရးဍုၚ်မန်ဂှ် ပေါဲဗ္တိုက်အကြာဒပ် BGF သၟဝ်တဲကံၚ်ဇြဳပၞာန်တံ ကဵု ဒပ်ပံၚ်ကောံ KNLA တံ သ္ကာတ်မြဟ်ကၠုၚ်မာန်တုဲ ကံၚ်ဇြဳပၞာန် ကၟာတ်သီထောံ အပိုၚ်အခြာဒေသသွံရာန်ဗၞိက်မြဝတဳ ယာယဳရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်မၚ်ပယျဵု BGF သၟဝ်တဲကံၚ်ဇြဳပၞာန်တံ ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံဝွံ စနူဂိတုအဝ်ဂါတ် (၁၈) လဒေါဝ်တ္ၚဲတုဲဂှ် ပ္ဍဲပွိုၚ်ဍုၚ်ကအ်ကြိက် ဒဵုဒဝ်န ကဵု လ္ပာ် (တောၚ်သုံးလုံး) တံဂှ် ပေါဲဗ္တိုက်တံ သ္ကာတ်မြဟ်ဒၟံၚ်ရ။
ပေါဲဗ္တိုက်ဂှ်ဝွံ ဗွဲကြဴပရိုၚ် ကၠောံထၞာန်ကၠုၚ်မာန် ဒဵုကဵုအပိုၚ်အခြာဒေသသွံရာန်ဗၞိက်မြဝတဳ မဒှ်ဒေသပရေၚ်သွံရာန်ပယျဵု သေံ−ဗၟာၜါဍုၚ် မံက်တိတ်ကၠုၚ်တုဲဂှ် ကံၚ်ဇြဳပၞာန် ကၟာတ်ထောံလဝ် ဒေသပရေၚ်သွံရာန်တံ ယာယဳရ။
ညးဒေသ နူကဵုအပိုၚ်အခြာဒေသသွံရာန်ဗၞိက် မွဲတၠဂှ် ပ္ဍဲလဒေါဝ်တ္ၚဲ ၜိုတ် (၁) နာဍဳဂှ် ကောန်ဂကောံဒပ်ကံၚ်ဇြဳပၞာန်တံ စိုပ်ကၠုၚ်တုဲ ကွဳစက် ကေုာံ အေဂျေန် အပ္ဍဲဒေသပရေၚ်သွံရာန်ဗၞိက်တံဂှ်လေဝ် သွက်ဂွံပါဲထောံ ဗွဲမပြဟ်ဂှ် ကဵုလဝ်သတိဂှ်ရ ညးဂမၠိုၚ် ပြံၚ်ဆုဲအာအိုတ်တုဲ လၟုဟ် ညးမွဲမှ ဟွံမွဲရပုဟ်ဂှ် ဟီုရ။
အခိၚ်လၟုဟ် ပ္ဍဲကဵုအပိုၚ်အခြာဒေသ သွံရာန်ဗၞိက်မြဝတဳဂှ် ကောန်ဂကောံကံၚ်ဇြဳပၞာန်တံကဵု သၞာဲဒဴသၟဝ်တဲလ္ၚဵုတံဟေၚ် သှ်ေဒၟံၚ်ရဂှ် သ္ဂးရ၊ သၟာဗၞိက်တံဂှ်တှ်ေ ဟိုတ်နူဒးကၟာတ်ထောံလဝ် အပိုၚ်အခြာဒေသသွံရာန်ဗၞိက်တံဂှ်ရ ပရေၚ်သၠာဲဗ္တးဗၞိက်ပယျဵုတံ ဒေါအ်ဒေၚ်အာအိုတ်ရဂှ် သ္ဂးရ။
ကၟိန်ဍုၚ်ဗၟာဝွံ နူကဵုပယျဵုမြဝတဳဂှ်မွဲကဆံၚ် ပလံၚ်ပ္တိုန်ဒၟံၚ် ပ္ဍဲဍုၚ်သေံ မပ္တံကဵု သတ်ဂန် မပါလုပ် ကပေါတ်တိတ်နူ ပရေၚ်တဵုလွဳတံတုဲ လ္ပာ်ဍုၚ်သေံတေံဂှ်တှ်ေ ပၠောပ်ပ္တိုန်ဒၟံၚ် အပ္ဍဲကၟိန်ဍုၚ်ဗၟာဂှ် ဗၞိက်စၞစသုၚ်သ္ဇိုၚ်၊ ဂဥုဲဇဗ၊ ဗၞိက်ပယျေဝ်၊ ကပေါတ်အရပ်စပ်မၞိဟ် ကေုာံ ကပေါတ်ဗၞိက်အပြောံ သွက်ပရေၚ်သိုၚ်ခၞံတံရ။
ပရိုၚ်−သြၚ်လောန်တိုၚ်(မ်)