ဗဒိုပ်ကံၚ်ဇြဳပၞာန် ပ္ဍဲဍုၚ်လာယှိုဝ်ကဵု ဍုၚ်ဏာမ်ခါမ် (၄) ဗဒိုပ် ဒးထပ်ဒုၚ်သီကေတ်လဝ်ပၠန်

ဏာမ်ခါမ်၊ နဝ်ဝေမ်ဗာ (၅)

တွဵုရးသေံသၟဝ်ကျာ၊ ဗဒိုပ်ပၞာန်ညးဍုၚ်ကွာန် မၞုံပ္ဍဲပွိုၚ်ဍုၚ်လာယှိုဝ် (၂) ဗဒိုပ်ကဵု ဗဒိုပ်ကံၚ်ဇြဳပၞာန် မၞုံဍုၚ်ဏာမ်ခါမ် (၂) ဗဒိုပ် သီကေတ်မာန်လဝ်ရဂှ် ဒပ်ပၞာန်တအာၚ် TNLA လလောၚ်တြးလဝ် ပ္ဍဲတ္ၚဲဏံ အခိၚ်နူဂယးဂှ်ရ။

တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၄) အခိၚ်နူဂယး ၜိုတ် (၅) နာဍဳကဝက်ဂှ် ဗတိုက်သီကေတ် ဗဒိုပ်ပၞာန်ညးဍုၚ်ကွာန်ဂျာယာန် သၟဝ်တဲကံၚ်ဇြဳပၞာန်ကဵု ဗဒိုပ်ပၞာန်ညးဍုၚ်ကွာန်မိုၚ်ယာန် (၂) ဗဒိုပ် မာန်လဝ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၃) တ္ၚဲတုဲကၠုၚ်တေံ အခိၚ်ဒေါဝ်တ္ၚဲ ၜိုတ် (၂) နာဍဳဂှ် ဒပ်ကံၚ်ဇြဳပၞာန် ဝါယျအ်(ဝါရော့) မၞုံပွိုၚ်ဍုၚ်ဏာမ်ခါမ်ကဵု ဗဒိုပ်ကံၚ်ဇြဳပၞာန် မၞုံတၞုၚ်ကွာန်ထုၚ်ကာန်တအ်ဂှ် ဒပ်ပၞာန်တအာၚ် TNLA ဗတိုက်သီကေတ်မာန်လဝ်ရဂှ် ဂွံတီကေတ် အတိုၚ်တၚ်လလောၚ်တြးရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၃) တုဲကၠုၚ်တေံ နူအခိၚ်ဇိုၚ်သဝ်တ္ၚဲ စဵုကဵုစိုပ်ပယျဵုဂယးဂှ် သီုပေါဲဗတိုက်ဟၟဲမွဲသာ် နူကဵုဒပ်ကံၚ်ဇြဳပၞာန် ဖျေံသ္ဇိုၚ်နံၚ်ၛော ဟိုတ်နူပန်ဖျေံလဝ်လွဟ်ဇၞော် ပ္ဍဲကွာန်လေဝ်တဝ်ဂျဳ ပွိုၚ်ဍုၚ်နံၚ်ၛော ဟွံအောန်နူ (၂၀) မတုဲ ပါဲနူကောန်ၚာ် (၁) တၠ ဒးလဝ်ဘဲဝပ်သ္ကာတ်မြဟ်တုဲ သ္ၚိဒၟံၚ် (၃) မ ဇီုကပိုက် ဒးလီုလာ်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

သ္အာၚ်နူဂှ်ပၠန် ဒပ်ကံၚ်ဇြဳပၞာန်သိန္နဳဂှ် ပ္ဍဲကဵုလ္ပာ်ဗဒိုပ်မာၚ်ပါ ဒပ်ပၞာန်တအာၚ် TNL A ထိၚ်ဒဝ်လဝ်ဂှ်လေဝ် ဒဒှ်ရပန်ဖျေံ ဗတိုက်လဝ်ကဵုလွဟ်ဇၞော် ဟွံအောန်နူ (၇) မဂှ် လလောၚ်တြးလဝ်ရ။

ဂကောံကိုဝ်က MNDAA၊ ဒပ်ပၞာန်တအာၚ် TNLA ကေုာံ ဒပ်ပၞာန်ရခေၚ် AA မဒှ်ဂကောံမဟာမိတ်ကောဒေံပိဂကောံတအ်ဂှ် သ္ပတံနူဂိတုအံက်တဝ်ဗာ စၟတ်တ္ၚဲ (၂၇) တုဲကၠုၚ်တေံတုဲ ချဳဒရာၚ်ဒၟံၚ် “ပရေၚ်ချဳဒရာၚ်ပၞာန် ၁၀၂၇” သွက်ဒပ်ကံၚ်ဇြဳပၞာန်ဂွံခရိုဟ်ကၟိုၚ်စှ်ေရ။

ပ္ဍဲမွဲကာလပရေၚ်ချဳဒရာၚ်ပၞာန်ဏံ ဟိုတ်နူပေါဲဗတိုက်တုဲ ကောန်ဒေသညးဍုၚ်ကွာန် ပ္ဍဲတွဵုရးသေံသၟဝ်ကျာ ပွိုၚ်ဍုၚ် (၇) ပွိုၚ်ဍုၚ်တအ် ၃၂၀၀၀ ပြၚ် ဒးပါဲဓလေတ်ဒၟံၚ်ဘဲပၞာန်ရဂှ် အလဵုအသဳညဳသၟဟ်ကောန်ဂကူ NUG လလောၚ်တြးလဝ်ပရိုၚ်။

ပရိုၚ် – သြၚ်လောန်တိုၚ်မ်

ဗီု -TNLA