မတ်မလီု၊ အံက်တဝ်ဗာ(၁၉)
သ္ဘၚ်ကျာ်ဣသိယဵု တွဵုရးဍုၚ်မန် ဒယှ်တှ်ပြာကတ်တဴတုဲ ကၟုဲအာတရဴ ပ္ဍဲဍုၚ်၊ မ္ၚးဍုၚ် ဂၠိုၚ်ကဵုကိုဋ်တံ လေပ်ကၠုၚ်စိုပ်ဒၟံၚ် သွက်ဂွံကလေၚ်စဳပၠန်ဂှ် ကံၚ်ဇြဳပၞာန် သုၚ်စောဲနဲကဲစုၚ်တုဲ ဂ္စာန်ပလေဝ်ပလေတ်မံၚ်ရ။
သ္ဘၚ်ကျာ်ဣသိယဵုဂှ် လၟေၚ်သၞာံ သ္ပပ္တံနူဂိတုဝှ်ပေၚ် စဵုကဵု ဂိတုပသာ်ပေၚ် ကၠောန်ဗဒှ်လဝ် လလအ်ပွိုၚ်ထပှ်ဂိတုတုဲ အပ္ဍဲပိသၞာံတုဲကၠုၚ်ဏံဂှ် မွဲကရောံကဵုယဲကပ်ကိုဝေတ်ဂှ် ဟိုတ်နူပရေၚ်ဍုၚ်ကွာန်ဟွံ ညိၚ်ဝတ်ဂှ်ရ ကၠောန်ဗဒှ်လဝ် ဗွဲမသ္ၚိတ်ဇြရ။
ဆ္ဂး ကံၚ်ဇြဳပၞာန်ဂှ် သွက်သ္ဘၚ်ကျာ်ဣသိယဵုကၠောန်ဗဒှ်ပ္ဍဲသၞာံဏံ သ္ဂောံစဳဂှ် ကလေၚ်ဒက်ပ္တန် ဂကောံဂေါပကကျာ်တံ၊ ကၠောန်သ္ပမံၚ် ပရေၚ်ခိုၚ်ကၠိုက် ကွဳစက်တိုန်ဒဵုတံကဵု ပွသ္ကဵုပလေဝ်ပလေတ်ဂၠံၚ်ဍာန်တံတုဲ ပ္ဍဲကာလသ္ဘၚ်ဂှ် စၞောန်ပ္ညုၚ်လဝ် သွက်ဂွံဖာပ်ဗ္စအိုတ်ရ။
ညးတာလျိုၚ် ဂကောံဂေါပကကျာ်ဣသိယဵုမွဲတၠဂှ်တှ်ေ သွက်သ္ဘၚ်ကျာ်သ္ဂောံစဳဂှ် ကၠောန်သ္ပလဝ် ပွပလေဝ်ပလေတ်တံ တုဲဒှ်မံၚ်ရတုဲ ပရေၚ်ဂီုကၠီုဂှ် ဒပ်ကံၚ်ဇြဳပၞာန်တံကဵု ဂကောံဒပ်ဗၠာဲသၟိၚ်တံ ကေတ်တာလျိုၚ်ရေၚ်တၠုၚ်အာဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ပိုဲတံဂှ် လ္ဂောံကဵုအခိုက်ကၞာပိုဲ ပ္ဍဲဂိတုဝှ်ပေၚ်၊ အေၚ်္ဂလိက်(၂၉)၊ ဂိတု(၁၀)၊ တ္ၚဲအဒိုတ်၊ ရာသဳကညၚ်ဂှ် ကလေၚ်စပံက် ရာသဳသ္ဘၚ်ကျာ် (၇)ဂိတုပၠန်ဏောၚ်။ သွက်ညးဍုၚ်ကွာန် ကၟုဲလ္ၚောဝ်ကျာ်တံဂှ် ပိုဲတံ ပံက်လဝ် ဆေၚ်စသုၚ်၊ သ္ၚိဇၞူ၊ ဟဝ်တေဝ်တံ တုဲဒှ်မံၚ်ယျ။ ပရေၚ်ဂီုကၠီုဂှ်တှ်ေ နူကဵုဂကောံဒပ်ဂီုကၠီုတံ ကေတ်တာလျိုၚ်ရေၚ်တၠုၚ်အာဏောၚ်။ သွက်ဂွံကၠောန်ဗဒှ်သ္ဘၚ်ကျာ် ညံၚ်သ္ဂောံစဳဂှ်တှ်ေ ပိုဲပံၚ်တောဲ ကုတၠအဝဵုဆေၚ်စပ်တံကဵု ဂကောံဂေါပကတံတုဲ ရေၚ်တၠုၚ်လဝ် နွံမံၚ်ရ။ သွက်ညးဍုၚ်ကွာန် ကၟုဲလ္ၚောဝ်ကျာ်တံ သ္ဂောံအာကၠုၚ်ဂီုဂီုကၠီုကၠီုၜိုဟ်ဟ်သြိုဟ်ဟ်မာန်ဂှ်လေဝ် နူကဵုဂကောံညးတာလျိုၚ်ဆေၚ်စပ်တံ ရေၚ်တၠုၚ်ကဵုလဝ် သီုဖအိုတ်ရ” ဂှ်သ္ဂးရ။
ဂကောံအလဵုအသဳတွဵုရးဍုၚ်မန် ကံၚ်ဇြဳပၞာန်ခါန်ကၞက်ဂှ် သွက်ဂွံကၠောန်ဗဒှ်သ္ဘၚ်ကျာ်ဣသိယဵုညံၚ်သ္ဂောံစဳ တုဲကၠုၚ် ပ္ဍဲဂိတုအံက်တဝ်ဗာ၊ စၟတ်တ္ၚဲ(၉)တေံဂှ် ကော်ကေတ်လဝ် ကောံဓရီုမွဲတုဲ ဒက်ပ္တန်လဝ် ကဝ်မတဳနာနာတံရ။
ညးတာလျိုၚ် ဂကောံဇြဟတ်ပၠန်ဂတးကျာ်ထဝ် (KRF)မွဲတၠဂှ်တှ်ေ ပွဂ္စာန်ညံၚ်သ္ဘၚ်ကျာ်ဣသိယဵု သ္ဂောံစဳဂှ် ကံၚ်ဇြဳပၞာန်တံ မိက်ဂွံတြးဝါဒ ဒဒှ်ရတိဍာ်ညိၚ်ဝတ်မံၚ်ရဒှ်တုဲ ပ္ဍဲအကာဲအရာဏံဂှ် ညးဍုၚ်ကွာန်တံ သွက်ဂွံစွံသတိဗွဲတၟေၚ်အိုတ်ညိဂှ် ဖတိုက်ဖအောဝ်လဝ်ရ။
“လ္ပာ်စကစဂှ်တှ်ေ ပ္ဍဲဍုၚ်ကွာန်တံဏံဂှ် ဍေံတံထိၚ်ဒဝ်ဂွံမံၚ် ပေၚ်ၚ်ယျ။ တိဍာ်တံ ညိၚ်ဝတ်မံၚ်ယျသ္ဂးတုဲတှ်ေ မိက်ဂွံတြးဝါဒတုဲ ဟီုတွံတုဲတှ်ေ နဲလဵုဒှ်ဒှ် ညံၚ်သ္ဂောံစဳဂှ် ကၠောန်တွဵုရလေဝ်။ ပ္ဍဲအခိၚ်ကၠောန်ဗီုဏံဂှ် ညးဍုၚ်ကွာန်ပိုဲတံဂှ် သတိပၠန်ဂတး၊ သမ္တီပၠန်ဂတး နွံညိညတုဲတှ်ေ သွက်ဂွံအာကၠုၚ်ကဵုသတိညိဂှ် အဲမိက်ဂွံကဵုဏာသတိရ။ ပရေၚ်ယုတ်မာရုန်မဵုဍေံတံ မွဲမွဲသာ်၊ ဗ္တိုဟ်ဗုမ်အကြာညးဍုၚ်ကွာန်တံဏောၚ်။ ညးဍုၚ်ကွာန်တံ ဇီုကပိုက်ဂွံအာဝပ်မ္ဂး လ္ပာ်ဂကောံဇြဟတ်ပၠန်ဂတးတံ ကၠောန်လဝ်ရသ္ဂးတုဲ အကြာညးဍုၚ်တံကဵု ဂကောံဇြဟတ်ပၠန်ဂတးတံဂှ် ဍေံတံသုၚ်စောဲကၠုၚ်နဲကဲ နကဵုဗီုပြၚ်ပါ်ထ္ကးဆီတံမာန်ရ။ ဗီုလဵုဒးပါ်ထ္ကးပါ်ထ္ကး သွက်ဆီဂွံထ္ကး၊ ညံၚ်ဂကောံဇြဟတ်ပၠန်ဂတးတံ ဇြဟတ်ဂွံအောန်အာဂှ် ဍေံတံကၠောန်တွဵုရဏောၚ်တှ်ေ ပ္ဍဲအကြာဏံ နကဵုညးဍုၚ်ကွာန်တံ အဲဂွိၚ်ဖေက် ကြေပ်အကြာရ”ဂှ် သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဂှ် ဟိုတ်နူမိက်ဂွံပလီုယၟု ဂကောံဇြဟတ်ပၠန်ဂတးတံဂှ်ရ ညးဍုၚ်ကွာန်လ္ၚောဝ်ကျာ်တံဂှ် သုၚ်စောဲပရေၚ်ဘာသာတုဲ ကၠောန်သ္ပပရေၚ်ပါ်ထ္ကးဆီမာန်တုဲ နကဵုညးဍုၚ်ကွာန်လ္ၚောဝ်ကျာ်တံဂှ်လေဝ် ညံၚ်ဟွံဂွံမံၚ်ကြပ်ပ်ကဵု ကောန်ဂကောံဒပ်ကံၚ်ဇြဳပၞာန်တံဂှ် ဒုၚ်လဝ်ဂုဏ်ရ။
ပ္ဍဲဂိတုအံက်တဝ်ဗာ စၟတ်တ္ၚဲ (၁၂) သၞာံတုဲကၠုၚ်တေံဂှ် ဟိုတ်နူပရေၚ်ပန်ပှော်ၜါလ္ပာ်က္တဵုဒှ်လဝ် ပ္ဍဲသၞေဟ်ကွဳစက်တိုန်ဒဵုကျာ်ဣသိယဵုဂှ်တုဲ ညးဍုၚ်ကွာန်လ္ၚောဝ်ကျာ် (၃)တၠ ချိုတ်တုဲ ဟွံအောန်နူကဵု(၁၀)တၠ ကလိဂွံလဝ်ဝပ်ရ။
ကြဴနူပရေၚ်ပန်ပှော်ၜါလ္ပာ်က္တဵုဒှ်တုဲဂှ် ကံၚ်ဇြဳပၞာန်တံဂှ် ပတေၚ်ဓရတ်လဝ် ပရေၚ်ဂီုကၠီုဗွဲတၟေၚ်တုဲ ညးဍုၚ်ကွာန်ကၠုၚ်လ္ၚောဝ်ကျာ်ဣသိယဵု ပ္ဍဲဍုၚ်မ္ၚးဍုၚ်တံ ယအ်စှ်ေကၠုၚ်တီတီဒှ်ဒှ်ရ။
ကျာ်ဣသိယဵုဂှ် ကိုပ်ကၠာနူဂွိုအ်သီအဝဵုဂှ် လၟေၚ်သၞာံ ကၟုဲလ္ၚောဝ်ကျာ် ပ္ဍဲဍုၚ်၊မ္ၚးဍုၚ် (၂)ပြကောဋိကိုတ်ပြၚ် ကၠုၚ်စိုပ်မံၚ်တုဲ ပ္ဍဲလက်ထက်ကံၚ်ဇြဳပၞာန်ဂှ်တှ်ေ ဟိုတ်နူတိဍာ်ဟွံညိၚ်ဝတ်တုဲ ပရေၚ်ညးလ္ၚောဝ်ကျာ် လုပ်စိုပ်တံ ယအ်စှ်ေကၠုၚ်တီတီဒှ်ဒှ်ရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai