မတ်မလီု -အံက်တဝ်ဗာ (၂၆)
သွက်ဂွံသၠုၚ်ပ္တိုန်အသိၚ်ပရေၚ်ပံၚ်တောဲရေၚ်တၠုၚ် ပရေၚ်ပၞာန် ပရေၚ်ဍုၚ်ကွာန် အကြာအလဵုအသဳညဳသၟဟ်ကောန်ဂကူ (NUG) ကဵု ဂကောံမဟာမိတ်ကောန်ဍုၚ်အရၚ်တအ် နွံဒၟံၚ်ပၟိက်ရဂှ် သမ္မတ NUG ယာယဳ ဒူဝါလယှဳလ ဟီုလဝ်ရ။
ပ္ဍဲကဵုကောံဓရီု ဂကောံအလဵုအသဳညဳသၟဟ်ကောန်ဂကူ မရနုက်ကဵု (၃၃) ဝါ ကၠောန်ဗဒှ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၂၄) ဂှ် ဟီုဂးလဝ်သာ်ဏံရ။
“အကြာဂကောံအလဵုအသဳညဳသၟဟ်ကောန်ဂကူကဵု ဂကောံမဟာမိတ် ကောန်ဍုၚ်အရၚ်တအ်ဂှ် နွံဒၟံၚ်ပၟိက် သွက်ဂွံသၠုၚ်ပ္တိုန် အသိၚ်ပရေၚ်ပံၚ်တောဲရေၚ်တၠုၚ် ပရေၚ်ပၞာန် ပရေၚ်ဍုၚ်ကွာန်ရ။ ပရေၚ်ပံၚ်တောဲကၠုၚ် အတိုၚ်ပရေၚ်ဍုၚ်ကွာန်ဂှ်လေဝ် သာတုဲ နွံဒၟံၚ်ပၟိက်ဗွဲတၟေၚ်ဂှ် ဂွံညာတ်ကေတ်ရ။ ဟိုတ်ဂှ် အကြာ က္ဍိုပ်သ္ကိုပ်ညးလုပ်ဂကောံအလဵုအသဳပိုဲကဵု က္ဍိုပ်သ္ကိုပ်မဟာမိတ်ကောန်ဍုၚ်အရၚ်တအ်ဂှ် ပရေၚ်ဍုက်ကေဝ်၊ ဆာန်ကၟိန် ကေုာံဓဝ်ပတှ်ေ လ္တူနူဏံ ညံၚ်ဂွံသၠဲတြးတိုန်ကၠုၚ် ထေက်ကဵုဒးဒက်ပ္တန် ထိၚ်ဒက်ရောၚ်” ဂှ် သမ္မတ NUG ယာယဳ ဟီုလဝ်ရ။
သ္အာၚ်နူဂှ်ပၠန် ပရေၚ်ပံၚ်တောဲ စပ်ကဵုပရေၚ်ပၞာန် ပရေၚ်ဍုၚ်ကွာန်ဂှ် ဒုၚ်သ္ဇိုၚ်ကဵု လ္တူဓဝ်ပတှ်ေတုဲ ဓဝ်ပတှ်ေ ဟီုဂှ်လေဝ် တန်တဴဴဒၟံၚ်ကဵု အပိုၚ်ခြာၚုဟ်မး ကေုာံတၚ်ဒုၚ်ဂိုၚ်ကေတ် တၚ်ပတှ်ေဂှ်ရ တၚ်နွံပၟိက်ပရေၚ်ဍုၚ်ကွာန် ဂကောံမဟာမိတ် ကောန်ဍုၚ်အရၚ်တအ် နွံဒၟၚ်ပၟိက်ဂှ်ကဵု ဆန္ဒပရေၚ်ဂကူတအ်ဂှ်လေဝ် ထေက်ကဵုဒးသ္ပဂရုဗွဲတၟေၚ်ရဂှ် ဟီုလဝ်ဏီရ။
ပ္ဍဲကဵုပရေၚ်ပံၚ်ကောံမဟာမိတ်တအ်လေဝ် သွက်ဂွံကၠိုဟ်ခၠၚ်ဒုၚ်ကေတ်တဲ သရုပ်စၟတ်သမ္တီ တၞဟ်ခြာ ဒတုဲမြမောဝ်ဟွံတုပ်သၟဟ် နကဵုလစွံစိုတ်သၠဲသၠဲလးလးဂှ် ပၟိက်ဇၞော်ဒၟံၚ် ဗွဲတၟေၚ်ရဂှ် ဟီုလဝ်ရ။
အခိၚ်လၟုဟ်ဏံဂှ် ပၠန်ဂတး ဂွံကၠုၚ်အသိၚ်တုဲ ဟိုတ်နူသၠဲတိုန်ကၠုၚ်ဂှ်ရ ပရေၚ်ဆက်ဆောံ ပရေၚ်ပၞာန်ပရေၚ်ဍုၚ်ကွာန် NUG ကဵု ဂကောံရပ်လွဟ်မဟာမိတ်ကောန်ဍုၚ်အရၚ်တအ်ဂှ် ပၟိက်ဇၞော်လ္တူဇၞော် ပၟိက်ဇၞော်တိုန်ကၠုၚ်တုဲ ပါဲနူဒုၚ်ဒစေၚ်ဗၠေၚ်ဟွံမာန်ဂှ် ပရေၚ်လုတ်ဒကုတ်လေဝ် ညိဓဝ်ဟိုတ်နူဟွံထေက်ကဵုဒှ်ဂှ်ရ သွက်ဂွံသ္ပဂရုဗွဲတၟေၚ်ဂှ် ဟီုဗ္ကန်လဝ် ဂကောံအလဵုအသဳရ။
ကောံဓရီုဂကောံအလဵုအသဳညဳသၟဟ်ကောန်ဂကူဂှ် ဝန်ဇၞော်ကၟိန်တအ်ကီု သီုကဵုညးတာလျိုၚ်မဆေၚ်စပ်တအ် တိုန်စိုပ်လဝ်ရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
ဗီု – NUG
sanlontai