ကံက်ကေတ်စရိတ်လၟေၚ်သၞာံ လ္တူညးသုၚ်စောဲဇြောယှေဝ်မဳဒဳယာ X တအ် မွဲဒဝ်ဠာဏောၚ်

ဝါယှေန်တာန်၊ အံက်တဝ်ဗာ(၁၉)

ပလေတ်ဖောၚ်ဇြောယှေဝ်မဳဒဳယာ X မၞိဟ်တီဂၠိုၚ်ဒၟံၚ်အခိၚ်ကၠာတေံ Twitter ဂှ် သွက်ညးသုၚ်စောဲသာမည နဒဒှ်စရိတ်လၟေၚ်သၞာံ စမ်ၜတ်ကံက်ကေတ် မွဲဒဝ်ဠာရောၚ် လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ(၁၇)ရ။ 

ကုညးသုၚ်စောဲဗီုပြၚ်ပ္တိုန်စရၚ်တၟိ ကော်ဂး “Not A Bot” ဂှ် သ္ပလိုက်ခ်၊ ကလေၚ်ပါ်တြး ဟွံသေၚ်မ္ဂး နိဿဲကဵုပိုပေါတ်သ်တၞဟ်သ္အာၚ် ကေုာံ ပ္ဍဲကဵုဝှေပ်ဗာယှေန်ပလေတ်ဖောၚ်ဂှ် သွက်ပေါတ်သ် ဒးသီဂိုၚ်လဝ်တအ်ဂှ် စဳဇန်လဝ် သွက်ဂွံကံက်ကေတ်အာ မွဲဒဝ်ဠာရ။ 

ဂွံဒးဆက်မိတ်လဝ် ဗီုပြၚ်ပ္တိုန်စရၚ်တၟိဂှ်မ္ဂး ဗောတ်ပလံၚ်ဒၟံၚ်လိက်ဇမၠေံ ပလာပ်ပထုဲဒၟံၚ် ညးသုၚ်စောဲတအ်ဂှ်ကဵု သွက်ဂွံဗတိုက်ပလီု spammers ရဂှ် X ဟီုသ္ဂးလဝ်ရ။ 

သ္အာၚ်နူဂှ်ပၠန် စရိတ်ကံက်ကေတ်လၟေၚ်သၞာံဂှ် တုဲတဴကဵုဗ္ၜတ်သၠာဲသြန်တုဲ ကၟိန်ဍုၚ်မွဲကဵုမွဲ ဒှ်တၞဟ်ခြာမာန်ရဂှ် ဟီုသ္ဂးလဝ်ရ။ 

ဗီုပြၚ်တၟိဏံဂှ် သွက်ညးသုၚ်စောဲ မၞုံနယူဇြဳလာန် ကေုာံ ဖိလေတ်ပိုၚ်တအ်ဂှ် စကၠောန်အာ ဗွဲကိုပ်ကၠာရောၚ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြး X ရ။ 

ပ္ဍဲကဵုပရေၚ်စမ်ၜတ်ဏံဂှ် သွက်ညးသုၚ်စောဲ နွံဒၟံၚ်တုဲတုဲတအ် ၜိုန်ပရေၚ်ဇီုကပိုက်ဒးဟၟဲကီုလေဝ် သွက်ညးသုၚ်စောဲ ပၟိက်ဆန္ဒဟၟဲတၟိတအ်ဂှ် ကၠောန်သ္ပပရေၚ်ရံၚ်ဗဵုပေါတ်သ်ကီု၊ ဗှ်ကီု၊ ဗဵုဗဳဒဳယောကီု သီုကဵုသ္ပဖှဝ်လဝ်တအ်ဟေၚ် ကၠောန်မာန်ရ။ 

ကိစ္စဗောတ်က္တဵုဗဒှ်ကဵုပလာပ်ပထုဲ ညးသုၚ်စောဲပရေၚ်ပလံၚ်လိက်ဇမၠေံဂှ် နူကဵုသၞာံတုဲတေံ သွက်အဳလောန်မာက် ရာန်ကေတ်လဝ်ကုမ္ပဏဳဂှ် ပြဒ္ဒညာကယျာန်ဓဝါတ် မွဲဂကူလေဝ် ဒှ်လဝ်ရ။ 

ပ္ဍဲဂိတုဂျူလာၚ် လောန်ကၠုၚ်တေံလေဝ် X ဂှ် ညးသုၚ်စောဲတအ်ဂှ် ဒဒှ်ရဒှ်ဍာံစၟတ် သွက်ဂွံတီကၠး ပ္ဍဲလ္တူရံၚ်ကျောဝ်လ္တူတွောတ်တာ ဆက်မိက်ကဵုလဝ် တၚ်အပိုၚ်အခြာမွဲဂကူဏီရ။ 

ပ္ဍဲဂိတုဏံသ္ကုတ်ပထမဂှ် ဇြဳအဳအိုဝ် X လေန်ဒါဂှ် ညးမဆေၚ်စပ်ကဵု X ကေုာံ လ္ပာ်ကုမ္ပဏဳညးသုၚ်စောဲတအ်ဂှ် တုဲတဴကဵု လၟိဟ်လလောၚ်တြးတုဲ သွက်ဂွံစမ်ၜတ် ကဆံၚ်ဒုၚ်ကာပၠုပ်စရၚ် ပိကဆံၚ်နွံဒၟံၚ် ဒဒှ်ဟီုဂးလဝ်ဂှ် ဓမံက်ထ္ၜးလဝ် ပ္ဍဲဌာန်ပရိုၚ်ရိုက်တာရ။ 

Ref: Reuters