ပ္ဍဲတိဍာ် KNU အပ္ဍဲပွိုၚ်မွဲဂိတုဂှ် လ္ပာ်ကံၚ်ဇြဳပၞာန် ချိုတ်အာလဝ် ဗ္ဒါဲ ၈၀ တၠ

ဒူပလာယာ၊ အံက်တဝ်ဗာ (၁၅)

ပ္ဍဲကဵုတိဍာ်ဒပ်မဟာ (၆) ဗော်သွးကောန်ဂကူကရေၚ် KNU ဂှ် ပ္ဍဲကဵုပေါဲဗ္တိုက် မက္တဵုဒှ်လဝ် အပ္ဍဲဂိတုသေပ်တေမ်ဗာ တုဲကၠုၚ်မွဲဂိတုတေံဂှ် လ္ပာ်ကံၚ်ဇြဳပၞာန် သ္ကိုပ်တမ်ဒပ်ယာယဳမွဲတၠပါလုပ်ဂှ် (၈၀) တၠ ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ဌာနလလောၚ်ပရိုၚ် ခရိုၚ်ဒူပလာယာရ။

ပ္ဍဲကဵုတိဍာ်ဒပ်မဟာ (၆) ခရိုၚ်ဒူပလာယာ KNU ဂှ် အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံပၠန်ဂတး၊ ဒပ်စဵုဒၞါကောန်ဂကူကရေၚ် KNDO ၊ ဒပ်ပၞာန်ဗၠးၜးကောန်ဂကူကရေၚ် KNLA တံဂှ် နူဂိတုသေပ်တေမ်ဗာ (၁) စဵုကဵုဂိတုသေပ်တေမ်ဗာ (၃၀) ဂှ် ပေါဲဗ္တိုက်ဍောတ်၊ ပေါဲဗ္တိုက်ဇၞော် က္တဵုဒှ်လဝ် ၅၁ ဝါရောၚ် လလောၚ်ပ္တိတ်လဝ်ရ။

အပ္ဍဲပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန်ဂှ် ဂအုပ်ဗၠာဲသၟိၚ်ခရိုၚ် ၁ တၠ၊ သ္ကိုပ်တမ်ဒပ်ယာယဳ ၁ တၠ၊ ဂအုပ်ဗၠာဲသၟိၚ် ၁ တၠ၊ ဒုအကြာပ်ဗိုလ် ဒပ်စြေက် ၁ တၠ ပါလုပ်ဂှ် ၇၉ တၠ ချိုတ်အာလဝ်တုဲ ဒုသ္ကိုပ်ဗၠာဲသၟိၚ်ခရိုၚ် ၂ တၠ၊ ဒုသ္ကိုပ်ဗၠာဲသၟိၚ် ၃ တၠ ပါလုပ်ဂှ် ၄၄ တၠ ကလိဂွံလဝ်ဝပ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် ဗ္ဒိုပ်ဒပ်ကံၚ်ဇြဳပၞာန်ဂှ်လေဝ် ဗ္တိုက်သီဂွံလဝ်တုဲ သီဂိုၚ်ဂွံလဝ် သီုကဵုလွဟ်လက်နက်မကမ် ဗွဲမဂၠိုၚ်ဂၠေၚ်ဂှ် လလောၚ်ပ္တိတ်လဝ်ရ။

ပ္ဍဲကဵုပေါဲဗ္တိုက် မက္တဵုဒှ်လဝ် အပ္ဍဲဂိတုသေပ်တေမ်ဗာ ၁ ဂိတုဂှ် နူကဵုဂကောံပၠန်ဂတးပံၚ်ကောံ KNU ၅ တၠ ကလိဂွံလဝ်ဝပ်တုဲ ၂ တၠ ပြဟ်လလုဲအာလဝ်ရောၚ် တၚ်လလောၚ်တြးဂှ် သ္ဂးလဝ်ရ။

တုဲကၠုၚ် ပ္ဍဲဂိတုသေပ်တေမ်ဗာ (၁၄) တေံ နူကဵုဂကောံပၠန်ဂတးပံၚ်ကောံတံ သီဂွံလဝ် ဗ္ဒိုပ် (ရေတလျောက်) ဒပ်ကံၚ်ဇြဳပၞာန် မၞုံအပ္ဍဲပွိုၚ်ဍုၚ်လှာဒကှ် ပယျဵုသေံ−ဗၟာ တိဍာ်ဒပ်မဟာ (၆) တံဂှ်တုဲ ပ္ဍဲကဵုပေါဲဗ္တိုက်သီဗ္ဒိုပ်ဂှ် သီဂိုၚ်ဂွံလဝ်မကမ်လွဟ်လက်နက် နူကဵုဒပ်ကံၚ်ဇြဳပၞာန်တံ ဗွဲမဂၠိုၚ်ဂၠေၚ်ရ။

