EAOs တံ မိက်ဂွံဆက်ရပ်လွဟ်မ္ဂး ကဵုအခေါၚ်လုပ် ပ္ဍဲဒပ်ပၞာန်ဗၟာ ကဵု ဒပ်မၚ်ပယျဵုတံရောၚ်ဂှ် က္ဍိုပ်သ္ကိုပ်ပၞာန်ဟီု

နေပျဳဒဝ်၊ အဝ်ဂါတ် (၂၄)

နကဵုဂကောံရပ်လွဟ်ကောန်ဍုၚ်အရၚ် EAOs  မထ္ပက်လဝ်စၟတ်တဲ ပ္ဍဲလိက်ကသုက် ဒေါအ်ပန်ပှော်အလုံဍုၚ် NCA တံ မိက်ဂွံဆက်ရပ်လွဟ်မ္ဂး ကဵုအခေါၚ်လုပ်စိုပ် ယိုက်ဂၠေၚ်တာလျိုၚ် ပ္ဍဲဒပ်ပၞာန်ဗၟာကဵု ဒပ်မၚ်ပယျဵုတံရောၚ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုရ။

ပ္ဍဲကဵုကောံဓရီု ကံၚ်ဇြဳပၞာန် မကၠောန်ဗဒှ်လဝ် ပ္ဍဲနေပျဳဒဝ် တုဲကၠုၚ်ဂိတုအဝ်ဂါတ် (၂၂) တေံဂှ် စပ်ကဵုထ္မံက်ရုပ်ရဴ ပရေၚ်ၜိုဟ်လလမ်ဂှ် ဗွဲကြဴထ္ပက်စၟတ်တဲNCA တုဲ ကိစ္စဆက်ရေၚ်တၠုၚ်အာတံဂှ် က္ဍိုပ်သ္ကိုပ်ပၞာန်သီအဝဵု ဟီုဂးလဝ်ရ။

ဆ္ဂး နကဵုဂကောံရပ်လွဟ်ကောန်ဍုၚ်အရၚ် EAOS တံ ယဝ်ရကၠောန်သ္ပ ညံၚ်ညးဍုၚ်ကွာန်တံ ဇီုကပိုက်ဒးမ္ဂး လ္ပာ်ညးမဒးဂိတံ အာတ်မိက်ကၠုၚ်မ္ဂး ဒးရေၚ်တၠုၚ်အာ ဗွဲမညဳကဵု သၞောဝ်ဥပဒေရောၚ်ဂှ်လေဝ်  သ္ဂးလဝ်ရ။

ညးမၞုံအခေါၚ်ဟီုဂး ဂကောံက္ဍိုက်ပ် လၟေၚ်ကမၠောန်ပရေၚ်ၜိုဟ်လလမ် PPST သ္ကိုပ်ဗိုလ်ဇၞော် သဝ်ကျဝ်ညောအ်ဂှ် ဂလာန်လဟီု က္ဍိုပ်သ္ကိုပ်ပၞာန်ဝွံ ဆန္ဒညးမိက်ဂွံဒှ်ဂှ် ဟီုလဝ်ဒှ်မာန်ကီုလေဝ် ဒှ်ကိစ္စဟွံဒုၚ်ဒွံလုက်ရောၚ်ဂှ် သ္ပလဝ်တၚ်စၟတ်ရ။

“နကဵုဥက္ကဌ (နစက) ဂှ် အရေဝ်ညးမဟီုလဝ် နူကောံဓရီုတံဂှ် ဒဒှ်ရညးဟီုလဝ် နကဵုဆန္ဒညးမိက်ဂွံဒှ်၊ လညာတ်ညးလေဝ် ဒှ်မာန်ဏောၚ်၊ ဆ္ဂး နကဵုဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ NCA တံကဵုဒှ် ပ္ဍဲကဵုလၟေၚ်ကမၠောန် မဒးရေၚ်တၠုၚ်နလၟေၚ်တံကဵုဒှ် လုကဴကၠောန်သ္ပ ပွမပ္ညဳပ္ညပ်သဳကၠဳတံ သောၚ်ၚ်ကၠးကၠး သၠဲသၠဲလးလးဟွံမာန်ဏီမ္ဂး နကဵု PPST ပိုယ်တံ ဣဏံဂှ် ဒှ်ကိစ္စ ဟွံဒုၚ်ဒွံလုက်ရောၚ်” ဂှ် ညးသ္ဂးရ။

