ရေဝ်၊ အံက်တဝ်ဗာ(၁၉)
တွဵုရးဍုၚ်မန်၊ သ္ကိုပ်က္ဍိုက်က္ဍိုပ်ကမၠောန်ကၠောန်က ပွိုၚ်ဍုၚ်ရေဝ် ဥူဇြဝ်နိုၚ်လေန်ဂှ် ပ္ဍဲကဵုဂိတုအံက်တဝ်ဗာစၟတ်တ္ၚဲ ၁၈ အခိၚ်နူဂယး ၜိုတ် (၇) နာဍဳဂှ် ဟိုတ်နူဒးဒုၚ်ပန်ကဵုလွဟ်တုဲ ဒးချိုတ်လဝ်ရဂှ် ညးဒေသတအ် ဟီုကဵုဌာန်ပရိုၚ်သြန်လောန်တိုၚ်(မ်)ရ။
ဥူဇြဝ်နိုၚ်လေန်အယုက် (၅၂) သၞာံ ဃောသုၚ်ဒၟံၚ်ဍာ်လက်ဖက် ပ္ဍဲဆေၚ်ဍာ်လက်ဖက် “ဖူ” မၞုံအရာပ်ယာန်ဂျဳအောၚ်၊ ဍုၚ်ရေဝ်ဂှ် မၞိဟ်တြုံဍိုက်ကၠုၚ်ကွဳလိုန်ဓာတ်မွဲတၠ လုပ်ပန်လဝ်ကဵုလွဟ်ရ။
ဟိုတ်နူဒးဒုၚ်ပန်ကဵုလွဟ်တုဲ ဥူဇြဝ်နိုၚ်လေန် ဒးလဝ်ဘဲဝပ်လွဟ် (၃) လစုတ်တုဲ ပ္ဍဲကဵုဒၞာဲဒှ်ပရေၚ်ပရောဂှ်ဟေၚ် ဒးချိုတ်အာလဝ်ရ။
ပ္ဍဲပရေၚ်ပရောဥူဇြဝ်နိုၚ်လေန် ဒးဒုၚ်ပန်လဝ်ကဵုလွဟ်ဏံ ကျာ်ဇၞော်နာဲသုနန္ဒ ဘာဇြေန်တောၚ် ကွာန်ကလအ်ဍောတ် ပွိုၚ်ဍုၚ်ရေဝ် စဴဴဒၟံၚ်ပိဏ္ဍပါတ် ပ္ဍဲဆေၚ်ဍာ်လက်ဖက်ဂှ် ဒးလဝ်ဘဲဝပ်မကမ် တေက်ဒးအာ ပ္ဍဲသပါတဲရ။
ကြဴဴနူပရေၚ်ပရောဏံဒှ်တုဲ လအ်ဂွံၜိုတ်မွဲနာဍဳဂှ် ဒပ်ကံၚ်ဇြဳပၞာန် သီုကောန်ဒပ်ဗၠာဲသၟိၚ်တအ် စိုပ်ကၠုၚ်တုဲ ကၠောန်သ္ပလဝ် ပရေၚ်ကၟာတ်ဒၞာစၟဳစၟတ်ဂှ် ညးဒေသတအ်ဟီုလဝ်ရ။
ဂကောံလကိုဟ်ဍုၚ်ရေဝ် မဒှ်ဂကောံစဵုဒၞာဒေသမွဲဂကောံ ဖျေံသ္ဇိုၚ်ပွိုၚ်ဍုၚ်ရေဝ်ဂှ် ပရေၚ်ပန်ပှော်ဏံ ညးတအ်ကၠောန်သ္ပလဝ်ရဂှ် လလောၚ်တြးပ္တိတ်လဝ်ပရိုၚ်ရ။
ပ္ဍဲကဵုဂိတုသေပ်တေမ်ဗာ စၟတ်တ္ၚဲ (၃၀) တေံလေဝ် ပ္ဍဲကွာန်ကာန်လှ၊ ပွိုၚ်ဍုၚ်ရေဝ်ဂှ် သၞာဲဒဴတံဒပ်ပၞာန်တိုက် စၟတ် (၅၉၁) ကံၚ်ဇြဳပၞာန်မွဲတၠ ဟိုတ်နူဒးဒုၚ်ပန်ကဵုလွဟ်တုဲ ဒးချိုတ်လဝ်ရ။
ပရိုၚ်- သြၚ်လောန်တိုၚ်(မ်)
ဗီု -Social Media
sanlontai