သ္အာၚ်နူဂှ်ပၠန် ပ္ဍဲဂိတုသေပ်တေမ်ဗာ (၃) အခိၚ်ဗ္တံဂှ်လေဝ် အပ္ဍဲလၟေၚ်ဒဒှ်ပရေၚ်ဗ္တိုက် ရုၚ်ဗၠာဲသၟိၚ်ခရိုၚ်ကံၚ်ဇြဳပၞာန် မၞုံဍုၚ်ဗြဝတဳဂှ် သ္ကိုပ်အုပ်ဓုပ်ခရိုၚ် သၟဝ်တဲကံၚ်ဇြဳပၞာန်၊ သ္ကိုပ်တမ်ဒပ်ယာယဳ ခလရ (၂၇၅) ၊ ဂအုပ်ဗၠာဲသၟိၚ်ထိၚ်ယာန်တံ ပါလုပ်ဂှ် ဟွံအောန်နူကဵု ၅ တၠ ချိုတ်အာလဝ်တုဲ ပါလုပ်သီုကဵုသၞာဲဒဴဗၠာဲသၟိၚ်တံဂှ် ဗွဲမဂၠိုၚ်ဂၠေၚ် ကလိဂွံလဝ်ဝပ်ရ။

ပ္ဍဲကဵုပေါဲဗ္တိုက် မက္တဵုဒှ်လဝ် အပ္ဍဲတိဍာ် KNU ဂှ် ကောန်ဒပ်ကံၚ်ဇြဳပၞာန် ဗွဲမဂၠိုၚ်ဂၠေၚ် မဒးဇီုကပိုက်ချိုတ်အာလဝ်ဂှ်ဝွံ မ္ၚးနူဇြဟတ်ဒပ်ကဵု စိုတ်ဓာတ် ကောန်ဒပ်ကံၚ်ဇြဳပၞာန်တံ မစှ်ေကၠုၚ်ဒၟံၚ်ဂှ် ဟွံဂွံပရေၚ်ထံက်ဂလာန်ညးဍုၚ်ကွာန်တံရတုဲ ဒၟါနူဂကောံဒပ်ပံၚ်ကောံပၠန်ဂတး KNU တံ ဗက်လၞိန်ဗပိန်ဗ္တိုက်ကၠုၚ်မာန်တံဂှ်တုဲ ဇီုကပိုက်ချိုတ်တံ ဂၠိုၚ်လဝ်ဂှ် ညးမၞုံအခေါၚ်ဟီုဂး KNU ပဒိုဝ်သဝ်ကလေဝ်သေ ဟီုဂးလဝ်ရ။

ဒပ်ကံၚ်ဇြဳပၞာန် မလုပ်စိုပ်ချဳဒရာၚ်ဒၟံၚ် အပ္ဍဲတိဍာ်ဒပ်မဟာ (၆) ခရိုၚ်ဒူပလာယာဂှ်ဝွံ ရပ်ဒက်ပျဲပျာံ လ္တူညးဍုၚ်ကွာန်ဒေသတံကီု၊ လုပ်စိုပ်ဂၠိုက်ဂၠါဲပလီုပလာ် သ္ၚိဒၟံၚ်ညးဍုၚ်ကွာန်တံတုဲ ကေတ်ဏာ ကပေါတ်ကညောတ်ဂမၠိုၚ်ကီု၊ ပန်ပှော်ပ္ဍဲကွာန်ဂမၠိုၚ် နကဵုလွဟ်ဇၞော်တံ ဒှ်တမ် ကလိလောန်ဒၟံၚ် အမှုရာဇဝတ်ပၞာန် ကေုာံ ဝးပ္ကဝ်ဒၟံၚ်အခေါၚ်အရာမၞိဟ်တံ လၟေၚ်ဒဒှ်တ္ၚဲရောၚ်ဂှ် လလောၚ်ပ္တိတ်လဝ်ရ။

စွံပွန်လ္တူညးဍုၚ်ကွာန်တံတုဲ ပွဝးပ္ကဝ်အခေါၚ်အရာမၞိဟ် ဒပ်ကံၚ်ဇြဳပၞာန်တံဂှ်ကဵု ဟိုတ်နူပေါဲဗ္တိုက်ၜါလ္ပာ်တံတုဲ လၟိဟ်ညးဍုၚ်ကွာန်ဒေသ မ္ဒးဂြိပ်ဒဴပါဲဒလေတ်ဒၟံၚ် အပ္ဍဲတိဍာ် ဒပ်မဟာ (၆) ခရိုၚ်ဒူပလာယာဂှ် ၁၂၉၉၆၉ တၠ နွံတုဲ ဆက်နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ် အတိုၚ်တၚ်လလောၚ်တြး KNU ရ။

ပရိုၚ်−သြၚ်လောန်တိုၚ်(မ်)

ဗီု−KNU