မွဲကရောံကဵု ပရေၚ်ချဳဒရာၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံဂှ် အလုံမွဲကၟိန်ဍုၚ် ဟိုတ်နူပရေၚ်ချဳဒရာၚ်ပၞာန်ပံၚ်တောဲ ညဳသၟဟ် ဂကောံဇြဟတ်ပၠန်ဂတးတအ်တုဲ ဒပ်ကံၚ်ဇြဳပၞာန် ဒးဗလးလဝ်တဲ ဗဒိုပ် (၂၀၀)ဗဒိုပ်ပြၚ် ပါလုပ်သီုဍုၚ် (၈) ဍုၚ်ရ။ ဉက္ကဋ္ဌအဗော်ဍုၚ်မန်တၟိ ဂကောံရပ်လွဟ်ကောန်ဍုၚ်အရၚ်မန် ဝှ်ကြံၚ် နာဲဟံသာဂှ်မ္ဂး ပ္ဍဲကဵုပေါဲဗတိုက်သရိုဟ် သၞောတ်တၠအဝဵုပၞာန် ယဝ် EAO တအ် သီုဖအိုတ်ပါလုပ်မ္ဂး နကဵုညးတအ်လေဝ် ပါလုပ်ဗတိုက်အာရောၚ်ဂှ် ပ္ဍဲကဵုဂိတုဂျောန်တုဲကၠုၚ်တေံ ဟီုသွဟ်လဝ် အေန်တာဗျူ အေဂျေန်ဇြဳဌာန်ပရိုၚ်ဗၠးၜးမန်ရ။
ဟိုတ်ဂှ်ရ ပ္ဍဲကဵုပေါဲဗတိုက်သရိုဟ်သၞောတ်တၠအဝဵုပၞာန် ဂကောံရပ်လွဟ်ကောန်ဍုၚ်အရၚ် ဗွဲမဂၠိုၚ်ပါလုပ်ကၠုၚ်ဒၟံၚ်လၟုဟ်ဏံ နကဵုဗော်ဍုၚ်မန်တၟိ အကာဲအရာပါလုပ်ကၠုၚ် နွံဟာ၊ ဟိုတ်နူဟွံပါလုပ်တုဲ စပ်ကဵုဂုဏ်သိက္ခာ ပရေၚ်ဍုၚ်ကွာန် ဒးဇီုကပိုက်ကၠုၚ်တအ်တုဲ ဆက်စၠောံသၟာန်လဝ်ကဵု ဒံက်တာသဳရိမန်ဆာန် ဥက္ကဋ္ဌ ကဝ်မတဳက္ဍိုက်က္ဍိုပ် ပရေၚ်ပၞာန် ပရေၚ်ဍုၚ်ကွာန် ဒပ်စဵုဒၞာဍုၚ်မန် (MSDF) ရ။
သြၚ်လောန်တိုၚ်မ် – ကၠာအိုတ်ဏံ လ္ပာ်ကံၚ်ဇြဳပၞာန်လေဝ် ဟွံသေၚ်၊ လ္ပာ်ပၠန်ဂတးလေဝ် ဟွံသေၚ် နကဵုဗော်ဍုၚ်မန်တၟိ ဒတူလာၚ်ဒၟံၚ် နကဵုမူဝါဒမံၚ်အကြာဂှ် ပ္ဍဲကဵုပေါဲဗတိုက်ဏံ မွဲကရောံကဵု ဂကောံပံၚ်ကောံတအ် ပါလုပ်ကၠုၚ်မွဲစွံမာန်ဟာ။ ဟွံမာန်ပုဟ်ဟာ။ မုဟိုတ်ရော။
ဒံက်တာသဳရိမန်ဆာန် – ပ္ဍဲအကာဲအရာပကတိလၟုဟ်ဏံဂှ် နကဵုဗော်ဍုၚ်မန်တၟိ အကာဲအရာ ဂွံပါလုပ်ကၠုၚ် မွဲကရောံကဵု ဂကောံပံၚ်ကောဲတအ်ဂှ် အောန်မံၚ် ညာတ်ကေတ်ရ။ မုဟိုတ်ရောတှ်ေ နူကဵုၜိုတ် ၂၀၂၃ တေံ ကိစ္စဖျေံလဝ်သ္ဂုတ်သွာတ် ညံၚ်ဟွံဂွံဆက်ကၠောန် ပေါဲဆဵုဂဗ ရေၚ်တၠုၚ်ဏာအကာဲအရာပရေၚ်ဍုၚ်ကွာန်ကဵု စကစဂှ်ကီု၊ တုဲမွဲပၠန်ဂှ် ကိစ္စနုက်တိတ်လဝ် နူကဵု PPST ကော်ဂး ဂကောံက္ဍိုက်က္ဍိုပ်ဂၠံၚ်တရဴဴဓဝ်ၜိုဟ်လလံ ဂကောံရပ်လွဟ်ကောန်ဍုၚ်အရၚ်ဂှ်ကီု ပါဲနူဂှ် စဵုကဵုအခိၚ်လၟုဟ်ရလေဝ်။ သွက်ဂွံပၠန်ဂတးကဵု စကစပိုတ်တ်သ္ကုတ်တ်ဂှ် တၠုၚ်လအာဍေံ ဟွံညာတ်ကေတ်ကွေံကွေံဏီရ။
နကဵုဗော်ဍုၚ်မန်တၟိဂှ် ဒၟာနူအကာဲအရာတိဍာ်တွဵုရးဍုၚ်မန်ကီု ယဝ်ဒှ်ကၠုၚ်ပၞာန်တှ်ေ လမျီုသ္ၚိဌာန်ညးဍုၚ်ကွာန်တအ်လေဝ် ဟိုတ်နူဂွိၚ်ဖေက်လီုလာ်အာတုဲ ဟွံဓမံက်ရုပ်ရဴပၞာန်ဏီဂှ် ထ္ၜးလဝ်ဟိုတ် နွံရ။ ဍာံဍာံတေံ ဒှ်ဟိုတ်ခိုၚ်ခိုၚ်မွဲဏောၚ် ဟွံပတှ်ေပုဟ်။ ဇၟာပ်ပေါဲပၞာန် ဒးဆေၚ်မုက်ကဵု အန္တရာမမိက်ကဵုမွဲမွဲ တွဵုရ။ သွက်ဂွံအံၚ်ဇၞးပရေၚ်ပၞာန်ဂှ် ပရေၚ်ဍုၚ်ကွာန်၊ ပရေၚ်ပၞာန်၊ အကာဲအရာမဟာဗျူဟာ အပြံၚ်သၠာဲ အရာရာအိုဿီုဂှ် သ္ၚဳဂၠိပ်တုဲတှ်ေ ဒးဂံၚ်ဆေၚ်မုက် တတ်ထပါ် အန္တရာယ်နာနာသာ်ဏောၚ်။ ဒးနွံကဵုဓဝ်ပတှ်ေ ပရေၚ်ပၠန်ဂတးပေၚ်ၚ်ကဵု တၚ်ဒတူလာၚ် ခိုၚ်ၚ်ဗိုန်န်ဏောၚ်။
သြၚ်လောန်တိုၚ်မ် – ပ္ဍဲအခိၚ်သွာၚ်နာနာ ဗိုၚ်ဗတိုက်ဒၟံၚ်ဒပ်ကံၚ်ဇြဳပၞာန် ဗီုလၟုဟ်ဏံ နကဵုဗော်ဍုၚ်မန်တၟိ ယဝ်ရဟွံပါလုပ် ပ္ဍဲပေါဲဗတိုက် ကဵုသ္ဂုတ်သွာတ်ဏံတှ်ေ အတိုၚ်ဂုဏ်သိက္ခာပရေၚ်ဍုၚ်ကွာန်ညးတအ် ဇီုကပိုက်ဒးကၠုၚ် မာန်ဟာ။ သ္ၚဳဂၠိပ်ထ္ၜးကဵုညိ။ တုဲပၠန် ပ္ဍဲကဵုတိဍာ်အုပ်ဓုပ်တအ်ရော ဗီုလဵုဇီုကပိုက်ဒးနွံကၠုၚ်မာန်ရော။
