ဖဏံဖေန်၊ အဝ်ဂါတ် (၂၂)
ပ္ဍဲရုၚ်ကာဇြဳနဝ် ဍုၚ်ကာမ္ဗောဒဳယျာတံဂှ် ကောန်ကၟိန်ဍုၚ်ဝေဒ်နာမ် ပရိုၚ်တိတ်ဒၟံၚ် ဟွံဂွံၚုဟ်ကၠောန်မွဲသာ် မဒးဒုၚ်စကာဒၟံၚ် ဟွံဗဗွဲဓဝ်တံ ကၠောံၜဳတုဲ ဂြိပ်တိတ်အာ ဌာန်ဇာတိညးတံရောၚ်ဂှ် သၟိၚ်တၠအဝဵုတံ ဟီုဂးလဝ် ပ္ဍဲဂိတုအဝ်ဂါတ် (၁၉) တေံရ။
ညးဒုၚ်ကာ (၄၀) တၠ နူရုၚ်ကာဇြဳနဝ် Golden Phoenix Entertainment မပံက်လဝ် ပ္ဍဲခရိုၚ်ဒေသန္တရ ကာန်ဒေဝ် ကာမ္ဗောဒဳယျာ မဒှ်ဍုၚ်ဇိုၚ်ဝုတ်ဒိုဟ် ကဵုဍုၚ်ဝေဒ်နာမ်တံဂှ်ဝွံ သွက်ညးတံ ဂွံဗၠးၜးဂှ် ဗ္တိုက်ကဵု ပၟၚ်ဂီုကၠီု ဂြိပ်တိတ်ကၠုၚ်လဝ်တုဲ ပြဟ်ဟ်ဏံ ညးဒုၚ်ကာမွဲတၠ ကၠေံဒၟံၚ်ဂှ် ထ္မံက်ထ္ၜးလဝ် ပ္ဍဲပရိုၚ်မဳဒဳယျာ ကၟိန်ဍုၚ်ဝေဒ်နာမ်တံရ။
“ကတိ နူမွဲလ္ပာ်တေံ မကဵုလဝ် ညးတံ ကလိဂွံသြန်ဂိတုရောၚ်ဂှ် ဂွံလဝ်ရ၊ ဆ္ဂး အတိုၚ်ကတိတံဏံဂှ် ညးတံ ဟွံဂွံလဝ်ပုဟ်၊ ဟိုတ်နူပရေၚ်ကဵုကေတ်ဏံ ဟွံက္တဵုဒှ်လဝ်ဂှ်ရ ညးတံသီုဖအိုတ် သွက်ဂွံစဴဝေဒ်နာမ်ဂှ် ဂ္စါန်ကၠုၚ်အိုတ်ရ၊ ညးတံသီုဖအိုတ် နူကဵုဒၞါဲဂှ်ဂှ် ပါဲဒလေတ် ဂြိပ်တိတ်အာအိုတ်ယျ” သာ်ဝွံ ဝန်ဇၞော်အပ္ဍဲဍုၚ် ကာမ္ဗောဒဳယျာ သာခါန်ဂှ် ဟီုဂးလဝ်ကဵု အ္စာပရိုၚ်တံရ။
တုဲပၠန် ကောန်ဍုၚ်ဝေဒ်နာမ် မဂြိပ်ဗၠးတိတ်အာတံဂှ်ဝွံ ဒှ်ညးမကၠောန်ဒၟံၚ်ကမၠောန် ပ္ဍဲကဵုဍုၚ်ကာမ္ဗောဒဳယျာ ဟွံလုပ်သၞောဝ်တံရဂှ် ညးဟီုဂးလဝ်ဏီရ။
အတိုၚ်ဂလာန် ညးမဒးဂိလဝ်မွဲတၠ အာယုက် (၂၀) သၞာံဂှ်မ္ဂး အခိၚ်ညးတံ ဂ္စါန်ဂြိပ်တိတ်ဂှ် ဒးဒုၚ်တက်လဝ်ကဵု လေံဒုက်ပသဲ၊ လေံတက်သၞေၚ်စာၚ် ပၟၚ်ဂီုကၠီုတံရောၚ်ဂှ် သ္ဂးလဝ်ရ။
“ပွိုၚ် (၄) ဂိတု ပိုယ်တံ မကၠောန်လဝ်ကမၠောန် ပ္ဍဲကဵုကာဇြဳနဝ် ကာမ္ဗောဒဳယျာဂှ် ညံၚ်နရက်ရ၊ တုဲပၠန် သီုဒးဒုၚ်လီဠာန်လဝ်ရ” သာ်ဝွံ ဟီုဂးလဝ်တုဲ နကဵုညး (ဗြဴ) ဒဒှ်ရဒးကၠောန်ကမၠောန် ဗၞတ် (၁၄) နာဍဳကီု၊ “အဲကၠောန်အေဗီုဂှ် ဟွံမာန်မ္ဂးလေဝ် ဒးဒုၚ်တက်ကြပ်ချိုတ်ရ” သာ်ဝွံ ဟီုဂးလဝ်ကဵု ပရိုၚ်မဳဒဳယျာ VnExpress ရ။
ဇၞော်သ္ကိုပ် ဂကောံဒပ်ဗၠာဲသၟိၚ် ဝေဒ်နာမ် ဒေန်ဗာန်နွိုၚ်ဂှ် တတ်ကၠောံ ၜဳဗေန်ဒဳတုဲ မၞိဟ်တြုံ (၃၅) တၠ၊ မၞိဟ်ဗြဴ (၅) တၠ မလုပ်စိုပ်ကၠုၚ် နူကဵုပါၚ်သၞေဟ်ကၚ်ပယျဵုတံဂှ် စၟဳစၟတ်ကဝ်ဝေဒ်တုဲ သၟာန်သၟုက်ဒၟံၚ် သၟာန်မဆေၚ်စပ်ကဵု လၟေၚ်ဒဒှ်ဂှ်ရောၚ် ဟီုဂးလဝ်ရ။
အတိုၚ်ဂလာန် သၟိၚ်တၠအဝဵု ဝေဒ်နာမ်တံဟီုဂှ်မ္ဂး အပ္ဍဲကဝက်သၞာံဏံ ပ္ဍဲဍုၚ်ကာမ္ဗောဒဳယျာဂှ် ကောန်ဍုၚ်ဝေဒ်နာမ် မဒးဒုၚ်ရေက်ကးပ္တိတ်ဒၟံၚ်ပရဲ (၂၅၀) တၠပြၚ် ရီုဗၚ်မာန်လဝ်ဂှ် သ္ဂးရ။
အပ္ဍဲကၟိန်ဍုၚ်ကာမ္ဗောဒဳယျာဂှ် မၞိဟ်နူဍုၚ်အာယှဒိုဟ်အဂၞဲတံဝွံ လုပ်စိုပ်ကၠုၚ် သွက်အခေါၚ်အဝဵု ကမၠောန်ကၟိတ်တံတုဲ စွံပွန်ကဵု ဇာဇၞိက်သွံရာန်မၞိဟ်တံတုဲ စၟဳစၟတ်ရေၚ်တၠုၚ်ဒၟံၚ်ရောၚ် သၟိၚ်တၠအဝဵုတံ ဟီုဂးလဝ်ရ။
သ္အာၚ်နူဂှ်ပၠန် နူကဵုကမၠောန်ပရေၚ်ပိုန်ဒြပ် မၞိဟ်လီဠာန် နူဒေသၜဳရေၚ် ကာမ္ဗောဒဳယျာတံဂှ် ရီုဗၚ်မာန်လဝ် ကုကောန်ဍုၚ်အေန်ဒိုဝ်နဳယှာ ဂၠိုၚ်ကဵုဒါဇြိန်ရောၚ်ဂှ် မဳဒဳယျာတံ ဒုၚ်လဝ်စဳရေၚ်ရ။
ဟိုတ်နူလၟေၚ်ဒဒှ်ဏံတုဲ ဗၠာဲသၟိၚ်ကာမ္ဗောဒဳယျာတံ ရပ်ထိၚ်လဝ် မာန်နေဂျာကာဇြဳနဝ်ဂှ်တုဲ ကၠောန်သ္ပစၟဳစၟတ်ဂၠိုက်ဂၠါဲဒၟံၚ်ဂှ် ဂွံတီကေတ်ရ။
Ref: The Straits Time