ပ္ဍဲကဵုဖျာ ၄၀ ပွိုၚ်ဍုၚ်ဒဂုၚ်သၟဝ်ကျာ ရးဒေသလဂုၚ် ပတေၚ်ဂြတ်လဝ် ပရေၚ်ဂီုကၠီုဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၅) ဂှ် ဂကောံဇြဟတ်လဂုၚ် ကိုဝ်နာန်လေန် က္ဍိုက်က္ဍိုပ်တုဲ ဒဒှ်ရဒစဵုဒစးကဵု တၠအဝဵုပၞာန်ဂှ် ထ္ၜးလဝ်ဆန္ဒရ။ နဒဒှ်ကလေၚ်ပလန်တဲကဵု ပရေၚ်ချဳဒရာၚ် ထ္ၜးဆန္ဒညးဍုၚ်ကွာန်တအ် ပါလုပ်လဝ်ဏံဂှ် ကံၚ်ဇြဳပၞာန် သုၚ်စောဲဇြဟတ်တုဲ ပလီုပလာ်လဝ်ဖျာ ၄၀ ပွိုၚ်ဍုၚ်ဒဂုၚ်သၟဝ်ကျာရ။
ဟိုတ်ဂှ်ရ ပ္ဍဲလ္တူပေါဲဗတိုက် ဗ္ကပ်ဗဗေၚ်ညးဍုၚ်ကွာန်တအ်ဂှ် စပ်ကဵုပရေၚ်ကံၚ်ဇြဳပၞာန် ပ္ကီုပရာပ်လဝ်ကီု၊ ကမၠောန်ပြဝကံၚ်ဇြဳပၞာန် ပၠုပ်စိုတ်ဖေက်တုဲ ဍဵုဍိုက်ဒၟံၚ်ကီု၊ ပရေၚ်ညးဍုၚ်ကွာန်တအ် ပါလုပ်ဒၟံၚ် ပ္ဍဲပေါဲထ္ၜးဆန္ဒတအ်ကီု၊ စပ်ကဵုဂလာန် မိက်ဂွံဟီုကဵု ကောန်ဒပ်ကံၚ်ဇြဳပၞာန်တအ်တုဲ ဆက်စၠောံသၟာန်လဝ် ကိုဝ်နာန်လေန် ဂကောံဇြဟတ်ဒစဵုဒစးတၠအဝဵုပၞာန်ရ။
သြၚ်လောန်တိုၚ်မ် – ကၠာအိုတ်ဏံ ပ္ဍဲလ္တူကံၚ်ဇြဳပၞာန် ကၠောန်သ္ပကၠုၚ် ပွပ္ကီုပရာပ် လ္တူပေါဲဗတိုက်ညးဍုၚ်ကွာန် ပရေၚ်ဒစဵုဒစးကဵုတၠအဝဵုပၞာန်ဂှ် ဗီုလဵုညာတ်ကေတ်ရော။
ကိုဝ်နာန်လေန် – ထေဲကဵုကၞိစံၚ်သ္ၚိ ဒှ်မံၚ်ဗီုပြၚ်ဏံ ဒးဟီုရ။ အဓိကဂှ်တှ်ေ ပါ်ဒကးဆီ ဂကောံဇြဟတ်ပၠန်ဂတးတအ်ကဵု ညးဍုၚ်ကွာန်တအ်လေဝ် ပါဒၟံၚ်ရ။ သွက်ဂွံဍဵုဍိုက်ညးဍုၚ်ကွာန် နကဵုစိုတ်ဖေက် နဲကဲစုၚ်ရ။ သုၚ်စောဲကၠုၚ် အရာဓဇန်ကြာန်အိုတ်ဂှ် ပိုဲဂွံညာတ်ကေတ်ရ။ တုဲမွဲပၠန်ဂှ် တၠအဝဵုပ္ကီုပရာပ်တအ်ဂှ် ဇြဟတ်ဍိုန်ကၠုၚ်ခ္ဍၚ် ဍဵုဍိုက်ကၠုၚ် ညးဍုၚ်ကွာန်ခ္ဍၚ် ဒှ်ကၠုၚ်ဗီုပြၚ်ဏံရ။ က္လေၚ်သရောပ်ထောံတှ်ေ ထေဲကဵုကၞိ စံၚ်သ္ၚိရ။ တုဲပၠန် ဒှ်အကာဲအရာ ပါ်ဒကးဆီ အကြာညးဍုၚ်ကွာန်တအ်ကဵု သၟာပၠန်ဂတးတအ်ရ။ အလဵုဍေံတအ် ဇြဟတ်ဍိုန်ကၠုၚ်ဂှ်ရ သာတုဲပ္တဝ်ကၠုၚ်ကဵု ညးဍုၚ်ကွာန် ပ္ကီုပရာပ်ကၠုၚ်ရ။ ပ္ဍဲလဂုၚ်တှ်ေ တံၚ်ဒၟံၚ်ပဝ်တာတအ်ဟီုဂှ် ဂွံမိၚ်မံၚ်ယျ။ ဇေတ်တ်တေံ တံၚ်ပဝ်တာဟီုဂှ် ယဝ်ရဟီုသ္ပဒၞန်(ပြန်ပေး)တှ်ေ သာတုဲ ဒးဏောၚ်။ ဟိုတ်ဟၟဲမွဲသာ် ဂၠာဲဟိုတ်တုဲ ဗက်ဂၠာဲရပ်ဒၟံၚ် သၟတ်တအ်။ ဟိုတ်ဟၟဲမွဲသာ် ဗက်ဂၠာဲရပ်ဒၟံၚ် ညးဍုၚ်ကွာန်တအ်။ အာတ်မိက်သြန်၊ ကဵုသြန်မှ က္လေၚ်ဗလးကဵုဏောၚ်တှ်ေ တအ်ဏံဂှ် ဒှ်သ္ပဒၞန်(ပြန်ပေး)ရ။ ကံၚ်ဇြဳပၞာန်ဂှ် အာဂတနူဏံ သွက်ဂွံဍဵုဍိုက်အာ ညးဍုၚ်ကွာန်တအ် မွဲဒမြိပ် ဂွံညာတ်ကၠုၚ်ရ။
သြၚ်လောန်တိုၚ်မ် – သ္ကုတ်လကြဴဏံ ကံၚ်ဇြဳပၞာန်ဂှ် ကၠောန်သ္ပကၠုၚ်ပရေၚ်ပါ်ဒကးဆီ အကြာညးဍုၚ်ကွာန်ကဵု ဂကောံဗကပ်ဗဗေၚ်တအ် ဂွံညာတ်ကေတ်ရ။ ပၠုပ်စိုတ်ဖေက် ဗီုကဵုလၟုဟ်တုဲ စပ်ကဵုကိစ္စ ပါ်ဒကးဒၟံၚ်ဆီတုဲ မုမိက်ဂွံဟီုကဵု ညးဍုၚ်ကွာန်တအ်ရော။
ကိုဝ်နာန်လေန် – အဓိကဂှ် ပၠုပ်ဒၟံၚ်စိုတ်ဖေက် ပ္ဍဲညးဍုၚ်ကွာန်တအ်ဟီုဂှ် မုဒှ်ရောတှ်ေ သၞဂှ် ဇြဟတ်ဍိုန်ကၠုၚ်။ ဍေံတအ်ဂှ် မုဖေက်ဒၟံၚ်မုရောတှ်ေ ညးဍုၚ်ကွာန်တအ် ညဳဂှ် ဍေံတအ်ဖေက်အိုတ်ရ။ တၠအဝဵုခေတ်အဆက်ဆက်ဂှ် ဖေက်ဒၟံၚ်ရမျာၚ်ကရေဲ ညးဍုၚ်ကွာန်တအ်ဟီုဂှ် ကေၚ်မိၚ် ကေၚ်သမ္တီလဝ် နွံရ။
သြၚ်လောန်တိုၚ်မ် – ပ္ဍဲကဵုပေါဲဗတိုက်ဗ္ကပ်ဗဗေၚ်ဒစဵုဒစးတၠအဝဵုပၞာန် ပ္ဍဲဍုၚ်လဂုၚ်ဂှ် ပရေၚ်ညးဍုၚ်ကွာန်တအ် ပါလုပ်ပံၚ်တောဲ ဗီုပြၚ်လဵု ဆက်နွံဒၟံၚ်ရော။
ကိုဝ်နာန်လေန် – လၟုဟ်လေဝ် ဖေက်မံၚ် ပရေၚ်ညးဍုၚ်ကွာန်တအ် ပါလုပ်ဂှ်ဟီုတှ်ေ ပ္ဍဲကဵုဂိတုကၠာတေံ ချဳဒရာၚ်လဝ် သွက်တ္ၚဲဒှ်မၞိဟ် ဒဝ်အံၚ်သာန်သုကျဳ ချဳဒရာၚ်လဝ် ဗ္ကပ်ဗဗေၚ်ပ္ကဴ ပရေၚ်ချဳဒရာၚ်ကၞာၚ်ကြေၚ် အခိၚ်ပြုပြေၚ်ပၞာန် ၁၀၂၇ ကဵု ပရေၚ်ချဳဒရာၚ် လၟုဟ်ဏံ ဒဒှ်ရထံက်ဂလာန်ဂှ် ညးဍုၚ်ကွာန်တအ် ပါလုပ်ဒၟံၚ်ညးသ္ကအ် ညဳဳညဳဂှ် နွံရ။ ပ္ဍဲပရေၚ်ချဳဒရာၚ်တအ်ဏံလေဝ် ကံၚ်ဇြဳပၞာန် သ္ပတံနူသၟာသွံပ္ကဴဒှ်တံ စရှ်ပ္ကဴဴတှ်ေ ရပ်။ ရပ်ကၞာၚ်ကြေၚ်တှ်ေ ရပ်။ ရပ်ပ္ကဴနၚ်ဇဳတှ်ေ ရပ်ဟီုဂှ် ဍာံဍာံတေံ ညံၚ်ညးဍုၚ်ကွာန်တအ် ဟွံဂွံဂံၚ်ပါလုပ် ပ္ဍဲပရေၚ်ပၠန်ဂတးရ။ ပရေၚ်ပ္ကီုပရာပ်ဍဵုဍိုက် ဗီုပြၚ်ဏံ နွံကၠုၚ်ဒၟံၚ် မွဲဒမြိပ်ရ။ လောန်ကၠုၚ်မွဲၜါတ္ၚဲဏံ ပိုဲ တိတ်ဗ္ကပ်လဝ်ဗဗေၚ်ရ။ ညးဍုၚ်ကွာန်တအ်ပါလုပ်လဝ် ကတိုၚ်ၚ်ကၟဟ်ဟ် ညးသ္ကအ်ရ။ နဒဒှ်တပ်ဒဏ် ပရေၚ်ပါလုပ်ဏံ ညံၚ်ညးဍုၚ်ကွာန်တအ် ဂွံဒှ်ဒဒိုက်စိုတ် ဗီုပြၚ်ပလီုပလာ်ထောံ ဒြပ်ညးဍုၚ်ကွာန်ဂှ် ဂွံညာတ်ကေတ်ရ။
နူကဵုစပၠုပ်စိုတ်ဖေက်ကဵု ညးဍုၚ်ကွာန်တအ်ဂှ် အလဵုဍေံတအ် ဒၟာနူဖေက်ရ။ ဖေက်ဒၟံၚ်ညးဍုၚ်ကွာန်တအ်ညဳအာ၊ ဖေက်မံၚ်ညးဍုၚ်ကွာန်တအ် ပါလုပ်ကၠုၚ် ပ္ဍဲပရေၚ်က္ဍိုက်က္ဍိုပ်ပၠန်ဂတး သီုစိုတ်သီုစရိုတ်ရ။ ဟိုတ်ဂှ်ရ ဍေံတအ်ပ္တဝ်လဝ်ကဵု ညးဍုၚ်ကွာန်တုဲ ကၠောန်ကၠုၚ် ပရေၚ်ဍဵုဍိုက်ရ အရာဏံဂှ်တှ်ေ ပ္ဍဲဍုၚ်ဇၞော်သၟးဟွံသေၚ်ပုဟ် အညာတှ်ေလေဝ် အညာ။ အရိုဟ်တ္ၚဲ ဆက်က် ကံၚ်ဇြဳပၞာန်က္လိလောန်ဒၟံၚ် လ္တူကောန်အရာပ် ညးဍုၚ်ကွာန်တအ်တအ်ရ။ ဟိုတ်ဂှ်ရ အဲညာတ်ကေတ်ရ။ ယဝ်ရဆက်ဍဵုဍိုက်ဒၟံၚ် ညးဍုၚ်ကွာန်တအ် အတိုၚ်ဏံဏောၚ်တှ်ေ ဇြဟတ်ညးဍုၚ်ကွာန်၊ ဒေါသညးဍုၚ်ကွာန် ကံၚ်ဇြဳပၞာန် ဒးဆေၚ်မုက်ကဵု လပှ်ပၠန်ဂတးဏောၚ်။ လပှ်ပၠန်ဂတးညးဍုၚ်ကွာန်ဂှ် ၚိတ်ဖျေံဏာ ကံၚ်ဇြဳပၞာန် မၞိဟ်ဍဵုဍိုက်ဒၟံၚ် ညးဍုၚ်ကွာန်တအ်ဏောၚ်ဂှ် အဲတှ်ေ ညာတ်ကေတ်လဝ် ဗီုဏံရ။
