ၜဳကလေၚ်၊ နဝ်ဝေမ်ဗာ (၅)
တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ကွာန်ဝၚ်က၊ ပ္ဍဲဆေၚ်အရက် နွံဇိုၚ်ဂၠံၚ်ကွဳစက် လဂုၚ်-မတ်မလီုဂှ် ကောန်ဒပ်ဗၠာဲသၟိၚ် ကံၚ်ဇြဳပၞာန်မွဲတၠ ဒးဒုၚ်ပန်လဝ်ကဵုလွဟ် ဒးချိုတ်လဝ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကောန်ဒပ်ဗၠာဲသၟိၚ် နူကဵုဗဒိုပ်ဗၠာဲသၟိၚ် တိဍာ်ဝၚ်က ဇြဝ်နိုၚ်ဝေန်ဂှ် တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၄) အခိၚ်နူဂယး ၜိုတ် (၁၁) နာဍဳ အခိၚ်နွံဒၟံၚ် ပ္ဍဲဆေၚ်အရက် ဥူပေါၚ်တိုဝ်ဂှ် မၞိဟ်ဟွံတီယၟုၜါတၠ ကၠုၚ်ကဵုကွဳလိုန်ဓာတ်တုဲ ပန်လဝ်ကဵုလွဟ်ရ။
ဟိုတ်နူဒးဒုၚ်ပန်လဝ်ကဵုလွဟ်တုဲ ကောန်ဒပ်ဗၠာဲသၟိၚ်ဇြဝ်နိုၚ်ဝေန် ဒးလဝ်ဘဲဝပ်မကမ်ဖံက်လုပ်ဂွံလဝ် ပ္ဍဲကအ်၊ ပ္ဍဲဒဳ၊ ပ္ဍဲတဲတအ်တုဲ ဒၞာဲဒှ်ပရေၚ်ပရောဂှ်ဟေၚ် ဒးချိုတ်အာလဝ်ရ။
ကြဴနူကောန်ဒပ်ဗၠာဲသၟိၚ်ဇြဝ်နိုၚ်ဝေန် ဒးဒုၚ်ပန်ဂစိုတ်တုဲဂှ် ကောန်ဒပ်ကံၚ်ဇြဳပၞာန် ကၠုၚ်စိုပ်စၟဳစၟတ်လဝ်တုဲ ဇွဂှ် ပ္ဍိုက်ကေတ်ဏာလဝ် ပ္ဍဲရုၚ်ဂဥုဲညးဍုၚ်ကွာန် ပွိုၚ်ဍုၚ်ၜဳကလေၚ်ရဂှ် ဟီုလဝ်ရ။
ကောန်ဒပ်ဗၠာဲသၟိၚ် ဒးချိုတ်လဝ်ဂှ် နူကဵုဗဒိုပ်ဗၠာဲသၟိၚ်ၝောံဍုၚ်ၜဳကလေၚ် ပြံၚ်စိုပ်ကၠုၚ်လဝ် အကြာၜိုတ် (၆) ဂိတုဟေၚ်ဏီရဂှ် ဂွံတီကေတ် အတိုၚ်လဟီုညးဒေသတအ်ရ။
ပ္ဍဲဂိတုသေပ်တေမ်ဗာ တုဲကၠုၚ်တေံလေဝ် ပ္ဍဲဂၠံၚ်ကွဳစက် လဂုၚ်-မတ်မလီု ပွိုၚ်ဍုၚ်ပံၚ် တွဵုရးဍုၚ်မန်ဂှ် ဗၠာဲသၟိၚ်ထိၚ်ရး နူဗဒိုပ်ဗၠာဲသၟိၚ်ၝောံဍုၚ်ပံၚ် ကိုဝ်ကိုဝ်လွေန် ဟိုတ်နူဒးဒုၚ်ပန်တုဲ ဒးချိုတ်လဝ်ရ။
ပ္ဍဲတွဵုရးဍုၚ်မန်ဂှ် ပ္ဍဲမွဲကာလသီအဝဵုဏံ ဟိုတ်နူ ကောန်ဒပ်ဗၠာဲသၟိၚ်ကံၚ်ဇြဳပၞာန်တအ် ဒးဒုၚ်ပန်ဂစိုတ်ဒၟံၚ်ခြာဟွံလအ်ဟွံလအ်ဂှ်ရ ကံၚ်ဇြဳပၞာန် တာဒၞာလဝ် ညးမွဲတၠဓဝ် ညံၚ်ဟွံဂွံတိတ်အာ မ္ၚးဒပ်ရ။
ပရိုၚ် – သြၚ်လောန်တိုၚ်မ်
ဗီု -SBM
sanlontai