ပ္ဍဲကဵုပေါဲဗတိုက်အလုံံကၟိန်ဍုၚ်မွဲ ဟိုတ်နူပရေၚ်ဂကောံဇြဟတ်ပၠန်ဂတးတအ် ချဳဒရာၚ်ပၞာန်စက်ဗရုသာဲ(ဒရုမ်)တုဲ ဒးဗလးထောံလဝ်တဲ ဗဒိုပ်တအ်တုဲ စဵုကဵုဒးပံၚ်ပကောံလဝ်ဇြဟတ် ဒးဂိဒၟံၚ်ရဂှ် ညးမၞုံအခေါၚ်ဟီုဂးကံၚ်ဇြဳပၞာန် ဂအုပ်ဗိုလ်ဇြဝ်မေန်ထောန် ဒုၚ်ကၠုၚ်ဝန်ရ။ အတိုၚ်နဲကဲဗျူဟာပရေၚ်ချဳဒရာၚ်ပၞာန် စက်ဗရုသာဲ(ဒရုမ်)ဂကောံဇြဟတ်ပၠန်ဂတးတအ် ပြံၚ်သၠာဲကၠုၚ်ဂှ် ရေၚ်တၠုၚ်စဵုဒၞာအာ နကဵုမဟာဗျူဟာစှ်ေစှ်ေ ဗွဲမပြဟ်ရောၚ်ဂှ် နူလ္ပာ်ကံၚ်ဇြဳပၞာန် ဟီုကြဵုဇာလဝ်ရ။
ပ္ဍဲမွဲကာလသီအဝဵုဏံ စပ်ကဵုပရေၚ်ဓမံက်ရုပ်ရဴချဳဒရာၚ်ပၞာန် စက်ဗရုသာဲ(ဒရုမ်)ကီု၊ သွက်ဂွံလုပ်ပေါဲဗတိုက် အကာဲအရာ ဒးပလေဝ်ပလေတ်လဝ်ကီု၊ စပ်ကဵုပရေၚ်ချဳဒရာၚ်ပၞာန် စက်ဗရုသာဲ(ဒရုမ်) သၠုၚ်ပ္တိုန်အာအသိၚ်ပၞာန် ပါလုပ်သီုစရိတ်အိုတ်ကီုတအ်ဂှ် ဆက်စၠောံသၟာန်သွဟ်လဝ်ကဵု ညးတာလျိုၚ်ဂကောံစက်ဗရုသာဲ (ဒရုမ်) Cloud Wings ချဳဒရာၚ်ဒၟံၚ် ပ္ဍဲတိဍာ်ဒပ်မဟာ (၆)ကိုဝ်ညုၚ်ရ။
သြၚ်လောန်တိုၚ်မ် – ကၠာအိုတ်ဏံ ပရေၚ်ချဳဒရာၚ်ပၞာန်စက်ဗရုသာဲ(ဒရုမ်)တအ်ဂှ် ပ္ဍဲကဵုဒၞာဲဗီုလဵု ဓမံက်ဒၟံၚ်ရုပ်ရဴ ဗီုပြၚ်လဵု ကၠောန်ရေၚ်တၠုၚ်ဒၟံၚ်နွံရော။ သောၚ်ကလး လဴထ္ၜးကဵုညိ။
ကိုဝ်ညုၚ် – ဒပ်စက်ဗရုသာဲပိုဲဂှ် ဒၞာဲဌာန်ပ္တဝ်ဆေၚ်ကဵုသွာၚ်ပၞာန်သၞတအ် ဒၞာဲဌာန်ပ္တဝ်ဆေၚ်ကဵု ပရေၚ်အုပ်ဓုပ်ဍေံတအ် မပ္တံဗီုဏံ ဗတိုက်ဒၟံၚ် နကဵုနဲဒပ်ဒမၠုက် နွံရ။ ကုန်အမၠံက်သၞတအ်၊ သၠာတ်က္ၜၚ်ကျာသၞတအ် မပ္တံဗီုဏံလေဝ်။ ပရေၚ်ချဳဒရာၚ်ပၞာန်သၞ တအ်ဂှ် မွဲလ္ပာ်တေံ ညံၚ်ပရေၚ်ကၠေံစိုတ်ဂွံလုတ်ဒကုတ်လီုလာ်အာ ပလာပ်ပထုဲ ဆေဝ်တာမာန်တုဲ ဗတိုက်ဒၟံၚ် နွံရ။ မွဲကရောံကဵု