သြၚ်လောန်တိုၚ်မ် – နကဵုဂကောံဇြဟတ်ဗ္ကပ်ဗဗေၚ် ဒစဵုဒစးတၠအဝဵုပၞာန်ဂှ် လ္ပာ်လကြဴဏံ ပ္ဍဲအရာထ္ၜးဆန္ဒလ္တူဍုၚ်ဂှ် ဗီုပြၚ်လဵု ဒးဆေၚ်မံၚ်မုက်ကဵု အခက်ခုဲရော။
ကိုဝ်နာန်လေန် – ပရေၚ်ညးဍုၚ်ကွာန်တအ် ပါလုပ်ဂှ် မွဲဗီုဓဝ်ရဂှ် မိက်ဂွံဟီုရ။ နူကဵုစပၠန်ဂတးက္ညၚ်တေံ စကၠုၚ်လဝ်ကဵု ဇြဟတ်ညးဍုၚ်ကွာန်ရ။ ပရေၚ်ချဳဒရာၚ်တက်စေဝ်၊ ပရေၚ်ချဳဒရာၚ် CDM ပရေၚ်ချဳဒရာၚ် ထ္ၜးဆန္ဒကောံကလောံလ္တူဂၠံၚ်၊ ပရေၚ်ကၟာတ်လဒဵု ညံၚ်ကံၚ်ဇြဳပၞာန် ဟွံဂွံလုပ်စိုပ်ကၠုၚ် ပ္ဍဲကွာန်အရာပ်ဇကု မပ္တံဗီုဏံရ။ လ္တူနူတိုန်လ္တူဂၠံၚ်ဗီုဏံဂှ် ပ္ဍဲပရေၚ်ချဳဒရာၚ်လေဝ် ညးဍုၚ်ကွာန်ဂှ် ပါလုပ်ကၠုၚ် သီုစိုတ်သီုစရိုတ်တုဲ အခိၚ်ကောံလ္တူဂၠံၚ် ခက်ခုဲကၠုၚ်ဂှ်လေဝ် ပ္ဍဲကဵုလ္တူဂၠံၚ် ကောံကလောံ ဂၠိုၚ်ကဵုပြကောဋိကိုတ်ရ။ အခိၚ်ကောံကလောံဟွံဂွံလေဝ် သ္ၚိတ်ထ္ၜး ပ္ဍဲသ္ၚိဇကု ကဵုဇကုရ။ ကံၚ်ဇြဳပၞာန်ဂှ် ဖေက်တွဵုရ။ စရှ်ထ္ၜးပ္ကဴပ္ဍဲက္ဍိုပ်လေဝ် ကံၚ်ဇြဳပၞန်ဖေက်ဂှ်ရ။ ညးဍုၚ်ကွာန်လေဝ် သွက်ညးတအ်ဂွံပါလုပ် အခေါၚ်အရာနွံကၠုၚ် မွဲဒမြိပ်တုဲ ယဝ်ရဂွံတၚ်ဂၞၚ်ညးတအ် ပါလုပ်မာန်ဏောၚ်တှ်ေ ညးဍုၚ်ကွာန်လေဝ် နူကဵုအကြာအကြေပ်ဂြတ်ဂှ် ပါလုပ်ဒစဵုဒစး ရုန်ဂစာန်ဒၟံၚ် စဵုကဵုတ္ၚဲဏံဏီဂှ် အဲညာတ်ကေတ်ရ။
