ကျောက်ကျဳ၊ အံက်တဝ်ဗာ(၁၉)
ပ္ဍဲကဵုပွိုၚ်ဍုၚ်ကျောက်ဂျဳ ခရိုၚ်ညံၚ်လေဝ်ပေန်၊ ဒပ်မဟာ(၃) ဗော်သွးကောန်ဂကူကရေၚ် KNU ဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၁၇) တုဲကၠုၚ်တေံ ပ္ဍဲပွိုၚ်မွဲတ္ၚဲဓဝ် နူကဵုဒပ်ကံၚ်ဇြဳပၞာန် ဟိုတ်နူဂြာတ်ထောံဖျေံလဝ်ဗုမ် (၄) ဝါတုဲ သ္ဂံၚ် KNLA (၃) တၠ ကေုာံကောန်အရာပ် (၁) တၠ ဇီုကပိုက်ဒးလဝ်ဝပ်ရဂှ် KNU ဗဟဵု လလောၚ်တြးလဝ်ရ။
ပ္ဍဲတ္ၚဲဂှ် မွဲတ္ၚဲဓဝ် နူကဵုဒပ်ကံၚ်ဇြဳပၞာန် ဂြာတ်ထောံဖျေံလဝ်ဗုမ် ကဵုက္ၜၚ်ကျာပၞာန်ဂျေတ် (၄) ဝါ၊ ပန်လဝ်ကဵုလွဟ် စက် (၂) ဝါ ပ္ဍဲကွာန်လေဝ်ထူ၊ ကဒဳသူ၊ ပေဝ်ဝါဒေဝ် ပွိုၚ်ဍုၚ်ကျောက်ဂျဳရ။
ဟိုတ်နူကံၚ်ဇြဳပၞာန် ဗတိုက်လဝ်ကဵုက္ၜၚ်ကျာတုဲ စမြိုၚ်ညးဍုၚ်ကွာန်ပိုၚ် (၃) မ၊ ဘာဗ္တောန်လိက် (၁) ဘာ ကေုာံ သ္ၚိဒၟံၚ်မၞိဟ် (၃) မ ဇီုကပိုက်ဒးလီုလာ်လဝ်တုဲ သ္ဂံဒပ်ပၞာန်ဗၠးၜးကောန်ဂကူကရေၚ် (၃) တၠ ကေုာံကောန်အရာပ် (၁) တၠ ဇီုကပိုက်ဒးလဝ်ဝပ်ရ။
ပ္ဍဲကဵုဂိတုအံက်တဝ်ဗာ စၟတ်တ္ၚဲ (၁၇) အခိၚ်ဗ္တံဂှ်လေဝ် ပ္ဍဲကဵုကွာန်ကွဳလာ၊ ထဳယိုဝ်ထဝ်ပလဝ် ကေုာံ ဇြေဗဝ်ဒေဝ်တအ်ဂှ် ဒပ်ကံၚ်ဇြဳပၞာန် ဗတိုက်ဂြာတ်ထောံဖျေံလဝ်ဗုမ် ကဵုဂျေတ်ဖိုက်တာ (၃) ဖ္ဍိုက် (၃) ဝါ၊ ပန်လဝ်ကဵုလွဟ်စက် (၂) ဝါတုဲ ပရေၚ်ဇီုကပိုက်ဒးလဝ် နွံဟၟဲဂှ် ဃောလ္ၚတ်ဂၠိုက်ဂၠာဲဒၟံၚ်ဖိုဟ်ရဂှ် KNU လလောၚ်တြးလဝ်ရ။
ဟိုတ်နူဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာတုဲ ကောန်ဒေသညးဍုၚ်ကွာန် နူကွာန်မၞုံဗ္ဒာဲကရပ်တအ်ဂှ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲတုဲ ဘာတန်သၠုၚ်လေဝ်ဒိုဝ်၊ ကဝ်လိက်ဂျူနဳယာ ခလေဝ်လွဳထူ၊ ဘာတန်သၠုၚ်လေဝ်ဝါ၊ ဘာတန်ဒေါဝ် ကွဳလာ၊ ဘာတန်မူလ ပေဝ်ပဒေဝ်၊ ဘာတန်မူလ ခဝ်လိုဝ်ကလိုဝ်တအ် ဒးကၟာတ်လဝ် မွဲချိုန်ခနရဂှ် KNU သ္ဂးလဝ်ရ။
ပ္ဍဲဂိတုအံက်တဝ်ဗာ စၟတ်တ္ၚဲ (၁၆) တေံလေဝ် ပ္ဍဲပွိုၚ်ဍုၚ်ယှိုဲကျေန် ခရိုၚ်ညံၚ်လေဝ်ပေန်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ ကောန်အရာပ် (၃) တၠ ပါလုပ်သီုမၞိဟ်ဗြဴဴ (၂)တၠ ဇီုကပိုက်ဒးလဝ်ဘဲဝပ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး KNU ရ။
ပ္ဍဲတိဍာ်ဒပ်မဟာ (၃) ခရိုၚ်ညံၚ်လေဝ်ပေန်ဂှ် ပရေၚ်ဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ်ညးဍုၚ်ကွာန်တုဲ ဗတိုက်ပန်ဒၟံၚ်ကီု သီုပရေၚ်ဖံက်ပ္ကဝ်ဒၟံၚ်အခေါၚ်အရာမၞိဟ်တုဲ ညးဒေသ ဒးဂြိပ်ဒဴပါဲဓလေတ်ဒၟံၚ် စဵုကဵု (၂) ကိုတ်ပြၚ်နွံကၠုၚ်တုဲ ဆက်နွံဒၟံၚ်ပၟိက် အရီုဗၚ်ဗ္စာရဏာပရေၚ်မၞိဟ် နဒဒှ်ကာတၟေၚ်ရဂှ် ဂွံတီကေတ် အတိုၚ်တၚ်လလောၚ်တြး KNU ရ။
ပရိုၚ် -သြၚ်လောန်တိုၚ်(မ်)
ဗီု -KNU
sanlontai