ပွန်ပၞာန်ပန်ဒၞါဲ ပါလုပ်သီုကဵုသ္ၚိဒၟံၚ်သ္ကိုပ်ရး ရတခ တွဵုရးဍုၚ်မန် ဒးဒုၚ်ဗ္တိုက်ကဵုဒရုၚ်

မတ်မလီု၊ ဒဳဇြေမ်ဗာ ၃

သ္ၚိဒၟံၚ်သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန် မခါန်ကၞက်လဝ်ဂှ်ကီု၊ သ္ၚိဒၟံၚ်သ္ကိုပ်ရး ဌာန်ဂအုပ်ပၞာန်ရးအဂၞဲကံၚ်ဇြဳပၞာန် ဖျေံသ္ဇိုၚ်ဍုၚ်မတ်မလီုဂှ်ကဵု ပွန်ပၞာန်ပန်ဒၞါဲဂှ် ဗ္တိုက်လဝ်ကဵုဒရုၚ်ရောၚ် ဂွံတီကေတ် အတိုၚ်ဂလာန် ညးမၞုံတာလျိုၚ် ပကဖ တွဵုရးတံရ။

ပရေၚ်ပၞာန်ဏံဂှ် ပ္ဍဲဂိတုဒဳဇြေမ်ဗာ ၁ အခိၚ်ဗ္တံၜိုတ် ၉ နာဍဳကဝက်ဂှ် ဂကောံနဲပညာယှာထူဝဝ် (ဒပ်စြေက် Alpha bats ) ကေုာံ ဂကောံဒပ်စဵုဒၞါညးဍုၚ်ကွာန် တွဵုရးဍုၚ်မန် ပကဖ၊ တမ်ဒပ် (၆) KNDO တံ ပံၚ်တောဲဗ္တိုက်လဝ်ရ။

ပွန်ပၞာန်ပန်ဒၞါဲ မပ္တံကဵုသ္ၚိဒမၠုက် သ္ကိုပ်ရးရတခ၊ သ္ၚိဒၟံၚ်သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ်ဂှ်ကီု၊ သ္ၚိဒၟံၚ် သ္ကိုပ်တမ်ဒပ်ဗၠာဲသၟိၚ် တမ်ဒပ် (၁၅) ဗၠာဲသၟိၚ်တွဵုရးဍုၚ်မန် ကေုာံ ဒၞါဲဒတန် သၟာဒဳက္ၜၚ်ကျာသၞေၚ်ဝဲ မဗ္တိုက်လဝ် ဂကောံဒပ်ပၠန်ဂတးတံ နူကဵုတရဴကျာတံဂှ် ဗ္တိုက်လဝ် နကဵုဒရုၚ် Kamikaze Drone ရ။

ပရေၚ်ဗ္တိုက်ဏံဝွံ စွံပွန်ရေၚ်တၠုၚ်လဝ် ကုသၞာဲဒဴကဆံၚ်တွဵုရးကံၚ်ဇြဳပၞာန် မကဵုဒၟံၚ်အမိၚ်အဓိက ပ္ဍဲကဵုပေါဲဗ္တိုက်ကအ်ကြိက်၊ လှာဒကှ် တွဵုရးကရေၚ်ဂှ်ကဵု ပေါဲဗ္တိုက်ကျာ်မြဟ်တံဂှ် အဓိကရောၚ် ဒုညးဒုၚ်တာလျိုၚ် ပကဖ တွဵုရးဍုၚ်မန် သဝ်ထူအံၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲပရေၚ်ပၞာန်ဏံဂှ် ကလိဂွံဝပ်ဇီုကပိုက်တံကဵု စမြိုၚ်လ္ၚဵု လီုလာ်အာတံ နွံရောၚ် ဂွံမိၚ်ကေတ်ကီုလေဝ် လၟိဟ်ချိုတ်တ်ပၠိုတ်တ်ဂှ် ဟွံဂွံတီကေတ်ဏီပုဟ်ဂှ် သ္ဂးရ။

