မတ်မလီု၊ အဝ်ဂါတ် (၂၄)
အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံဘာ်ပြၚ် ပ္ဍဲကဵုဘာပရဟိတတံ ကေုာံ ဌာန်ဒတန်ကောန်ၚာ်ကၠၚ်ယာဲတတံဂှ် ဗ္စသွဖျုန်ဟွံမာန်ရတုဲ စၞးဍာ်တှ်ခၞိက်ဂှ် ဒးဗ္စဖျုၚ်ဒၟံၚ် ပုၚ်ၜိုဟ် ကေုာံ ဍာ်ဍဵုတံရောၚ် တၠဂုဏ်အ္စာ မဒက်ပ္တန်လဝ်ဘာတံဏံ ဟီုမြော်လဝ်ရ။
ဌာန်ဒတန်ကောန်ၚာ်ကၠၚ်ယာဲတတံကဵု ဘာပရဟိတတံဝွံ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံဘာ်ပြၚ်ဂှ် တၠဒါန်အောန်စှ်ေကၠုၚ်ကီု၊ ၚုဟ်ဖျာက္ဍၚ်တိုန်ကၠုၚ်ကီုတုဲ သွက်ဂွံဗ္စဖျုၚ် ကောန်ၚာ်တံ လၟေၚ်ၚ်တ္ၚဲမာန်ဂှ် ဒးဂ္စါန်ဒၟံၚ်တၟာဂလှ်ေရ။
ဌာန်ဒတန်ကောန်ၚာ်ကၠၚ်ယာဲတတံကဵု ဘာပရဟိတတံဝွံ ဟိုတ်နူၚုဟ်ဖျာက္ဍၚ်တုဲ ကောန်ၚာ်စၜံၚ်တိတ်တၟိတၟိတံဂှ် စၞးဍာ်တှ်ခၞိက်ဂှ် ဒးနှဲဖက် ပုၚ်ၜိုဟ် ကေုာံ ဍာ်ဍဵုတုဲ ဖျုၚ်ဒၟံၚ်ဂှ် တၠဂုဏ်အ္စာ မဒက်ပ္တန်ဘာကမၠၚ်ယာဲတ မွဲဇကု ဟီုမြော်လဝ်ရ။
“တၠဒါန်တံလေဝ် လ္တူနူကၠာတေံဂှ် အောန်စှ်ေအာ ၜိုတ် (၂) ဆပြၚ်ရ၊ ပြဟ်ဟ်ဏံ ပ္ဍဲတၠဂုဏ်တံဂှ် ၜိုတ်တၠဒါန်ဗဝ်သၟုတ်လၟေၚ်ၚ်တံ တၠဒါန်ဗ္စဖျုၚ်ဒၟံၚ် ကုကောန်ၚာ်တံဂှ် အောန်အာယျ၊ ကၠာတေံဂှ် ဗ္စဖျုန်လၟေၚ်ၚ် မာန်မံၚ်၊ လၟုဟ်ဂှ်တှ်ေ သွဖျုန်ဂှ် ဗ္စလၟေၚ်ၚ်ဟွံမာန်ရပုဟ်၊ ဒးဗ္စဒၟံၚ် ကဵုသၞေဝ်ကေဝ်တံ မုတံ သာ်ဏံရ၊ လၟုဟ်ဂှ် ကောန်ၚာ်မေဲတှ်တံ ဟီုမ္ဂး ဍာ်တှ်ခၞိက်ဂှ် ဒးနှဴကဵု ပုၚ်ၜိုဟ်၊ ဍာ်ဍဵုတံတုဲ ဒးဖျုၚ် စိုပ်ကၠုၚ်ကဆံၚ်ဏံရ၊ အခက်အခုဲဂှ်တှ်ေ ကောန်ၚာ်မေဲတှ် ဍောတ်တ်တံရ” သာ်ဝွံ ဟီုမြော်လဝ်ရ။
ဟိုတ်နူအခက်အခုဲ ပရေၚ်စသုၚ်မံၚ်စံၚ်ဗိုက်လ္တက်တံတုဲ ကောန်ၚာ်ကၠၚ်ယာဲတ ကၠုၚ်စိုပ်ပအပ်လဝ်တၟိတၟိတံဂှ်လေဝ် ဒုၚ်တဲမၚ်မွဲကဵု ဟွံမာန်ရတုဲ ကောန်ၚာ်မၞုံဒၟံၚ်တုဲတုဲတံဂှ်လေဝ် ညံၚ်ဂွံဗ္စဖျုၚ် အရိုဟ်တ္ၚဲမာန် ဒးဂ္စါန်ဒၟံၚ်ရ။
