သဓီု၊ အံက်တဝ်ဗာ(၂၄)
တွဵုရးဍုၚ်မန်ပွိုၚ်ဍုၚ်သဓီု ပ္ဍဲဂၠံၚ်ကွဳစက်မတ်မလီု-လဂုၚ် ဗ္ဒာဲဒဒန်ကျုံအုက် ဗ္စပ်ပွိုၚ်ဍုၚ်ၜဳကလေၚ်ကဵုကွာန်ဒုမ်ဝန် ပွုၚ်ဍုၚ်သဓီုဂှ်ကွဳစက်လ္ၚောဝ်ကျာ် ဒးမာၚ်တုဲ ကောန်အရာပ် ၂ တၠ ဒးလဝ်ဘဲဝပ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ယာဉ်ကွဳစက်လ္ၚောဝ်ကျာ် ဂကူလိုက်ထရာပ် ဒဳလုပ်ကၠုၚ်ပ္ဍဲပွိုၚ်ဍုၚ်သဓီု နူပွိုၚ်ဍုၚ်ၜဳကလေၚ်ဂှ် တ္ၚဲဏံဂိတုအံက်တဝ်ဗာ စၟတ်တ္ၚဲ ၂၃ အခိၚ်နူဂယး ၜိုတ် ၆ နာဍဳ ပ္ဍဲကဵုစိုပ် ဂၠံၚ်ကွဳစက်မတ်မလီု-လဂုၚ် စၟတ်မိုၚ်တိုၚ်(၁၂၃/၅)ဂှ် ဒးဆဵုဂဗလဝ်ကဵု ပရေၚ်မာၚ်ခတိုဟ်ရ။
ဟိုတ်နူယာဉ်လ္ၚောဝ်ကျာ်ဒးလဝ်မာၚ်တုဲ သၟာဒဳကွဳစက် ဥူဝဏ္ဏကျဝ်ကဵု ညးဍုၚ်ကွာန်လ္ၚောဝ်ကျာ်မထေတ်ထေတ်အောၚ် ပါဗက်ကၠုၚ် ပ္ဍဲကွဳစက်ဂှ် ဒးလဝ်ဘဲဝပ်ကဝေက်မာၚ်တုဲ ညးဒဳကွဳစက်ဂှ် အကာဲအရာဒးဒှ်ဓဝိၚ် နွံဒၟံၚ်ရ။
ဟိုတ်နူမာၚ်ပါ်ခတိုဟ်လဝ်တုဲ ယာဉ်ကွဳစက်လ္ၚောဝ်ကျာ်ဂှ်လေဝ် ဇီုကပိုက်လီုလာ်ဒးဒှ်လဝ်တုဲ ညးဒးလဝ်ဘဲဝပ်တအ်ဂှ် ပလံၚ်ဗစိုပ်လွဳလွတ်ကဵုဒၟံၚ် ပ္ဍဲရုၚ်ဂဥုဲညးဍုၚ်ကွာန်ခရိုၚ်သဓီုရဂှ် ဂွံတီကေတ်နူဂကောံရီုဗၚ်ဟံၚ်ပြာ်ပရေၚ်မၞိဟ်တအ်ရ။
အတိုၚ်ညးဒေသတအ်ဟီုလဝ်မ္ဂး ယာဉ်ကွဳစက်လ္ၚောဝ်ကျာ် ဒးဆဵုဂဗလဝ်ပရေၚ်မာၚ်ခတိုဟ်ဂှ် နူကဵုလ္ပာ်ရးဨရာဝတဳ ဒှ်ကၟဳကၠုၚ်လ္ၚောဝ်ကျာ် ပ္ဍဲကဵုတွဵုရးဍုၚ်မန်ရဂှ် ဟီုလဝ်ရ။
ပ္ဍဲဂိတုမေစၟတ်တ္ၚဲ ၂၁ တုဲကၠုၚ်တေံလေဝ် လ္တူဂၠံၚ်ကွဳစက် မတ်မလီု-လဂုၚ် ကွာန်ကၟာသိုၚ်၊ ပွိုၚ်ဍုၚ်သဓီုဂှ် ကွဳစက်ညးအာတရဴ ဒးလဝ်မာၚ်တုဲ ကောန်အရာပ် ၃ တၠ ဇီုကပိုက်ဒးလဝ်ဘဲဝပ်ဏီရ။
ပ္ဍဲဂၠံၚ်ကွဳစက် မတ်မလီု-လဂုၚ်ဂှ် ပ္ဍဲမွဲကာလဒပ်ပၞာန်သီအဝဵုဏံ ခြာဟွံလအ်ဟွံလအ် ဟိုတ်နူမာၚ်ပါ်ခတိုဟ်၊ ဟိုတ်နူပရေၚ်ပန်ပှော်ၜါလ္ပာ်တုဲ ပရေၚ်ကောန်အရာပ်ညးဍုၚ်ကွာန်တအ် ဇီုကပိုက်ဒးချိုတ်ဒၟံၚ် နွံရ။
ပရိုၚ်- သြၚ်လောန်တိုၚ်မ်
ဗီု – ချာန်နေဝ်တြးဝါဒကံၚ်ဇြဳပၞာန်
sanlontai