မတ်မလီု၊ အံက်တဝ်ဗာ(၂၂)
ပ္ဍဲထံၚ်စာတ်ဗဟဵုကျာ်မြဟ်၊ တွဵုရးဍုၚ်မန်ဂှ် ဟိုတ်နူရာသဳပြံၚ်သၠာဲ က္တဵုဒှ်ဒၟံၚ်အခိၚ်လၟုဟ်တုဲ ၜိုန်ကောန်ထံၚ်ပရေၚ်ဍုၚ်ကွာန်တအ် ဂိဒၟံၚ်ယဲ နွံကီုလေဝ် ဒးဒုၚ်ပိုၚ်ခြာကၟာတ်ဒၞာလဝ် အခေါၚ်ပလံၚ်ဗစိုပ်ဂဥုဲဍုၚ်မ္ၚး(အေၚ်္ဂလိက်)ရဂှ် ညးစုက်လုက်ကဵု ဂကောံသ္ၚိကၟိန် ကောန်ထံၚ်ပရေၚ်ဍုၚ်ကွာန်တအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကောန်ထံၚ်ပရေၚ်ဍုၚ်ကွာန်တအ်ဂှ် ဟိုတ်နူဥတုရာသဳပြံၚ်သၠာဲတုဲ ဇကုက္တဴ၊ ဒးချာံ၊ ခ္ဍက်၊ ခ္ဍတ်တိတ်ဒၟံၚ်တအ်ကဵု ဟိုတ်နူဒးသုၚ်စောဲဒၟံၚ် ဍာ်ဟွံသ္အးဇ္ၚးတုဲ ဒှ်ဒၟံၚ်ယဲခၞော်ညးသ္ကအ် ဖအုံကဵုဖအုံ နွံရ။
ကောန်ထံၚ်ပရေၚ်ဍုၚ်ကွာန် ဒှ်ဒၟံၚ်ယဲညးသ္ကအ်တအ်ဂှ် ပ္ဍဲအရာဂကောံသ္ၚိကၟိန်ညးတအ် ပလံၚ်နၚ်ဂဥုဲဍုၚ်မ္ၚးဂှ် ညးယိုက်ဝန် သၟဝ်တဲကံၚ်ဇြဳပၞာန်တအ် ပိုၚ်ခြာတာဒၞာလဝ် အခေါၚ်ပလံၚ်ဗစိုပ်တုဲ ဒုၚ်ဒၟံၚ်တဲ ဂဥုဲဂြိုပ်နကဵုဗ္ၜတ်အပိုၚ်အခြာဟေၚ်ရ။
“အခေါၚ်ကဵုဒါန်ဂဥုဲအေၚ်္ဂလိက် နူမ္ၚးလေဝ် ကၟာတ်လဝ်ရ။ ဟီုတှ်ေ ဂကောံအိန်ထံၚ်တအ်ဂှ် ဒးဗ္ကန်ကေတ်ဒၟံၚ်ဂဥုဲဂြိုပ်ရ။ ဂဥုဲဂြိုပ်လေဝ် ယဝ်ဒှ်ကဵုပလၚ်တှ်ေ ဟွံဂွံပုဟ်။ ဒးပြံၚ်စုတ် ပ္ဍဲဍေၚ်ဂဝ်ရ။ ဂဥုဲကၠောန်ပ္တိတ်လဝ်ကဵုဍေၚ်ဂဝ် နူတမ်မူလတအ်ဂှ်တှ်ေ ဍေံကဵုလဝ်အခေါၚ် (၂)ဍေၚ်ရ။ ယဝ်အောန်ဒၟံၚ်တှ်ေ စုတ်ဒၟံၚ် ပ္ဍဲဍေၚ်ဂဥုဲဂြိုပ် ပလံၚ်ကဵုနၚ် နူသ္ၚိညးသ္ကအ်ရ။ ဂဥုဲသုၚ်လေဝ် သုၚ်ဒၟံၚ်ဂဥုဲဂြိုပ်ညးသ္ကအ်ရ။ အာမံၚ်အတိုၚ်ဏံရ။ ပရေၚ်လွဳလွတ်ဂဥုဲဂွံစိုပ်တရဴ ဂွံလွဳလွတ်ကဵုသီုစိုတ်သီုစရိုတ်ဂှ် ပ္ဍဲထံၚ်စာတ် ပ္ဍဲဌာနက္ဍိုက်က္ဍိုပ်ထံၚ်စာတ် ဟၟဲပုဟ်” ဂှ် ဟီုလဝ်ရ။
