မတ်မလီု၊ ဨပရဴ ၁၂
ကောန်ဒပ်ကံၚ်ဇြဳပၞာန် စှ်ေနူတန်ဗ္တောန်ကွတ်ပၞာန် လၟေၚ် ၈ ၜါတၠ လုပ်စိုပ်ဖျေံကၠုၚ်လွဟ် ဇရေၚ်တမ်ဒပ် ဒပ်မဟာ ၁ KNU ဂှ် ညးတာလျိုၚ် ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ်ဂိတုဨပရဴ ၈ တေံ ကောန်ဒပ်စှ်ေနူတန်ဗ္တောန်ကွတ်ပၞာန် ၜါတၠ မၞုံယၟု ကျဝ်ဇြဝ် ကေုာံ သူရ နူကဵုခမရ ၂၀၆ ဖျေံသ္ဇိုၚ်ကွာန် (ကြာပန်း) ပွိုၚ်ဍုၚ်သဓီုဂှ် လွဟ်လက်နက်ဟွံပါမွဲသာ် လုပ်စိုပ်ကၠုၚ်ဂှ် သ္ဂးရ။
ကောန်ဒပ် ၂ တၠဏံဝွံ ဟိုတ်နူဟွံမိက်ယိုက်လျိုၚ်ပၞာန် ပ္ဍဲကံၚ်ဇြဳပၞာန်တုဲ လုပ်စိုပ်ဖျေံကၠုၚ်လွဟ်တုဲ ပြဟ်ဟ်ဏံ နွံဒၟံၚ် ဇရေၚ်ဂကောံဒေသတံဏံဂှ် ညးတာလျိုၚ် ခရိုၚ်သဓီု KNU မွဲတၠ ဟီုရ။
ကောန်ဒပ်လုပ်စိုပ်ဖျေံကၠုၚ်လွဟ် ၂ တၠဏံဝွံ အခိၚ်ကၠောန်ဒၟံၚ်ကလောန် ပ္ဍဲလ္ဂုၚ် ပ္ဍဲဂိတုအံက်တဝ်ဗာ ၂၀၂၄ တေံ ဒးဒုၚ်ရပ်ကၠုၚ် နကဵုသၞောဝ်ယိုက်လျိုၚ်ပၞာန်တုဲ ဒှ်ကၠုၚ်ကောန်ဒပ်ရ။
တန်ဗ္တောန်သ္ဇိုၚ်ကွတ်ပၞာန်တံဂှ်တှ်ေ တိုန်စိုပ်လဝ် ပ္ဍဲတန်ဗ္တောန် ဍုၚ်ဒပ်( ရဲမွန်) ရးလ္ဂုၚ် ကရောံကောန်ဒပ် ၃၀၀ ပွိုၚ်ၜါဂိတုဘာ်တုဲဂှ် စိုပ်ကၠုၚ်လဝ် ခမရ ၂၀၆ ရောၚ် ဂွံတီကေတ်ရ။
အခိၚ်လၟုဟ် ညးလုပ်စိုပ်ကၠုၚ် ၜါတၠဂှ် လ္ပာ် KNU မၚ်မွဲရံၚ်စံၚ်ကဵုလဝ် ခိုဟ်ဟ်တုဲ ဖန်ဇန်ကဵုလဝ် ပရေၚ်စသုၚ်မံၚ်စံၚ်တံရောၚ် ဂွံတီကေတ်ရ။
တုဲကၠုၚ် ပ္ဍဲဂိတုဂျာန္နဝါရဳ ၂၅ တေံဂှ်လေဝ် နူဒပ်အမၠံက် စၟတ် ၄၀၂ ဖျေံသ္ဇိုၚ်သဓီုဂှ် ကောန်ဒပ်ကံၚ်ဇြဳပၞာန် စှ်ေနူတန်ဗ္တောန်ကွတ်ပၞာန် ၃ တၠဝွံ လုပ်စိုပ်ဖျေံကၠုၚ်လွဟ် ဇရေၚ်တမ်ဒပ် ဒပ်မဟာ ၁ KNU သီုလွဟ်လက်နက်ဂမၠိုၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KNU