KIA သီကေတ် ဗ္ဒိုပ်ဒပ်ကံၚ်ဇြဳပၞာန်ၜါဗ္ဒိုပ်

နာန်သာန်ယာန်၊ အံက်တဝ်ဗာ(၂၂)

ဗ္ဒိုပ်ဒပ်ကံၚ်ဇြဳပၞာန် မၞုံပ္ဍဲတွဵုရးကချေၚ်ကေုာံ တွဵုရးသေံသ္ကုတ်သၟဝ်ကျာ ၜါဗ္ဒိုပ်ဂှ် ဒပ်ပၞာန်ဗၠးၜးကောန်ဂကူကချေၚ် (KIA) ကေုာံ ဂကောံဒပ်ပံၚ်ကောံတံ သီကေတ်လဝ်ရဂှ် ညးတာလျိုၚ်လလောၚ်ပရိုၚ် (KIA)နဝ်ဗူ သ္ပဒတန်လဝ်ကဵု သြၚ်လောန်တိုၚ်မ်ရ။

ဂကောံဒပ်ပံၚ်ကောံ သၟဝ်တဲ KIA ဒပ်မဟာ (၆) ကေုာံ ဂကောံဒပ်ပံၚ်ကောံတံဂှ် ပ္ဍဲဂိတုအံက်တဝ်ဗာ စၟဝ်တ္ၚဲ(၁၉) အခိၚ်နူဂယး (၆)နာဍဳဂှ် လုပ်စိုပ်ဗ္တိုက်လဝ် ဗ္ဒိုပ်နကောတ် မၞုံခြာဇမ္ၚောဲ (၁၀)မိုၚ် နူဒိုဟ်နေရတိဍုၚ်မုံကိုဝ်(မုံးကိုး) မၞုံတွဵုရးသေံ သ္ကုတ်သၟဝ်ကျာဂှ်ရ။

သ္အာၚ်နူဂှ်ပၠန် ဗ္ဒိုပ်လေဝ်လုံ(လဲလုံ) မၞုံဗ္ဒါဲကွာန်နာန်သာန်ယာန်၊ ဍုၚ်ဝိုၚ်မဝ်၊ တွဵုရးကချေၚ် ဗ္တိုက်လဝ်နကဵုဇြဟတ် လၟိဟ်ဗွဲမဂၠိုၚ်ဂၠေၚ် လလအ်ပွိုၚ်မွဲသတ္တာဟပြၚ်ဂှ်လေဝ် ပ္ဍဲဂိတုအံက်တဝ်ဗာ စၟတ်တ္ၚဲ(၂၀)ဏံ KIA တံ သီကေတ်မာန်လဝ်ရ။

“ဗ္ဒိုပ်ဂှ်ဂှ် လၟေၚ်ဒဒှ် KIA ကေုာံ ဒပ်ပံၚ်ကောံပိုဲတံ သီလဝ် နွံမံၚ်ရ။ ပ္ဍဲဂိတုအံက်တဝ်ဗာ စၟတ်တ္ၚဲ(၁၈) (၁၉)ဂှ်ရ။ နူကနေံတေံ အံက်တဝ်ဗာ (၂၀) ဂှ် လၟေၚ်ဒဒှ် လုပ်သီဗ္ဒိုပ်လေဝ်လုံ(လဲလုံ)နွံ။ ပ္ဍဲဗ္ဒိုပ်လေဝ်လုံဂှ်လေဝ် ဒှ်လၟေၚ်ဒဒှ် KIA ပိုဲကဵု ဒပ်ပံၚ်ကောံသီုဖအိုတ်တံ ပံၚ်တောဲလုပ်ဗ္တိုက်တုဲ သီဂိုၚ်ဂွံလဝ်ရ” သာ်ဝွံ သ္ဂးရ။

အတိုၚ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ် လ္တူလၟေၚ်ဒဒှ် ဒးဗလးထောံတဲ ဗ္ဒိုပ်နကောတ်ဂှ်မ္ဂး KIA ကေုာံ ဂကောံဒပ်ပံၚ်ကောံတံ ဟိုတ်နူဗ္တိုက်လဝ် နဇြဟတ်လၟိဟ်ဗွဲမဂၠိုၚ်ဂၠေၚ် နူကဵုဒၞါဲပိဒၞါဲဂှ်ရ ကောန်ဒပ်တံဂှ် ပ္ဍဲအခိၚ်သဝ်တ္ၚဲ (၄)နာဍဳ ဒးစ္ဍးတိတ်လဝ် နူဗ္ဒိုပ်ရဂှ် ထ္မံက်ထ္ၜးလဝ်ရ။

လ္တူဒးဒုၚ်သီဗ္ဒိုပ်တံဂှ် ဟိုတ်နူပွကလေၚ်ပလန်တဲ ပန်ရီုကဵုတရဴကျာ ကေုာံ အမၠံက် ကုဒပ်မဟာ(၆)တံဂှ်ရ မွဲကရောံကဵု ဇွကောန်ဂကောံ KIA တံဂှ် သီုကဵုသီဂိုၚ်ဂွံလဝ် လွဟ်လက်နက်မကမ်တံရဂှ် သ္ဂးရ။

သ္ကိုပ်ဗိုလ်ဇၞော်နဝ်ဗူဂှ်တှ်ေ ဟိုတ်နူပွဗ္တိုက်ကံၚ်ဇြဳပၞာန်တုဲ ကောန်ဂကောံဒပ် KIA (၄)တၠ ပြဟ်လလုဲအာလဝ် နွံတုဲ သီဂိုၚ်ဂွံလဝ် လွဟ်လက်နက်မကမ်ဟီုဂှ် ဓဝ်ဍာံဟွံမွဲလးလးရဂှ် ခၠေဝ်ပၠန်လဝ်ရ။

“နူကနေံတေံ ဂအုပ်ဌာန ဒပ်မဟာ (၆) ပိုဲ ဒးဒုၚ်ဗ္တိုက်လဝ် နူကဵုတရဴကျာ ကေုာံ ပန်လဝ်ကဵုအမၠံက်ရ။ ပ္ဍဲဒၞါဲဂှ်ဂှ် ညးယိုက်ဝန်ပိုဲ (၄)တၠ ပြဟ်လလုဲလဝ် နွံ။ ဆ္ဂး ဍေံတံဂှ် ကလေၚ်သီဂွံလဝ် လွဟ်လက်နက်မကမ်တံဟီုဂှ်တှ်ေ ဓဝ်ဍာံဟွံမွဲလးလးရ။ မုဟိုတ်ရောဟီုတှ်ေ ဍေံတံဂှ် ပွထ္ပက်ကရောၚ်ပၞာန် နူဗလးတိဂှ် ဟွံမွဲရ။ (ညးဒးချိုတ်အာဂှ်) သၞာဲဒဴ သေၚ်၊ဟွံသေၚ်ဂှ်တှ်ေ ပွကဵုပရိုၚ်ကုဌာနပိုဲဂှ် ဟွံမွဲပုဟ်။ ဟိုတ်ဂှ်ရ ပိုဲဂှ် သ္ပဒတန်ဟီုကဵုအရာဏံ ဟွံဂွံပုဟ်” သာ်ဝွံ သ္ဂးရ။

ဂိတုအံက်တဝ်ဗာ စၟတ်တ္ၚဲ(၂၁) စဵုကဵုနူဂယး အကြာ (၃)နာဍဳကဵု (၄)နာဍဳဂှ် ကံၚ်ဇြဳပၞာန် ပွဗ္တိုက်နူကဵုတရဴကျာ၊ ပွက္ဍပန်နကဵုလွဟ်ဇၞော် ပ္ဍဲဗ္ဒိုပ်လေဝ်လုံ ဒးဗလးလဝ်တဲဂှ် နွံမံၚ်တုဲ နကဵုပေါဲဗ္တိုက်ဗလးတိဂှ် စဵုကဵုအခိၚ်သြၚ်လောန်တိုၚ်မ် သၟာန်သၟုက် အခိၚ်နူဂယး (၁၁)နာဍဳ ဟွံမွဲဏီရဂှ် ညးဆက်ဟီုရ။

ဟိုတ်ပွဗ္တိုက်ပန်ရီု နကဵုတရဴကျာကေုာံ လွဟ်ဇၞော်ကံၚ်ဇြဳပၞာန်တံ သွက်ဂွံကလေၚ်ဂွံဗ္ဒိုပ်ဂှ်တုဲ အကာဲအရာပရေၚ်ဇီုကပိုက်ဂှ်တှ်ေ ဂၠိုက်ဂၠါဲဂွံတီကေတ်လဝ် ဟွံမွဲဏီတုဲ အကာဲအရာပရေၚ်ပၞာန်ၜါလ္ပာ် သွက်ဂွံဆက်ကြံၚ်မ္ၚိုဟ်ရဂှ် သ္ကိုပ်ဗိုလ်ဇၞော် နဝ်ဗူ သ္ၚဳဂၠိပ်လဝ်ရ။

ဗ္ဒိုပ်လေဝ်လုံ နဒဒှ် ဗ္ဒိုပ်ထိၚ်ဒဝ် ဂၠံၚ် ဗာန်မဝ်-ဝိုၚ်မဝ်ဂှ် သ္ပပ္တံနူဂိတုဂျူလာၚ် သၞာံဏံတုဲ စဵုကဵု ဂိတုအံက်တဝ်ဗာ စၟတ်တ္ၚဲ(၂၀)ဂှ် နူကဵု KIA တံ လုပ်စိုပ်ဗ္တိုက်လဝ် နကဵုဇြဟတ်လၟိဟ်ဗွဲမဂၠိုၚ်ဂၠေၚ် ဗၞတ် (၈၁)ဝါရဂှ် ကံၚ်ဇြဳပၞာန်တံ လလောၚ်ပ္တိတ်လဝ်ပရိုၚ်ရ။

ဒပ်ကံၚ်ဇြဳပၞာန်ဂှ် တုဲကၠုၚ် ပ္ဍဲဂိတု အံက်တဝ်ဗာ စၟတ်တ္ၚဲ(၉)ဂှ် ဟိုတ်နူဗ္ဒိုပ်ပါဲဒဴဘဲပၞာန် မုၚ်လာၚ်ခက် မၞုံဗ္ဒါဲ ဂအုပ်ဌာန ဒပ်ပၞာန်ဗၠးၜးကချေၚ် (KIO/ KIA)တံ ဒးဒုၚ်ဗ္တိုက်ဂြာတ်လဝ်မခတိုဟ်ဂှ်ရ ကောန်ၚာ်မပါလုပ် ကောန်အရာပ် (၂၉)တၠ ချိုတ်တုဲ (၅၇)တၠ ဇီုကပိုက်ကလိဂွံလဝ်ဝပ်တုဲ ကြဴနူလၟေၚ်ဒဒှ်ဏံတုဲ ပရေၚ်ပၞာန်ၜါလ္ပာ် သာတုဲကြံၚ်မ္ၚိုဟ်မံၚ်ရ။

ပရိုၚ်-သြၚ်လောန်တိုၚ်မ်

ဗီု-KIA