ပ္ဍဲတွဵုရးဍုၚ်မန် သွက်ဂွံကၠောန်ဗဒှ် သဘၚ်ဇာတ် ကေုာံ ပေါဲသ္ဘၚ်တံဂှ် ကံၚ်ဇြဳပၞာန် ကဵုဇြဟတ်ဂရိုဟ်

မတ်မလီု၊ အံက်တဝ်ဗာ(၁၅)

ပ္ဍဲတွဵုရးဍုၚ်မန်ဂှ် သွက်ဂွံကၠောန်သ္ပ ညံၚ်သ္ဂောံစဳမံၚ်နကဵုပေါဲသ္ဘၚ်တံတုဲ သွက်ဂွံကလေၚ်လှ်ေပေါဲဇာတ်ဂှ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက် ဥူအံၚ်ကျဳတုၚ်ဂှ် ဟီုဂးကဵုကၠုၚ်ဇြဟတ်ဂရိုဟ်ရဂှ် ဂၠိုက်ဂၠါဲဂွံတီကေတ် နူပွဳူဗွိုၚ် ရဲလှ်ေဇာတ်တံရ။

အပ္ဍဲတွဵုရးဍုၚ်မန်ဂှ် သွက်ဂွံထ္ၜးပျး ပရေၚ်တိဍာ်ညိၚ်ဝတ်ၜိုဟ်လလမ်ဂှ် သ္ကိုပ်ဝန်ဇၞော်ကံၚ်ဇြဳပၞာန်ခါန်ကၞက်ဂှ် ပ္ဍဲပွိုၚ်ဍုၚ် တွဵုရးဍုၚ်မန်သီု(၁၀)ပွိုၚ်ဍုၚ်ဂှ် ကလေၚ်လှ်ေပေါဲဇာတ်တံမာန်မံၚ်ရဂှ် ပ္ဍဲတ္ၚဲတုဲကၠုၚ်အကြာတံဏံ အခိၚ်ဆဵုဂဗကုရဲဇာတ်တံဂှ် ဟီုဂးလဝ်ရ။

နကဵုပေါဲဇာတ်တံဂှ် မ္ၚးနူသဘၚ်ကျာ် ဗက်ကဵုပွိုၚ်ဍုၚ်တံဂှ် မပ္တံစနူပ္ဍဲသဘၚ်စၟတ်သမ္တီ ပ္ဍဲကွာန်အရာပ်တံဂှ်လေဝ် ကလေၚ်လှ်ေထ္ၜးမာန်ရဂှ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ဂှ် ကဵုသမ္တီဟီုဂးလဝ် မဒှ်ရ။

ညးစုက်လုက်ကဵုပွဳူဗွိုၚ်ပေါဲဇာတ်မွဲတၠဂှ်တှ်ေ သ္ကိုပ်ဝန်ဇၞော်တွဵုရးဍုၚ်မန်ကံၚ်ဇြဳပၞာန်ခါန်ကၞက်ဂှ် ဟီုလဝ်ပရူ ပ္ဍဲတွဵုရးဍုၚ်မန် သွက်ဂွံကၠောန် ညံၚ်ဂွံစဳမံၚ်နကဵုပေါဲသ္ဘၚ်ဗီုကၠာတေံဂှ်ကဵု သွက်ပေါဲဇာတ်တံ ဂွံကလေၚ်လှ်ေမာန်ဂှ် ကေတ်ကဵုပရေၚ်ဂီုကၠီုရောၚ်ဂှ် မဒှ်ရဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။

“သ္ကိုပ်ဝန်ဇၞော်ဂှ် ပ္ဍဲတွဵုရးဍုၚ်မန်ဂှ် စဳမံၚ်နကဵုပေါဲသ္ဘၚ် ကလေၚ်ဒှ်ဗီုကၠာတေံဂှ် မိက်သ္ဂောံဂွံရ ဏး။ ပြဟ်ဟ်ဏံ တွဵုရးဍုၚ်မန်ဂှ်လေဝ် ဂွံမံၚ်မံၚ်ၜိုဟ်ဟ်သြိုဟ်ဟ်လးလးရတှ်ေ အခိၚ်ညးကေတ်မံၚ်တာလျိုၚ်ဂှ် တွဵုရးဍုၚ်မန်တဴတက်တုဲ စဳမံၚ်ဗီုဂှ်ရမိက်ဂွံညာတ်ရ။ ဟိုတ်ဂှ်ရ ညးဂှ် ပ္ဍဲသၞာံဏံဂှ် ကဵုအခေါၚ်ကၠောန်သ္ပသ္ဘၚ်တံ ပေၚ်ၚ်ရဂး။ ညံၚ်ဂွံဒှ်သ္ဘၚ်ဂှ် ပၟိက်ဇၞော်မံၚ်၊ သ္ဘၚ်ဒှ်မ္ဂး ပြဿနာဒှ်ကၠုၚ်ဖအိုတ်ဂှ် ညးကေတ်ကဵုတာလျိုၚ်ရ။ ကိစ္စပရေၚ်ဂီုကၠီုတံမုတံဂှ် ရးကေုာံသ္ကိုပ်ဝန်ဇၞော်တံ ပ္ညဳတုဲတှ်ေ ဟီုလဝ်ရ သ္ဂး။ ညးတံကေတ်ကဵုတာလျိုၚ်ရဂှ် ဟီုရ။ ပါမေတ်လှ်ေပေါဲတံဟီုဂှ်လေဝ် ပ္တိတ်ကဵုဏောၚ်ဂး။ ညးကၠုၚ်ပ္တိုန်သီုဖအိုတ်ဂှ်လေဝ် ဟီုဗီုဂှ်ရ”သာ်ဝွံ သ္ဂးရ။

