ဒဳမအ်သဵု၊ အံက်တဝ်ဗာ(၂၄)
ပ္ဍဲဗ္ဒိုပ်ပါဲဒဴဘဲပၞာန် ပွိုၚ်ဍုၚ်ဒဳမအ်သဵု၊ တွဵုရးကရေၚ်ဍာဲဂှ် ဟိုတ်နူလွဟ်ဇၞော်ဒပ်ကံၚ်ဇြဳပၞာန်ပန်ပှော်နၚ် ဒတုံဗ္တိုဟ်က္ကးလဝ်တုဲ ကောန်ၚာ်ကောန်တှ်မွဲတၠ လကိုတ်တုဲ ဒးချိုတ်လဝ်ရဂှ် ဂွံတီကေတ် နူဇရေၚ်ညးရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
နူကဵုဒပ်အမၠံက်လွိုၚ်ကဝ်ကေုာံ တမ်ဒပ်ကံၚ်ဇြဳပၞာန် ဖျေံသ္ဇိုၚ်ဒဳမအ်သဵုတံဂှ် တုဲကၠုၚ် ပ္ဍဲဂိတုအံက်တဝ်ဗာ သတ္တာဟတတိယဂှ် ဟိုတ်နူပန်ပှော်လဝ်လွဟ်ဇၞော် အဆက်ဟွံပိုတ်သ္ကုတ်ဂှ်ရ ဒတုံဗ္တိုဟ်ထ္ကးအာလဝ် ပ္ဍဲဗ္ဒါဲဗ္ဒိုပ်ပါဲဒဴဘဲပၞာန် သဳတုဒဝ်(ဆီးသူ့တော်)ရ။
ဟိုတ်နူလွဟ်ဇၞော်ဒတုံဗ္တိုဟ်ထ္ကးအာလဝ်ဂှ်ရ ကောန်ၚာ် (၇)တ္ၚဲမွဲတၠဂှ် ဟိုတ်နူလကိုတ်အာ ရမျာၚ်လွဟ်ဇၞော်ဗြုတမ္ညဝ်တုဲ ဒးချိုတ်အာလဝ်ရဂှ် ညးရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်မွဲတၠဂှ် ဟီုရ။
ကောန်ၚာ်ကောန်တှ်ချိုတ်အာလဝ် ဒၟါနူလွဟ်ဇၞော်ဂှ် တိုပ်ကဵုလဝ်တုဲ ညးမဒှ်မိမတံဂှ်တှ်ေ ပဆုဲပြံၚ်ကဵုလဝ် ဒၞါဲဗၠးဘဲရဂှ် သ္ဂးရ။
အတိုၚ်တၚ်နၚ်သြၚ်လောန်တိုၚ်မ် ပကောံပကေဝ်လဝ် ၜိုတ်က္ဍစိုပ်ဂှ်မ္ဂး ပ္ဍဲတွဵုရးကရေၚ်ဍာဲဂှ် အပ္ဍဲသၞာံဏံ လၟေၚ်ဒဒှ် ကောန်ၚာ်ဟွံစိုပ်ဂိတုတ္ၚဲမွဲသာ် သၠးလဝ်တုဲ ဒးချိုတ်အာတံကဵု ဟိုတ်နူလွဟ်ဇၞော်တုဲ ဒးချိုတ်အာတံဂှ် နွံမံၚ် ဟွံအောန်နူကဵု (၁၀)တၠရ။
ကောန်ၚာ်နူအပ္ဍဲတွဵုရးကရေၚ်ဍာဲတံဂှ် ပ္ဍဲကာလသီအဝဵုဏံ မ္ၚးနူလွဟ်ဇၞော်ဂှ် ဟိုတ်နူအာဟာရဟွံဍိုက်ပေၚ်ကီု၊ ဟွံဂွံပရေၚ်မၚ်မွဲပရေၚ်ထတ်ယုက်တံကီုဂှ်ရ ဟွံထေက်ကဵုချိုတ်မွဲသာ် ဒးချိုတ်အာလဝ် နွံမံၚ်ရဂှ် ညးရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံ သ္ဂးအိုတ်ရ။
ပ္ဍဲဏံဂှ် ပ္ဍဲဗ္ဒိုပ်ပါဲဒဴဘဲပၞာန်တံကဵု ဒေသကွာန်ရးတံဂှ် ပရေၚ်ကောန်ၚာ်ကဵုဂိတုချိုတ်ဒၟံၚ် သာတုဲဂၠိုၚ်ကၠုၚ်ရဂှ် ဗော်သွးညးဗြဴကယျာန်တံ ဟီုဂးလဝ်ရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai