တၞၚ်သဳ၊ ဨပရဴ ၁၂
ပ္ဍဲရးတၞၚ်သဳ ပွိုၚ်ဍုၚ်တၞၚ်သဳ ဗ္ဒါဲကွာန်တုၚ်ဃောန် ပ္ဍဲဂၠံၚ်တၞၚ်သဳ−မဝ်ဒံၚ်ဂှ် ပ္ဍဲဂိတုဨပရဴ ၁၀ တေံ ပေါဲဗ္တိုက်ဒှ်လဝ်တုဲ ကောန်ဒပ်ကံၚ်ဇြဳပၞာန် ၅ တၠ ချိုတ်တုဲ သီဂွံလဝ်လွဟ်လက်နက်ဂမၠိုၚ်ရောၚ် ညးတာလျိုၚ် ပကဖ ခရိုၚ်ဗိက် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် အခိၚ်လဒေါဝ်တ္ၚဲ ၜိုတ် ၁၂ နာဍဳဂှ် ဇြဟတ်ကံၚ်ဇြဳပၞာန် ဗၞတ် ၅၀ ပြၚ် နူကဵုတမ်ဒပ် ခလရ ၂၆၅ အခိၚ်ထ္ပက်ကၠုၚ်ကရောၚ်ပၞာန်ဂှ် ဒပ်ပံၚ်ကောံ KNLA မၚ်ဗ္တိုက်လဝ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ပွိုၚ် ၂ နာဍဳရောၚ် သ္ဂးရ။
ပေါဲဗ္တိုက် ဒှ်တ္ၚဲဆက်ဒၟံၚ်တုဲ ပ္ဍဲပေါဲဗ္တိုက် ဗ္ဒါဲတုၚ်ဃောန်ဂှ်တှ်ေ လ္ပာ်ကံၚ်ဇြဳပၞာန် ဒးဂိတုဲ ဆုတ်ကလေၚ်အာလဝ်ရောၚ် ညးတာလျိုၚ် ပကဖ ခရိုၚ်ဗိက် ဟီုရ။
အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန် ၅ တၠ ချိုတ်တုဲ သီဂွံလဝ် MA1 မွဲဇကိုအ်၊ ဖျေဲလွဟ် ၁၁ ၊ မကမ် ၆၀ မမ ၂ မ၊ မကမ် PRG ၂ မ၊ မကမ် M79 ၉ မ၊ မဗုမ်တဲ ၃ မ၊ M14 ၄ မ၊ မာၚ်ဗ္တိုက် ၂ မ၊ မကမ် ၈၁ မမဂှ် ၁ မ ကေုာံ သီဂွံလဝ် မကမ် ၅.၅၆ (၅၃၀) ဒကောၚ်ရောၚ် ဂွံတီကေတ်ရ။
ပ္ဍဲဂိတုဨပရဴ ၉ တေံဂှ်လေဝ် ဗ္ဒါဲကွာန်တုၚ်ဃောန်ဂှ် ပေါဲဗ္တိုက်က္တဵုဒှ်လဝ်ၜါဝါတုဲ လ္ပာ်ကံၚ်ဇြဳပၞာန် ထောံလဝ်မခတိုဟ် ၆ မ နူကဵုပၞာန်ကျာ ၂ ဝါကီုလေဝ် လ္ပာ်ဒပ်ပံၚ်ကောံတံ ဇီုကပိုက်ဒးဟွံမွဲဂှ် ဂွံတီကေတ်ရ။
တုဲကၠုၚ် ဂိတုဨပရဴ ၅ တေံ ဒပ်ပၞာန် ထောံဏာလဝ်မခတိုဟ် နူကဵုပၞာန်ကျာ လ္တူကွာန် (ချောင်းနောက်ပြန်) ပွိုၚ်ဍုၚ်တၞၚ်သဳဂှ်တုဲ ကောန်သ္ဂံၚ် ၂ တၠ ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