အတိုၚ်ဂလာန်ညးဒေသတံဂှ်မ္ဂး ပ္ဍဲအရာဗ္တိုက် သ္ၚိဓလုက် သ္ကိုပ်ရးဌာန်ဂအုပ်ရးပၞာန်အဂၞဲဂှ် ဒဒှ်ရဂွံမိၚ်ကေတ် ရမျာၚ်ဗြုဗ္တိုဟ်ထ္ကး နူကဵုရတခတံဂှ်ကဵု အကာဲအရာဗွဲလစှ်ေ ဂှ် ဟွံဂွံတီကေတ်ဏီပုဟ်ဂှ် ဟီုဂးလဝ်ရ။

သ္အာၚ်နူဂှ်ပၠန် ပ္ဍဲကဵုဗ္တိုက်သ္ၚိဒၟံၚ် သ္ကိုပ်ဝန်ဇၞော် ကံၚ်ဇြဳပၞာန်ခါန်ကၞက် မမံၚ်တန်တဴဒၟံၚ် ပ္ဍဲကဵုအရာပ်ဒၞါဲဒတန်ဝန်ဇၞော်ဂမၠိုၚ် မၞုံအရာပ်ၚါန်တေ ဍုၚ်မတ်မလီုဂှ် မခတိုဟ်ဒရုၚ်မွဲမ ဒတုံဗ္တိုဟ်ထ္ကးအာလဝ် ဗ္ဒါဲခဠာတ်ၚါန်တေ နွံလဝ်ဂှ် သ္ဂးရ။

အတိုၚ်ဂလာန် ဗွိုၚ်ရတခတံဂှ်မ္ဂး ကၠုၚ်စိုပ်ဗ္တိုက်လဝ် သ္ၚိဒၟံၚ်သ္ကိုပ်ရးဂှ်ဍာံကီုလေဝ် ဟိုတ်နူလ္ပာ်ဒပ်ပၞာန် ပန်ဖျေံလဝ် မခတိုဟ်ဒရုၚ် ဂကောံဇြဟတ်ပၠန်ဂတးတံမာန်ဂှ်ရ ပရေၚ်ဇီုကပိုက်တံ ဟွံမွဲပုဟ်ဂှ် ဂွံတီကေတ် အတိုၚ်သြၚ်လောန်တိုၚ်(မ်) ဂၠိုက်ဂၠါဲသၟာန်သၟုက်လဝ်ဂှ်ရ။

ဌာန်ဂအုပ်ပၞာန်ရးအဂၞဲ ကံၚ်ဇြဳပၞာန် ဖျေံသ္ဇိုၚ်ဍုၚ်မတ်မလီုဂှ်ဝွံ ပ္ဍဲဂိတုနဝ်ဝေမ်ဗာ ၁၆ တေံဂှ်လေဝ် အခိၚ်ကၠောန်ဗဒှ်ဒၟံၚ် သ္ဘၚ်ရတခ ပေၚ် ၆၂ သၞာံဂှ် ဒးဒုၚ်ဗ္တိုက်လဝ် ကဵုဒရုၚ်တုဲ သ္ဘၚ်ဂှ်လီုအာလဝ်ရ။

ကြဴနူလၟေၚ်ဒဒှ်ဏံတုဲဂှ် ကံၚ်ဇြဳပၞာန်ဝွံ ပတေၚ်ဂြတ်လဝ် ပရေၚ်ဂီုကၠီု အပ္ဍဲဍုၚ်မတ်မလီုတုဲ ဂေတ်ကၚ်တံကဵု လုပ်စိုပ်စၟဳတ် စရၚ်ကၟုဲတံဂှ် ကၠောန်ၜိုတ်ကၠုၚ်အဆက်က်ရောၚ် ဂွံတီကေတ် အတိုၚ်ဂလာန်ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−Social Media