မတ်မလီု၊ ဒဳဇြေမ်ဗာ (၂)
ပ္ဍဲကွာန်ပါၚ်ၜဳ ပွိုၚ်ဍုၚ်ရေဝ် တွဵုရးဍုၚ်မန်ဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂) အခိၚ်နူဂယး ၜိုတ် (၁၁) နာဍဳဂှ် ဟိုတ်နူပၟတ်တူလဝ်တုဲ သ္ၚိဒၟံၚ် ဗ္ဒာဲ (၅၀) မ ဒးတူပၟတ်လီုလာ်လဝ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပရေၚ်ပၟတ်တူလဝ်ဏံဂှ် ပ္ဍဲကဵုသ္ၚိကိုဝ်ဇြဝ်ဥူ ဗ္ဒာဲကျာ်စေတဳဖအုံဗတဳ(သဲပုံစေတဳ) အရာပ်စၟတ် (၁) ကွာန်ပါၚ်ၜဳဂှ် နူကဵုပၟတ်အှော်ဍုန်လဝ်ပုၚ် တူကၠောံထၞာန်ဂွံသ္ၚိခပေဝ်တုဲ ဂဵုသၠာန်လဝ်ရ။
ဟိုတ်နူပၟတ်တူလဝ်တုဲ သ္ၚိဒၟံၚ် ကၟဳသောတ်၊ လးခတဵု၊ ဗ္ဒၚ်ဆု ဗ္ဒာဲ (၅၀) မ ပါလုပ် သီုသ္ၚိစဵုခပေဝ်၊ ကၟဳသၠ တူပၟတ်လီုလာ်လဝ်တုဲ ညးဍုၚ်ကွာန်ဒးဘဲပၟတ်ဂၠိုၚ်ကဵုကၠံ နွံလဝ်ရဂှ် ညးဒေသတအ် ဟီုလဝ်ရ။
ပရေၚ်ပၟတ်တူဏံ ဟိုတ်နူဒပ်ပလိုတ်ပၟတ်အရန်၊ ဂကောံရီုဗၚ်ဟံၚ်ပြာ်မၞိဟ် နူကွာန်ဇိုၚ်ဗ္ဒာဲဗ္ဒာဲတအ်ကဵု ညးဒေသတအ် ဘိုၚ်ပလိုတ်လဝ်ပၟတ်တုဲ ပၟတ်တူလဝ် လအ်ဂွံ ပွိုၚ် (၂) နာဍဳပြၚ်တုဲ ပလိုတ်ပၟတ်မာန်လဝ်ရဂှ် ဂွံတီကေတ်ရ။
ညးဍုၚ်ကွာန်ဒးဘဲပၟတ် (၁၆၀) တၠပြၚ်ဂှ်မ္ဂး ဖျေံကဵုလဝ်ဒၞာဲ ပ္ဍဲဘာလကျာ်ယျတနာအောၚ်မျေ ကွာန်ပါၚ်ၜဳရဂှ် ဂွံတီကေတ်ရ။
ကွာန်စဳပျး ကွာန်ပါၚ်ၜဳဏံဂှ် ဒှ်ကွာန်ကၠောန်ဒၟံၚ် ကမၠောန်တမ္ၚာအဓိကမွဲကွာန်တုဲ အတိုၚ်စရၚ်သ္ဂာဗ္တံ သၞာံ ၂၀၁၄ မ္ဂးလၟိဟ်မၞိဟ် ၄၀၀၀ ပြၚ် မံၚ်တန်တဴဒၟံၚ်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai