သဵု(လ်) ၊ အဝ်ဂါတ် (၂၃)
အခိၚ်မဟာမိတ်ဂမၠိုၚ် ဂ္စါန်ဒၟံၚ် သွက်ပရေၚ်စမ်ၜတ်လွဟ်လက်နက် ကိုဝ်ရဳယျာသၟဝ်ကျာ မၞုံကဵုအယောၚ်အလာတံဂှ် ကိုဝ်ရဳယျာသၠုၚ်ကျာ ကေုာံ အမေရိကာန်တံ ကလေၚ်စလဝ် ပွပ္ကတ်ပ္ကေတ်ပရေၚ်ပၞာန် မကၠောံသၞာံ ပ္ဍဲကဵုတ္ၚဲစန် ( ဂိတုအဝ်ဂါတ် ၂၂) ဂှ်ရောၚ် ညးတာလျိုၚ်တံ ဟီုဂးလဝ်ရ။
အခိၚ်လၟုဟ် ကုခန်လ္ၚတ်ဥတုက္ညၚ် မပြံၚ်လဝ်ယၟု အာချဳ (Ulchi Freedom Shield) ဂှ် ပ္ဍဲဂိတုသေပ်တေမ်ဗာ (၁) ဏံ စဳဇန်လဝ် သွက်ဂွံထပိုတ်ထောံတုဲ သမ္မတကိုဝ်ရဳယျာသၠုၚ်ကျာ Yoon Suk-yeol မတိုန်ကၠုၚ် ပ္ဍဲဂိတုမေဂှ် သွက်ဂွံကလေၚ်ကၠောန် ပွပံၚ်တောဲပ္ကတ်ပ္ကေၚ် အတိုၚ်သၞောတ်တြေံဂှ်ကီု ကြဴနူကဵုကတိ သၠုၚ်ပ္တိုန်အာ ပရေၚ်တာဒၞါ လ္တူကိုဝ်ရဳယျာသၟဝ်ကျာရောၚ်ဂှ်တုဲ မံက်တိတ်ကၠုၚ်လဝ်ရ။
အပ္ဍဲကဵုသၞာံ ခြာဟွံလအ်ဏီတံဂှ် ဒၟါနူ COVID-19 တုဲ ဖအောန်ဖျေံလဝ် ပွပ္ကတ်ပ္ကေၚ်ပရေၚ်ပၞာန်တံတုဲ သမ္မတကိုဝ်ရဳယျာသၠုၚ်ကျာ သွက်ဂွံကလေၚ်စ ပေါဲသဳကၠဳ ကဵုဖျီုယာန်ဂှ် ပ္တိတ်လဝ်ဇြဟတ် ဂ္စါန်ကၠုၚ်လဝ်ရ။
အပ္ဍဲသတ္တဟတုဲကၠုၚ်တေံ ကိုဝ်ရဳယျာသၠုၚ်ကျာ ကေုာံ အမေရိကာန်တံ သွက်ဂွံကၠောန်သ္ပပ္ကတ်ပ္ကေၚ်ပရေၚ်ပၞာန်ဂှ် ဗွဲကြဴစပ္ကတ်ပ္ကေၚ်လဝ်ပဏာမတုဲ နူကဵုဍုၚ်အောန်ချောန် မဒှ်ဍုၚ်ပရၚ်ပ္တဳပလိုတ် ကိုဝ်ရဳယျာသၟဝ်ကျာဂှ် ပန်ပှော်လဝ် ကမ်လှောဝ်(ခရုသ်) ၜါ ဖ္ဍိုက်ရောၚ်။
ကိုဝ်ရဳယျာသၟဝ်ကျာဝွံ အပ္ဍဲသၞာံဏံ ပွမစမ်ၜတ်ကမ်လှောဝ်တံဂှ် နကဵုအသိၚ် ဟွံကေၚ်ဂဗမွဲလှ်ေဂှ် ကၠောန်သ္ပလဝ်တုဲ ပရေၚ်စမ်ၜတ်နျူကလဳယျာဍေံ မရနုက်ကဵုသတ္တဟဂှ် အခိၚ်ဟွံရုဲ ဒှ်ဒၟံၚ်ဒတုဲရောၚ်ဂှ် ညးမၞုံတာလျိုၚ် သဵု (လ်) တံ ဟီုဂးလဝ်ရ။
ဖျီုယာန် ဂါမ်ကၠုၚ်လဂါံဇိုၚ် ပရေၚ်သ္အးဇ္ၚး နျူကလဳယျာတံဏောၚ်မ္ဂး သွက်ဂွံကဵုအထံက်အပၚ် ပရေၚ်ပိုန်ဒြပ် ဆန္ဒမၞုံဂှ် Yoon ဟီုဂးလဝ်ကီုလေဝ် ကိုဝ်ရဳယျာသၟဝ်ကျာ တးပါဲလဝ်တုဲ ဟီုဂးပါ်ပါဲလဝ် တပ်ပ်ရ။
သွက်ဂွံခၠေဝ်ပလန် ကုပွမဘပဠ စပ်ကဵုကမ်လှောဝ် ကိုဝ်ရဳယျာသၟဝ်ကျာ မစွံလဝ်ပွန် ကဵုဍုၚ်ကိုဝ်ရဳယျာသၠုၚ်ကျာတံဂှ် သၠုၚ်ပ္တိုန်လဝ် အစောံစရာဲကမ်လှောဝ်ဂှ်တုဲ သွက်ဂွံတြးသၞောတ်အကြာတၟိဂှ် ကဵုအာဇြဟတ်ဂရိုဟ်ရောၚ် ဌာနဝန်ဇၞော် ဟီုဂးလဝ်ရ။
အမေရိကာန်၊ ကိုဝ်ရဳယျာသၠုၚ်ကျာ ကေုာံ ဂျပါန်တံဝွံ ပ္ဍဲကဵုဒေသသြၚ်သ္ၚောဲ ဟာဝိုၚ်အဳဂှ် ခြာဟွံလအ် ကၠောန်သ္ပအာ ပွပ္ကတ်ပ္ကေၚ်စၟဳစၟတ်ပရေၚ်စဵုဒၞါတံရောၚ်။
လက္ကရဴ သၞာံ ၂၀၁၇ ပရေၚ်ဆက်ဆောံ သဵု(လ်) ကေုာံ တဝ်ကျဵု မစိုပ်လဝ် ကဆံၚ်သဝ်အိုတ်တုဲဂှ် လၟုဟ်ဝွံ ဒှ်ပွမပ္ကတ်ပ္ကေၚ် ပရေၚ်ပၞာန် ကိုပ်ကၠာအိုတ်ရ။
Ref: Reuters