တၠဂုဏ်အ္စာမွဲတၠ နူဘာပရေၚ်ပညာသၚ်တံဗ္တောန်ဂှ်လေဝ် ကြဴနူဒပ်ပၞာန်သီအဝဵုတုဲ ဗ္စကောန်ၚာ်တံ သွဖျုန်ဟွံမာန်ရတုဲ ဒၞါဲသွဖျုန်ဂှ် ထ္ပက်အဇာ ဒးဗ္စကၠုၚ် (ပဲပြုတ်) တံကဵု ခရံက်တံတုဲ စၞစတံလေဝ် အောန်စှ်ေကၠုၚ်ဒၟံၚ်ဂှ် ဟီုမြော်လဝ် သာ်ဏံရ။
“ကၠာတေံ မွဲသတ္တာဟ (၂) အလန် (၃) အလန် ဗ္စသွဖျုန်မာန်ဒၟံၚ်၊ လက္ကရဴဏံဂှ် လဖျုန်ပါမှာ ပါဏောၚ်၊ (ပဲပြုတ်) ကဵု ခရံက် ညံၚ်ဂွံအာ လၟေၚ်တ္ၚဲမာန်ဂှ် ဒးဂ္စါန်ဒၟံၚ်ရ” သာ်ဝွံ သ္ဂးရ။
အခိၚ်လၟုဟ်ဂှ် ပ္ဍဲဌာန်ဒတန်ကောန်ၚာ်ကၠုၚ်ယာဲတတံကဵု ဘာပရဟိတတံဂှ် ကဵုက္ဍိုပ် ဒးပသောၚ်ဒၟံၚ် ပရေၚ်စသုၚ်မံၚ်စံၚ်ဗိုက်လ္တက် ကေုာံ ပရေၚ်ပညာ ကောန်ၚာ်တံ အဓိကဂှ်ရ ပွမမၚ်မွဲ ပရေၚ်ထတ်ယုက်ကောန်ၚာ်တံ ဗီုကၠာတေံဂှ် ရေၚ်တၠုၚ်ကဵု ဟွံမာန်ရပုဟ်ဂှ် သ္ဂးရ။
ပ္ဍဲပရေၚ်ပညာ ကောန်ၚာ်တံဂှ် ဂွံလဝ် အထံက်အရီုလ္ၚဵုတံ နွံကီုလေဝ် လိက်သ္ဂောံရပ်စပ် သွက်မွဲသၞာံတံဂှ် တၚ်နွံပၟိက်တံ နွံဒၟံၚ်တုဲ နကဵုအ္စာ၊ အ္စာၝောံ ဗ္တောန်လိက်တံလေဝ် ဟွံဂွံသြန်ထံက်ပၚ် လၟေၚ်ၚ်ဂှ်ရ ဒှ်ဒၟံၚ်အခက်အခုဲရဂှ် တၠဂုဏ်အ္စာ နူဘာပရေၚ်ပညာသၚ်တံဗ္တောန် ဟီုမြော်လဝ်ရ။
ဟိုတ်နူအကာဲအရာတံဏံတုဲ ကောန်ၚာ်သၟတ် နူဌာန်ဒတန်ကောန်ၚာ်ကၠၚ်ယာဲတတံကဵု ဘာပရဟိတတံဝွံ ဒးဆေၚ်ကၠုၚ်မုက်ကဵု အဟာရဟွံဍိုက်ပေၚ်တံတုဲ ကောန်ၚာ်သၟတ်လ္ၚဵုတံဟီုမ္ဂး မံၚ်စဟွံခိုဟ်တံ သာက္တဵုဒှ်ကၠုၚ်အိုတ်ရ။
တၠဂုဏ်အ္စာ မဒက်ပ္တန်လဝ် ဘာပရဟိတတံကဵု ဌာန်ဒတန်ကောန်ၚာ်ကၠၚ်ယာဲတတံဂှ်ဝွံ ယဝ်ရဒးဆက်ဆေၚ်အာမုက် ကဵုအကာဲအရာတံဏံရမ္ဂး စဵုကဵုအကာဲအရာ ဒးကၟာတ်သီ ဘာပရဟိတတံကဵု ဌာန်ဒတန်ကောန်ၚာ်ကၠၚ်ယာဲတတံ က္တဵုဒှ်ကၠုၚ်မာန်ဂှ် ဟီုမြော်လဝ်ရ။
ပရိုၚ်−သြၚ်လောန်တိုၚ်(မ်)