တယေတ်ချံၚ်၊ အံက်တဝ်ဗာ(၁၉)
ရးဒေသဇၞော်တၞၚ်သြဳ၊ ပွိုၚ်ဍုၚ်တယျေတ်ချံၚ်၊ လ္တူဂၠံၚ်ဆက်စၠောံလဝ် ကွာန်ယၚေဝ်ကေုာံ ကွာန်ကတွေဝ်(ကတွဲ)ဂှ် ဟိုတ်နူဒပ်ကံၚ်ဇြဳပၞာန် ဒးဒုၚ်ပါမ်မာၚ်တုဲ ဗ္တိုက်လဝ်ဂှ်ရ ကောန်ဂကောံဒပ်ကံၚ်ဇြဳပၞာန် ဟွံအောန်နူ (၁၀)တၠ ဇီုကပိုက်ဒးချိုတ်လဝ်ရဂှ် တမ်ဒပ်ခရိုၚ်ထဝါဲ စၟတ် (၂)ဂှ် လလောၚ်ပ္တိတ်လဝ်ရ။
တုဲကၠုၚ်ပ္ဍဲဂိတုအံက်တဝ်ဗာ စၟတ်တ္ၚဲ (၁၇) အခိၚ်နူဂယးဂှ် ကရောၚ်ပၞာန်ကံၚ်ဇြဳပၞာန် ဇြဟတ်ဒပ်(၅၀)ပြၚ်ပါ တိတ်ကၠုၚ်နူကွာန်(ကတွဲ)ဂှ် ဂကောံဒပ်ပံၚ်ကောံစဵုဒၞါဒေသတံ ပါမ်မာၚ်တုဲ ဗ္တိုက်လဝ်ရ။
ဟိုတ်နူပွဗ္တိုက်ဏံတုဲ ပေါဲဗ္တိုက်ၜါလ္ပာ်က္တဵုဒှ်လဝ် လလအ်ပွိုၚ်ဗ္ဒါဲကဝက်နာဍဳတုဲ ဟိုတ်နူဒပ်ပံၚ်ကောံစဵုဒၞါဒေသတံ ဂွံလဝ်ကၠာတဲဂှ်ရ လ္ပာ်ဒပ်ကံၚ်ဇြဳပၞာန်တံ ဒးဂိလဝ်ရ။
ပ္ဍဲညးချိုတ်အာ (၁၀)တၠတံဂှ် သၞာဲဒဴဒပ်ကံၚ်ဇြဳပၞာန်မွဲတၠ ပါလုပ်တုဲ ညးက္လိဂွံလဝ်ဝပ်တံလေဝ် နွံမံၚ်ရဂှ် ညးတာလျိုၚ် ခရိုၚ်ထဝါဲစၟတ် (၂)မွဲတၠဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကွဳစက်ပၞာန်ကၠုၚ်ကပှ်ဇွ ကောန်ဂကောံဒပ်ကံၚ်ဇြဳပၞာန် ချိုတ်အာလဝ်ပ္ဍဲပေါဲဗ္တိုက်တံ မွဲဖ္ဍိုက်ဂှ်လေဝ် ဒပ်ပံၚ်ကောံမဟာမိတ်တံ ထပ်ပါမ်မာၚ်ဗ္တိုက်လဝ်တုဲ ပရေၚ်ဇီုကပိုက်ချိုတ်ဂျိုၚ်ဂှ် ဟွံဂွံတီကေတ်ဏီရဂှ် သ္ဂးရ။
ဒပ်ကံၚ်ဇြဳပၞာန်ဂှ် တမ်ဒပ်(T5-Zone) စၟတ်(၂)ခရိုၚ်ထဝါဲ ၊ ဂကောံဒပ်ဒမၠုက်(ပုတီးတစ်လုံး) ကေုာံ ဂကောံဒပ်ပံၚ်ကောံ ဂကောံဇြဟတ် ယူဂျဳတံ ဗ္တိုက်လဝ်ရဂှ် လလောၚ်ပ္တိတ်လဝ်ရ။
အတိုၚ်လဟီုညးဒေသတံဂှ်မ္ဂး ကြဴနူပေါဲဗ္တိုက်တုဲဂှ် ဒပ်ကံၚ်ဇြဳပၞာန် ဒးဂိအာလဝ်ဂှ် စံၚ်ပလီုပလာ်ဏာလဝ် သ္ၚိဒၟံၚ်မၞုံပ္ဍဲကွာန်ယၚေဝ် (၃)မရဂှ် ဂွံတီကေတ်ရ။
ပ္ဍဲရးဒေသဇၞော်တၞၚ်သြဳ တုဲကၠုၚ်ပ္ဍဲဂိတုသေပ်တေမ်ဗာတေံဂှ် ပေါဲဗ္တိုက်ၜါလ္ပာ် ဟွံအောန်နူကဵု (၅၀)ဝါ က္တဵုဒှ်လဝ်တုဲ လ္ပာ်ကံၚ်ဇြဳပၞာန် ဟွံအောန်နူ (၆၉)တၠ ချိုတ်လဝ်ရဂှ် ဂကောံသုတေသန ဖျေံသဇိုၚ်ဒေသတံ လလောၚ်ပ္တိတ်လဝ်ရ။
ပရိုၚ်-သြၚ်လောန်တိုၚ်မ်
ဗီု-တမ်ဒပ်စၟတ်(၂) ခရိုၚ်ထဝါဲ
sanlontai