လ္ဂုၚ်၊ အဝ်ဂါတ် (၁၉)
ဇာဇၞိက်ပရေၚ်မၞိဟ် Facebook မၞိဟ်ရပ်စပ်ဂၠိုၚ်အိုတ် ပ္ဍဲကၟိန်ဍုၚ်ဗၟာဂှ် ကၟာတ်တုဲ ထ္ပက်အဇာ သွက်ဂွံခၞံဗဒှ်အာ မဳဒဳယျာဇာဇၞိက်ပရေၚ်မၞိဟ်မွဲဂှ် ဂ္စါန်ဒၟံၚ်ရောၚ် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန် ဟီုဂးလဝ် ပ္ဍဲပေါဲသောၚ်ကလးပရိုၚ် မကၠောန်ဗဒှ်လဝ် ပ္ဍဲဂိတုအဝ်ဂါတ် (၁၇) တေံရ။
ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန်ဂှ် ပ္ဍဲ Facebook ဂှ် ပရေၚ်ဂကူတံ မပါလုပ် သီုကဵု တၚ်နၚ်ပရိုၚ် မဆေၚ်စပ်ကဵု ဒပ်ပၞာန်တံ ဒဒုၚ်ပလှ်ဖျေံဒၟံၚ်ဂှ်ရ သွက်ဂွံခၞံဗဒှ်အာ မဳဒဳယျာဇာဇၞိက်ပရေၚ်မၞိဟ်မွဲဂှ် ဂ္စါန်ဒၟံၚ်ရောၚ် ဟီုဂးကၠုၚ်ရ။
တၠကွတ်နဲပညာ IT မွဲတၠဂှ် နကဵုကံၚ်ဇြဳပၞာန် အခေါၚ်ရပ်စပ်စကာ Facebook ဂှ် ကၟာတ်ဒၞါကၠုၚ်မာန်ဂှ်ရ နကဵုညးဍုၚ်ကွာန်တံ နူစလၟုဟ် စၞး Facebook သွက်ဂွံပြံၚ်လှာဲစကာထောံ မဳဒဳယျာဇာဇၞိက်ပရေၚ်မၞိဟ်မွဲမွဲဂှ် ဖ္တိုက်ဖ္အောဝ်လဝ်ရ။
“Facebook ဂှ် သွက်ကံၚ်ဇြဳပၞာန် အန္တရာယ်နွံဒၟံၚ်ရ၊ ဂၠါဲဒၟံၚ်ပြသၞာ ကဵုဍေံတံ လၟိုန်ရောၚ်၊ ဟိုတ်ဂှ်ရ သွက်ဂွံပသောၚ်ထောံ အရာပြသၞာနွံဒၟံၚ် သွက်ဍေံတံဂှ် တၠုၚ်လအာ နွံရောၚ် အဲချိၚ်ကေတ်ရ၊ နကဵုညးဍုၚ်ကွာန်တံ ပြံၚ်လှာဲထောံ media တၞဟ်ဟ်မွဲမာန်မ္ဂး ခိုဟ်ဂၠိုၚ်ရ၊ ဒစးဒုၚ်တုဲ သုၚ်စောဲလဝ်ထေက်ရောၚ်ဂှ် အဲ ချိၚ်ခယျကေတ်ရ” ဂှ် သ္ဂးရ။
ကံၚ်ဇြဳပၞာန် သီအဝဵုဝွံ အခါလၟုဟ်ဂှ် သွက်ဂွံထ္ပက်အဇာ ဒၞါဲ Facebook ဂှ် ဌာနဝန်ဇၞော်ပိဌာနတံ ပံၚ်တောဲတုဲ ကၠောန်ၜိုတ်ဒၟံၚ် မဳဒဳယျာဇာဇၞိက်ပရေၚ်မၞိဟ်မွဲရ။
ကံၚ်ဇြဳပၞာန်ဝွံ ဗွဲကြဴသီအဝဵုတုဲ ကၟာတ်လဒဵုလဝ် အခေါၚ်ရပ်စပ်စကာ Facebook ပ္ဍဲကၟိန်ဍုၚ်ဗၟာတုဲ ညးဍုၚ်ကွာန်တံဂှ် ဒုၚ် VPN တံ မွဲကဆံၚ်တုဲ စကာရပ်စပ်ဒၟံၚ်ရ။
ညးဍုၚ်ကွာန်မွဲတၠဂှ်လေဝ် ကံၚ်ဇြဳပၞာန် ကၟာတ်ဂဒဵုကၠုၚ် အခေါၚ်ရပ်စပ် Facebook မ္ဂး နကဵုညးဍုၚ်ကွာန်တံ ဗီုဂွံဂှ် သုၚ်စောဲကၠုၚ်မာန်ရောၚ် ဟီုရ။
“နဲကဲ ဒံၚ်ကေတ်ကၠောံကေတ်တံဂှ် မံက်ကၠုၚ်တွဵုဏောၚ်၊ နကဵုဂၠံၚ်ဍာန်တံဏံရ သုၚ်စောဲကၠုၚ် Facebook မာန်ဂှ် ထေၚ်ကေတ်ရ” သာ်ဝွံ သ္ဂးရ။
အတိုၚ်ဂလာန် တၠပညာ IT တံဂှ်မ္ဂး ကံၚ်ဇြဳပၞာန်ဝွံ မဳဒဳယျာဇာဇၞိက်ပရေၚ်မၞိဟ်ဍေံတံ မခၞံဗဒှ်ဒၟံၚ်ဂှ် မံက်တိတ်ကၠုၚ်မ္ဂး ကုညးမရပ်စပ်စကာ Facebook ကၟိန်ဍုၚ်ဗၟာတံဂှ် ကေတ်အရေဝ်ရပ်ဒက်ကၠုၚ်မာန်တုဲ သွက်ဂွံစကာ ဇာဇၞိက်ပရေၚ်မၞိဟ် မဳဒဳယျာဍေံတံ မခၞံဗဒှ်လဝ် ဟွံဒေါအ်ဟွံဂွံဂှ် စၞောန်ကၠုၚ်မာန်ရောၚ် ရဴဝွံ သ္ဂးတဴအိုတ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ နူကဵု Facebook ဂှ် ပွမချူဆာဲပါ်ပါဲ ပြဝဍေံတံဂှ်ကီု၊ ကုညးထံက်ဂလာန် အလဵုအသဳညဳသၟဟ်ဂကူ ကဵု ဒပ်စဵုဒၞါညးဍုၚ်ကွာန်တံဂှ် ပွမဗက်ဒၞါဲဇိုၚ်ရပ်ဒက်တံလေဝ် ကၠောန်ၜိုတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)