ပ္ဍဲကဵုပရေၚ်ဒဒှ်ဖျာ ဒဂုၚ်သၟဝ်ကျာဒးဒုၚ်ပလီုလဝ်ဏံ ဍာံဍာံတှ်ေတှ်ေ ညးဍုၚ်ကွာန် မၞုံဒၟံၚ်ပ္ဍဲဒဂုၚ်သၟဝ်ကျာသီုဖအိုတ်တအ်လေဝ် ပ္ဍဲကဵုပၠန်ဂတးက္ညၚ်ဂှ် ဒှ်ညးဍုၚ်ကွာန်တာလျိုၚ်ပြေမံၚ်ကွေံကွေံဏောၚ် ဟီုဂွံရ။ နူစပၠန်ဂတးက္ညၚ်စတေံရ ဗက်ကၠဟ်ကဵု ဗကပ်ဂၠံၚ်မၞုံ ပ္ဍဲဒဂုၚ်သၟဝ်ကျာတအ်ရ။ ညံၚ်ဒပ်ကံၚ်ဇြဳပၞာန် လုပ်ကၠုၚ်ဟွံဂွံ ညံၚ်ဂွံအာကၠုၚ်ဝါတ်ဂါတ် ကၟာတ်ဒၞာကဵုဂၠံၚ်တအ်ရ။ ပ္ဍဲကဵုပေါဲဗတိုက် လ္တူဂၠံၚ် ဂိတုမာတ်ချ်ဂှ်လေဝ် ပ္ဍဲကဵုဂၠံၚ်ဇၞော်ဒဂုၚ်သၟဝ်ကျာဂှ် ဟိုတ်နူပရေၚ်ညးဍုၚ်ကွာန်တအ် ပါလုပ်ပ္ဍဲပေါဲဗတိုက်တုဲ ပရေၚ်ဒဒှ် ဒးပြဟ်လလုဲလဝ်နွံရ။ ဒဂုၚ်သၟဝ်ကျာဂှ် နူကဵုစပၠန်ဂတးက္ညၚ်ဂှ် ဇြဟတ်ခိုဟ်လဝ်တုဲ ပ္ဍဲကဵုမွဲဒမြိပ်ဏံ ဇၟာပ်ပရေၚ်ချဳဒရာၚ် ညးဍုၚ်ကွာန်ဂှ် ပ္ဍဲဇၟာပ်ပေါဲဗ္ကပ်ဗဗေၚ်တအ် ပ္ဍဲကဵုပေါဲဗတိုက်ဒမၠုက်တအ်ကီု ပ္ဍဲကဵုပေါဲဗတိုက်ကဆံၚ်အလုံံမွဲကၟိန်ဍုၚ်ကီု ညးဍုၚ်ကွာန်ဒဂုၚ်သၟဝ်ကျာဂှ် ပါလုပ်ဒၟံၚ် သီုစိုတ်သီုစရိုတ် ပိုဲသ္ပဂွံမံၚ်သတိရ။ ဟိုတ်ဂှ်ရလေဝ် ဒဂုၚ်သၟဝ်ကျာဂှ် ကံၚ်ဇြဳပၞာန် လလောၚ်တြးလဝ် နဒဒှ်ပရေၚ်အုပ်ဓုပ်ပၞာန်တုဲ အလုံပွိုၚ် (၃) သၞာံပေၚ်ၚ် ပ္ဍဲတ္ၚဲ ပွိုၚ်လ္ၚီတ္ၚဲပြၚ်ၚ်ဂှ် ဍုၚ်ဒဂုၚ်သၟဝ်ကျာဂှ် လလောၚ်တြးလဝ် နဒဒှ်ဍုၚ်ပရေၚ်အုပ်ဓုပ်ပၞာန်တုဲ သွက်ဂွံဍဵုဍိုက်ဂှ် ပ္တိတ်ဒၟံၚ်ဇြဟတ်ရ။ မိက်ဂွံဟီုဂှ်တှ်ေ ပရေၚ်ညးဍုၚ်ကွာန်တအ် ပါလုပ်ဂှ် နွံဒၟံၚ် အတိုၚ်ပကတိရ။ တုဲတဴဴကဵု ပရေၚ်သၞဍဵုဍိုက်တုဲ ပရေၚ်ပါလုပ်သၠုၚ်သဝ် တိုန်စှ်ေဂှ်တှ်ေ နွံလေဝ်။ ဆ္ဂးဂှ် ပရေၚ်ညးဍုၚ်ကွာန်တအ်ပါလုပ် အာဂတနူဏံ အကာဲအရာဗီုပြၚ်သွက်ဂွံသၠုၚ်ဂၠိုၚ်ကၠုၚ်မွဲဒမြိပ်နွံမံၚ်ဂှ် အဲဂွံညာတ်ကေတ်ရ။
