ကောန်ထံၚ်ပရေၚ်ဍုၚ်ကွာန်ထဝါဲ ဒးဒုၚ်ရပ်ဒက်လဝ်မွဲတၠ ဒးဒုၚ်ဖျေံစၟတ်ဒဏ်ထံၚ် (၄၄) သၞာံ

ထဝါဲ၊ အံက်တဝ်ဗာ(၂၀)

ကောန်ထံၚ်ပရေၚ်ဍုၚ်ကွာန် မယေန်န်ချဵု ဒးဒုၚ်ရပ်ဒက်ဖျေံလဝ်ထံၚ် ပ္ဍဲထံၚ်စာတ်ထဝါဲ၊ ရးဒေသဇၞော်တၞၚ်သဳဂှ် ဒးဒုၚ်ဖျေံစၟတ်လဝ်ဒဏ်ထံၚ် စဵုကဵု(၄၄)သၞာံရဂှ် ဂွံတီကေတ် နူကောန်ယက်ကောန်ထံၚ်ပရေၚ်ဍုၚ်ကွာန်ထဝါဲ(DPPN)ရ။

နကဵုအမှု ဥပဒေဗ္တိုက်သ္အးပွပကီုပရာပ် ၝောံပိုဒ် ၅၀(ည)၊ ၅၁၊ ၅၂၊ ၅၄ဂှ် ကံၚ်ဇြဳပၞာန် ထပ်ဗပဵုပ္တိုန်ပံက်လဝ်အမှု ကုကောန်ထံၚ်ပရေၚ်ဍုၚ်ကွာန် မယေန်န်ချဵုဂှ် ပ္ဍဲဂိတုအံက်တဝ်ဗာ သတ္တာဟဒုတိယဂှ် နူကဵုရုၚ်သၞောဝ်ဓဝ်ထံၚ်စာတ်ထဝါဲ ထပ်ဖျေံစၟတ်လဝ် ဒဏ်ထံၚ် (၃၂)သၞာံရ။

ကံၚ်ဇြဳပၞာန်ဂှ် နကဵုတၚ်စောတ်စောဲ မယေန်န်ချဵုဂှ် ပံၚ်တောဲပါလုပ်ရေၚ်တၠုၚ်ကဵုမံၚ် ပရေၚ်ထံက်ပၚ်ကဵုမံၚ်သြန်လှုဲ ဇရေၚ် PDF တံဂှ်တုဲ သၞာံဏံ ပ္ဍဲဂိတုဂျာန္နဝါရဳ စၟတ်တ္ၚဲ (၂၃)ဂှ် လုပ်စိုပ်ရပ်ဒက်လဝ် ပ္ဍဲသ္ၚိဒၟံၚ်ရ။

ကြဴနူဂှ်တုဲ ကံၚ်ဇြဳပၞာန်ဂှ် နကဵုဥပဒေ ဗ္တိုက်ပလီုပွပကီုပရာပ် ၝောံပိုဒ် ၅၀(ည)ဂှ် ဖျေံစၟတ်လဝ်ဒဏ်ထံၚ် ကုမယေန်န်ချဵု (၁၂)သၞာံ ဗွဲကိုပ်ကၠာရ။

မယေန်န်ချဵုဂှ် ဟိုတ်နူဒးဒုၚ်ဖျေံစၟတ်လဝ်ဒဏ်ထံၚ် စဵုကဵု (၄၄) သၞာံဂှ်ရ ပ္ဍဲထံၚ်စာတ်ထဝါဲ ဒးဒုၚ်ဖျေံစၟတ်လဝ် ဒုဟ်ဒဏ်ဂၠိုၚ်အိုတ်ရဂှ် ညးတာလျိုၚ် ကောန်ယက်ကောန်ထံၚ်ပရေၚ်ဍုၚ်ကွာန်ထဝါဲ (DPPN) မွဲတၠဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ပ္ဍဲထံၚ်စာတ်ထဝါဲဂှ် ကောန်ထံၚ်ပရေၚ်ဍုၚ်ကွာန်ဗြဴ နွံမံၚ် (၁၀၀)ပြၚ်တုဲ (၉၀)တၟံကၠံပြၚ်တံဂှ် ဒးဒုၚ်ဖျေံစၟတ်လဝ်ဒဏ်ထံၚ် နကဵုၝောံပိုဒ်နာနာ အောန်အိုတ် နူ (၂)သၞာံ ဂၠိုၚ်အိုတ် စဵုကဵု(၄၄)သၞာံရ။

အတိုၚ်တၚ်လလောၚ်တြး ဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန် (AAPP)ဂှ်မ္ဂး ပ္ဍဲကာလသီအဝဵုဂှ် ပ္ဍဲရးတၞၚ်သဳဂှ် ညးဒးဒုၚ်ရပ်ဒက်လဝ် နွံကၠုၚ် ဗ္ဒါဲ(၁၇၀၀)ရဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၁၈)ဂှ် လလောၚ်ပ္တိတ်လဝ်ရ။

ပရိုၚ်-သြၚ်လောန်တိုၚ်မ်

ဗီု-CJ