ယဝ်ရပလာပ်ပထုဲဂြိုဟ်ပတောံ ဗလးပ္တိုန်လဝ်ဂှ်တှ်ေ ဒှ်လလောၚ်တြးပၞာန်ရဂှ် ကိုဝ်ရဳယျာသၟဝ်ကျာ ကဵုသတိ

ပျုမ်ယာမ်၊ ဒဳဇြေမ်ဗာ (၃)

ကိုဝ်ရဳယျာသၟဝ်ကျာဂှ် ယဝ်ရပလာပ်ပထုဲကၠုၚ် ဂြိုဟ်ပတောံထံၚ်ပရိုၚ် ညးတအ်ဗလးပ္တိုန်လဝ်ဂှ်မ္ဂး စၟတ်သမ္တီကေတ် နဒဒှ်လလောၚ်တြးပၞာန်ရဂှ် ကဵုလဝ်သတိ ပ္ဍဲဂိတုဒဳဇြေမ်ဗာ စၟတ်တ္ၚဲ (၂)ရ။

ပရေၚ်ပိုၚ်ပြဳမဟာဗျူဟာညးတအ် သွက်ဂွံဒးဒုၚ်ဗတိုက် ယဝ်ချိုတ်ပၠိုတ်ကၠုၚ်မ္ဂး သွက်ဂွံတာဒၞာအာ အတိုၚ်ပရေၚ်ပၞာန် ပကောံပကေဝ်လဝ် ဂကောံဇြဟတ်ရောၚ်ဂှ်လေဝ် ဟီုဂးလဝ်ရ။

ယဝ်ရ အမေရိကာန် ပလာပ်ပထုဲကၠုၚ်ညးတအ် ပ္ဍဲအာကာသမ္ဂး ဒးပသောၚ်အာ ဂြိုဟ်ပတောံအမေရိကာန်တအ်ရောၚ်ဂှ် နိဿဲကဵုဂလာန် ညးမၞုံအခေါၚ်ဟီုဂး သွာၚ်ပၞာန်ကိုဝ်ရဳယျာသၟဝ်ကျာတုဲ ဓမံက်ထ္ၜးလဝ် ပ္ဍဲ KCNA ရ။

သုၚ်စောဲနဲကဲကွတ်ပညာဂတာပ်ခေတ်အမေရိကာန်တုဲ ပရေၚ်ပ္တိတ်ဒၟံၚ်ဇြဟတ် သွက်ဂွံဖံက်လုပ်ပယျဵုဒၞက်တိဍာ် ကၟိန်ဍုၚ်ပိုၚ်ပြဳအခေါၚ်အဝဵု လုပ်ကဵုသၞောဝ်ဂှ် ဟွံဒှ်ကမၠောန်လုပ်သၞောဝ်ရဂှ် KCNA ဓမံက်ထ္ၜးလဝ်ရ။

ကိုဝ်ရဳယာသၟဝ်ကျာဂှ်မ္ဂး ဗလးပ္တိုန်လဝ်ဂြိုဟ်ပတောံထံၚ်ပရိုၚ် ဆေၚ်ကဵုသွာၚ်ပၞာန် ပ္ဍဲကဵုဂိတုနဝ်ဝေမ်ဗာစၟတ်တ္ၚဲ (၂၁) ဗွဲမအံၚ်ဇၞးမာန်လဝ်တုဲ မၚ်ရံၚ်ခါတ်မံၚ်အကာဲ ပ္ဍဲဒၞာဲပၟိက်ကိစ္စဇၞော် ပါလုပ်သီုသ္ၚိနန်ဗ္တာၚ် သီုဌာန်ဂအုပ်ပၞာန်အမေရိကာန် ပေန်တဂေါန်ရဂှ် ဟီုသ္ဂးလဝ်ရ။

လ္ပာ်အမေရိကာန်ဂှ်မ္ဂး သွက်ဂွံတာဒၞာ ပရေၚ်ထံၚ်ပရိုၚ်ဂြိုဟ်ပတောံကိုဝ်ရဳယျာသၟဝ်ကျာဂှ် ယဝ်ရပၟိက်ဆန္ဒနွံမ္ဂး အစောန်စရာဲတာဒၞာ နွံဒၟံၚ်ရဂှ် ဟီုဂးလဝ်ရ။

စပ်ကဵုကိုဝ်ရဳယျာသၟဝ်ကျာ ဗလးပ္တိုန်လဝ် ဂြိုဟ်ပတောံထံၚ်ပရိုၚ်ပၞာန်တုဲ အမေရိကာန်ကဵု ကိုဝ်ရဳယျာသၠုၚ်ကျာတအ်ဂှ် ကၠောန်ရေၚ်တၠုၚ်လဝ် ပရေၚ်ကၟာတ်လဒဵုကေတ်အရေဝ် လ္တူအလဵုအသဳပျုမ်ယာမ်ရ။

စပ်ကဵုပရေၚ်ဗလးပ္တိုန်ဂြိုဟ်ပတောံဏံတုဲ ကိုဝ်ရဳယာသၠုၚ်ကျာလေဝ် ကၟာတ်လဒဵုကေတ်လဝ်အရေဝ် ကောန်ဍုၚ်ကိုဝ်ရဳယာသၟဝ်ကျာ (၁၁) တၠရ။

ဒဒှ်ရခၞံဗဒှ်လဝ် လွဟ်လက်နက်ပန်ဖျေံဂြိုဟ်ပတောံ ကၟိန်ဍုၚ်ဇြဟတ်ဇၞော်လ္ၚဵုမာန်တုဲဂှ်ရ ပါဲနူပေါဲပၞာန်ဗလးမုက်တိတုဲ ပ္ဍဲကဵုအာကာသလေဝ် အကာဲအရာပေါဲပၞာန် က္တဵုဒှ်ကၠုၚ်မာန်ဒၟံၚ်ဂှ် ညးခါတ်အကာဲအပရေၚ်ပၞာန်တအ် သ္ၚဳဂၠိပ်လဝ်ရ။

Ref: Yahoo News