မွဲကရောံကဵု ပရေၚ်ချဳဒရာၚ်ပၞာန် ၁၀၂၇ မဟာမိတ်ကောဒေံပိဂကောံဂှ် ဟိုတ်နူဂကောံဇြဟတ်ပၠန်ဂတး အလုံမွဲကၟိန်ဍုၚ်တအ် ထ္ပက်ပၞာန် ဗတိုက်ကၠုၚ်တုဲ ဒပ်ကံၚ်ဇြဳပၞာန် ဒးဗလးလဝ်တဲ ဗဒိုပ်ဂၠိုၚ်ကဵုကၠံဂှ် ပ္ဍဲကဵုပေါဲဗတိုက် လ္ပာ်သ္ကုတ်လကြဴဏံ ပါဲနူက္ၜၚ်ကျာတုဲ ကၠောန်သ္ပကၠုၚ် ပရေၚ်ဗတိုက်ပန်ကဵုလွဟ်ဇၞော် ဂၠိုၚ်ကဵုသၞောတ်ဗ္ၜတ်ရ။ ပ္ဍဲတုဲကၠုၚ်မွဲၜါတ္ၚဲတေံလေဝ် ပ္ဍဲပေါဲဗတိုက်ဒှ်လဝ် ပ္ဍဲတွဵုရးကရေၚ်ဍာဲဂှ် ပါဲနူဗုမ်ကလေတ်သတာ လေပ်ပါ်ခတိုဟ်ကဆံၚ်ကဵုကဆံၚ်တုဲ ဒပ်ကံၚ်ဇြဳပၞာန် သုၚ်စောဲလဝ် သီုဗုမ် ဒးထေၚ်ကခယျကေတ် ဗုမ်သၟုဟ်ဓာတ်ဂျိ နွံကၠုၚ်ရ။
ဟိုတ်ဂှ်ရ စပ်ကဵုအကာဲအရာဒပ်ကံၚ်ဇြဳပၞာန် သုၚ်စောဲကၠုၚ်လွဟ်လက်နက် ဇြဟတ်ပလီုသ္ကာတ်မြဟ် ပ္ဍဲပေါဲဗတိုက်ကီု၊ ပရေၚ်သုၚ်စောဲဗုမ်လဝ် ကလေတ်သတာ လေပ်ကဵုပါ်ခတိုဟ် ကဆံၚ်ကဵုကဆံၚ်ကီု၊ ပၠန်ဂတးက္ညၚ် ၜိုတ်ဂလိုၚ်လဵု စိုပ်ဒၟံၚ်တရဴကီု၊ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ် ဗိုလ်ဇၞော် CDM လေန်ထေတ်အောၚ်ရ။
သြၚ်လောန်တိုၚ်မ် – ကၠာအိုတ်ဏံ ပ္ဍဲကဵုပေါဲဗတိုက်အခိၚ်လၟုဟ် လ္ပာ်ကံၚ်ဇြဳပၞာန် သုၚ်စောဲဒၟံၚ် လွဟ်လက်နက် ဇြဟတ်ပလီုသ္ကာတ်မြဟ် မုနွံကီုရော။ တုဲပၠန် သုၚ်စောဲဒၟံၚ်လွဟ်လက်နက် ဂကူလဵုဂၠိုၚ်ဂွံညာတ်ကေတ်ရော။
ဗိုလ်ဇၞော်လေန်ထေတ်အောၚ် – အခိၚ်ကျဟောံကၠုၚ်ပေါဲဗတိုက် အခိၚ်ဒးဆောံလေၚ်လဝ်တိဍာ်ဂှ် လၟုဟ်ဏံဍေံတအ် သုၚ်စောဲဒၟံၚ် လွဟ်လက်နက် ပန်ခရာဇမ္ၚောဲတအ် ဂွံညာတ်ကေတ်ရ။ ကမ်လှောဝ်တောဲတအ်၊ လွဟ်ကမ်လှောဝ် ဒးပန်ကဵုစၚ်ပန်ကမ်လှောဝ်တအ် အရာတအ်ဏံ သုၚ်စောဲကၠုၚ်အဓိကဂှ် ဂွံဆဵုကေတ်ရ။ လၟုဟ်ဏံ တိဍာ်ဍေံတအ် ဒးဆောံလေၚ်လဝ်ဂှ် က္လေၚ်ဗတိုက်ပန်ရီုဒၟံၚ်ကဵု အရီုဗၚ်ပန်ရ။ တုဲပၠန် ညံၚ်ဍေံတအ် ဟွံဂွံဒးဗလးထောံတဲ တိဍာ်တအ်ကီု၊ ဗီုကဵု တိဍာ်ကရေၚ်ဍာဲ၊ လွိုၚ်ကဝ် လ္ပာ်တွဵုရးသေံသၟဝ်ကျာပိုဲ၊ လ္ပာ်ရခေၚ်တေံ သုၚ်စောဲ သီုကဵုအရီုဗၚ်ပန် ကဵုဒပ်ဍာ် သုၚ်စောဲကၠုၚ်ဂှ် ဂွံဆဵုကေတ်ဒၟံၚ်ဂှ်ရ နူကဵုဒပ်တိုက်၊ ဒပ်ကျာ၊ ဒပ်ဍာ် ၜိုတ်ဂွံမာန် သုၚ်စောဲအစောန်အရီုပန်တအ်တုဲ အခိၚ်လၟုဟ်ဏံ ပလေဝ်ပလေတ်ဒၟံၚ်ပၞာန်ဒုၚ်ရဂှ် ပိုဲဟီုစမာန်ရ။
သြၚ်လောန်တိုၚ်မ် – လ္ပာ်သ္ကုတ်လကြဴဏံ ပ္ဍဲကဵုပေါဲဗတိုက်တအ်ဂှ် လ္ပာ်ကံၚ်ဇြဳပၞာန် ပါဲနူဗုမ်ကလေတ်သတာ ပါ်ခတိုဟ်ကဆံၚ်ကဵုကဆံၚ်တုဲ သီုကဵုဗုမ် ဒးထေၚ်ခယျကေတ် ဒှ်ဗုမ်သၟုဟ်ဓာတ်ဂျိမာန်တအ်ဂှ် သုၚ်စောဲကၠုၚ်နွံဂှ် ဟီုဂးဒၟံၚ်နွံရ။ ဒပ်ကံၚ်ဇြဳပၞာန် သုၚ်စောဲကၠုၚ်မာန်ဒၟံၚ်ဟာ။
ဗိုလ်ဇၞော်လေန်ထေတ်အောၚ် – ကံၚ်ဇြဳပၞာန်ဂှ် လွဟ်လက်နက်ဇြဟတ်ပလီုသ္ကာတ်တအ်ဂှ် ၜိုတ်သုၚ်စောဲမာန် သုၚ်စောဲဒၟံၚ်ရဂှ် ဟီုဂွံရ။ လွဟ်လက်နက်ပန်ခရာဇမ္ၚောဲတအ်ဂှ်တှ်ေ သုၚ်စောဲကၠုၚ် အဓိကရ။ ဒပ်ပၞာန်ဂှ် ဗီုကဵုဗုမ်သၟုဟ်ဓာတ်ဂျိဂှ် သုၚ်စောဲကၠုၚ်ဟီုဂှ် ပိုဲလေဝ် ဒှ်ဒၟံၚ်သံသယရ။ ပ္ဍဲကဵုဗလးမုက်တိ နတဲဂှ်တှ်ေ ဒၟာနူဟွံဂွံသက်သဳတုဲ ဂွံဟီုဂးဂှ် ဝါတ်ဒၟံၚ်ရ။ ပ္ဍဲကဵုဍေံတအ်ဂှ် ဗုမ်သၟုဟ်ဓာတ်၊ လွဟ်လက်နက်ဓာတုတအ်ဂှ် ၜိုန်ရဂွံမံၚ်ပရိုၚ် ညိညကီုလေဝ် ကၠောန်ပ္တိတ်ဗုမ်ကလေတ်သတာရ။ ပရိုၚ်ကဵုတြးလဝ် ပ္ဍဲဒပ်ကျာတအ်ဂှ် ပိုဲဂွံမိၚ်လဝ်မံၚ်ရ။ ဒၟာနူဂှ်ရ ဗုမ်ကလေတ်သတာဂှ်တှ်ေ ကာလသုၚ်စောဲတှ်ေ သုၚ်စောဲဏောၚ် ဟီုဂွံရ။