သ္အာၚ်နူဂှ်ပၠန် သၟာယဲဆီဍာတ်ကဵု သၟာယဲဆီၜေတ် မဒှ်ယဲဍာ်ဇမၠိၚ်တၞဟ်တအ်ဂှ်လေဝ် ဟိုတ်နူဟွံဂွံသုၚ်ဂဥုဲဍုၚ်မ္ၚး အရၚ်ဂွံသုၚ်အာဍာ်ဇမၠိၚ်ဂှ် ဒးဂဗဒၟံၚ်ကဵုအခက်ခုဲရတုဲ ဒှ်ယဲတုဲ ယဝ်အာဟီုမ္ဂး ညးပိုၚ်ပြဳအဝဵုထံၚ်တအ် ကဵုဒၟံၚ်ပါရာဇြဳတမဝ်ကဵု ဗာမဳတွောန်သၟးရဂှ် ညးဆက်ဟီုလဝ်ရ။
အတိုၚ်သၞောဝ်ဥပဒေသ္ကအ်တဲထံၚ် အခန်(၈) ၝောံပိုဒ် ၃၇၊ ၃၈၊ ၃၉ မ္ဂး ပရေၚ်မၚ်မွဲထတ်ယိုတ်ကောန်ထံၚ်တအ်ဂှ် ဒေါံဟွံဂွံ ဒးရေၚ်တၠုၚ်ကဵုရောၚ် ၜိုန်ရပျးဌာန်လဝ်ကီုလေဝ် ပ္ဍဲလက်ထက်ကံၚ်ဇြဳပၞာန် ပရေၚ်မၚ်မွဲပရေၚ်ထတ်ယိုတ် ဒးဆောံလေၚ် ကြပ်အိုတ်ဒၟံၚ်ရ။
ပ္ဍဲကဵုထံၚ်စာတ်ဂှ် ၜိုန်ရရုၚ်ဂဥုဲထံၚ် နွံကီုလေဝ် အ္စာဂဥုဲထံၚ်တအ် ကၠုၚ်စိုပ်ဒၟံၚ် စဵုကဵုဟၟဲ အောန်လောန်တုဲ ပရေၚ်ထတ်ယိုတ်ကောန်ထံၚ်တအ် ဟွံခိုဟ်ကၠုၚ်မ္ဂး ဒးကလေၚ်လွဳလွတ်ဒၟံၚ်ကဵုဂဥုဲ နွံဒၟံၚ်အကြာဇကုကဵုဇကုရဂှ် ကောန်ထံၚ်ပရေၚ်ဍုၚ်ကွာန်တြေံတအ်ဟီုလဝ်ရ။
သ္ပတံနူဂိတုတုဲကၠုၚ်တေံတုဲ ကောန်ထံၚ်ပရေၚ်ဍုၚ်ကွာန် ဒးဒုၚ်ပိုၚ်ခြာလဝ် အခေါၚ်ပလံၚ်ဗစိုပ်စၞစတအ်ဂှ် လၟုဟ်ဏံ သီုဒးထပ်ဒုၚ်ပိုၚ်ခြာကၠုၚ် အခေါၚ်ပလံၚ်ဗစိုပ်ဂဥုဲဇဗပၠန်ဂှ်ရ ပရေၚ်ထတ်ယိုတ်အကာဲအရာပရေံကၠုၚ် ပ္ဍဲထံၚ်ဂှ် ဂကောံသ္ၚိကၟိန်ညးတအ် ဒှ်ဒၟံၚ်ဓဝိၚ်ဂွိၚ်ဒၟံၚ်ညးသ္ကအ်ရ။
ဟိုတ်နူဟွံက္လိဂွံ အခေါၚ်မၚ်မွဲပရေၚ်ထတ်ယိုတ်တုဲ ပ္ဍဲတုဲကၠုၚ်မွဲၜါတ္ၚဲတေံလေဝ် ပ္ဍဲထံၚ်စာတ်ဇြေမတွယ်ဂှ် ကောန်ထံၚ်မွဲတၠ ဒးချိုတ်လဝ်ရဂှ် ဂွံတီကေတ်နူညးရီုဗၚ်မၚ်မွဲဒၟံၚ် ကောန်ထံၚ်ပရေၚ်ဍုၚ်ကွာန်တအ်ရ။
ပရိုၚ် – သြၚ်လောန်တိုၚ်မ်
ဗီု – Social Media
sanlontai