ပါလုပ်သီုမတ်မလီု ပ္ဍဲမွဲတွဵုရးဍုၚ်မန် ပရေၚ်ပၟတ်ဓါတ်လလဳပိုတ်ပၠိုတ် သာတုဲပရေံကၠုၚ်

မတ်မလီု၊ အံက်တဝ်ဗာ(၂၄)

ပါလုပ် သီုဍုၚ်ဇၞော်တွဵုရးဍုၚ်မန် မတ်မလီု ပ္ဍဲမွဲအလုံတွဵုရးတံဂှ် ပ္ဍဲဂိတုဏံ ဒးထပ်ဂဗကၠုၚ်မံၚ် ပရေၚ်ပၟတ်ဓါတ်လလဳပိုတ်ပၠိုတ် အကာဲအရာပရေံပရေံရဂှ် ဂွံတီကေတ် အတိုၚ်ညးဒေသတံ လဴထ္ၜးလဝ်ဂှ်ရ။

ပရေၚ်ပၟတ်ဓါတ်လလဳပိုတ်ပၠိုတ် အကာဲပရေံပရေံဂှ် ပ္ဍဲဂိတုတုဲကၠုၚ်တေံဂှ် ၜိုန်က္တဵုဒှ်လဝ် ပ္ဍဲဍုၚ်ဍောတ်တ်သၟးကီုလေဝ် လၟုဟ်ဏံဂှ်တှ်ေ လ္တူဍုၚ်မတ်မလီုဂှ် ပၟတ်ဓါတ်လလဳပိုတ်ပၠိုတ်ကၠုၚ် ပရေံပရေံရ။

ပရေၚ်တြးပၟတ်ဓါတ်လလဳဂှ် နူကဵုကမၠောန်တြးပၟတ်ဓါတ်လလဳ သၟဝ်တဲကံၚ်ဇြဳပၞာန်ဂှ် ဗက်ကဵုကွာန်အရာပ်တံတုဲ ကဵုအာပၟတ်မွဲတ္ၚဲ ပွိုၚ်(၈)နာဍဳရောၚ်ဂှ် လလောၚ်တြးလဝ်ကီုလေဝ် ပြဟ်ဟ်ဏံဂှ် အတိုၚ်မွဲတ္ၚဲမှ ဂွံမံၚ်ပၟတ်ဓါတ်လလဳ ပွိုၚ်(၄)နာဍဳဓဝ်ရ။

အခိၚ်ဂွံပၟတ်ဓါတ်လလဳတံဂှ်လေဝ် ကၠာတေံဂှ် ကဵုမွဲအလန် (၂)နာဍဳ ထပိုတ်မံၚ် (၄)နာဍဳတုဲ ပြဟ်ဟ်ဏံဂှ်တှ်ေ မွဲအလန်မ္ဂး ဂွံၜိုတ်ပွိုၚ် မွဲနာဍဳကဝက်ရတုဲ အခိၚ်ပၟတ်ပၠိုတ်ဂှ် မွဲအလန်မ္ဂး လအ်ကၠုၚ် နူ (၆)နာဍဳ စဵုကဵု (၈)နာဍဳရ။

ကောန်ဍုၚ်မတ်မလီုမွဲတၠဂှ် မွဲတ္ၚဲမ္ဂး ဟိုတ်နူဂွံမံၚ်ပၟတ် ၜိုတ်ပွိုၚ် (၃)နာဍဳဓဝ်ဂှ်ရ ဒးဂဗမံၚ်ကဵု အကာဲအရာဟွံပြေပြံၚ် နာနာသာ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

“ပၟတ်ဂှ် မွဲတ္ၚဲ ကဵုၜိုတ်ပွိုၚ် (၃)နာဍဳဓဝ်ရ။ ပၟတ်ဟွံကၠုၚ်တှ်ေ ဒးရာန်ချး။ ဒဗစုက်ပၟတ်၊ ကမၠောန်ယှုက်ရဣဒှ်။ အခိၚ်ပၟတ်ကၠုၚ်တှ်ေ အရာတောဲ ကဵုပၟတ်ဓါတ်လလဳလောဲလောဲဂှ် လၟုဟ်ဂှ် အခိၚ်ဗွဲမလအ်လ သွက်ဂွံဍုန်သွ မွဲမွဲအလန်လေဝ် ဒးဗ္စုက်မံၚ်ပၟတ်ရ။ ကမၠောန်ဒးတုဲ ပွိုၚ်ကဵုကဝက်နာဍဳဂှ် လၟုဟ် ဒးကၠောန်မံၚ် ဗ္ဒါဲ (၁)နာဍဳရ။ မုလေဝ်ဟွံပြေပြံၚ်ရ။ လှုဲလေဝ်အိုတ်ဂၠိုၚ်၊ ဒှ်မံၚ်ဘဝ အတိုၚ်ဍေံတံဗ္ဂေတ် ဒးဒုၚ်ဂေတ်မံၚ်ရ။ တုဲပၠန် အတိုၚ်မွဲတ္ၚဲ ဍောၚ်မံၚ်တုဲ စိုပ်အခိၚ်ဗ္တံ ကြပ်တိက်ဂှ်လေဝ် ပၟတ်ဟွံကၠုၚ်တှ်ေ လၟုဟ်စိုပ်ကၠုၚ်ရာသဳကညၚ်ယျတှ်ေ သာတုဲကတဴတုဲတှ်ေ ဟွံပြေပြံၚ်ရ။ ဇဳဒိုဟ်ဂှ် ဗီုလဵုမှ ဟွံပြေပြံၚ်ရ” သာ်ဝွံ သ္ဂးရ။

သ္အာၚ်နူဂှ်ပၠန် ဟိုတ်နူဂွံပၟတ်ဓါတ်လလဳအောန်မံၚ်ဂှ်ရ စနူကဵုကမၠောန်ဂှ် လအ်လလဇုဲလဇဒၟံၚ်နွံတုဲ ဟိုတ်နူသြန်လှုဲအပဵုအိုတ်လေဝ် က္တဵုဒှ်မံၚ်ဂှ်ရ ဘဝပရေၚ်ပိုန်ဒြပ်မၞိဟ်တံလေဝ် ဒးဂဗကၠုၚ်မံၚ် အခက်အခုဲရဂှ် ညးဆက်ဟီုရ။

တၠကမၠောန် SME မွဲတၠဂှ်လေဝ် ပရေၚ်ကလိဂွံပၟတ်ဓါတ်လလဳတံဂှ် ကလေၚ်စိုပ်အာအခိၚ် လောန်ကၠုၚ် (၄၀)သၞာံတေံဂှ်တုဲ သွက်ကမၠောန်ဂွံဂေတ်ဂြိပ်ဂှ် ဒးဗ္ဒဗ္ဒါဲဒၟံၚ် ပၟတ်စက်တံရဂှ် သ္ဂးရ။

“စရိတ်ပၟတ်ဂှ်လေဝ် ကံက်ဗပဵု၊ ပၟတ်ဂှ်လေဝ် ဟွံပလေဝ်ပလေတ်၊ ပၟတ်လေဝ်ဟွံကၠုၚ်၊ ဇကုညး ညးပတှ်ေရ။ လောန်ကၠုၚ်ပွိုၚ် (၄၀)သၞာံတေံလေဝ် အာမံၚ် အတိုၚ်ဏံရ။ ကၠောန်ကမၠောန်မ္ဂး ပၟတ်ဟွံကၠုၚ်တှ်ေ ပံက်စက်၊ ပၟတ်ကၠုၚ်တှ်ေ ဒေါံ။ ကမၠောန်ဇကုဂှ်လေဝ် ကမၠောန်ဒးသုၚ်စောဲပၟတ်ဓါတ်လလဳဟီုတှ်ေ သာတုဲလှုဲအိုတ်ဂၠိုၚ်ရ။ အခိၚ်လၟုဟ်ဂှ် ပရေၚ်သွံရာန်လေဝ် ဟွံမွဲကွေံကွေံ။ စရိတ်အိုတ်လေဝ် ဂၠိုၚ်မံၚ်။ လီုမံၚ်ၜိုတ်ကဝက်တ္ၚဲ။ အခိၚ်ဗ္တံတှ်ေလေဝ် လ္ပာ်ပိုဲတံဂှ် ကာလမှာန်တှ်ေလေဝ် မှာန်ရ။ ကာလဟွံကၠုၚ်လေဝ် ဟွံကၠုၚ်ပုဟ် ဒှ်မံၚ်ဗီုဂှ်ရ” သာ်ဝွံ ညးဟီုရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ဂှ်တှ်ေ တၚ်နွံပၟိက်ဇြဟတ်ဓါတ်လလဳနွံမံၚ်ဂှ် ဟိုတ်နူကိုန်စဳမာန် ပရေၚ်ကၠောန်ပ္တိတ်ဇြဟတ်ဓါတ်လလဳ ထ္မံက်လဝ်ရုပ်ရဴ လောန်ကၠုၚ်ၜိုတ်(၁၀)သၞာံတေံ ဒေါံဒေၚ်အာ နကဵုဟိုတ်နာနာသာ်တံမဒှ်ရဂှ် ထ္ၜးလဝ်ဟိုတ်ရ။

တၚ်နွံပၟိက်ဇြဟတ်ဓါတ်လလဳဂှ် သုၚ်စောဲဇြဟတ်တ္ၚဲ၊ ဇြဟတ်ကျာ ကေုာံ ယက်ကၠေၚ်စၞပၟတ် သုၚ်စောဲကာမ်တံတုဲ သွက်ဂွံပ္တိတ်ဓါတ်လလဳဂှ် ထ္မံက်မံၚ်ရုပ်ရဴရဂှ် တုဲကၠုၚ်ပ္ဍဲဂိတုအဝ်ဂါတ် စၟတ်တ္ၚဲ(၈) အခိၚ်ဆဵုဂဗကု ပူဂိုလ်ကံၚ်ဇြဳပၞာန်ခါန်ကၞက်ကဆံၚ်ကၟိန်ဍုၚ်တံဂှ် ဟီုဂးလဝ်ရ။

ပ္ဍဲတွဵုရးဍုၚ်မန်ဂှ် ပၟတ်ဓါတ်လလဳနူကဵုကၟိန်ဍုၚ်တြးကဵုမံၚ်ဂှ် မ္ၚးနူပွိုၚ်ဍုၚ်ရေဝ်တုဲ က္လိဂွံမံၚ် ဇၟာပ်ပွိုၚ်ဍုၚ်ကီုလေဝ် လက်ထက်ကံၚ်ဇြဳပၞာန်ဂှ်တှ်ေ ဒးဂဗကၠုၚ် ပၟတ်ဓါတ်လလဳပိုတ်ပၠိုတ် တုပ်သၟဟ်ကုရးကေုာံ တွဵုရးတၞဟ်ဟ်တံကီုရ။

ပွိုၚ်ဍုၚ်ရေဝ် ဟွံကလိဂွံပၟတ်ဓါတ်လလဳ နူကၟိန်ဍုၚ်တြးကဵုဏီတံဂှ် ဟိုတ်နူၚုဟ်ကၠေၚ်စက်က္ဍၚ်တိုန်ကၠုၚ်တုဲ ဒးကဵုဂၠိုၚ်ကဵုဆတုဲ ဒးသုၚ်စောဲဒၟံၚ် ပၟတ်ဓါတ်လလဳ နူကဵုကုမ္ပဏဳပုဂ္ဂလိကတံ သွံတြးကဵုမံၚ်တံ မွဲယူနေတ် စဵုကဵု (၂၀၀၀)ဒ္ကေဝ်ရ။

ပရိုၚ်-သြၚ်လောန်တိုၚ်မ်

ဗီု-Twitter