ရုၚ်စက်ကောန်ဍုၚ်ကြုက်ပိုၚ်ဂှ် ဘပဠ ကုညးမရပ်လဝ် တၞးကာဒ်ကောန်ဍုၚ် သေတ်ကိုၚ်တံကဵု မကွေတံတုဲ ပ္တိတ်ထောံနူကမၠောန်

လ္ဂုၚ်၊ အဝ်ဂါတ် (၂၂)

ရုၚ်စက်ဇိၚ်ဂၠိက်ယာတ် ZHENIANG TONGLI CLOTHING (MYANMAR) CO,LTD  မဒှ်ရုၚ်စက်ကောန်ဍုၚ်ကြုက်ပိုၚ်ဂှ် ဘပဠပ္တိတ်ထောံကမၠောန် ကုညးဒုၚ်ကာ ပွဳပွူ (၁၀၀) မရပ်လဝ် တၞးကာဒ်သေတ်ကိုၚ်တံကဵု မကွေတံရဂှ် ညးမရီုဗၚ်ကဵုဒၟံၚ်သၟာကမၠောန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ရုၚ်စက်ဂှ်ဝွံ ဒှ်ရုၚ်စက် မဇိၚ်ဒၟံၚ် ဂၠိက်ယာတ်တဆိပ် H&M မဒှ်တဆိပ် ဒယှ်တှ်မွဲတုဲ စုက်လုက်ဒၟံၚ်ကဵု ကံၚ်ဇြဳပၞာန်သီအဝဵုတံနွံတုဲ လုပ်တိတ်အာကၠုၚ်ဒၟံၚ် ရုၚ်စက်တံ နွံဂှ် ဂွံတီကေတ်ရ။

သ္အာၚ်နူဂှ်ပၠန် တုဲကၠုၚ် ဂိတုဂျူလာၚ် (၃၀) တေံ ညးကောပ်ကာဲသၟာကမၠောန်တံဂှ် ကုသၟာကမၠောန် နူသေတ်ကိုၚ် ကဵု မကွေ မၞုံဒၟံၚ်ပ္ဍဲရုၚ်စက်တံဂှ် ပ္ဍဲဂိတုအဝ်ဂါတ် စၟတ်တ္ၚဲ (၁) ပ္တိတ်သြန်ဂိတုတုဲမ္ဂး သွက်ဂွံတိတ်ကမၠောန် နူရုၚ်စက်ဂှ် ဟီုဂးလဝ်တုဲ ဟွံတိတ်နူကဵုကမၠောန်မ္ဂး အာအပ်ကဵု ဒၞါဲမဆေၚ်စပ်တံဂးတုဲ ဘပဠကၠုၚ်လဝ်ရောၚ် ညးဟီုဂးလဝ်ဏီရ။

“မၞိဟ်ဟွံဂွံတိတ်ဏီတံဂှ် နူကဵုမဆေၚ်စပ်တံ ကၠုၚ်စိုပ်စၟဳစၟတ်မ္ဂး ဍေံတံ ဒးပ္တိတ်ကဵုဏောၚ် ဟီုရ၊ ဘပဠ နကဵုစၞာဲရ၊ အေဂှ်တှ်ေ ညးတံ ဒးတိတ်စကေတ်တ်ရ၊ အဇှ်ေဂှ် ပိုယ်တံ အာတ်ကၠုၚ်အရီုဗၚ် ကု FGWN ရ” သာ်ဝွံ ညးမၞုံတာလျိုၚ် ဂကောံကုလသမဂ္ဂသၟာကမၠောန်ကၟိန်ဍုၚ်ဗၟာ (FGWN) မအိအိဖျူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ရုၚ်စက်ဂှ်ဝွံ ဒှ်ရုၚ်စက် မဝးပ္ကဝ်ဒၟံၚ် အခေါၚ်အရာသၟာကမၠောန်တံ ပရေံပရေံတုဲ သွက်ညးဒးဒုၚ်ပ္တိတ်နူကမၠောန်တံလေဝ် ဟွံကဵုသြန်လေဲပုဟ်ဂှ် သ္ဂးရ။

တုဲပၠန် တၚ်နၚ်ရုၚ်စက်တံဏံဂှ် ပ္ဍဲကဵုဝါပ်သာ် ဌာနဝန်ဇၞော် ပရေၚ်ဆက်စၠောံ ပရေၚ်ပိုန်ဒြပ်ကၟိန်ဍုၚ်သ္အာၚ် ကဵု ပွမဓလိုက်တမ်ရိုဟ်ကၟိန်ဍုၚ်ဗၟာတံလေဝ် ထ္မံက်ထ္ၜးလဝ် ဟွံမွဲရ။

FGWN မရေၚ်တၠုၚ်ဒၟံၚ် ပရေၚ်သၟာကမၠောန်တံဂှ် သွက်သၟာကမၠောန် မဒးဒုၚ်ပ္တိတ်ထောံ နူကမၠောန်တံဂှ် အာတ်မိက်လဝ် သွက်ဂွံကဵုအရီုဗၚ် လ္ပာ် H&M တံတုဲ သွဟ်အဆက်လက္ကရဴတံဂှ် ထ္မံက်ပ္တိတ်လဴပ္တီကဵုရောၚ် သ္ဂးလဝ်ရ။

စပ်ကဵုကိစ္စဏံတုဲ နကဵုသြၚ်လောန်တိုၚ်(မ်) သွက်ဂွံသၟာန်သၟုက် ရုၚ်စက်ဂှ် ဂ္စါန်ကၠုၚ်ကီုလေဝ် ဟွံဂွံအဆက်ဏီဖိုဟ်ရ။

ပရိုၚ်−သြၚ်လောန်တိုၚ်(မ်)