လံၚ်လုၚ်၊ ဒဳဇြေမ်ဗာ (၁၅)
ပ္ဍဲကွာန်ညေန်မဝ်၊ ပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သြဳဂှ် ဂကောံပံၚ်ကောံကံၚ်ဇြဳပၞာန်တအ် လုပ်ဗတိုက်ဒမၠလဝ်တုဲ ကေတ်ဏာလဝ် ကပေါတ်နွံၚုဟ်မး ထဝ်၊ သြန် ညးဍုၚ်ကွာန်ပိုၚ် ကိုတ် ၅၀၀ ဒ္ကေဝ်ပြၚ်ရဂှ် ဂွံတီကေတ် အတိုၚ်ညးဒေသတအ် ဟီုထ္ၜးလဝ်ရ။
ပ္ဍဲဂိတုဒဳဇြေမ်ဗာ စၟတ်တ္ၚဲ (၁၃) အခိၚ်ဗ္တံ ၜိုတ် (၁၁) နာဍဳဂှ် ဂကောံပံၚ်ကောံ ဒပ်ပၞာန်ကဵု ဗၠာဲသၟိၚ် ဇြဟတ် ၅၀ တၠ တိတ်ကၠုၚ် နူဗဒိုပ်ဗၠာဲသၟိၚ်ၝောံဍုၚ်လံၚ်လုၚ် စိုပ်ကၠုၚ်ကဵုကွဳစက် (၅) ဖ္ဍိုက်တုဲဂှ် လုပ်ဗတိုက်ဒမၠလဝ် ပ္ဍဲသ္ၚိ (၂၆) သ္ၚိရ။
ဂကောံပံၚ်ကောံကံၚ်ဇြဳပၞာန်ဂှ် ကၠာန်အိုတ်လုပ်စိုပ်ဖံက်ကလိုဟ်လဝ် သ္ၚိမၞိဟ်မံၚ်ဟၟဲ ပ္ဍဲကရပ်ဘာလကျာ်တုဲ ညးဍုၚ်ကွာန် ပ္ဍဲသ္ၚိမၞိဟ်မံၚ် နွံဒၟံၚ်တအ်ဂှ် ကဵုတိတ်အာမ္ၚးသ္ၚိတုဲ ကေတ်ဏာလဝ် ကပေါတ်ဒးစိုတ်တအ်ရဂှ် ဂွံတီကေတ် အတိုၚ်ညးဒေသ (၃) တၠ ဟီုထ္ၜးလဝ်ရ။
ညးဒေသမွဲတၠဂှ်မ္ဂး ဒပ်ကံၚ်ဇြဳပၞာန် လုပ်စိုပ်ကၠုၚ်ကွာန်ဂှ် မုဟွံဟီုဂးမွဲသာ်တုဲ ကေတ်ဏာလဝ်ကပေါတ်နွံၚုဟ်မး ပ္ဍဲသ္ၚိညးဍုၚ်ကွာန်တအ်ဂှ် ဒှ်ဗတိုက်ဒမၠဏာဟေၚ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ညးဒေသမွဲတၠပၠန်ဂှ်လေဝ် ဂကောံကံၚ်ဇြဳပၞာန်ဂှ် လုပ်ကၠုၚ် ပ္ဍဲကွာန်ညေန်မဝ်တုဲ ဂၠိုက်ဂၠာဲဂၟာဲလဝ် ပ္ဍဲသ္ၚိ ၂၆ သ္ၚိ ဗ္ဒာဲပွိုၚ်မွဲနာဍဳ လအ်လဝ်ဂှ်ရ ထ္ၜးလွဟ်ဘပဠပ္ဍဲသ္ၚိတအ်ဂှ်တုဲ သွက်ဂွံကေတ်ဏာကပေါတ် စဳဇန်လဝ်တုဲတုဲ ဒှ်မာန်ရဂှ် သ္ၚဳဂၠိပ်လဝ်ရ။
ဒပ်ကံၚ်ဇြဳပၞာန် လုပ်စိုပ်ကၠုၚ် ပ္ဍဲကွာန်ညေန်မဝ် အခိၚ်လုပ်ဂၠိုက်ဂၠာဲ ပ္ဍဲသ္ၚိဒၟံၚ်တအ်ဂှ် ပရေၚ်သၟာန်ဇာန်စၟဳစၟတ်၊ ရပ်ကေတ်ဏာလဝ် ကောန်ဒေသညးဍုၚ်ကွာန်တအ် ဟၟဲမွဲသာ်တုဲ အဓိကဂှ် ကေတ်ဏာလဝ် ကပေါတ်နွံကဵုၚုဟ်မးတအ်ဟေၚ်ရဂှ် ဂွံတီကေတ်ရ။
အတိုၚ်တၚ်ဂၞၚ်ညးဒေသတအ်ပကောံပကေဝ်လဝ်မ္ဂး ပ္ဍဲပရေၚ်သ္ၚိဒၟံၚ် (၂၆) မ ဒးဒုၚ်ဗတိုက်ဒမၠလဝ်ဂှ် သြန်ဒ္ကေဝ်ညးဍုၚ်ကွာန်ပိုၚ် ကိုတ် ၁၃၀ ပြၚ်၊ ထဝ် လျိုၚ် ၉ ဒ္ကေဝ်၊ ကွဳလိုန်ဓာတ် ၇ ဖ္ဍိုက်၊ ကွဳလိုန်ဓာတ် ၁ ဖ္ဍိုက် သီုကဵုတၞးကာဒ်ကောန်ဍုၚ် ပါအာရဂှ် ဟီုလဝ်ရ။
ကွာန်ညေန်မဝ် ပွိုၚ်ဍုၚ်လံၚ်လုၚ်ဂှ် ပ္ဍဲမွဲကာလဒပ်ပၞာန်သီအဝဵု ဗ္ဒာဲပွိုၚ်ပိသၞာံဏံ ဒဒှ်ရဒစဵုဒစးကဵုဂကောံပၞာန် ပရေၚ်ထ္ၜးဆန္ဒ ဆက်နွံဒၟံၚ်တုဲ ဒှ်ဒေသ ဂကောံဇြဟတ်ပၠန်ဂတးတအ် ချဳဒရာၚ်ဇြဟတ်ခိုဟ်ဒၟံၚ် မွဲဒေသလေဝ် ဒှ်ရ။
ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၃) တုဲကၠုၚ်တေံလေဝ် ကရောၚ်ပၞာန်ကံၚ်ဇြဳပၞာန် လုပ်စိုပ်ကၠုၚ် ပ္ဍဲကွာန်တပျေယှောၚ်တုဲ ကေတ်ဏာလဝ် ကပေါတ်ညးဍုၚ်ကွာန်ပိုၚ် နွံၚုဟ်မးတအ်တုဲ ကွဳလိုန်ဓာတ် (၂၁) ဖ္ဍိုက်ကဵု တာဲ (၁၈) မဂှ်လေဝ် စံၚ်ပလီုဏာလဝ်ရ။
သ္ပတံနူကၞောတ်သၞာံဏံတုဲ ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် ပ္ဍဲပွိုၚ်ဍုၚ်လံၚ်လုၚ်ဂှ် ယဝ်ရထံက်ဂလာန်ကဵု PDF တအ်မ္ဂး အကာဲအရာပရေံလ္တူနူဏံဏီရောၚ်ဂှ် ချူစွံလဝ်လိက် နွံဒၟံၚ်ရဂှ် ဂွံတီကေတ် အတိုၚ်ညးဒေသတအ် ဟီုလဴဴထ္ၜးလဝ်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai