ကံၚ်ဇြဳကလေၚ်ဒက်ပ္တန်ဍုၚ်သေံ (RCSS) မဒှ်ဂကောံရပ်လွဟ်ကောန်ဍုၚ်အရၚ်မွဲဂကောံဂှ် ကော်လဝ်ကောံဓရီု ပေၚ် (၆) ဂိတု ပ္ဍဲလွေဝ်တိုၚ်လျာန်(လွယ်တိုင်လျဲန်) ဌာန်ဂအုပ်ဗဟဵု သ္ပတံနူဂိတုအဝ်ဂါတ် စၟတ်တ္ၚဲ (၁၈) စဵုကဵု စၟတ်တ္ၚဲ(၂၀) မွဲတန် ကၠောန်ဗဒှ်လဝ်ရ ။
ကြဴနူကောံဓရီုဂှ်တုဲ စပ်ကဵုတၚ်ဒတူလာၚ် RCSS ကီု သီုကဵုပြဒ္ဒညာပရေၚ်ဍုၚ်ကွာန် က္တဵုဒှ်ဒၟံၚ်အခိၚ်လၟုဟ်ဏံတုဲ လလောၚ်တြးလဝ် တၚ်လစွံစိုတ် (၅)တၚ်ရ။
ဟိုတ်ဂှ်ရ စပ်ကဵုတၚ်ဒတူလာၚ် RCSS ပ္ဍဲဗလးပရေၚ်ဍုၚ်ကွာန်အခိၚ်တ္ၚဲဏံကီု၊ လၟေၚ်ကမၠောန် ကၠောန်ရေၚ်တၠုၚ်အာ အဓာန်ဂတဂမၠိုၚ်ကီု၊ လစွံစိုတ် လ္တူ NCA ကီုတအ်ဂှ်တုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ကံၚ်ဇြဳကလေၚ်ဒက်ပ္တန်ဍုၚ်သေံ (RCSS) ဒုသ္ကိုပ်ဗိုလ်ဇၞော် အုမ်ခေရ။
၁။ ကၠာအိုတ်ဏံ ပ္ဍဲကောံဓရီု RCSS ပေၚ် ၆ ဂိတု ကၠောန်ဗဒှ်လဝ် ပွိုၚ် ၃ တ္ၚဲဂှ်တုဲ စပ်ကဵုပရေၚ်ဍုၚ်ကွာန် က္တဵုဒှ်ဒၟံၚ်လၟုဟ်တုဲ မုဒှ်သဳကၠဳလဝ် နွံကီုရော။
ပ္ဍဲကောံဓရီုဂှ်တှ်ေ စပ်ကဵုကိစ္စဂှ်တုဲ ချပ်ဇန်လဝ် ဟၟဲပုဟ်။ ဒၟာနူဒှ်ကောံဓရီုပေၚ်တြဴဂိတု လၟေၚ်ဍာံဂှ်ရ စပ်ကဵုပရေၚ်ဍုၚ်ကွာန် ပ္ဍဲဂကောံဂှ်တှ်ေ နူသွာၚ်စုၚ် ဆဵုဂဗ၊ သဳကၠဳလဝ်ညးသ္ကအ် သွဟ်ခိုဟ်အိုတ်ဟီုဂှ် လညာတ်တအ်၊ လစွံစိုတ်တအ် နွံလဝ်ရလေဝ်။
၂။ ဗော်သွးကောန်ဂကူကရေၚ် KNUဂှ် လိက်ကသုက် NCA လီုလာ်အာယျဂှ် ပ္ဍဲလ္တူဟီုဂးလဝ်ဏံ နကဵု RCSS လစွံစိုတ် ဗီုပြၚ်လဵုနွံရော။
လၟေၚ်ကမၠောန် ဆက်ကၠောန်အာအဓာန်ဂတတေံဂှ် အတိုၚ်ဗီုပကတိတြေံရ။ အဓိကဂှ် ဆက်အာ အတိုၚ်လၟေၚ်ဂၠံၚ်တရဴ ပရေၚ်ၜိုဟ်လလံပၠန်ဏောၚ်လေဝ်။
၃။ ပ္ဍဲလိက်ကသုက် NCA ဂှ် ဒးစဵုဒၞာကဵုကောန်အရာပ်တအ်ဏောၚ် ပျးဌာန်လဝ် ကၠးကၠးမးမးရ။ လၟုဟ်ဂှ် ပရေၚ်ကောန်အရာပ်တအ် ဒးဇီုကပိုက်ချိုတ်ဒၟံၚ်ဂှ် ဒှ်ကၠုၚ် အရာဒးဒှ်ဓဝိၚ်ရလေဝ်၊ ဟီုတှ်ေ လ္တူလိက်ကသုက် NCA ဂှ် ဒ္ဂေတ်ဗက်ဒၟံၚ် နွံဏီဟာ။ ဗီုလဵု ညာတ်ကေတ်ရော။
လညာတ်လစွံစိုတ်တအ်ဂှ်တှ်ေ နူသွာၚ်နာနာ အခေါၚ်အရာပါလုပ်ဆက်စၠောံမာန်သီုဖအိုတ်ဂှ် ပံၚ်တောဲတုဲ ၜိုတ်သ္ပမာန်ဂှ်တှ်ေ ဗီုပြၚ်သွက်ဂွံရီုဗၚ်ရေၚ်တၠုၚ်အာရနွံဏောၚ်လေဝ်ဏး။
၄။ နကဵု RCSS သွက်ဂွံဆက်ကၠောန်အာပေရၚ်ဆဵုဂဗသဳကၠဳကဵုကံၚ်ဇြဳပၞာန် နွံဟာ။
အရာဏံဂှ်တှ်ေ ဂကောံဟွံဂွံပါလုပ်ထ္ပက်လဝ်စၟတ်တဲ NCA ဂှ်တှ်ေ ဟွံဟီုပုဟ်လေဝ်ဏး။ ဆ္ဂးပိုဲတအ်ဂှ်တှ်ေ အလဵုဇကုဒှ်ဂကောံထ္ပက်လဝ်စၟတ်တဲဂှ်ရဟီုတှ်ေ ၜိုတ်သ္ပမာန်ဂှ် ပရေၚ်ဆဵုဂဗသဳကၠဳဂှ် ဒှ်နဲကဲဂၠံၚ်တရဴသွဟ်ခိုတ်အိုတ်ရဟီုတုဲတှ်ေ၊ ဒၟာနူဂှ်ရ ပ္ဍဲကဵု NCA ဂှ်လေဝ် လစွံစိုတ်တအ်ဏံပါလုပ်ဒၟံၚ်ရလေဝ်ဏး။ ဟိုတ်ဂှ်ရ NCA ဂှ် လီုလာ်အာယျလေဝ် ဟီုဟွံမာန်ဏီပုဟ်လေဝ်ဏး။
၅။ လ္တူပြဒ္ဒညာပရေၚ်ဍုၚ်ကွာန် က္တဵုဒှ်ဒၟံၚ်လၟုဟ်ဏံ နကဵု RCSS ဗီုလဵုညာတ်ကေတ်လဝ်ရော။ စပ်ကဵုအကာဲအရာဒှ်ကၠုၚ်မာန်တုဲ သဳကၠဳထ္ၜးကဵုညိ။
အတိုၚ်ပါဒၟံၚ်ပ္ဍဲ NCA ဂှ်ရ ပရေၚ်ဍုၚ်ကွာန် ပရေၚ်ယှုက်ထုဲ ဗီုပြၚ်လဵုဒှ်ဒှ် ဟွံသုၚ်စောဲဇြဟတ်လွဟ်လက်နက်တုဲ မွဲလ္ပာ်ကဵုမွဲလ္ပာ်၊ မွဲဂကောံကဵု မွဲဂကောံ တၚ်ညံၚ်ပရေၚ်ပန်ပှော် ဟွံဂွံဒှ်ဂှ် ပါလုပ်ဒၟံၚ်ရ။ မုကိစ္စဒှ်ဒှ် သွက်ဂွံဆဵုဂဗသဳကၠဳကီု၊ လကြဴအိုတ် ဒးစဵုဒၞာကဵု ညးဍုၚ်ကွာန်တအ်ဏောၚ် အတိုၚ်ဟီုလဝ်ဂှ်ရ ဟိုတ်ဂှ် ပ္တိတ်ဒၟံၚ်ဇြဟတ်ညးသ္ကအ်ရ။ ဟွံဂွံလဝ်ပေၚ်ၚ်ဏီပုဟ်ဂှ်လေဝ် ဒုၚ်ဒၟံၚ်တဲရ။ ဆက်တုဲ ဒးပ္တိတ်အာဇြဟတ် ပၠန်ဏောၚ်ဂှ်ရ။ ဂၠံၚ်တရဴပရေၚ်ဆဵုဂဗသဳကၠဳဏံရ ဒှ်သွဟ်ခိုဟ်အိုတ်ဏောၚ်ဂှ်ဟီုတုဲ ညာတ်ကေတ်လဝ်ရ။
