ကဝ်တူလေဝ်၊ အဝ်ဂါတ် (၂၃)
ပ္ဍဲတိဍာ်အုပ်ဓုပ်ကဝ်တူလေဝ် ဗော်သွးကောန်ဂကူကရေၚ် KNU ဂှ် ဟိုတ်နူပေါဲဗ္တိုက်တံတုဲ ညးပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ်တံဝွံ ဂွံအရီုဗၚ် အောန်စှ်ေကၠုၚ်ရဂှ် ဂကောံမှာဇန်ကရေၚ် မရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုခရိုၚ် (၆) ခရိုၚ် မဒှ်တိဍာ်အုပ်ဓုပ် ကဝ်တူလေဝ် KNU ဂှ် ဒၟါနူပေါဲဗ္တိုက်တုဲ ညးဍုၚ်ကွာန်ပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ်တံ မၞုံကၠုၚ် (၃) ကိုဋ်ဘာ်ပြၚ်တုဲ သွက်တၚ်နွံပၟိက် ညးပါဲဒဴဘဲပၞာန်တံဂှ် KNU မပါလုပ် သီုဂကောံပရေၚ်မၞိဟ်တံ ကေုာံ ဂကောံဗွိုၚ်မှာဇန်တံ ဘိုၚ်ထံက်ပၚ်ရီုဗၚ်ကဵုဒၟံၚ်ရ။
ဆ္ဂး အရီုဗၚ် သွက်ညးပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ် နူပေါဲဗ္တိုက်စဒှ်တံဂှ် ရုမ်မ်ဂပ်ပ် နွံကၠုၚ်ကီုလေဝ် ဂိတုလအ်ကၠုၚ်ဗက် အရီုဗၚ်တံ ဟွံကၠုၚ်စကွေံကွေံရပုဟ်ဂှ် ညးတာလျိုၚ် ဂကောံကေၚ်ကာပရေၚ်မၞိဟ်ကရေၚ်ဒေသ ခရိုၚ်ညံၚ်လေဝ်ပေန် မွဲတၠ ဟီုရ။
“စဒှ်ဂှ်တှ်ေ ရုမ်မ်ဂပ်ပ် နွံရ၊ ဂိတုလအ်ကၠုၚ်တုဲ အရီုဗၚ်တံဂှ် ဟွံကၠုၚ်ရပုဟ်၊ ပြဟဟ်ဏံ သွက်မွဲဂိတုဂှ် ရီုဗၚ်ကဵုမာန်ရောၚ်၊ ဂိတုလက္ကရဴတံဂှ် ဟီုဟွံလေပ်ရပုဟ်” သာ်ဝွံ သ္ဂးရ။
ညးဍုၚ်ကွာန်ပါဲဒဴဘဲပၞာန် နူတိဍာ်အုပ်ဓုပ်ကဝ်တူလေဝ် KNU ဂှ်ဝွံ အခိၚ်ကာလ မဒးဂြိပ်ဒဴပါဲဒလေတ်ဒၟံၚ်တံ လအ်ကၠုၚ်ဗက် စၞစဇွောံမသ္ဇိုၚ်တံ မပါလုပ် စနူဂဥုဲဇဗတံဒှ်တမ် ဒးဆေၚ်ဒၟံၚ်မုက်ကဵု ဟွံရုမ်ဂပ်တံရ။
တၚ်နွံပၟိက် ညးဍုၚ်ကွာန်ပါဲဒဴဘဲပၞာန်တံဂှ် ၜိုတ်သ္ပမာန် ရီုဗၚ်ရေၚ်တၠုၚ်ကဵုဒၟံၚ်ကီုလေဝ် သီုဖအိုတ် အုပ်ဓလီုဟွံမာန်ပုဟ်ဂှ် ညးမၞုံအခေါၚ်ဟီုဂး ဇာဇၞိက်အထံက်အရီုပရေၚ်ၜိုဟ်လလမ်ကရေၚ် မရီုဗၚ်ရေၚ်တၠုၚ်ကဵုဒၟံၚ် ညးပါဲဒဴဘဲပၞာန် (KPSN) သဝ်လေဝ်ကပဝ် ဟီုဂးလဝ်ရ။
“လ္ၚဵုဂှ်တှ်ေ စဴအာကွာန်ရ၊ ဆ္ဂး ဂယိုၚ်လမျီု မုမှကၠောန်ဟွံဂွံပုဟ်၊ လၟုဟ်ဂှ် ၜိုတ်ညးတံစရ အခိၚ်နွံပၟိက်ဂှ် ထံက်ပၚ်ကဵုဒၟံၚ်ရ၊ သီုဖအိုတ်ဂှ် အုပ်ဓလီုကၠုၚ်ခိုဟ်ဟ် ဟွံမာန်ဏီပုဟ်” သာ်ဝွံ သ္ဂးရ။
ပ္ဍဲတိဍာ်အုပ်ဓုပ် KNU တံဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်တုဲ လၟိဟ်ညးပါဲဒဴဘဲပၞာန်တံဝွံ သာဂၠိုၚ်ကၠုၚ် နူကၠာတေံတုဲ အရီုဗၚ်သွက်ညးပါဲဒဴဘဲပၞာန်တံဂှ် သာတုဲနွံပၟိက်ကၠုၚ်ရ။
ဗော်သွးကောန်ဂကူကရေၚ် KNU ဂှ် ဂကောံလဵု၊ ပူဂဵုလဵု ဟွံဟီု မိက်ဂွံရီုဗၚ်ကဵု ကုညးပါဲဒဴဘဲပၞာန်တံဂှ်မ္ဂး ဒုၚ်တဲဒုၚ်တၠုၚ်ဒၟံၚ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)