အခက်ခုဲဂကောံဇြဟတ်လ္တူဍုၚ်တအ်ဂှ် နွံၜါဂကူဓဝ်ရ။ မုက်ဂၞန်မွဲဂှ်တှ်ေ ၚုဟ်ဗွဝ်ဖျာ က္ဍၚ်ဒၟံၚ်ကဵု အကြေပ်ဂြတ် နာနာသာ်ရ။ ပရေၚ်သြန်ဖောဝ် ဒှ်ကၠုၚ်။ ၚုဟ်ဗၞိက်ဗွဝ်ဖျာတအ် က္ဍၚ်တိုန်ကၠုၚ်ရ။ စရိတ်မံၚ်စံၚ်စသုၚ် မပ္တံဗီုဏံ အလဵုညးဍုၚ်ကွာန်တအ်လေဝ် ခက်ခုဲရ။ အလဵုပိုဲလေဝ် ပ္ဍဲလ္တူဍုၚ်ဂှ် ဗီုပြၚ်စုၚ် ချဳဒရာၚ်ဒၟံၚ်ဂှ် ပ္ဍဲသ္ဂံၚ်ချဳဒရာၚ်တအ်လေဝ် အခက်ခုဲ ဗီုပြၚ်ဏံ နွံရ။ တၚ်ၜါဂှ်တှ်ေ စကစဂှ် သာတုဲ ပလေဝ်ပလေတ်ကၠုၚ် ပရေၚ်ဂီုကၠီုရ။ သာတုဲ ဗီုပြၚ်ဍဵဍိုက်ကၠုၚ်ရ။ တအ်ဏံလေဝ် ပ္ဍဲလ္တူပိုဲ တၚ်ကော်ချဴနွံ။ တၚ်ကော်ချဴ နွံဟီုဂှ် ဗီုကဵုဟီုလဝ် နူကလၚ်ဏံ ကၠောန်လဝ်ပရေၚ်ချဳဒရာၚ် ဗ္ကပ်ဗဗေၚ်။ ပ္တိတ်ဇြဟတ် သွက်ဂွံပါ်ဒကးဆီ အကြာညးဍုၚ်ကွာန်ကဵု ပိုဲရ။ ပလီုပလာ်ဖျာဒဂုၚ်သၟဝ်ကျာတုဲ ယဝ်ရပါလုပ်ဗီုဏံတှ်ေ ပလီုပလာ်ဏောၚ်ဟီုဂှ် ပၠုပ်လဝ်စိုတ်ဖေက်ရ။
ၜိုတ်ဂွံမိၚ်ကေတ်လဝ်တှ်ေ ညးဍုၚ်ကွာန်ဒဂုၚ်သၟဝ်ကျာတအ်ဂှ် ဒှ်မၞိဟ်စိုတ်ဓာတ် စိန်ဝုန်ဒၟံၚ် လ္တူပၠန်ဂတး ကွေံကွေံဏောၚ်။ ပ္ဍဲလ္တူညးဍုၚ်ကွာန် စကစဂှ် အမိၚ်ဟွံလုပ်သၞောဝ်တအ်၊ အခေါၚ်ဗၠးၜးညးဍုၚ်ကွာန် ပ္ဍဵုပ္ဍိုက်ညးဍုၚ်ကွာန် အခေါၚ်ဂျိုၚ်လမျီု ညးဍုၚ်ကွာန်၊ အခေါၚ် ညးဍုၚ်ကွာန် ဂၠာဲပိုန်ဒြပ် ကိစ္စဍဵုဍိုက်ဒၟံၚ် ညးဍုၚ်ကွာန်အရိုဟ်ဟ်တ္ၚဲဂှ် သွက်ပိုဲတှ်ေ ဒှ်တၚ်ကော်ချဴရ။ တအ်ဏံဂှ် ပိုဲတအ် သွက်ဂွံတတ်ထပါ်အာ မွဲကရောံကဵုညးဍုၚ်ကွာန်မာန်ဂှ် ဆက်ပလေဝ်ပလေတ်အာ ရေၚ်တၠုၚ်အာဏောၚ် ဗီုပြၚ်ဏံနွံရ။
သြၚ်လောန်တိုၚ်မ် – မွဲကရောံကဵုပရေၚ်ချဳဒရာၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံဂှ် ဟိုတ်နူဂကောံဇြဟတ်ပၠန်ဂတး တအ် ချဳဒရာၚ်လဝ်ပၞာန်ညဳညဳတုဲ လ္ပာ်ကံၚ်ဇြဳပၞာန် ကြပ်ဒှ်အလုံမွဲကၟိန်ဍုၚ် ဒးဂိဒၟံၚ်ဂှ် ဂွံညာတ်ကေတ်ရ။ ပ္ဍဲကဵုအကာဲအရာဏံ မုမိက်ဂွံဟီုကဵု ကောန်ဒပ်ကံၚ်ဇြဳပၞာန်တအ်ရော။