သြၚ်လောန်တိုၚ်မ် – လွဟ်လက်နက်ဇြဟတ်ပလီုသ္ကာတ်မြဟ် နွံပ္ဍဲကဵုဇြဳပၞာန် ဟွံဂွံပ္တိတ်သုၚ်စောဲ ပ္ဍဲပေါဲဗတိုက်တအ်ဏီ မုဂကူ နွံဒၟံၚ်ဏီရော။ ဒၟာနူဆောံလေၚ်ကၠုၚ်တိဍာ်ဂှ်ရ ဗီုပြၚ်လဵု ကံၚ်ဇြဳပၞာန် ဆက်ကၠောန်ရေၚ်တၠုၚ်ကၠုၚ်မာန် ပတှ်ေကေတ်လဝ်ရော။
ဗိုလ်ဇၞော်လေန်ထေတ်အောၚ် – လွဟ်လက်နက်ရာန်ကေတ်နၚ်လဝ် နူကဵုဍုၚ်မ္ၚးတအ်ဂှ်တှ်ေ နွံမံၚ်ဏီ။ ကြုက်၊ ရုယှာတအ် သီုကဵုဍုၚ်တၞဟ်တအ်ဂှ်လေဝ်။ လွဟ်လက်နက်ရာန်ကေတ်နၚ်လဝ် နူဍုၚ်သ္အာၚ်ဂှ်တှ်ေ ပ္ဍဲဍေံတအ် နွံဒၟံၚ်ဏီ။ လွဟ်လက်နက်ဟွံဂွံပ္တိတ်သုၚ်စောဲဏီလေဝ် နွံဏီဏောၚ် အဲထေၚ်ရ။ မုနွံရော နကဵုအဲ ဂွံဟီုချိုတ်တ် ပၠိုတ်တ် ဝါတ်ဒၟံၚ်ရ။
သြၚ်လောန်တိုၚ်မ် – ပ္ဍဲကဵုကံၚ်ဇြဳပၞာန်လေဝ် တၚ်နွံပၟိက်မကမ်ဂှ် ကပစ ဒးဂ္စာန်ပ္တိတ်ဒၟံၚ် ညံၚ်ဂွံဂတာပ်နွံရဂှ် ပရိုၚ်လေဝ် တိတ်ဒၟံၚ်ရ။ ပ္ဍဲလ္တူဏံ ဗီုလဵုညာတ်ကေတ်ရော။
ဗိုလ်ဇၞော်လေန်ထေတ်အောၚ် – စၟတ်တ္ၚဲ မကမ်ကပစ ကၠောန်ပ္တိတ်တအ် ဂကောံဇြဟတ်ပၠန်ဂတးတအ်သီဂွံလဝ်ဂှ် ဒှ်ဒၟံၚ် စၟတ်တ္ၚဲသၞာံဏံ ပိုဲဂွံညာတ်ကေတ်ရ။ ပ္ဍဲကဵုဍေံတအ်လေဝ် အကာဲအရာလွဟ်လက်နက်မကမ်ဂှ် တၚ်ဍိုန်လျ နွံဒၟံၚ်တၟာဂလိုၚ်ဟီုဂှ် ပိုဲဟီုမာန်ရ။ မုဒှ်ရောတှ်ေ ဒပ်ပၞာန်ဂှ် လၟုဟ်ဏံ အခိၚ်ဒှ်ဒၟံၚ်ပၞာန် သီုအလုံဍုၚ်မွဲ မကမ် ၜိုတ်နွံ ပ္ဍဲဍေံတအ်ဂှ် အကာဲအရာဒးကၠောန်ပ္တိတ် သုၚ်စောဲဒၟံၚ်ပြဟ်ဟ် နွံမံၚ်ဂှ်လေဝ် ဂွံမိၚ်လဝ်ရ။ ဒပ်ကပစ ကံၚ်ဇြဳပၞာန်တအ်ဂှ် အခိၚ်လၟုဟ်ဏံ အကာဲအရာကၠောန်ပ္တိတ်မာန် နွံမံၚ်ဏီရ။ အဓိကဂှ် ပ္ဍဲကဵုဗၞိက်အပြောံ ဒးဗ္ဒဗ္ဒာဲဒၟံၚ်ကဵုဍုၚ်သ္အာၚ်တအ်ဂှ်တှ်ေ ပရေၚ်ဇီုကပိုက်နွံကၠုၚ် ညိညရ။ ဆ္ဂးဂှ် ဒှ်အာသီုဖအိုတ် ဟွံသေၚ်ဏီပုဟ်။ ဒၟာနူဂှ်လေဝ် နကဵုပိုဲတအ်တှ်ေ အခိၚ်လၟုဟ်ဏံ ကပစကံၚ်ဇြဳပၞာန်တအ်ဂှ်တှ်ေ အကာဲအရာဗ္ဂေတ်ဂွံ နွံဒၟံၚ်ဏီဟီုဂှ် ပိုဲဟီု ချိုတ်တ်ပၠိုတ်တ်မာန်မံၚ်ဏီရ။
သြၚ်လောန်တိုၚ်မ် – ဗလးပရေၚ်ပၠန်ဂတးအခိၚ်တ္ၚဲဏံ ဗီုပြၚ်လဵုဆက်အာမာန်ရော။ လ္ပာ်ကံၚ်ဇြဳပၞာန်ရော အတိုၚ်ပရေၚ်ပၞာန် မုဆက်ကၠောန်ကၠုၚ်မာန်ရော သ္ၚဳဂၠိပ်ထ္ၜးကဵုညိ။
ဗိုလ်ဇၞော်လေန်ထေတ်အောၚ် – အခိၚ်လၟုဟ်ဏံ ဗလးပရေၚ်ပၠန်ဂတးဂှ်တှ်ေ နူကဵုလ္ပာ်ပၠန်ဂတးဂှ် တိဍာ်ဒေသဗွဲမဂၠိုၚ် ဂွံလဝ်စေဝ်လ္တူဟီုဂှ် ပိုဲဟီုချိုတ်တ်ပၠိုတ်တ်မာန်ရ။ နကဵုဒပ်ပၞာန် တိဍာ်ဍေံတအ် ဒးဆောံလေၚ်လဝ်တအ်ဂှ် အကာဲအရာသွက်ဂွံက္လေၚ်ထ္ပက်ပၞာန်လေဝ် ဍေံတအ် ကၠောန်ဟွံဂွံဏီပုဟ်။ အခိၚ်လၟုဟ်ဏံ ညံၚ်ဟွံဂွံဒးထပ်ဆောံလေၚ်ပၠန်ဂှ် ဍေံတအ် ဒးစွံဒၟံၚ်အာရီုရ။ ဒပ်ပၞာန်ဂှ် အ်ခိၚ်လၟုဟ်ပ္ဍဲကဵုဒၞာဲဗွဲမဂၠိုၚ် ဂွံညာတ်ကေတ် အကာဲအရာ ပလေဝ်ပလေတ်ဒၟံၚ် ပၞာန်ဒုၚ်ရ။ အဓိကဂှ် ပ္ဍဲကဵုတိဍာ်ဒးဆေၚ်ဒၟံၚ်မုက်ကဵု ဒပ်ဂကောံရပ်လွဟ် ကောန်ဍုၚ်အရၚ်ဇၞော်ဇၞော်တအ်ဂှ်တှ်ေ ပ္ဍဲကဵုတိဍာ်တအ်ဏံ စွံသတိတုဲ ရေၚ်တၠုၚ်ဒၟံၚ် ပရေၚ်ပၞာန်နွံဂှ် ဟီုဂွံရ။
ဆ္ဂးဂှ်လေဝ် ဍေံတအ် ဒက်ပ္တန်လဝ်ပၞာန်ဒုၚ် သၞာံဂၠိၚ်သ္ၚောဲမံၚ်ယျ။ အကာဲအရာဏံမွဲဂှ်တှ်ေ သွက်ဍေံတအ် ပၞာန်ဒုၚ်ခိုၚ်ၚ်ဂှ် ပ္ဍဲကဵုဒၞာဲလ္ၚဵု နွံဒၟံၚ်ဖိုဟ်ဏီ အကာဲအရာဏံ ဟီုစဂွံရ။ အကာဲအရာပရေၚ်ပၠန်ဂတးလေဝ် အခိၚ်လၟုဟ်ဏံ ဝးပ္ကဝ်ကၠုၚ် ပၞာန်ဒုၚ် ဒပ်ပၞာန် မာန်ကၠုၚ်ဒၟံၚ်သိုက်က်ဂှ်တှ်ေ ပိုဲဂွံညာတ်ကေတ်ဒၟံၚ်ရ။ လ္ပာ်ကံၚ်ဇြဳပၞာန်ဂှ်တှ်ေ အခိၚ်လၟုဟ်ဏံ လ္တူနူကဵုက္လေၚ်ပလန်ထ္ပက်ပၞာန်ဂှ် ညံၚ်တိဍာ်ဍေံတအ် ဟွံဂွံဒးဆောံလေၚ်အာဂှ် စွံအဓိကပၞာန်ဒုၚ်တုဲ ပလေဝ်ပလေတ်ဒၟံၚ်ဟီုဂှ်တှ်ေ ပိုဲဂွံညာတ်ကေတ်ရ။ အကာဲအရာလၟုဟ်ဂှ် နကဵုဒပ်ပၠန်ဂတးပိုဲတအ် နဲလဵု ဂွံဝးပ္ကတ်ပၞာန်ဒုၚ်ကံၚ်ဇြဳပၞာန်မာန်၊ ဗီုဂွံထ္ပက်လုပ်မာန်ရောဟီုဂှ် ပိုဲတအ် သာတုဲ ဒးချပ်တုဲ ဆက်ကၠောန်ရေၚ်တၠုၚ်အာ နကဵုနဲကဲဗျူဟာခိုဟ်ဟ်မာန်ဏောၚ်ဂှ် နကဵုအဲပတှ်ေကေတ်လဝ်ရ။
သြၚ်လောန်တိုၚ်မ် – အလန်လကြဴဴအိုတ်ဏံ လွဟ်လက်နက်ကံၚ်ဇြဳပၞာန်သုၚ်စောဲဒၟံၚ်ပ္ဍဲကဵုပေါဲဗတိုက်လၟုဟ်ဏံ ၜိုတ်ဂလိုၚ်လဵုသ္ကာတ်မြဟ်ဒၟံၚ်ရောဂှ် ဟီုထ္ၜးကဵုညိ။
ဗိုလ်ဇၞော်လေန်ထေတ်အောၚ် – လွဟ်လက်နက်ဍေံတအ်သုၚ်စောဲဒၟံၚ်တအ်ဂှ်တှ်ေ လွဟ်ကမ်လှောဝ်၊ လွဟ်လက်နက်အမၠံက်တအ်၊ ကွဳစက်ခြပ်တအ် သုၚ်စောဲကၠုၚ်ဒၟံၚ်အဓိကဂှ်တှ်ေပိုဲဂွံဆဵုကေတ်ရ။ အရာတအ်ဏံ အကာဲအရာဇြဟတ်ပလီုသ္ကာတ်မြဟ်ဂှ်တှ်ေ နွံဒၟံၚ်ဗွဲမစိုပ်တရဴရဂှ် ပိုဲဟီုမာန်ရ။ ပ္ဍဲကဵုဒၞာဲလ္ၚဵုဂှ်တှ်ေ အကာဲအရာပန်ပှော်ဏာလဝ်တအ်ဂှ် ရံၚ်ကေတ်တှ်ေ ဒှ်အာကတိုၚ်ဇၞော်ဇၞော်တအ်၊ စမြိုၚ်တအ်လီုလာ်အာဗွဲမဂၠိုၚ် အတိုၚ်အကာဲအရာလီုလာ်အာလဝ်ဗွဲမဂၠိုၚ်တအ်ဂှ်ရံၚ်ကေတ်တှ်ေ ယဝ်ရပန်ဖျေံပ္ဍဲဌာန်ပ္တဝ်ချိုတ်တ်ပၠိုတ်တ်မာန်ဏောၚ်ဟီုတှ်ေ ပရေၚ်ဇီုကပိုက်လီုလာ် ဗွိုက်ဇၞော်ဇၞော်ဒှ်မာန်ဒၟံၚ်ရ။ ဆ္ဂး အကာဲအရာလၟုဟ်ဂှ်တှ်ေညံၚ်ဂွံပန်ဗီုဂှ်မာန်ဂှ် လ္ပာ်ဒပ်ပၞာန် ဂွံကၠောန်မာန် ပိုဲဟွံညာတ်ကေတ်ရ။ အကာဲအရာပလီုပလာ်သ္ကာတ်ဒၟံၚ်ဟီုဂှ်တှ်ေ နကဵုအဲ ဝါတ်ဂါတ်ဒၟံၚ်ရ။