ဒံက်တာသဳရိမန်ဆာန် – နူသွာၚ်နာနာ အခိၚ်ဗိုၚ်ဗတိုက်ဒၟံၚ်စကစဗီုအခိၚ်လၟုဟ်ဏံ နကဵုဗော်ဍုၚ်မန်တၟိ ယဝ်ရဟွံပါလုပ်ကၠုၚ် ပ္ဍဲပေါဲဗတိုက်ကဵုသ္ဂုတ်သွာတ်ဏံတှ်ေ ဂုဏ်သိက္ခာဗော်ဍုၚ်မန်တၟိ ပ္ဍဲအကြာညးဍုၚ်ကွာန်တအ်ကီု ဂကောံရပ်လွဟ်ကောန်ဍုၚ်အရၚ်တၞဟ်တအ်ကီု သီုကဵုအကြာညးဍုၚ်ကွာန် ဗတိုက်ပၠန်ဂတးကုတ်ဗပိုတ်ဒၟံၚ်ရိုဟ်ကၞက်စကစဂှ် ဂုဏ်သိက္ခာ ဒးစှ်ေအာတၟာဂလိုၚ်ဏောၚ်။ မုဒှ်ရောတှ်ေ အတိုၚ်တၠုၚ်လအာဝၚ်ပၠန်ဂတးတှ်ေ ဗော်ဍုၚ်မန်တၟိဂှ် ဒှ်ဗော်ပၠန်ဂတးရပ်လွဟ် ကြဵုဇာကၠုၚ်လဝ် သွက်ပရေၚ်ဂကူ၊ ပရေၚ်ဒဳမဝ်ကရေဇြဳကဵု အခေါၚ်ကံကုသဵုမန် မန်ဂွံဖန်ဖက်ကေတ်ဂှ် ဒးကေတ် နကဵုပရေၚ်ပၠန်ဂတးရပ်လွဟ် မွဲဗော်ရ။ ဟိုတ်ဂှ်ရ သွက်ဂွံဗတိုက်သရိုဟ် ကုတ်ဗပိုတ်ရိုဟ်ကၞက် သၞောတ်တၠအဝဵုပၞာန်ကဵု သၞောတ်တၠအဝဵုနာနာ ဗီုအခိၚ်လၟုဟ်ဏံမာန်ဂှ် ပ္ဍဲကဵုမွဲဒမြိပ်ဝၚ်ပၠန်ဂတး ပွိုၚ် (၇၀) သၞာံပြၚ် အခေါၚ်အရာ ဟွံကေၚ်ဂွံလဝ်မွဲလှ်ေဂှ် ယဝ်ရဗလးထောံတဲ ဒုၚ်ဆောံလေၚ်ထောံတှ်ေ ပါလုပ်သီုညးဍုကွာန်ကွာန်မန်တအ် ညးလဵုမွဲလေဝ် သ္ပကၠုၚ်ရှ်ေသှ်ေဟွံသေၚ်ရ။
အခိၚ်လၟုဟ် ပါဲနူမၞိဟ်ထံက်မံၚ်ဂလာန်ကဵု ဗော်ဍုၚ်မန်တၟိ မွဲကေံမွဲဇြာပ် ညးဍုၚ်ကွာန်မန်လ္ၚဵုတအ်တုဲ ညးဍုၚ်ကွာန်မန်ဗွဲမဂၠိုၚ်တအ်ဂှ် ပ္ဍဲလ္တူဗော်ဍုၚ်မန်တၟိ တတ်ထပါ်ကၠုၚ် ပရေၚ်ပၠန်ဂတးဂှ် ရမျာၚ်ပါ်ပါဲ သာတုဲ သၠဲတြးကၠုၚ်ရ။ ဗော်ဍုၚ်မန်တၟိဂှ် ၜိုန်ရဟွံချဳဒရာၚ်ပရေၚ်ပၞာန် ပိုတ်တ်သ္ကုတ်တ်ကီုလေဝ် ကောန်ညးဍုၚ်ကွာန်မန်လ္ၚဵုဂှ် ဒးဒုၚ်ဒၟံၚ်ဘဲဒဏ်ပၞာန်ဂှ်ရ။ ပါဲနူဂှ်ပၠန် ပ္ဍဲကဵုတိဍာ် ညးတအ်ထိၚ်ဒဝ်လဝ်ဂှ်လေဝ် ပရေၚ်ဍုၚ်ကွာန်၊ ပရေၚ်ပၞာန် ဇီုကပိုက်ဒးကၠုၚ် ဗွဲမဂၠိုၚ်မာန်ရ။ အတိုၚ်ပရေၚ်ဍုၚ်ကွာန် ပရေၚ်ပၞာန် ပ္ဍဲကဵုမွဲဗွိုၚ်တိဍာ်ထိၚ်ဒဝ်ဗော်ဍုၚ်မန်တၟိဂှ် ပေါဲဗတိုက် ဒှ်ကၠုၚ်ဒၟံၚ်သိၚ်သိၚ်ရ။ တုဲပၠန်တှ်ေ တၚ်ထ္ၜးဟိုတ်ဗော်ဍုၚ်မန်တၟိတၞဟ် မွဲပၠန်ဂှ် ဗော်ဍုၚ်မန်တၟိဂှ် ယဝ်ရထိၚ်ဒဝ်လဝ်ဓဝ်ၜိုဟ်လလံကဵု စကစမာန်တှ်ေ ညးဍုၚ်ကွာန်မန်တအ် ဂွံမံၚ်ၜိုဟ်ဟ်သြိုဟ်ဟ်မာန်ဏောၚ် တၚ်ထ္ၜးဟိုတ်ဏံ မွဲအံၚ်အခိၚ်လၟုဟ်ဏံ တၚ်ထ္ၜးဟိုတ်ပရေၚ်ပၞာန်ကဵု ဘဲဒဏ်ပၞာန်တအ်ဂှ် အဓိပ္ပါယ်ဟၟဲပုဟ်ဟီုဂှ် ညးဍုၚ်ကွာန်မန်ဗွဲမဂၠိုၚ် စကၠိုဟ်ခၠၚ်တီကၠုၚ်ယျ။ ခြာဟွံလအ် အခိၚ်ရာသဳဗြဲအိုတ်ဏံတှ်ေ အလုံမွဲတွဵုရးဍုၚ်မန် ဂကောံဇြဟတ်ပၠန်ဂတးတအ် သၠဲပ္တိုန်ကၠုၚ်ပရေၚ်ချဳဒရာၚ်ပၞာန်တအ်ဂှ် ပ္ဍဲကဵုတိဍာ်ထိၚ်ဒဝ်ဗော်ဍုၚ်မန်တၟိတအ်ဂှ်တှ်ေ သွက်ဂွံဇီုကပိုက်ဒးကၠုၚ် ဂၠိုၚ်ဏောၚ်။
သြၚ်လောန်တိုၚ်မ် – နကဵုဗော်ဍုၚ်မန်တၟိ သွက်ဂွံဗတိုက်ကဵုဒပ်ကံၚ်ဇြဳပၞာန် တၚ်ထ္ၜးဟိုတ်ဂွိၚ်ဖေက်ညးဍုၚ်ကွာန်တအ်ဂိဂှ် ပ္ဍဲကဵုကာလဏံ ထေက်ကြိုက်ဒၟံၚ်ရဟာ။ နကဵုညးတအ် ဟိုတ်နူဇြဟတ်လွဟ်လက်နက် ဇြဟတ်မၞိဟ်တုဲ ဟွံမိက်ဗတိုက်ပၞာန်ဟာ။ ဗီုလဵုညာတ်ကေတ်ရော။