ယဝ်ဒးသဳကၠဳထေက်ဏောၚ်လေဝ် ဒးသဳကၠဳဏောၚ်၊ ဒုၚ်လဝ်တဲ ဗီုပြၚ်ဏံရ။ အတိုၚ်နဲကဲဂၠံၚ်တရဴပရေၚ်ဍုၚ်ကွာန် ယဝ်ဒးဟီု သီုအလုံမွဲကၟိန်ဍုၚ်တှ်ေ ဂၠံၚ်တရဴနဲကဲဆဵုဂဗသဳကၠဳ ခိုဟ်အိုတ်နွံဒၟံၚ် အတိုၚ်ဟီုလဝ်ဂှ်ရ ဒှ်အာအတိုၚ်ဏံပၠန်ရ။
ဟိုတ်နူဂၠံၚ်တရဴဂၠာဲသွဟ် နကဵုဇြဟတ်လွဟ်လက်နက်တုဲ သာတုဲ ပၟတ်ပ္ဍဲဍုၚ်ဂဵုသၠာန်ဒၟံၚ်ဂှ် လညာတ်ဗီုဏံ ညာတ်ကေတ်ဒၟံၚ်ညးသ္ကအ်ရ။ ဟိုတ်ဂှ်ရ ဟွံသုၚ်စောဲဇြဟတ်လွဟ်လက်နက်တုဲ နဲကဲဂၠံၚ်တရဴပရေၚ်ဆဵုဂဗသဳကၠဳဂှ် ဒှ်နဲကဲဂၠံၚ်တရဴခိုဟ်အိုတ်ရဂှ် ပိုဲညာတ်ကေတ်လဝ် ဗီုဏံရ။ သီုအလုံမွဲဍုၚ် ပရေၚ်လီုလာ်ဆောံလေၚ်တအ်ဂှ် သာတုဲ သၠဲတိုန်ကၠုၚ်ဒၟံၚ်ဂှ် ပိုဲတအ် စိုတ်ဟွံမိပ် ဒးဒှ်ဒၟံၚ်ရလေဝ်ဏး။
ဟိုတ်ဂှ်ရ နကဵုဂကောံပိုဲ သုၚ်စောဲဇြဟတ်လွဟ်လက်နက်တုဲ နဲကဲဂၠာဲသွဟ်ဂှ် ပိုဲဟွံကဵုဇြဟတ်ပုဟ်လေဝ်။ ဒၟာနူဂှ်ရ ၜိုတ်သ္ပမာန် နဲကဲဂၠံၚ်ဍာန်ဂွံသဳကၠဳမာန်ဂှ်ရ ဂၠာဲအာသွဟ်ဏောၚ်ဂှ် လညာတ်ပိုဲနွံဒၟံၚ်ရ။ ယဝ်ရသုၚ်စောဲဇြဟတ်လွဟ်လက်နက်တှ်ေ လ္တူနူဏံ ပၟတ်ပ္ဍဲဍုၚ် ဂဵုသၠာန်ကၠုၚ်မာန်ဏောၚ်။ သာတုဲ ဒးပြဟ်လလုဲဂၠိုၚ်ဏောၚ်။ အပိုၚ်ခြာသီုအလုံမွဲဍုၚ်တှ်ေ သာတုဲ ဟုတ်ယုတ်စှ်ေအာဏောၚ်။ ဟိုတ်ဂှ်ရ သုၚ်စောဲဇြဟတ်လွဟ်လက်နက်တုဲ ဗတိုက်ဒၟံၚ်ညးသ္ကအ်ဂှ် ပိုဲဟွံမိက်ကဵုဖျုန်ပုဟ်။
၆။ အလန်လကြဴအိုတ်ဏံ မုမိက်ဂွံထပ်ဟီုဗပေၚ် နွံဏီရော။
နကဵုဂကောံပိုဲဂှ်တှ်ေ အတိုၚ်ပရေၚ်ဍုၚ်ကွာန်ဂှ် အကာဲအရာဗီုပြၚ်လဵုဒှ်ဒှ်ရ အဓိကဂှ်တှ်ေ သ္ပအဓိကဒုၚ်သ္ဇိုၚ်ကဵုညးဍုၚ်ကွာန်တအ်တုဲ ညံၚ်ညးဍုၚ်ကွာန်တအ်ဟွံဂွံဒးဒုၚ်ဂိဂှ် စွံလဝ်လစွံစိုတ်အဓိကတုဲ ဆဵုဂဗညးသ္ကအ်၊ ပ္ညဳပ္ညပ်ညးသ္ကအ်၊ ဂၠံၚ်တရဴပရေၚ်သဳကၠဳဂှ် စွံလဝ်အဓိကရဂှ် မိက်ဂွံဟီုဏာရ။