သဓီု၊ အဝ်ဂါတ် (၂၃)
ပ္ဍဲပွိုၚ်ဍုၚ်ပံၚ် တွဵုရးဍုၚ်မန်ဂှ် ဒုသ္ကိုပ်က္ဍိုက်ပ် သၞာဲဒဴ CDM မၞိဟ်ဗြဴ နူဂကောံဒပ်ကံၚ်ဇြဳပၞာန်သီအဝဵုတံ မရပ်ဒက်ကော်ဏာလဝ်ဂှ် စဵုကဵုလလအ်ပွိုၚ် (၂) တ္ၚဲ သ္ၚိကၟိန်တံ ဟွံဂွံအဆက်ဏီပုဟ်ဂှ် ဂွံတီကေတ်ရ။
ဒုသ္ကိုပ်က္ဍိုက်ပ် ဌာနက္ဍိုက်ပ်ကမၠောန်တမ္ၚာ ပွိုၚ်ဍုၚ်သဓီု ဒဝ်ခိုၚ်မေတူဂှ် ပ္ဍဲကဵုသ္ၚိညး ဗ္ဒါဲဗ္ဒိုပ်ဗၠာဲသၟိၚ် ၝောံဍုၚ်ပံၚ် ပ္ဍဲဂိတုအဝ်ဂါတ် (၁၉) အခိၚ်ဗ္တံဂှ် ဂကောံဒပ်ကံၚ်ဇြဳပၞာန်တံ ကၠုၚ်စိုပ် ရပ်ဒက်ဏာလဝ် ကဵုကွဳစက်သ္ၚိတုဲ ဟွံဂွံအဆက်ဏီရ။
ဒဵုကဵုအခိၚ်လၟုဟ် ဟွံဂွံအခေါၚ်ဆဵု၊ ဟွံဂွံအခေါၚ်တက်ကျာ ကဵုသ္ၚိကၟိန်တံဏီရ၊ ဒဵုကဵုအခိၚ်လၟုဟ်ဂှ် အခေါၚ်ဆဵုဂဗ ဆက်စၠောံကဵုညးဂှ် ဟွံဂွံဏီရောၚ် ညးမစုက်လုက်ကဵု သ္ၚိကၟိန်မွဲတၠ ဟီုရ။
အခိၚ်လၟုဟ် ထိၚ်လဝ် ဒဝ်ခိုၚ်မေတူ ပ္ဍဲထံၚ်စာတ် (စျေးမသွယ်) ပွိုၚ်ဍုၚ်သဓီုဂှ်တုဲ ကောန်ဒပ်ကံၚ်ဇြဳပၞာန်တံ စၟဳစၟတ်သၟာန်သၟုက်ဒၟံၚ်ဂှ်လေဝ် ညးမစုက်လုက်ကဵု သ္ၚိကၟိန်တံ ဟီုရ။
ဒဝ်ခိုၚ်မေတူဂှ် နကဵုတၚ်စောတ်စောဲ ဆက်စပ်ဒၟံၚ်ကဵု NUG, PDF တံဂးတုဲ ရပ်ဒက်လဝ်ရောၚ်ဂှ် ညးမစုက်လုက်ကဵု ကံၚ်ဇြဳပၞာန်တံ ဟီုရ။
သ္အာၚ်နူဂှ်ပၠန် မအံက်ဒဝ်ခိုၚ်မေတူ ဒုသ္ကိုပ်က္ဍိုက်ပ် မသ္ပလဝ် CDM ဂှ်ဝွံ ဒှ်သ္ကိုပ်ဗ္ဒိုပ်တိ နေဝ်ဇိုၚ်ကျာ် မဇူလဝ်နူကမၠောန်မွဲတၠတုဲ ဒဵုကဵုအခိၚ် ကၠာညးဟွံဂွံဒးဒုၚ်ရပ်ဂှ် မံၚ်စံၚ်ကၠုၚ်လဝ် မွဲကရောံကဵုသ္ၚိကၟိန်တံရဂှ် ဂွံတီကေတ်ရ။
ဗွဲကြဴ ၂၀၂၁ ကံၚ်ဇြဳပၞာန်သီအဝဵုတုဲဂှ် သၟာပရေၚ်ဍုၚ်ကွာန်၊ အမာတ်ကၠတ်ထဝ်၊ ညးချဳဒရာၚ်ကတိုက်ကၟုဟ်၊ သၟာအနုသုခုမ၊ ညးယၟုဒယှ်တှ်တံ ကေုာံ ညးမပါလုပ် ပ္ဍဲချဳဒရာၚ်ဒစဵုဒစးအဝဵု ပကီုပရာပ် CDM တံ ဒှ်တမ် ဂၠိုၚ်ကဵုလ္ၚီဂှ် ပ္တိတ်လဝ်အမိၚ်ရပ် ပ္တိတ်လဝ်ဝါရာန်တံရ။
ပ္ဍဲကဵုလိက်ပရိုၚ်တြးဝါဒ ကံၚ်ဇြဳပၞာန်တံဂှ်လေဝ် ကုညးမဆက်စၠောံ ထံက်ပၚ်ကဵု အလဵုအသဳညဳသၟဟ်ဂကူ NUG, ကမ္မတဳသ္ပစၞးကၠတ်ထဝ် ညးဍုၚ်ကွာန် CRPH ကေုာံ ဂကောံဒပ်စဵုဒၞါညးဍုၚ်ကွာန် PDF တံဂှ် ကေတ်အာအရေဝ်ရောၚ် လလောၚ်ပ္တိတ်လဝ် အဆက်က်ရ။
ဗွဲကြဴကံၚ်ဇြဳပၞာန်သီအဝဵုတုဲ အလုံမွဲကၟိန်ဍုၚ် ညးဒးဒုၚ်ရပ်အပံၚ် (၁၅၁၆၁) တၠ မၞုံရောၚ် ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် AAPP လလောၚ်ပ္တိတ်လဝ် ပ္ဍဲဂိတုအဝ်ဂါတ် (၁၉) တေံရ။
အပ္ဍဲကဵုဂှ် သၞာဲဒဴ နူသွာၚ်နာနာ မပါလုပ်ဒၟံၚ် ပ္ဍဲချဳဒရာၚ် CDM ဂှ် အပံၚ် (၃၁၄) တၠ နွံဂှ်လေဝ် ဂွံဆဵုကေတ်လဝ် ပ္ဍဲစရၚ် AAPP ဝွံရ။
ပရိုၚ်−သြၚ်လောန်တိုၚ်(မ်)