ညံၚ်လေဝ်ပေန်၊ နဝ်ဝေမ်ဗာ (၅)
ပ္ဍဲတိဍာ်ထိၚ်ဒဝ် ဗော်သွးကောန်ဂကူကရေၚ် KNU ဂှ် ပ္ဍဲမွဲကာလသီအဝဵုဏံ ဟိုတ်နူဒပ်ကံၚ်ဇြဳပၞာန် ဖံက်ပ္ကဝ်အခေါၚ်အရာမၞိဟ်တုဲ ညးဒှ်ဒဒိုက်ပါဲဓလေတ်ပၞာန် စဵုကဵု (၇) ကိုတ် ဂၠိုၚ်တိုန်ကၠုၚ်ရဂှ် ဂွံတီကေတ် အတိုၚ်လိက်ဒုၚ်စဳရေၚ် KNU ဗဟဵု ပ္တိတ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၃) ရ။
နူကဵုသၞာံ ၂၀၂၁ ဂိတုဖေဖဝ်ဝါရဳ ဒပ်ပၞာန်သီကေတ်အဝဵုတုဲ စဵုကဵုဂိတုသေပ်တေမ်ဗာ သၞာံဏံ ပ္ဍဲကဵုတိဍာ်ထိၚ်ဒဝ်ကဝ်ဒူလေဝ် ညးဍုၚ်ကွာန် (၇) ကိုတ်ပြၚ်တအ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ် ဒၞာဲဌာန်ဗၠးဘဲရဂှ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် KNU ရ။
ပ္ဍဲကဵုဂှ် နူဂိတုဂျာန္နဝါရဳသၞာံဏံ စဵုကဵုဂိတုသေပ်တေမ်ဗာ ပ္ဍဲပွိုၚ် (၉) ဂိတုဏံ ဟိုတ်နူဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာ သီုပန်ဖျေံလဝ်လွဟ်ဇၞော်တုဲ ကောန်အရာပ် (၁၄၀) ပြၚ် ဒးချိုတ်လဝ်တုဲ ဇီုကပိုက်ဒးလဝ်ဘဲဝပ် (၄၆၀) ပြၚ်ရဂှ် ဓမံက်လဝ် ပ္ဍဲတၚ်လလောၚ်တြးရ။
သ္အာၚ်နူဂှ်ပၠန် ပရေၚ်ဒပ်ကံၚ်ဇြဳပၞာန် ဖံက်ပ္ကဝ်လဝ်အခေါၚ်အရာမၞိဟ် လၟိဟ်ဟွံအောန်နူ (၁၈၄၇) ဝါ က္လိလောန်လဝ်တုဲ ဟိုတ်နူဒပ်ကံၚ်ဇြဳပၞာန် ဗတိုက်လဝ်တုဲ သ္ၚိဌာန်ညးဍုၚ်ကွာန် (၁၅၈၄) မ၊ စမြိုၚ်ညးဍုၚ်ကွာန်ပိုၚ် (၈၅) မ၊ ရုၚ်ဂဥုဲ ရုၚ်ကဵုဂဥုဲ (၆) ရုၚ်၊ ဘာဗ္တောန်လိက် (၁၀) ဘာ၊ ဘာပရေၚ်ဘာသာ (၃၂) ဘာ ဇီုကပိုက် ဒးလီုလာ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။
ဒပ်ကံၚ်ဇြဳပၞာန်ဂှ် နူကဵုဍာန်ကျာ နကဵုက္ၜၚ်ကျာပၞာန်၊ က္ၜၚ်ကျာသၞေၚ်ဝဲပၞာန်၊ က္ၜၚ်ကျာ မသက္ကုမၞိဟ်ဒဳကီု သီုဂြာတ်ထောံဖျေံဗုမ် ပ္တဝ်လဝ်ကဵုကောန်အရာပ် ဗတိုက်ဒၟံၚ်ကီု သီုပန်ဗတိုက်လဝ်ကဵုလဝ်ကဵုလွဟ်စက် လၟိဟ်ဟွံအောန်နူ (၃၆၅) က္လိလောန်လဝ်ရဂှ် KNU ဟီုလဝ်ရ။
ပ္ဍဲကဵုသၞာံဏံ သီုဟိုတ်ဟၟဲမွဲသာ် ဟိုတ်နူဒပ်ကံၚ်ဇြဳပၞာန် ရပ်ဒက် သီုပြိုက်ဂစိုတ်လဝ် လ္တူညးဍုၚ်ကွာန် ၜိုတ် (၄၄) ဝါ ကၠောန်လဝ်ဂှ်ရ ညးဍုၚ်ကွာန် နူကွာန်အပံၚ်လၟိဟ် (၄၃) ကွာန် ဟွံအောန်နူ (၁၃၀) တၠ ဒးဒုၚ်ရပ် ဒးဒုၚ်ပြိုက်ဂစိုတ်လဝ် (၃၀) တၠတုဲ ညးဍုၚ်ကွာန် (၃) တၠဂှ်လေဝ် သုၚ်စောဲစကာလဝ် နဒဒှ်ပဝ်တာ နွံလဝ်ရဂှ် ဂွံတီကေတ်အတိုၚ်တၚ် လလောၚ်တြးဂှ်ရ။
ပ္ဍဲကဵုကၟိန်ဍုၚ်ဗၟာ ပ္ဍဲကာလသီအဝဵုဏံ ဟိုတ်နူပဋိပက္ခကီု သီုပရေၚ်ဂီုကၠီုဟၟဲတုဲ လၟိဟ်မၞိဟ်ဗ္ဒာဲ ၁ ဒသမ ၇ ပြကောဋိကိုတ် ထောံသ္ၚိဌာန်တုဲ ဒးဂြိပ်ဒဴဴဒၟံၚ်ရဂှ် ရုၚ်ပ္ညဳပ္ညပ်ဆေၚ်စပ်ကဵုအရီုဗၚ်ဗ္စာရဏာပရေၚ်မၞိဟ် ကုလသမဂ္ဂ (UNOCHA) လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၂) ဂှ်ရ။
ပရိုၚ် – သြၚ်လောန်တိုၚ်မ်
ဗီု – KNU
sanlontai