သေဌဳဇၞော် ကောန်ဍုၚ်ကြုက်−ကနေဒါ ယှံၚ်ဂျာန်ဟွာ အဆက်အဆောံမၞုံဒၟံၚ်ကဵု ဗော်ကောန်မျူနေတ်ကြုက်ဂှ် ရုၚ်သၞောဝ်ဓဝ် ယှာန်ဟိုၚ် ဖျေံဒဏ်ထံၚ် (၁၃) သၞာံ

ဗေကျေန်၊ အဝ်ဂါတ် (၂၁)

ရုၚ်သၞောဝ်ဓဝ် ယှာန်ဟိုၚ် ဖျေံလဝ်ဒဏ်ထံၚ် (၁၃) သၞာံ ကုယှံၚ်ဂျာန်ဟွာ ဗဳလျာန်နာ ကြုက်−ကနေဒါဂှ်တုဲ ကမ္ပဏဳညး Tomorrow Holding  သွက်ဂွံဒးကဵု ဒဏ်သြန် (၅၅.၀၃) ဗဳလျာန် ယောန် (Yuan) ဂှ် တုဲကၠုၚ်တ္ၚဲသိုက်တေံ ဖျေံလဝ်အမိၚ်ရ။

Xiao  ကေုာံ ကမ္ပဏဳ Tomorrow Holding ဂှ် ပွမသီကေတ် သြန်ညးဂမၠိုၚ် မအပ်လဝ်တံ ဟွံဗဗွဲဓဝ်ဂှ်ကီု၊ ပွမရပ်စပ်စကာ သြန်ဘဏ္ဍာ ဟွံဗဗွဲဓဝ်ဂှ်ကဵု ပွမစလာဘ်ဗဇဴတံဂှ်ရ ဒဒှ်ရစောဲစပ်လဝ်အမှုဂှ် ရုၚ်သၞောဝ်ဓဝ် Shanghai First Intermediate ဟီုဂးလဝ်ရ။

ညးတံ ဒုၚ်လဝ်ဝန် ဒုဟ်ဒဏ်ဂှ်တုဲ ပ္ဍဲကဵုကလေၚ်ရေၚ်တၠုၚ် သွက်ဂွံကလိဂွံ သြန်ပရဲ မဟွံလုပ်သၞောဝ်တံဂှ်ကဵု သွက်ပွမဒးဆောံလေၚ်တံဂှ် ဟိုတ်နူပံၚ်တောဲရေၚ်တၠုၚ်ကဵုလဝ်ဂှ်ရ ဒုဟ်ဒဏ်သက်သာအာလဝ်ရောၚ် သ္ဂးရ။

Xiao နူဇာတိဍုၚ်ကြုက် အဆက်အဆောံမၞုံကဵု ဗော်ကောန်မျူနေတ် ကဆံၚ်လ္တူတံဂှ် ဒဒှ်ရတိတ်ကၠုၚ်လဝ် နူကဵုဟဝ်တေဝ်ဟံၚ်ကံၚ်ခိုဟ်ဟ်မွဲ နကဵုက္ၜဳဓရိုဟ်ဂှ် ဂွံဆဵုကေတ်လဝ် လက္ကရဴအိုတ်ရောၚ် ညးမစုက်လုက်ကဵု သေဌဳဇၞော်ဂှ် ဟီုကဵု Reuters ရ။

Xiao ကေုာံ Tomorrow တံဝွံ “ပွမဖံက်ပ္ကဝ် အမိၚ်ကောပ်ကာဲရေၚ်တၠုၚ်ဘဏ္ဍာ သ္ကာတ်တ်မြဟ်ဟ်တံ” ကေုာံ “ ကဵုဇီုကပိုက်ကၠေံ ဂီုကၠီုပရေၚ်ဘဏ္ဍာကၟိန်ဍုၚ်” တံဂှ် ရုၚ်သၞောဝ်ဓဝ် ဟီုဂးလဝ်တုဲ သွက်ဒုဟ်ဒဏ်ဂမၠိုၚ်ဂှ် မ္ၚးနူဒဏ်ထံၚ် ဖျေံလဝ် သီုဒဏ်သြန် (၆.၅) ပြကောတိကိုဋ် ယောန် ကုသေဌဳဇၞော်ဂှ်ရ။

ပ္ဍဲကဵုပေါဲသောၚ်ကလးပရိုၚ် မကၠောန်ဗဒှ်လဝ် ပ္ဍဲတ္ၚဲသိုက်ဂှ် စပ်ကဵုအခေါၚ်လုပ်စိုပ် ဝန်ကဵုအရီုဗၚ် (ကောၚ်စစ်ဝန်) Xiao ကြုက်−ကနေဒါဂှ်တုဲ ကာလသၟာန်သၟုက် ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ကြုက် ဝန်ဝဳဗောန်ဂှ် Xiao ဝွံ အတိုၚ်ဥပဒေကြုက်မ္ဂး ကောန်ဍုၚ်ၜါဍုၚ်ဂှ် ဟွံသ္ပစၟတ်သမ္တီတုဲ အခေါၚ်အဝဵု သာ်ဏံတံ ဂွံဟွံထေက်ပုဟ်ဂှ် ဟီုလဝ်ရ။

ဌာနဝန်ဇၞော်ကာဍုၚ်သ္အာၚ်ကနေဒါဂှ် တီလဝ် တၚ်သ္ဂုတ်သွာတ်ဂှ်တုဲ ညးမၞုံတာလျိုၚ်တံ မၚ်ရံၚ်ဒၟံၚ်ဂဗုတ်ဏံဂှ်တုဲ ကဵုအာပရိုၚ် သွက်အခေါၚ်လုပ်စိုပ် ဝန်အရီုဗၚ်တံရောၚ် ဌာနဝန်ဇၞော်ကာဍုၚ်သ္အာၚ်ကနေဒါ ဟီုဂးလဝ်ရ။

Ref: Reuters