ကံၚ်ဇြဳပၞာန် ပတေၚ်ဂြတ်လဝ် ပရေၚ်စၟဳတ် အပ္ဍဲခရိုၚ်သဓီု

သဓီု၊ ဒဳဇြေမ်ဗာ ၁၄

တွဵုရးဍုၚ်မန်၊ အပ္ဍဲခရိုၚ်သဓီု ပ္ဍဲကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်သဓီု ကေုာံ ပွိုၚ်ဍုၚ်ပံၚ်တံဂှ် အပ္ဍဲအကြာတ္ၚဲတံဏံ လ္ပာ်ကံၚ်ဇြဳပၞာန် ပတေၚ်ဂြတ်စၟဳတ်လဝ်တုဲ သၠုၚ်ပ္တိုန်လဝ် ပရေၚ်ဂၠိုက်ဂၠါဲစၟဳတ်ကၟာတ်လဒဵုတံဂှ် ဂွံတီကေတ် ဇရေၚ်ညးဒေသတံရ။

ပ္ဍဲဂိတုဒဳဇြေမ်ဗာ ၁၀ တေံ ကြဴနူခရိုၚ်သဓီု ဗော်သွးကောန်ဂကူကရေၚ် KNU လလောၚ်တြးကဵုသမ္တီ ကုညးဒုၚ်ကာ စပ်ကဵုလ္ပာ်အရာပ်၊ လ္ပာ်ပၞာန်ကံၚ်ဇြဳပၞာန် ကေုာံ ညးဍုၚ်ကွာန်တံတုဲဂှ် လ္ပာ်ကံၚ်ဇြဳပၞာန် ပတေၚ်ဂြတ်စၟဳတ်လဝ်ရ။

ပ္ဍဲကဵုဍုၚ်ပန်ဍုၚ် မၞုံအပ္ဍဲခရိုၚ်သဓီု ကံၚ်ဇြဳပၞာန်ဂှ် ဂေတ်ဒၟံၚ်ကၚ် သီုဗ္တံသီုတ္ၚဲကီု၊ ကၟာတ်လဒဵုဂၠိုက်ဂၠါဲစၟဳတ် ပ္ဍဲကဵုဂၠံၚ်လုပ်တိတ်ဍုၚ်တံကဵု ဂၠံၚ်ပိပန်သွာၚ်တံဂှ်ကီု၊ လုပ်စိုပ်စၟဳတ် စရၚ်ကၟုဲတံဂှ်လေဝ် သာတုဲကၠောန်သ္ပကၠုၚ်ဂှ် ညးဒေသတံ ဟီုဂးလဝ်ရ။

ညးဒေသကျာ်ထဝ်မွဲတၠဂှ် ဟိုတ်နူပရိုၚ် ဂကောံဇြဟတ်ပၠန်ဂတးတံ လုပ်ပေါဲဗ္တိုက်သီဍုၚ်တံဏောၚ်ဂှ်တုဲ လ္ပာ်ကံၚ်ဇြဳပၞာန် သၠုၚ်ပ္တိုန်ပရေၚ်ဂီုကၠီုတုဲ ပတေၚ်ဂြတ်လဝ်ပရေၚ်စၟဳတ်တံ ဒှ်မာန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကံၚ်ဇြဳပၞာန် မပတေၚ်ဂြတ်လဝ်ပရေၚ်စၟဳတ်ဂှ်ဝွံ စၟဳတ်ဒၟံၚ်ညးဍုၚ်ကွာန်အာတရဴဒေသတံ စနူကဵုတၞးကာဒ်ကောန်ဍုၚ်တံဂှ်တုဲ ပန်ပှော်ရပ်ဒက်ဒၟံၚ် မၞိဟ်တြုံၜါတၠ ဍိုက်ကွဳလိုန်ဓာတ်တုပ်ပ်တံဂှ်ကီု၊ အာတ်မိက်သြန်လှုဲ ဂၠိုၚ်ကဵုဆတံ မဒှ်ရ။

ညးဒေသသဓီုမွဲတၠဂှ်လေဝ် ဟိုတ်နူပရေၚ်စၟဳတ် ကောန်ဂကောံဒပ်ကံၚ်ဇြဳပၞာန်တံတုဲ မၞိဟ်အာကၠုၚ် အောန်စှ်ေအာတုဲ ပ္ဍဲအခိၚ်ဗ္တံဂှ်လေဝ် ဂွံမိၚ်ဒၟံၚ် ဗြုပန်ပှော်ကဵုသေနာတ်တံရောၚ်ဂှ် ဟီုရ။

မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ပ္ဍဲကဵုကွာန်ရး KNU မၞုံအပ္ဍဲပွိုၚ်ဍုၚ်သဓီု၊ ပွိုၚ်ဍုၚ်ကျာ်ထဝ် ကေုာံ ပွိုၚ်ဍုၚ်ၜဳကလေၚ်တံဂှ်လေဝ် ပန်ပှော်ဒၟံၚ် လွဟ်ဇၞော်တံ သီုဗ္တံသီုတ္ၚဲတံရောၚ်ဂှ် ဂွံတီကေတ်ရ။

ကောန်ဒပ်ကံၚ်ဇြဳပၞာန် ကေုာံ ညးဒုၚ်ကာ မၞုံအပ္ဍဲခရိုၚ်သဓီု တွဵုရးဍုၚ်မန်တံ ထောံလသာကံၚ်ဇြဳပၞာန်တုဲ သွက်ဂွံပံၚ်တောဲကဵု ညးဍုၚ်ကွာန်တံ ဗွဲမပြဟ်ဂှ် ခရိုၚ်သဓီု KNU လလောၚ်ပ္တိတ်လဝ် တၚ်လလောၚ်တြး နကဵုစၟတ်တ္ၚဲ ဂိတုဒဳဇြေမ်ဗာ ၁၀ တေံရ။

ပရိုၚ်−သြၚ်လောန်တိုၚ်(မ်)

ဗီု−Social Media (ဗီုတြေံ)