ဒံက်တာသဳရိမန်ဆာန် – နကဵုဗော်ဍုၚ်မန်တၟိဂှ် သွက်ဂွံဗတိုက်ကဵုစကစ တၚ်ထ္ၜးဟိုတ် ဂွိၚ်ဖေက်ညးဍုၚ်ကွာန်တအ်ဂိဂှ်တှ်ေ အခိၚ်လၟုဟ်ဏံ ဒှ်တၚ်ထ္ၜးဟိုတ် ဗဗွဲထေက်ကြိုက်မွဲဏောၚ် ဟွံညာတ်ရ။ ဗော်ဍုၚ်မန်တၟိဂှ် ၜိုန်ရဟွံဗတိုကဵုစကစကီုလေဝ် ညးဍုၚ်ကွာန်မန်တအ် ဒးဒုၚ်ဒၟံၚ် ဘဲဒဏ်ပၞာန် ဂှ်ရ။ ဗီုအခိၚ်လၟုဟ်ဏံ အလုံမွဲဍုၚ် ဗၟံက်ပလိုတ်သၠုၚ်ကျာ သၟဝ်ကျာ ပ္ဍဲဒေသဗွဲမဂၠိုၚ် သၟဝ်ဂၠုၚ်ဗုၚ်ကွဳ ပၞောန်ဒစေၚ်ဟွံသှ်ေ ပရေၚ်ချဳဒရာၚ် ဂကောံပၠန်ဂတးတအ် သၠဲပ္တိတ်ကၠုၚ်ဒၟံၚ်ဂှ်ရ ဗော်ဍုၚ်မန်တၟိဂှ် ဗတိုက်ကဵု စကစကဵုဒှ်၊ ဟွံဗတိုက်ကဵုဒှ် တွဵုရးဍုၚ်မန် ပါဲဓလေတ်ဘဲဒဏ်ပၞာန်မာန် ဟွံသေၚ်ပုဟ်။ ညးဍုၚ်ကွာနမန်တအ်လေဝ် ဂွံတိတ်ဗၠး နူကဵုဘဲဒဏ်ပၞာန်မာန် ဟွံသေၚ်ရ။
ဟိုတ်ဂှ်ရ တၚ်ထ္ၜးဟိုတ်ဏံ ကိတ်ညဳကဵု အကာဲအရာပရေၚ်ဍုၚ်ကွာန်၊ ပရေၚ်ပၞာန် အခိၚ်လၟုဟ်ဏံတုဲ ဒှ်တၚ်ထ္ၜးဟိုတ် ဍိုက်ပေၚ်ကဵုယုတ္တိမွဲ ဟွံသေၚ်ပုဟ်။ တုဲပၠန် ဟိုတ်နူလွဟ်လက်နက်မကမ်ဇြဟတ်မၞိဟ်တုဲ ဟွံမိက်ဗတိုက်လေဝ် ဟွံသေၚ်ပုဟ်။ ပ္ဍံကဵုဂကောံပၠန်ဂတးရပ်လွဟ် မွဲမွဲ ဍိုက်ပေၚ်သီုဖအိုတ်မှ ဂွံဗတိုက်ဟီုဂှ် ဟၟဲပုဟ်။ ပ္ဍဲပၠန်ဂတးမန်လေဝ် သွက်ကံကုသဵုမန် မန်ဂွံဖန်ဖက်ကေတ်မာန် ရပ်ကေတ်လွဟ် ၜိုတ်ဒှ်ကဵုဒှ်တုဲ စဗတိုက်ကၠုၚ်လဝ်ရလေဝ်။ ပ္ဍဲကဵုပၠန်ဂတးက္ညၚ်လၟုဟ်ဏံလေဝ် နူကၠာတေံ ဇြဟတ်မၞိဟ်၊ ဇြဟတ်လွဟ် နွံဒၟံၚ်ၜိုတ် ၂၀၀ ဓဝ် ဒပ်ပၠတရဴကောန်ဂကူချေၚ်ဂှ် ဟိုတ်နူဗတိုက်ကဵု စကစတုဲ ဇြဟတ်မၞိဟ်၊ ဇြဟတ်သ္ဂံၚ် ဒှ်ကၠုၚ်ကဵုလ္ၚီတုဲတှ်ေ စဵုကဵုဍုၚ်ပယျဵုအိန္ဒိယဂှ်လေဝ် ဗတိုက်သီကေတ် မာန်လဝ်ရ။ ဗော်ဍုၚ်မန်တၟိလေဝ် ဗီုပြၚ်ဏံကီုရ။ ယဝ်ရလုပ်ပေါဲဗတိုက် သွက်ပရေၚ်ကောန်ဂကူ၊ ပရေၚ်ဒဳမဝ်ကရေဇြဳ ပရေၚ်ပၠန်ဂတး ပိုတ်တ်သ္ကုတ်တ်ဏောၚ်တှ်ေ သွက်ညးဍုၚ်ကွာန်မန်တအ် ဂွံဗပေၚ်ကဵု ဇြဟတ်မၞိဟ်၊ ဇြဟတ်လွဟ်လက်နက်ဂှ် ဟွံဝါတ်ပုဟ်။ ယဝ်ရဗော်ဍုၚ်မန်တၟိ ရပ်လွဟ်ဗတိုက် ပိုတ်တ်သ္ကုတ်တ်ဏောၚ်တှ်ေ ပိုဲတအ်လေဝ် သွက်ဂွံဒးဒက်ပ္တန် ဒပ်စဵုဒၞာဍုၚ်မန် ဟွံသေၚ်တုဲ ပံၚ်တောဲကဵု ဗော်ဍုၚ်မန်တၟိတုဲ လုပ်ကၠုၚ်ပေါဲဗတိုက်မွဲစွံဏောၚ်။
သြၚ်လောန်တိုၚ်မ် – တၚ်လကြဴဴအိုတ်ဏံ ပ္ဍဲကဵုတ္ၚဲအခန်ကၞာစၟတ်သမ္တီတှ်ေ က္ဍိုပ်သ္ကိုပ်တအ် ဟီုဂးဒၟံၚ်ဂလာန်ဝေါဟာ နွံဒၟံၚ်မွဲ လၟိုန်ရ။ ဝေါဟာဂှ်တှ်ေ အခေါၚ်ကံကုသဵုဇကု ဇကုဖန်ဖက်ကေတ်ဂှ်ရလေဝ်။ ဟီုတှ်ေ သွက်ဂွံက္လိဂွံ အခေါၚ်ကံကုသဵုဇကု ဇကုဂွံဖန်ဖက် ကေတ်မာန်ဂှ် နကဵုဗော်ဍုၚ်မန်တၟိ ပၠတရဴ က္ဍိုက်က္ဍိုပ် စဵုဒၞာဒၟံၚ်ကဵု ဂကူမန်ဂှ် ဗီုပြၚ်လဵု ဒးကၠောန်ရေၚ်တၠုၚ်ထေက် ညာတ်ကေတ်ရော။
ဒံက်တာသဳရိမန်ဆာန် – သွက်ဂွံဂွံအခေါၚ် ကံကုသဵုဇကု ဇကုဂွံဖန်ဖန်ကေတ်မာန် က္ဍိုပ်သ္ကိုပ်မန်တအ်၊ ပူဂဵုဆာန်ဂကူမန်တအ် ဟီုဒၟံၚ်ဂှ်တှ်ေ ဗော်ဍုၚ်မန်တၟိကီု၊ ဂကောံရပ်လွဟ်မန် သီုဖအိုတ်ကီု၊ တၚ်ပတှ်ေ ပၠန်ဂတးညးတအ်ကဵု တိုၚ်ပ္ကဴရန်တၟံ ပရေၚ်ပၠန်ဂတးတအ် ညံၚ်ဟွံဂွံကၠေံဗ္ဒန်အာ နွံဒၟံၚ်ပၟိက်ရ။ တၠုၚ်လအာ ဝၚ်ကၟိန်ဍုၚ်ဗၟာကဵု ဟိုတ်နူပဋိပက္ခပရေၚ်ဍုၚ်ကွာန် ပရေၚ်ပၞာန်တုဲ သွက်ဂွံက္လိဂွံ အခေါၚ်ကံကုသိုလ် ပါကၠုၚ်နူဂဝ် ကောန်ဂကူကောန်ဍုၚ် ပါလုပ်သီုကောန်ဂကူမန်တအ်ဂှ် ပါဲနူပေါဲဗတိုက်ရပ်လွဟ်တုဲ ဂၠံၚ်တရဴတၞဟ်သ္အာၚ် ဟၟဲရပ်ပုဟ်ဂှ် က္ဍိုပ်သ္ကိုပ်မန် ညးဍုၚ်ကွာန်မန်တအ် ပတှ်ေစှ်ေစိုတ် ဒုၚ်ကၠုၚ်တဲညးသ္ကအ်ရ။
ပၠန်ဂတးရပ်လွဟ်မန် စဒှ်ကၠုၚ်ကၠုၚ်ပေါဲဗတိုက် နူကဵု ၁၉၄၈ စဵုကဵုအခိၚ်လၟုဟ် ပေါဲဆဵုဂဗသဳကၠဳ ပရေၚ်ဍုၚ်ကွာန်တအ်၊ ပရေၚ်ဒေါံပန်ပှော်တအ် ကၠောန်ကၠုၚ်လဝ် ဂၠိုၚ်ၚ်ကဵုအလန်ရ။ ပ္ဍဲသၞာံ ၁၉၅၈ ဂှ် ကၠာတေံ လက်ထက်အလဵုအသဳဥူနု ဗော်ပၠတရဴဍုၚ်မန် မဒှ်ကောဗော်ဍုၚ်မန်တၟိဂှ် တိုၚ်ပ္ကဴဓဝ်ပတှ်ေ ပၠန်ဂတးရပ်လွဟ်ဂှ် သၠးထောံပေၚ်ၚ်တုဲ ဒစေၚ်ကၠုၚ်လဝ် လ္ပာ်ပရေၚ်ဆဵုဂဗသဳကၠဳကီုလေဝ် မုဟွံတၟေၚ်ကၠုၚ်ပုဟ်။ ဟိုတ်ဂှ်ရ ဗော်ဍုၚ်မန်တၟိကီု သီုကဵုဒပ်စဵုဒၞာဍုၚ်မန်ပိုဲ မံက်တိတ်ကၠုၚ် မွဲကရောံပၠန်ဂတးက္ညၚ် သီုကဵုဂကောံဇြဟတ်ပၠန်ဂတးတအ် သီုဖအိုတ်ဂှ် သွက်ဂွံက္လိဂွံ အခေါၚ်ကံကုသဵုဇကု ဇကုဂွံဖန်ဖက်ကေတ်မာန်၊ သွက်ဒဳမဝ်ကရေဇြဳကောန်ဂကူ အခိၚ်လၟုဟ်ဏံ ပေါဲဗတိုက်ရပ်လွဟ်ဂှ် သာတုဲ ပၟိက်ဇၞော်ကၠုၚ်ရ။ ပေါဲဗတိုက်သီဍုၚ်၊ ပေါဲဗတိုက်သီဗဒိုပ် အလုံမွဲကၟိန်ဍုၚ် အခိၚ်လုပ်ဒၟံၚ်ပေါဲဗတိုက်ညးသ္ကအ်ဂှ် ဗော်ဍုၚ်မန်တၟိပိုဲကီု သီုကဵုဂကောံဇြဟတ်ပၠန်ဂတးမန် သီုဖအိုတ်ဂှ် သွက်ဂွံက္လိဂွံ အခေါၚ်ကံကုသဵုဇကု ဇကုဂွံဖန်ဖက်ကေတ်မာန် ဒှ်တိုၚ်ပ္ကဴရန်တၟံ ပၠန်ဂတးပိုဲဂှ် ဒှ်အခိၚ်ဒးလုပ်ပေါဲဗတိုက် ပိုတ်တ်သ္ကုတ်တ်ထေက်ရဂှ် ပတှ်ေဒုၚ်ကေတ်လဝ်တုဲ မိက်ဂွံဗတိုက်ဖ္အောဝ်ဏာ ဇြိုဟ်ဟ်နက်က်ရ။