တံဒပ် ဒပ်ပၞာန် ကရောၚ်ပၞာန် ပ္ဍဲဗလးမုက်တိတအ်ဂှ် ပေါဲဗတိုက်သီဗဒိုပ်သၞကဵုဒှ်၊ ကုတ်ဗပိုတ်ကရောၚ်ပၞာန်ကဵုဒှ် ကၠောန်ချဳဒရာၚ်ဒၟံၚ် ပေါဲဗတိုက်ဆေၚ်မုက်တအ်ဂှ် နွံရ။ စက်ဗရုသာဲဂှ် တုဲတဴကဵုပရေၚ်ချဳဒရာၚ်ပၞာန်တုဲ ဗီုဍေံကဵုဍေံ ပရေၚ်ဒးဆဵုဂဗ နွံဍာံဍာံရလေဝ်။
သြၚ်လောန်တိုၚ်မ် – နကဵုဒပ်စက်ဗရုသာဲတအ် ပ္ဍဲပရေၚ်ချဳဒရာၚ်ပၞာန်စက်ဗရုသာဲဂှ် ညံၚ်ဂွံစိုပ်တရဴ ဗီုပြၚ်လဵု ဒးပလေဝ်ပလေတ် ကၠောန်ရေၚ်တၠုၚ်ဒၟံၚ် နွံရော။
ကိုဝ်ညုၚ် – ပ္ဍဲပရေၚ်ချဳဒရာၚ်ပၞာန်စက်ဗရုသာဲဂှ် သွက်ဂွံပဝ်တိုန်အာ လ္တူအကာသ သွက်ဂွံဗတိုက်ဂြာတ်ထောံဖျေံဗုမ် ပ္ဍဲဌာန်ပ္တဝ်ပၞာန်မွဲမွဲမာန်ဂှ် လစှ်ေပါလုပ်ဒၟံၚ် ပ္ဍဲဍေံ၊ လၟေၚ်ကမၠောန် နွံဒၟံၚ် ဗွဲမဂၠိုၚ်ရ။ ဟိုတ်နူဒးကၠောန်ပရေၚ်ဗတိုက်ပန်ဂှ်ရ သွာၚ်ဒးပလေဝ်ပလေတ်ထိၚ်ဒဝ် စက်တအ်ဏံ နွံရ။ ကပေါတ်အ်ဏံဂှ် လီုဒၟံၚ် မွဲခနမွဲခနရ။ သွက်မေတ်ယှေန်မွဲမွဲ ဂွံအံၚ်ဇၞးဂှ် လ္တူနူကဵုပရေၚ်ချဳဒရာၚ် ပ္ဍဲဗလးမုက်တိ ပကတိဏံ ကမၠောန်ဒးယှုက်ဒၟံၚ်ရလေဝ်။ ကပေါတ်ပါလုပ်ဆက်စပ်ဒၟံၚ် မွဲမွဲဂကူတအ်ဂှ်လေဝ် ပိုဲပါဲစွံလဝ် ဟွံဂွံပုဟ်။ လၟုဟ်တှ်ေ ပေါဲဗတိုက်ဆေၚ်မုက်ဒှ်ကၠုၚ်ယျလေဝ်။ ဗီုကဵုၜါသွာၚ် ပ္ဍဲပွိုၚ်မွဲသတ္တာဟဂှ် ဂြာတ်ထောံဖျေံလဝ်ဗုမ် ၂၀၀ မပြၚ်ရ။ မကမ်တအ်လေဝ် ပကတိတှ်ေ ဒှ်ဂကူမကမ် ဒးပန်ပ္တိတ် နူကဵုပၠံၚ်လွဟ်ဇၞော်တအ်ဂှ် ပြံၚ်သၠာဲဗီုပြၚ်တုဲ ညံၚ်ဂွံဗတိုက်ဂွံ ဒးကလေၚ်ပလေဝ်လဝ်ရလေဝ်။
ပ္ဍဲအခိၚ်ကာလဂၠေံဂၠေံ နူကဵုပၠံၚ်လွဟ်ဇၞော် ဂွံပန်ပ္တိတ် ဒဵုဂလိုၚ်ဏံမာန်ဂှ်လေဝ် ဟွံလောဲပုဟ်လေဝ်။ အဓိကမိက်ဂွံဟီုဂှ်တှ်ေ တုဲတဴကဵုအကာဲအရာပေါဲဗတိုက်တုဲ မကမ်တိုန်ကၠုၚ် စရိတ်ဒးအိုတ်တအ်ဂှ်လေဝ်။ အရိုဟ်ရိုဟ်ဂြာတ်ထောံဖျေံ စရိတ်မကမ်တိုန်ကၠုၚ်ဒၟံၚ်တအ်၊ စရိတ်ဒးပလေဝ်ပလေတ် ကပေါတ်စက်တအ် တုဲတှ်ေ ပရေၚ်ကပေါတ်တံဏံ လီုလာ်။ ကပေါတ်စက်ဏံ သီုဖအိုတ်ဂှ် အယုက်ဍေံ နွံဒၟံၚ်။ ဂွံသုၚ်စောဲ မူစိအလန်။ ၜိုတ်ဂလိုၚ်လဵု သုၚ်စောဲဂွံ စတံနူကဵုဗီုဏံရ။ ဒးကလေၚ်လှာဲဒၟံၚ်ဏီ။ အရာရာအိုတ်သီုရလေဝ်။ အရိုဟ်ရိုဟ်အာချဳဒရာၚ်ပၞာန် စက်ဗရုသာဲ သွက်ဂွံကၠောန်မာန်ဂှ် လစှ်ေပါလုပ်သီုဖအိုတ်ဏံ ယဝ်ပံၚ်ထောံတှ်ေ သွက်စက်ဗရုသာဲမွဲဖ္ဍိုက် ဂွံအာမုက်ပၞာန်မာန်ဂှ် အကာဲအရာဒှ်လျိုၚ် ဇြိုၚ်ၚ်မွဲရ။ ပိုဲဂှ် ဘဲဒဏ်စရိတ်အိုတ်ဂၠိုၚ်ဂှ်လေဝ် ဒးဒုၚ်ရ။ အရိုဟ်ဟ်ဂြာတ်ထောံဖျေံဗုမ် စရိတ်အိုတ်တိုန်ကၠုၚ်ဒၟံၚ်တအ်ဂှ် နွံဗွဲမဂၠိုၚ်ရ။
သြၚ်လောန်တိုၚ်မ် – တုဲမွဲပၠန်ဂှ် သွက်ပရေၚ်ချဳဒရာၚ်ပၞာန်စက်ဗရုသာဲ စရိတ်အိုတ် ၜိုတ်ဂလိုၚ်လဵု ဂၠိုၚ်ဒၟံၚ်ရော။
ကိုဝ်ညုၚ် – ဂကောံစက်ဗရုသာဲတအ်ဂှ် လ္တူနူကဵုပရေၚ်ချဳဒရာၚ်ပၞာန် နကဵုဇြဟတ်မၞိဟ်ဂၠိုၚ်ၚ်ဂှ် အဓိကဂှ် ကပေါတ်ရ။ ကပေါတ်စက် နဲကဲကွတ်ပညာလေဝ်။ အရာဏံ ဒုၚ်သ္ဇိုၚ်ကဵုဇြဟတ်တုဲ ဒးလုပ်ပေါဲဗတိုက်ရ။ စက်ဗရုသာဲမွဲဖ္ဍိုက်ဂှ် သရောပ်ထောံတှ်ေ ၜိုတ်မၞိဟ် ၅ တၠ ဒးသုၚ်စောဲရ။ စက်ဗရုသာဲ မွဲဖ္ဍိုက်ဂှ် မၞိဟ် ၅ တၠ၊ ၆ တၠ စရိတ်ညးစအကြာပေါဲမေတ်ယှေန်မွဲမွဲကဵု စရိတ်ကရောၚ်ပၞာန်ဗလးမုက်တိ မွဲဒပ်လ္ပာ် ညးဟွံသေၚ်အဲ အဲဟွံသေၚ်ညးရ။ ဗီုကရောၚ်ပၞာန်ဗလးမုက်တိ စကစတအ် ဒးကေတ်ပၞာန်ရီုက္ၜၚ်ကျာကီုရ လ္ပာ်ဂကောံဇြဟတ်ပၠန်ဂတးပိုဲလေဝ် ပရေၚ်ချဳဒရာၚ်ပၞာန်ဒရုမ်ဂှ် ဂြာတ်ထောံဖျေံဗုမ်ဂှ် အာကဵုဒၟံၚ် ဗလးမုက်တိရ။
သြၚ်လောန်တိုၚ်မ် – အသိၚ်ပၠန်ဂတးအခိၚ်လၟုဟ်ဂှ်လေဝ် ဇြဟတ်ခိုဟ်ကၠုၚ်ရ၊ နူသွာၚ်နာနာ အခိၚ်ဗိုၚ်ဗတိုက်ဒၟံၚ် ဒပ်ကံၚ်ဇြဳပၞာန်ဂှ် ပရေၚ်ချဳဒရာၚ်ပၞာန် စက်ဗရုသာဲတအ်ရော လ္တူနူဏံ သွက်ဂွံသၠုၚ်ပ္တိုန်အသိၚ် နွံဒၟံၚ်ကီုဟာ။