ကိုဝ်နာန်လေန် – ပ္ဍဲလ္တူဂၠံၚ်ဇၞော်လေဝ် သောၚ်က္လးအိုတ်တှ်ေ အတိုၚ်တၚ်ပတှ်ေ သၞဂှ်ရလေဝ်။ ဗ္တောန်ဖျောန်လဝ် ကောန်ဒပ်ပၞာန်ဗၟာ။ သၞဏောၚ် ယဝ်ရဒးဟီုလေဝ် ဟီုမာန်ရ ကောန်ဒပ်ပၞာန်ဗၟာတအ်ဂှ်လေဝ် ကောန်ဍုၚ်ပိုဲရ။ အခိၚ်လၟုဟ် ပိုဲဗတိုက်ဒၟံၚ် သၞောတ်တၠအဝဵုပၞာန် ယုတ်ပရေံရ။ ကောန်ဒပ်ပၞာန်ဗၟာ ဗွဲမဂၠိုၚ်ဂှ်တှ်ေ သွက်ဒတုဲမြမောဝ် မေန်အံၚ်လှာၚ်ကဵု လောဘ အဝဵုဍေံတအ် ဒပ်ပၞာန်ဗၟာဂှ် ဒှ်အာဂၠုဲ ပေၚ်ၚ်၊ ဒးကၠောန်ၜိုတ်မံၚ် ညံၚ်ဍိက်ရ။ ပ္ဍဲကဵုဒပ်ပၞာန်ဗၟာ သ္ကိုပ်ဗိုလ်ဇၞော်အံၚ်သာန် ဒက်ပ္တန်လဝ် ဒပ်ပၞာန်ဗၟာဂှ်တှ်ေ ဒးဒှ်ဍိက်ကၟိန်ဍုၚ်ဏောၚ်။ ဒးကၠောန်ၜိုတ်ဍုၚ်ဟီုဂှ် ဣဏံလေဝ် စၞောန်ထ္ၜးလဝ်ဂၠံၚ်တရဴရ။ လၟုဟ်ဂှ် ပ္ဍဲလက်ထက်မေန်အံၚ်လှာၚ်တှ်ေ ဒပ်ပၞာန်ဗၟာ၊ သီုအလုံဒပ်ပၞာန်ဗၟာမွဲဂှ် လီုလာ်အာ ပေၚ်ၚ်တုဲမှ ဒှ်မံၚ်အကာဲအရာကၠောန်ၜိုတ်ဒၟံၚ် မေန်အံၚ်လှာၚ်ရ။ အကာဲအရာဏံ ပိုဲတအ်လေဝ် စိုတ်ဟွံခိုဟ်ပုဟ်။ ဒှ်မံၚ် အကာဲအရာဏံရ။ ဟိုတ်ဂှ်ရ ကောန်ဒပ်ပၞာန်ဗၟာပိုဲဂှ် ယဝ်ရမိက်ဂွံရီုဗၚ်ဒပ်ပၞာန်ဆာန်ဍုၚ်ဏောၚ်တှ်ေ ပါလုပ်ပံၚ်တောဲကဵု ညးဍုၚ်ကွာန်တအ် ဗွဲမပြဟ်တုဲ ဒတူလာၚ် လ္ပာ်ညးဍုၚ်ကွာန်တအ်ပြဟ်ဟ် လုပ်ဖျေံလွဟ်ညးသ္ကအ်ညိဂှ် ထပ်ကော်ဘိက်ဏာရ။
သြၚ်လောန်တိုၚ်မ် – အလန်လကြဴဴအိုတ်ဏံ စပ်ကဵုပၠန်ဂတးက္ညၚ် အခိၚ်လၟုဟ်ဏံတုဲ မုမိက်ဂွံဗတိုက်ဖ္အောဝ် ညးဍုၚ်ကွာန်တအ်နွံရော။