သ္ကိုပ်ဝန်ဇၞော်ကံၚ်ဇြဳပၞာန်ခါန်ကၞက်ဂှ် ၜိုန်ရအမိၚ်တိတ်ဗ္တံဟွံဂွံတံနွံကီုလေဝ် ပ္ဍဲဒၞါဲလှ်ေထ္ၜးပေါဲဇာတ်တံဂှ် ယှအ်ကဵုတုဲ စၟတ်ကဵု နူဗ္တံ ၁၂ နဍဳ စဵုကဵု ၄ နာဍဳဂယးရောၚ်မဒှ်တုဲ အေပ္ဍဲအခိၚ်ဂှ်ဂှ် နကဵုညးကၠုၚ်ဗဵုပေါဲတံဂှ် သွက်ဂွံမံၚ်ကဵုပ္ဍဲသၠာတ်ပေါဲဂှ် ကဵုလဝ် တၚ်စၞောန်ရဂှ် ညးဆက်ဟီုရ။

ပေါဲဇာတ်တံဂှ်လေဝ် သ္ပပ္တံနူဂိတုဝှ်ကၠုၚ်စိုပ်ဏံတုဲ စကဵုအာအခေါၚ်ရောၚ်မဒှ်တုဲ ပါမေတ်ပေါဲဂှ်လေဝ် ဗက်ကဵုသ္ဘၚ်စၟတ်သမ္တီ ဆေၚ်စပ်ကဵုကွာန်အရာပ်တံတုဲ ဖျေံကဵုအာဏောၚ်ဂှ် ကံၚ်ဇြဳပၞာန်စဳဇန်လဝ်ရ။

ညးဒုၚ်တာလျိုၚ်ခရိုၚ်သဓီု ကိုဝ်အေမေန်ထောန်ဂှ်တှ်ေ ပြဝကံၚ်ဇြဳပၞာန်ဂှ် သွက်ဂွံလီထ္ၜးပျးစ ကုဍုၚ်သ္အာၚ် ဒဒှ်ရ တိဍာ်ညိၚ်ဝတ်ၜိုဟ်သြိုဟ်မံၚ်ဂှ်ကဵု ပ္ဍဲပေါဲသ္ဘၚ်တံဂှ် ယဝ်ရပရေၚ်ဗ္တိုဟ်ထ္ကးက္တဵုဒှ်မ္ဂး သွက်ဂွံပ္တိုန်ဒုဟ် ကုဂကောံဇြဟတ်ပၠန်ဂတးတံ မဒှ်ရဂှ် ပါ်ပါဲလဝ်ရ။

“နကဵုဗီုပြၚ် ကၟိန်ဍုၚ်ဂှ် ၜိုဟ်သြိုဟ်မံၚ်ယျ၊ တွဵုရးဂှ်ၜိုဟ်သြိုဟ်မံၚ်ယျတံဂှ် ဍေံတံ မိက်ဂွံထ္ၜးကဵုညးဂၠးကဝ်တံရ။ မိက်ဂွံထ္ၜးကုဍုၚ်သ္အာၚ်တံဂှ်လေဝ်ပါကီု မိက်သ္ဂောံကဵု ညးဍုၚ်ကွာန်တံ မံၚ်ၜိုဟ်ဟ်သြိုဟ်ဟ်ယျဂှ် ဍေံတံမိက်ဂွံထ္ၜးရ။ တုဲမွဲပၠန်ဂှ် အခိၚ်လှ်ေမံၚ်ပေါဲဇာတ်တံဂှ် ပရေၚ်ဗ္တိုဟ်ထ္ကးတံက္တဵုဒှ်ကၠုၚ်ဏောၚ်၊ ပ္တိုန်ဒုဟ်ကုဂကောံဇြဟတ်ပၠန်ဂတးတံဏောၚ်။ နအလဵုဍေံတံဂှ် သွက်ဂွံကၠောန်လေဝ်နွံမံၚ်ရဏး။ ကၠောန်သ္ပညံၚ်မၞိဟ်တံဂွံဇီုကပိုက်ကဵုဒှ် ပရေၚ်ဇီဒးဟၟဲမွဲသာ် နကဵုမာၚ်ရမျာၚ်ကဵုဒှ် သွက်ဂွံကၠောန်ကၠုၚ် ချိုတ်ပၠိုတ်မံၚ်ရ။ တၟံကၠံပေၚ်ၚ်ဂှ် သွက်ဂွံကၠောန်ကၠုၚ်ဂၠိုၚ်ရ။ ညးဍုၚ်ကွာန်တံ ဗဵုမံၚ်ဇာတ်ပေါဲ ညိၚ်ၚ်ဝတ်တ်ၜိုဟ်ဟ်သြိုဟ်ဟ်ဂှ် ဟၟဲပၟိက်တုဲ ဣဏံ နကဵုက္ဍိုပ်သၟာပကီုပရာပ်တံဂှ် ဍေံတံ ပ္တိုန်ဒုဟ်ကုဂကောံဇြဟတ်ပၠန်ဂတးပိုဲတံဏောၚ်။ အဲညာတ်ဗီုဏံရ” သာ်ဝွံ သ္ဂးရ။