သ္အာၚ်နူဂှ်ပၠန် ကိစ္စလၟုဟ်ဝွံ သွက်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရေဝ် ဒဳမဝ်ကရေဇြဳဂှ် တၚ်ဒုၚ်လျိုၚ်တံ၊ အကာဲအရာ မဍိုက်ပေၚ်ရုမ်ဂပ်တံ ထ္မံက်ဟွံမာန်ဏီဂှ်ရ နွံပၟိက်သ္ဂောံဆက်ကၠောန် ပွမပ္ညဳပ္ညပ်တံ စိန်န်ဝုန်န်ဂှ် သ္ကိုပ်ဗိုလ်ဇၞော် သဝ်ကျဝ်ညောအ် သ္ဂးရ။

စပ်ကဵုဂလာန်လဟီု က္ဍိုပ်သ္ကိုပ်ပၞာန်ဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံလဝ် ကုညးမၞုံအခေါၚ်ဟီုဂး ဗော်ဍုၚ်မန်တၟိ NMSP၊ ဗော်ပအိုဝ် (PNLA) ကေုာံ ဗော်ရခေၚ် (ALP) မထ္ပက်လဝ်စၟတ်တဲ ဒေါအ်ပန်ပှော်တံ (၅) ဝါဟွံကကီုလေဝ် ဒုၚ်တဲသွဟ်ကဵုလဝ် ဟွံမွဲဏီရ။

ကံၚ်ဇြဳပၞာန်သီအဝဵုဂှ် ဒုၚ်သ္ဇိုၚ်ကဵု သၞောဝ်သ္ဇိုၚ်ဒက်ပ္တန် 2008 ဂှ်ကဵု လိက်ကသုက်ဒေါအ်ပန်ပှော်အလုံဍုၚ် NCA တံတုဲ သွက်ပရေၚ်ၜိုဟ်လလမ်ဂှ် ဆဵုဂဗသဳကၠဳဒၟံၚ်ကဵု EAOs တံရောၚ် သ္ဂးရ။

ဂွံတၚ်တုပ်စိုတ် ကဵုဂကောံ EAOs တံဏံတုဲ ဒဵုကဵုထ္ပက်စၟတ်တဲမာန် ထပ်သဳကၠဳရေၚ်တၠုၚ်အာ ဂၠိုၚ်ၚ်ကဵုဝါပၠန်ရောၚ်ဂှ်လေဝ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ် ဟီုဂးလဝ်ရ။

နကဵု EAOs တံ ထ္ပက် NCA တုဲမ္ဂး သွက်သ္ဂောံဂွံ အခေါၚ်အရာကောန်ဍုၚ်အရၚ်တံ၊ အခေါၚ်အရာဒေသတံဂှ် သဳကၠဳ ပ္ဍဲကၠတ်ထဝ် လ္တူစၚ်ပရေၚ်ဍုၚ်ကွာန်မာန်တုဲ မိက်ဂွံကၠောန်ပရေၚ်ပိုန်ဒြပ်တံမ္ဂးလေဝ် သွက်ဂွံရေၚ်တၠုၚ် ကမၠောန် ဗွဲမဗဗွဲကဵုဥပဒေတံမာန် ရီုဗၚ်ကဵုရောၚ်ဂှ်လေဝ် က္ဍိုပ်သ္ကိုပ်ပၞာန် သၠေံသၠန်တံၚ်ဒဇက်ဒၟံၚ်ရ။

အခိၚ်လၟုဟ် ဂကောံ (၇) ဂကောံ နူကဵုဂကောံရပ်လွဟ်ကောန်ဍုၚ်အရၚ် EAOs မထ္ပက်လဝ်စၟတ်တဲ NCA (၁၀) ဂကောံဂှ်ကဵု ဂကောံ EAOs ဟွံဂွံထ္ပက်စၟတ်တဲ (၃) ဂကောံတံ ကံၚ်ဇြဳပၞာန် သဳကၠဳလဝ် ပရေၚ်ဍုၚ်ကွာန် အလန်ပထမတုဲဒှ်ဣရ။

အပ္ဍဲကဵုဂကောံ ထ္ပက်လဝ်စၟတ်တဲ ဒေါအ်ပန်ပှော် (၇) ဂကောံဂှ် ဗော်ပအိုဝ် (PNLO) ၊ ဗော်ရခေၚ် (ALP) ကေုာံ ဗော်လာဟူ (LDU) တံဝွံ စနူဂိတုအဝ်ဂါတ် (၂၂) ဂှ်တုဲ သဳကၠဳဒၟံၚ် ပရေၚ်ၜိုဟ်လလမ် ကဵုကံၚ်ဇြဳပၞာန် အလန်ဒုတိယရ။

ပရိုၚ်−သြၚ်လောန်တိုၚ်(မ်)