ကိုဝ်နာန်လေန် – ညးဍုၚ်ကွာန်တအ်ဂှ် ပ္ဍဲကဵုအကာဲအရာ ဒှ်ဒၟံၚ်အခိၚ်လၟုဟ် ညးတအ်ညာတ်မံၚ် ကၠးကၠးဖ္ဍးဖ္ဍးတုဲတုဲရဂှ် အဲပတှ်ေလဝ်ရ။ ပတှ်ေတုဲ မုညးတအ် ဒးထံက်ဂလာန်ရောဟီုဂှ် ညးတအ် တီဒၟံၚ်ရ။ ကံၚ်ဇြဳပၞာန်ဂှ် ဗီုပြၚ်လဵု သုၚ်စောဲ နဲကဲစုၚ်တုဲ လီဠာန်ဗ္ဂေတ်တြးဒၟံၚ်ဝါဒဟီုဂှ် တီဒၟံၚ်ရ။ သဘဴဴတၠအဝဵုတအ်ဂှ် ဟွံမိက်ကဵုညးဍုၚ်ကွာန်တအ် ညဳညးသ္ကအ်ရ။ ပ္ဍဲအကြာညးဍုၚ်ကွာန်ဂှ် ဂကူပံၚ်ကောံ ဘာသာဇဳ ညဳသၟဟ်ကၠုၚ်တုဲ ဒစဵုဒစးကၠုၚ်ကဵုဍေံတအ်ဂှ် ဍေံတအ်ဖေက်ဒၟံၚ် ကွေံကွေံဏောၚ်။ ဒၟာနူဂှ်ရ တၠအဝဵုအဆက်က် ပါလုပ်သီုကံၚ်ဇြဳပၞာန် ကိစ္စကၠောန်ကၠုၚ်ဒၟံၚ် အဆက်က်ဂှ် မုရောတှ်ေ အကာဲအရာမွဲမွဲ ယဝ်ရဂဗကၠုၚ်ကဵု ဇြဟတ်ဍိုက်ဍေံတအ် အကြေပ်ဂြတ်ဍေံတအ်တှ်ေ ကၠောန်ကၠုၚ်ဒၟံၚ် ပဋိပက္ခပရေၚ်ဂကူ၊ ပရေၚ်ဘာသာ ကိစ္စပါ်ဒကးဆီဂှ် ကၠောန်ကၠုၚ်ဒၟံၚ် မွဲဒမြိပ်ရ။ လၟုဟ်လေဝ် သုၚ်စောဲဒၟံၚ်နဲကဲဏံရ။ ဒၟာနူဂှ်ရ ပရေၚ်လီၜန်တြးဝါဒကံၚ်ဇြဳပၞာန်တအ်ဂှ် ပရေၚ်ဒလုမတ် ဒမၠုပရေၚ်ဂကူ၊ ပရေၚ်ဘာသာဂှ် ညးဍုၚ်ကွာန်ပိုဲ ဒးဝေၚ်ပါဲအာ ကဵုညာဏ်ပညာတုဲ မၚ်ရံၚ်မံၚ် အကာဲအရာသၞပိုဲ လ္ပကဵုပိုတ်၊ ဝေၚ်လ္ပညှာ အခိၚ်ဗတိုက်အာ သ္ကာတ်တ်မြဟ်ဟ်ဏံ ဒးထ္ၜးဇြဟတ် ညးဍုၚ်ကွာန်ဏောၚ်။ ဟိုတ်ဂှ်ရ သၞဂှ် ပါ်ဒကးကၠုၚ်ဆီဏောၚ်။ ညံၚ်ဂွံလကိုတ်အာ ဍဵုဍိုက်ကၠုၚ်ဏောၚ်။ လ္တူအရာတအ်ဏံ လ္ပစွံအာရီုတုဲ သၞဇြဟတ်ဍိုန်ဒၟံၚ်ဂှ် ညံၚ်ဟွံဂွံပၞော်တိတ် ဒးဘိုၚ်ဗတိုက်ကဵုဇြဟတ် ညးဍုၚ်ကွာန်ဏောၚ် ဟိုတ်ဂှ်ရ ပိုဲကြဵုဇာလဝ်လ္တူဂၠံၚ်။ လ္ပမၚ်စၟဳမံၚ်ပေါဲဗတိုက် ကော်နၚ်ပေါဲဗတိုက်ညိ။ ပေါဲဗတိုက်ဂှ် အခိၚ်ဒးစၟဳမၚ်ဒၟံၚ် ဟွံသေၚ်ရပုဟ်။ အလဵုဇကု ဖန်ဗဒှ်ပေါဲဗတိုက်တုဲ ဒးကော်နၚ်ပေါဲဗတိုက်ဏောၚ်ဟီုတှ်ေ နူကဵုဒၞာဲဏံ မိက်ဂွံဗ္ကန်ဏာညးဍုၚ်ကွာန်တအ် ဂလာန်သောၚ်ၚ်ကၠးကၠး ၜိုတ်ဏံရ။