ပေါဲဇာတ်တံဂှ် ဟိုတ်နူအကာဲအရာယဲကပ်ကိုဝေတ်တုဲ သ္ပပ္တံနူဂိတုဖေဖဝ်ဝါရဳ သၞာံ ၂၀၂၀တုဲကၠုၚ်တေံတုဲ ဒးဒေါံဇူလဝ်တုဲ ဟိုတ်နူအကာဲအရာကၟိန်ဍုၚ်ကေုာံ အမိၚ်တိတ်ပ္တံဟွံဂွံတံတုဲ ပေါဲဇာတ်တံ ဟွံဂွံအခေါၚ်လှ်ေထ္ၜးဂှ် နွံကၠုၚ်ဗ္ဒါဲ(၄)သၞာံယျ မဒှ်ရ။

ဆ္ဂး ပ္ဍဲသၞာံတုဲကၠုၚ်တေံဂှ် ပေါဲဇာတ်လ္ၚဵုကလေၚ်တိတ်ကၠုၚ်လဝ်တံ နွံမံၚ်ကီုလေဝ် ဟိုတ်နူဟွံဂွံအခေါၚ်လှ်ေထ္ၜး ပ္ဍဲသ္ဘၚ်ဗက်ကဵုရာသဳတံ၊ သ္ဘၚ်မ္ၚဵုကဵုဒါန်တံ ကေုာံ သ္ဘၚ်အခန်ကၞာတၞဟ်ဟ်တံ ဟၟဲဂှ်ရ ပ္ဍဲဒၞါဲ ဝိုၚ်ဝေၚ်ၛၚ်တံ လိၚ်ဂှ်သၟးရ ပရေၚ်လှ်ေထ္ၜးအခိၚ်တ္ၚဲ နကဵုအခိၚ်အပိုၚ်အခြာတံ နွံလဝ်ရ။

ပ္ဍဲတွဵုရးဍုၚ်မန်ဂှ် ကိုပ်ကၠာနူယဲကပ်ကိုဝေတ်ဂှ် ပေါဲဇာတ်အပံၚ် (၄၂)ဇာတ်နွံလဝ်တုဲ ပြဟ်ဟ်ဏံဂှ်တှ်ေ သ္ကိုပ်ဝန်ဇၞော်ကံၚ်ဇြဳပၞာန်ခါန်ကၞက်ဂှ် ဟိုတ်နူကဵုအခေါၚ် ပေါဲဇာတ်တံကလေၚ်လှ်ေထ္ၜးပၠန်ဂှ်ရ ပေါဲဇာတ်တြေံ၊တၟိ (၃၀)ပြၚ်တံ ပလေဝ်ပလေတ်မံၚ် သွက်ဂွံကလေၚ်လှ်ေထ္ၜးရဂှ် ဂွံတီကေတ် နူကဵုပွဳူပွိုၚ် ပေါဲဇာတ်တံရ။

ပ္ဍဲတွဵုရးဍုၚ်မန် ကဵုကၠောန်သ္ပမံၚ် ပေါဲသ္ဘၚ်တံဂှ် ပ္ဍဲပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ရေဝ်၊ ပံၚ်ကေုာံ ကျာ်မြဟ်တံဂှ် အကြာဒပ်ကံၚ်ဇြဳပၞာန်ကေုာံ ဂကောံဇြဟတ်ပၠန်ဂတးတံဂှ် ပေါဲဗ္တိုက်ဇီုမုက်တံနွံမံၚ် မွဲဏှမွဲဏှတုဲ လ္ပာ်ကံၚ်ဇြဳပၞာန်တံ ဒးပတေၚ်ဓရတ်လဝ် ပရေၚ်ဂီုကၠီုမဒှ်ရ။

ပရိုၚ်-သြၚ်လောန်တိုၚ်မ်

ဗီု-Aung Kyi Thein(FB)