ပ္ဍဲပရေၚ်ဗ္တိုက် ဗ္ဒိုပ်(ကၚ်းမွန်ချောၚ်း)ဂှ် ပရေၚ်ချိုတ်ဂျိုၚ်ၜါလ္ပာ် နွံ

ကျာ်ထဝ်၊ အံက်တဝ်ဗာ(၂၄)

ပ္ဍဲပရေၚ်ဗ္တိုက်ဗ္ဒိုပ်(ကၚ်းမွန်ချောၚ်း) မၞုံကွာန်(ကၚ်းမွန်ချောၚ်း)၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် ပရေၚ်ဇီုကပိုက်ပြဟ်လလုဲ ၜါလ္ပာ် နွံလဝ်ရဂှ် ဂွံတီကေတ် အတိုၚ်လဟီုညးဒေသတံရ။

တုဲကၠုၚ်ပ္ဍဲဂိတုအံက်တဝ်ဗာ စၟတ်တ္ၚဲ(၂၂) အခိၚ်နူဂယး ၜိုတ်(၅)နာဍဳဂှ် ဒပ်ပၞာန်ဗၠးၜးကောန်ဂကူကရေၚ် KNLA၊ ဂကောံဒပ်ပံၚ်ကောံ PDF တံ လုပ်စိုပ်ဍိုက်ဗ္တိုက်လဝ် ဗ္ဒိုပ်ဗၠာဲသၟိၚ် တိဍာ်(ကၚ်းမွန်ချောၚ်း) ကောန်ဂကောံဒပ်ကံၚ်ဇြဳပၞာန်တံ ဖျေံဗ္ဒိုပ်မံၚ်တန်တဴမံၚ်ဂှ်ရ။

ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ်က္တဵုဒှ်လဝ် လလအ် ပွိုၚ် (၄၀)မိနေတ်တုဲ လ္ပာ်ကံၚ်ဇြဳပၞာန်တံလေဝ် ကလေၚ်ဒုၚ်ဗ္တိုက်လဝ် နကဵုလွဟ်ဇၞော် အဆက်ဟွံပိုတ်သ္ကုတ်ရဂှ် ညးဒေသတံ ဟီုဂးလဝ်ရ။

အတိုၚ်ဂလာန်ညးဒေသတံဂှ်မ္ဂး ပ္ဍဲပေါဲဗ္တိုက်ဏံဂှ် ပရေၚ်ဇီုကပိုက်ချိုတ်ဂျိုၚ်ၜါလ္ပာ် နွံလဝ်တုဲ ဟွံဂွံတီကေတ် လၟိဟ်ချိုတ်တ်ပၠိုတ်တ်ရဂှ် သ္ဂးရ။

ပ္ဍဲအကံက်ထလဳဂရာမ် လဝ်ဗဳဒပ်ပၞာန်တံဂှ်တှ်ေ ပ္ဍဲပရေၚ်ဗ္တိုက်ဗ္ဒိုပ်ဗၠာဲသၟိၚ်ဂှ် ကောန်သ္ဂံၚ် KNLA ကေုာံ PDFတံ ပြဟ်လလုဲလဝ် (၅)တၠရဂှ် ချူထ္မံက်ထ္ၜးလဝ် နွံမံၚ်ရ။

ဆေၚ်စပ်ကဵုလၟေၚ်ဒဒှ်ပရေၚ်ဗ္တိုက်ဏံတုဲ ၜိုန်ရသြၚ်လောန်တိုၚ်မ် ဆက်စၠောံသၟာန်သၟုက်လဝ် ညးတာလျိုၚ်ခရိုၚ်သဓီု KNU ကဵု ညးတာလျိုၚ် PDF ခရိုၚ်သဓီုတံဂှ်ကီုလေဝ် စဵုကဵုအခိၚ်လၟုဟ်ဂှ် ဟွံဂွံလဝ်အဆက်ဏီရ။

ဗ္ဒိုပ်ဗၠာဲသၟိၚ်တိဍာ်(ကၚ်းမွန်ချောၚ်း)ဂှ် ပ္ဍဲကာလသီအဝဵုဏံ ဒးဒုၚ်ဗ္တိုက်လဝ် ဟွံအောန်နူကဵု(၆)ဝါတုဲ ပရေၚ်ဇီုကပိုက်ချိုတ်ဂျိုၚ်ၜါလ္ပာ်ကီု သီုစမြိုၚ်ဗ္ဒိုပ်ဗၠာဲသၟိၚ်လ္ၚဵုတံ ပၟတ်တူလီုလာ်အာလဝ် နွံရ။

ပရိုၚ်-သြၚ်လောန်တိုၚ်မ်

ဗီု-CJ