သွက်ဂွံစၟတ်သမ္တီကဵု ဒပ်မၚ်မွဲအေဿလာမ္မေတ် နဒဒှ်ဂကောံပ္ကီုပရာပ်ဂှ် အမေရိကာန်ဗတိုက်ဖ္အောဝ်ယူကေ

ဝါယှေန်တာန်၊ အံက်တဝ်ဗာ(၂၄)

သွက်ဂွံလလောၚ်တြးကဵု ဒပ်မၚ်မွဲပၠန်ဂတးအေဿလာမ္မေတ်အဳရာန် (IRGC) နဒဒှ်ဂကောံပ္ကီုပရာပ်ဂှ် အမေရိကာန် ထပ်အာတ်မိက်လဝ် အလဵုအသဳဗျိတိၚ်ရဂှ် ဂွံတီကေတ်ရ။

ပ္ဍဲကဵုပေါဲပၞာန်ဟာမေဿ် အဳရာန်ထ္ၜလဘာ်ကဵုဒၟံၚ်လ္ပာ်လကြဴ ချဳဒရာၚ်လဝ် ပ္ဍဲဂိတုအံက်တဝ်ဗာစၟတ်တ္ၚဲ ၇ ဂှ် ပ္ဍဲကဵုဂကောံဏံ ပရေၚ်စောတ်စောဲ တဳဟဳရာန်ပါလုပ်ဒၟံၚ် မံက်တိတ်ကၠုၚ်လဝ်ရ။

ဟိုတ်နူပရေၚ်ဟာမေဿ်တအ် ဗတိုက်လဝ်ဂၠိုၚ်ကဵုလ္ၚီတုဲ ပွိုၚ်မွဲတ္ၚဲဓဝ်ဂှ် ပါလုပ်သီုကောန်ၚာ်သၟတ် ကေုာံမၞိဟ်အယုက်ဇၞော်တအ် ကောန်အရာပ်အေဿရေ ဟွံအောန်နူ ၁၄၀၀ ဒးဒုၚ်ပြိုက်ဂစိုတ်လဝ် ဓဇန်ဓဇန်ကြာန်န်တုဲ မၞိဟ်ဒးဒုၚ်သ္ပဂၞန် ၂၁၂ တၠ နူဂကူ ပံၚ် ၄၀ ဂကူပြၚ် ဒးဒုၚ်သ္ပဂၞန်ကော်ကေတ်ဏာလဝ် ပ္ဍဲသြၚ်ဂၚ်ဇၞော်ဂါဇြာရ။

နူကဵုသၞာံ ၂၀၁၉ တေံ ကၟာတ်လဒဵုတာဒၞာလဝ် IRGC ပ္ဍဲအမေရိကာန်တုဲ ပ္ဍဲအရာစၟတ်သမ္တီ နဒဒှ်ဂကောံပ္ကီုပရာပ်ဗီုလၟုဟ်ဏံလေဝ် သွက်ဂွံပံၚ်တောဲကၠောန်ရေၚ်တၠုၚ်ညးသ္ကအ်ဂှ် ဗတိုက်ဖ္အောဝ်လဝ် မဟာမိတ်ညးတအ် ပါလုပ်သီုဗျိတိၚ် ဍုၚ်တီကွာန်ညာတ်ရဂှ် အမေရိကာန် ဟီုသ္ဂးလဝ်ရ။

​မေတ်တရူမဳလာ ညးမၞုံအခေါၚ်ဟီုဂးဌာနပရေၚ်ဍုၚ်သ္အာၚ် အမေရိကာန်ဂှ်မ္ဂး “ကၟိန်ဍုၚ်တၞဟ်တအ် ထေက်ကဵုဒးစၟတ်သမ္တီ IRGC နဒဒှ်ဂကောံပ္ကီုပရာပ်ထေက်ဏောၚ် ပိုဲပတှ်ေကေတ်လဝ် ပေၚ်ၚ်ရ။ ဣဏံဂှ် ဒှ်သွဟ်သောၚ်ကၠး ဂၠိုၚ်ၚ်ကဵုအလန်မွဲရ”ဂှ် ဟီုလဝ်ရ။

ကောန်ဂကောံ နူဗော်ကောန်သာဗေတေတ် ဗွဲမဂၠိုၚ်တအ်ဂှ် ဟိုတ်နူအာတ်မိက်လဝ် ဍုၚ်တီကွာန်ညာတ်တုဲ ပရေၚ်ချဳဒရာၚ်လၟုဟ်ဏံ က္တဵုဗဒှ်ကဵုဇြဟတ်ဓရိုဟ် ပ္ဍဲဗျိတိၚ် ဂၠိုၚ်တိုန်ရ။

IRGC ဂှ် ပါလုပ်လဝ် ပ္ဍဲပရေၚ်ဗတိုက်ပန် အလုံံဂၠးကဝ်မွဲ ပ္ဍဲဒၞာဲဗွဲမဂၠိုၚ်ရဂှ် အမေရိကာန် ပတှ်ေကေတ်လဝ်ပေၚ်ၚ်တုဲ နကဵုဝန်ဇၞော်ကဆံၚ်လ္တူ ဗျိတိၚ်တအ်ကီု သီုသၞာဲဒဴဴပရေၚ်ဂီုကၠီုတအ်ဂှ် သွက်ဂွံစွံသတိ ကၟိန်ဍုၚ်သမ္မတအေဿလာမ္မေတ် က္တဵုဒှ်ကၠုၚ် လ္တူတိဍာ်ဗျိတိၚ်ဂှ် ထပ်ဟီုလဝ်ရ။

ဂကောံဏံဂှ် သွက်ဂွံမၚ်မွဲရံၚ်စံၚ် သဘဴဓဝ်ဆေၚ်စပ်ကဵုကွေတ်ဝါဒပၠန်ဂတးအဳရာန် သၞာံ ၁၉၇၉ တေံဂှ် ဒက်ပ္တန်လဝ်ဗွဲကိုပ်ကၠာတုဲ အခိၚ်လအ်လကၠုၚ်ဗက် ညးတအ်အုပ်ဓလီုကၠုၚ် ပရေၚ်ပၞာန်၊ ပရေၚ်ဍုၚ်ကွာန် ကေုာံကဏ္ဍပရေၚ်ပိုန်ဒြပ် ပ္ဍဲကၟိန်ဍုၚ်တုဲ ပြံၚ်သၠာဲကၠုၚ် နဒဒှ်ဂကောံဇြဟတ် ပၟိက်ဇၞော်ရဂှ် အမေရိကာန် ဟီုလဝ်ရ။

Ref: IranInternational