ကိုဝ်ညုၚ် – အခိၚ်လၟုဟ် အသိၚ်ပၠန်ဂတးဂှ် ခိုဟ်ဒၟံၚ်ရ။ နကဵုဂကောံစက်ဗရုသာဲ Cloud Wings ပိုဲ ကာလဂတနူဏံ ဟွံဟီုဏီပုဟ်။ တုဲတုဲကၠုၚ်တေံလေဝ် ပိုဲဟွံဂွံဇူလဝ်ပုဟ်။ ပ္ဍဲမွဲဂိတု ယဝ်ရဂွံဇူစ ၜိုတ်မွဲသတ္တာဟတှ်ေ ဂွံဇူတၟာဂလိုၚ်ဏောၚ် ဟီုစဂွံရ။ လၟုဟ်ဂှ် ပရေၚ်ချဳဒရာၚ်ပၞာန် ၁၀၂၇ ကဵု ပိုဲ ယဝ်ဒးပ္တဝ်ရံၚ်တှ်ေ ပိုဲဂှ် ပ္ဍဲစၟတ်တ္ၚဲ ၂၅ ဂှ်မှ ဂွံစတိတ်ရ။ စက်ဗရုသာဲတအ်ဂှ် ဒးတိတ် ပ္ဍဲဨရိယာပေါဲဗတိုက်ရ။ နူကဵုစၟတ်တ္ၚဲ ၂၆ ဗ္တံဂှ် စလဝ်ရ လၟုဟ် ဒဵုကဵုတ္ၚဲဏံ မွဲတ္ၚဲလေဝ် ဟွံဂွံဇူဏီပုဟ်။ သီုတ္ၚဲသီုဗ္တံ ဒၞာဲဟွံဂွံဒးဂြာတ်ထောံဖျေံဗုမ်ဂှ် ဟၟဲပုဟ်။ ဗ္တံဟွံဒးဂြာတ်ထောံဖျေံကဵု စက်ဗရုသာဲဂှ် ဟၟဲပုဟ်။ ဒၞာဲဒေသရ တၞဟ်ခြာတှ်ေ တၞဟ်ခြာဏောၚ်။ ဒပ်ပ္ဍဲဗလးမုက်တိ၊ ကရောၚ်ပၞာန်၊ ERO တအ် မပ္တံဗီုဏံရလေဝ်။ အသိၚ်ပၞာန်သၠုၚ်ပ္တိုန်ကၠုၚ်အရာတအ်ဏံ၊ ကဵုအသိၚ်ပၠန်ဂတးဏံ မွဲဒမြိပ်ဂှ် ပရေၚ်စက်ဗရုသာဲတအ် ပါလုပ်ဆက်စပ်ဒၟံၚ်၊ ပရေၚ်ဗတိုက်ပန်ပှော်တအ်လေဝ် သၠုၚ်ပ္တိုန်လဝ် မွဲဒမြိပ်တုဲတုဲမံၚ်ရလေဝ်။ အတိုၚ်အဲဟီုထ္ၜးလဝ် နူကၠာဏံဂှ်ရ။ ဗီုပြၚ်ပိုဲအာဒၟံၚ်ချဳဒရာၚ်ဒၟံၚ် ညဳညဳဂှ်တှ်ေ ဗလးတိ၊ ဗလးကျာ မပ္တံဗီုဏံရလေဝ်။ နူကဵုဗလးမုက်တိ ကရောၚ်ပၞာန်ပံၚ်တောဲတအ်ကဵု ဒပ်စက်ဗရုသာဲတအ်ဂှ် အဆက်စၠောံနွံနွံကဵု ဟိုတ်နူရေၚ်တၠုၚ်ချဳဒရာၚ်ဒၟံၚ်ပၞာန်ဂှ်ရ ပိုဲဂှ် ဂကောံဗလးမုက်တိတအ် သၠုၚ်ပ္တိုန်အသိၚ်ခ္ဍၚ် ကရောၚ်ပၞာန်ပံၚ်တောဲဗလးမုက်တိကဵု ဒပ်စက်ဗရုသာဲပိုဲ အဆက်စၠောံနွံနွံ ပရေၚ်အသိၚ်ပၞာန် သၠုၚ်တိုန်ဂှ်လေဝ် နွံမွဲဒမြိပ်တွဵုရလေဝ်။