မတ်မလီု၊ အဝ်ဂါတ် (၃၀)
မၞိဟ်ယဲ ကေုာံ တၠမၞိဟ်ယဲ မအာဒုၚ်ဝဳဝတ် ပ္ဍဲရုၚ်ဂဥုဲ သၟဝ်တဲကံၚ်ဇြဳပၞာန် နူတွဵုရးဍုၚ်မန်တံဂှ် သၞာဲဒဴကံၚ်ဇြဳပၞာန်တံ စၟဳစၟတ်သၟာန်သၟုက်ကၠုၚ်မံၚ် သၟာန်ဟွံဆက်စပ်ကဵု ပရေၚ်ထတ်ယုက်တံရောၚ် ညးမ္ဒးဂဗလဝ်အလဵုညးမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကၠာဒပ်ပၞာန်ဟွံဂွံသီအဝဵုဂှ် ပွမစၟဳစၟတ်သၟာန်သၟုက် ကုမၞိဟ်မကၠုၚ်စိုပ်ဝဳဝတ်ဂဥုဲတံဂှ် ဟွံမွဲကၠုၚ်ရ။
ကြဴနူသီအဝဵုတုဲဂှ် ကုမၞိဟ်ယဲ ကေုာံ တၠမၞိဟ်ယဲ မကၠုၚ်ဝဳဝတ် ကာမံက်တိုန် ပ္ဍဲကဵုရုၚ်ဂဥုဲညးဍုၚ်ကွာန် ကံၚ်ဇြဳပၞာန်တံ မထိၚ်ဒက်လဝ်ဂှ် နူကဵုသၞာဲဒဴပရေၚ်ထတ်ယုက်တံ နကဵုတၚ်ထ္ၜးဟိုတ်ပရေၚ်ဂီုကၠီုဂှ် ဟွံဝဳဝတ်ကဵုလွာဲဂှ်မွဲသာ် စၟဳစၟတ်သၟာန်သၟုက်ဒၟံၚ် သၟာန်ဟွံဆက်စပ်ကဵု ပရေၚ်ထတ်ယုက်တံရောၚ် ညးဒေသတံ သ္ဂးရ။
ကုမၞိဟ်ယဲ ကာမံက်တိုန် မဒးဂ္စါန်ဒၟံၚ်လမျီုတံဂှ် ဟွံလွဳလွတ်ကဵု လွာဲဂှ်မွဲသာ် စၟဳစၟတ်သၟာန်သၟုက်ကၠုၚ် ဌာန်ဒၟံၚ်တံ မွဲကရောံကဵု ပရူပရာဖာလက္ကရဴတံတုဲမှ လွဳလွတ်ကဵုဒၟံၚ်ရ။
ကောန်သ္ၚိကၟိန် မဒုၚ်ဝဳဝတ်လဝ် ပ္ဍဲရုၚ်ဂဥုဲညးဍုၚ်ကွာန် ပွိုၚ်ဍုၚ်ပံၚ်၊ တွဵုရးဍုၚ်မန်မွဲတၠဂှ် စပ်ကဵုအကာဲအရာညးတံ ဒးဆေၚ်လဝ်မုက်ဂှ်တုဲ ဟီုကၠုၚ်လဝ် သာ်ဏံရ။
“တ္ၚဲပ္တိုန်ဏာရုၚ်ဂဥုဲအပါ ကာမံက်တိုန်ဂှ်တှ်ေ ဟွံကဵုလုပ်ပ္ဍဲရုၚ်ဂဥုဲလွာဲဂှ်တုဲ သၟာန်ဒၟံၚ်ချိုတ်တ်ပၠိုတ်တ် ညးဂှ်ရော၊ ကၠုၚ်နူလဵုရော ဒှ်တမ် တုဲဟွံလေပ်ရ၊ အဏံ မၞိဟ်ယဲဂှ် ဒးဂ္စါန်မံၚ်လမျီုဂှ် ဍေံတံ ဟွံသ္ပဂရုပုဟ်၊ ဗီုပြၚ်ဆက်ဆောံ ကုမၞိဟ်ယဲဂှ်လေဝ် ပရေံကွေံကွေံရ၊ ဟွံတီတှ်ေ ညံၚ်ကဵုကမၠတ်ဒမၠကောန်ဒုဟ်မွဲရ၊ ကြဴနူသီအဝဵုတုဲ ပွမဒုၚ်ဝဳဝတ် ပ္ဍဲရုၚ်ဂဥုဲအလဵုအသဳတံဂှ် ဟွံပြေပြံၚ်ရပုဟ်၊ စနူကဵုပျာတာတံဂှ် ညံၚ်ကဵုဒးဖေက်ဒၟံၚ်ဖအိုတ်ယျ” သာ်ဝွံ သ္ဂးရ။
သ္အာၚ်နူဂှ်ပၠန် ကုမၞိဟ်ယဲ စိုပ်ကၠုၚ် သွက်ဂွံလွဳလွတ်ကာမံက်တိုန်တံဂှ် ဟွံလွဳလွတ်ကဵု ဗွဲမဂတာပ်အခိၚ်မွဲသာ် ဟိုတ်နူစၟဳစၟတ်သၟာန်သၟုက်လဝ်ဂှ်ရ ယဲ မၞိဟ်ယဲတံသာက္ဍၚ်ကၠုၚ်မာန်တုဲ ညးသ္ၚိကၟိန်တံ ဒးဂွိၚ်ကၠုၚ် သီုကဵုအန္တရာယ်လမျီုတံရ။
ပ္ဍဲအရာလွဳလွတ် ပ္ဍဲရုၚ်ဂဥုဲညးဍုၚ်ကွာန်တံဂှ်လေဝ် စနူဂဥုဲဇဗသ္ဇိုၚ် ကေုာံ ကပေါတ်ဆက်စပ်ဂမၠိုၚ် မပ္တံ နူတောဝ်ချဵု စဵုကဵုအရက်ဇိုတ်သရတံဂှ် အလဵုတၠမၞိဟ်ယဲတံ ဒးရာန်ကေတ်ဒၟံၚ်မ္ၚးဏံရောၚ်ဂှ် ညးမဒုၚ်ဝဳဝတ်ဒၟံၚ်ဂဥုဲ ပ္ဍဲကဵုရုၚ်ဂဥုဲညးဍုၚ်ကွာန် ဍုၚ်မတ်မလီုမွဲတၠ ဟီုရ။
“ကောန်ဗၠာဲအဲ ကွဳလိုန်ဓာတ်ဗကပ်တုဲ ပ္တိုန်လဝ်ရုၚ်ဂဥုဲ၊ တ္ၚဲကၠာဂှ် ပြေပြံၚ်မံၚ်ဏီ၊ တ္ၚဲလက္ကရဴဏံဂှ်တှ်ေ တောဝ်ချဵုကဵု အရက်ဇိုတ်သရတံ ဟွံမွဲရတုဲ ရာန်နၚ်နူကဵုမ္ၚးတေံညိ၊ ဂဥုဲဂိဇကုဗၠးတံလေဝ် ပါကီု၊ ရာန်နၚ်နူကဵုမ္ၚးတေံဟီုဂှ် ဟွံသေၚ်ဏီပုဟ်လေဝ်၊ ကပေါတ်တံဏံဂှ် ဒှ်ကပေါတ်သ္ဇိုၚ် နွံပၟိက် ဟွံမွဲဟွံတုဲတံရောၚ်၊ မူဟိုတ်ဟွံမွဲဂှ် ဟွံတီရ၊ သီအဝဵုတုဲဂှ် ဇၟာပ်ပ်ရုၚ်ဂဥုဲ ပ္ဍဲတွဵုရးဍုၚ်မန်တံ ဒးဂဗဒၟံၚ်ကဵု ပြသၞာသာ်ဏံရ” သာ်ဝွံ သ္ဂးရ။
စပ်ကဵုပရူပရာတံဏံတုဲ နူကဵုသြၚ်လောန်တိုၚ်(မ်) ဆက်စၠောံသၟာန်သၟုက်လဝ် ဇရေၚ်ရုၚ်ဂဥုဲ မဆေၚ်စပ်တံကီုလေဝ် ဟွံဂွံလဝ်အဆက်ရ။
ဗွဲကြဴသီအဝဵုတုဲ သၞာဲဒဴပရေၚ်ထတ်ယုက် ဗွဲမဂၠိုၚ် ဟွံမိက်ယိုက်ဂၠေၚ်တာလျိုၚ် သၟဝ်တၠအဝဵုပၞာန်တုဲ ပါလုပ်ကၠုၚ် ပ္ဍဲချဳဒရာၚ် CDM အိုတ်ရ၊ ဟိုတ်ဂှ်ရ ပ္ဍဲရုၚ်ဂဥုဲအလဵုအသဳတံဂှ် သၞာဲဒဴပရေၚ်ထတ်ယုက်တံ အောန်စှ်ေအာတုဲ ပ္ဍဲရုၚ်ဂဥုဲလ္ၚဵုတံမ္ဂး ဒဵုကဵုဒုၚ်တဲ မၞိဟ်ယဲမ္ၚးမ္ၚးတံ ဟွံမာန် စိုပ်ကၠုၚ်ဍာ်ဏံရ။
ဟိုတ်နူပရူသာ်ဏံတံတုဲ ကံၚ်ဇြဳပၞာန်ဝွံ ပ္ဍဲကဵုဌာနပရေၚ်ထတ်ယုက်အလဵုအသဳ ဍေံတံထိၚ်ဒက်လဝ်တံဂှ် သွက်ဂွံကလေၚ်လုပ်ကမၠောန် ၜိုန်ရကလေၚ်ကော်ဒၟံၚ် သၞာဲဒဴ CDM တံ ထပ်ကဵုထပ်ကီုလေဝ် ဗွဲမအောန်ဟေၚ် ကလေၚ်ယိုက်ဂၠေၚ်လဝ်တာလျိုၚ်တုဲ သွက်ကံၚ်ဇြဳပၞာန် ဟွံအံၚ်ဇၞးလဝ်ရ။
ဟိုတ်နူအကာဲအရာဗီုလၟုဟ်ဂှ်တုဲ ပ္ဍဲရုၚ်ဂဥုဲတံဂှ် ဇြဟတ်သၞာဲဒဴတံ ဟွံရုမ်ဂပ်ကီု၊ ကဵုပွမဒုၚ်ကာ ပရေၚ်ထတ်ယုက်တံ ခိုဟ်ဟ်ဟွံမာန်ကီု၊ ၚုဟ်မးသြန်ဗၟာ စှ်ေတုဲ ၚုဟ်ဖျာက္ဍၚ်တိုန်ကၠုၚ်ဂှ်ရ ပြသၞာရာန်ဂဥုဲဇဗ ကေုာံ ကပေါတ်ဂဥုဲ ဝါတ်ဂါတ်တံ က္တဵဒှ်ဒၟံၚ်ဂှ် သၞာဲဒဴပရေၚ်ထတ်ယုက် မသ္ပလဝ် CDM တံ ဟီုရ။
ပရိုၚ်−သြၚ်လောန်တိုၚ်(မ်)