ပံၚ်၊ သေပ်တေမ်ဗာ (၆)
နကဵုတၚ်စောတ်စောဲ ပန်ကၠဟ်လဝ် မခတိုဟ် (၄၀) မမ ပ္ဍဲဗ္ဒိုပ်ဗၠာဲသၟိၚ်ၝောံဍုၚ် ကံၚ်ဇြဳပၞာန် မၞုံဍုၚ်ပံၚ်၊ တွဵုရးဍုၚ်မန်ဂှ်တုဲ ကံၚ်ဇြဳပၞာန်တံ ရပ်ဒက်လဝ် ညးသၟတ် (၅) တၠ ဂှ် ညးမစုက်လုက်ကဵု ဂကောံဒပ်ဗၠာဲသၟိၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုသေပ်တေမ်ဗာ (၃) ဇိုၚ်သဝ်တ္ၚဲတေံ နူကဵုဒဵုကျာ်ရာဒနာမိက်ဍိုက်ပေၚ် ဍုၚ်ပံၚ်ဂှ် ဂကောံဟွံတီယၟုမွဲတၠ ပန်ပှော်ဗ္တိုက်လဝ် နကဵုဂကူမခတိုဟ်ခြာဇမ္ၚောဲ (၄၀) မမ ပ္ဍဲဗ္ဒိုပ်ဗၠာဲသၟိၚ်ၝောံဍုၚ်ဂှ်တုဲ မခတိုဟ်ဂှ် ဟိုတ်နူဒတုံဗ္တိုဟ်ထ္ကးအာ အကြာဗ္ဒိုပ်ဗၠာဲသၟိၚ်ၝောံဍုၚ်ကဵု ရုၚ်သ္ကိုပ်အုပ်ဓုပ်ကာနာနာ ပွိုၚ်ဍုၚ်ပံၚ်ဂှ်ရ စမြိုၚ်လ္ၚဵု ဇီုကပိုက်လီုလာ်လဝ်ရ။
ဟိုတ်နူဒးဒုၚ်ပန်ပှော်ဗ္တိုက်လဝ်ဂှ်ရ ဒပ်ကံၚ်ဇြဳပၞာန်တံ ကၠောန်သ္ပဂၠိုက်ဂၠါဲကၟာတ်ဆိုအ်ဗလဝ်တုဲ ကုမၞိဟ်တြုံ (၃) တၠ ကေုာံ မၞိဟ်ဗြဴ (၂) တၠဂှ် ညးပန်ပှော်ဗ္တိုက်တံရောၚ် စောတ်စောဲတုဲ ရပ်ဒက်လဝ်ရ။
“ ရပ်ဂွံ ပ္ဍဲတ္ၚဲဗ္တိုဟ်ထ္ကးဒှ်ဂှ် ဟွံသေၚ်ပုဟ်၊ ရပ်ဂွံလဝ် တ္ၚဲလက္ကရဴဏံ စၟတ်တ္ၚဲ (၄) ဂှ်ရ၊ နူကဵုလ္တူဒဵုတေံ ဍေံတံ လ္ပာ်ဂၠံၚ်စှ်ေ မၞိဟ်ၜါမွဲတောဲ၊ မၞိဟ်ပိမွဲတောဲ အဃောအာကၠုၚ်မံၚ်ဂှ် ဒှ်သံသယတုဲ ရပ်ဂွံလဝ်၊ လၟုဟ် စၟဳစၟတ်ဒၟံၚ် ဍေံတံဖိုဟ်” သာ်ဝွံ ညးမစုက်လုက်ကဵု ဗ္ဒိုပ်ဗၠာဲသၟိၚ်ၝောံဍုၚ်မွဲတၠ ဟီုရ။
ညးသၟတ် နူကဵုဒပ်ကံၚ်ဇြဳပၞာန်တံ စောတ်စောဲရပ်ဒက်လဝ်တံဝွံ ဒှ်ညးဗာ်အှော်တံတုဲ ညးဒေသ ပွိုၚ်ဍုၚ်ပံၚ်ဂှ် (၂) တၠ၊ (၃) တၠပၠန်ဂှ် ညးဒေသဟွံသေၚ်ပုဟ်ဂှ် ဂွံတီကေတ်ရ။
အခိၚ်လၟုဟ် ညးသၟတ် ဒးဒုၚ်ရပ်ဒက်လဝ်တံဝွံ ကံၚ်ဇြဳပၞာန် ရပ်ဒက်စၟဳစၟတ်ဒၟံၚ် ဒၞါဲလဵုရောဟီုဂှ် ဂွိုအ်တီကေတ်ဏီတုဲ ယၟု၊ အာယုက်ညးတံ ကေုာံ ညးဖံက်ဗ္တိုဟ်ဗမ် ဍာံ၊ဟွံဍာံဂှ်လေဝ် နကဵုသြၚ်လောန်တိုၚ်(မ်) သွက်ဂွံသ္ပဒတန်တၞဟ်ခြာမာန်ဂှ် ဂ္စါန်ဒၟံၚ်ဖိုဟ်ရ။
ဗ္ဒိုပ်ဗၠာဲသၟိၚ်ၝောံဍုၚ်ပံၚ်၊ တွဵုရးဍုၚ်မန် ကဵု ရုၚ်သ္ကိုပ်အုပ်ဓုပ်ကာနာနာပွိုၚ်ဍုၚ်တံ ဒးဒုၚ်ဗ္တိုက်ဂှ်ဝွံ ဒှ်အလန်ပထမကိုပ်ကၠာအိုတ်တုဲ ရုၚ်ဓာတ်လလဳ ပွိုၚ်ဍုၚ်ဂှ်မ္ဂး ဂကောံဒပ်စဵုဒၞါဒေသတံ ဗ္တိုက်ဒၟံၚ်ဟွံအောန်နူကဵု (၅) ဝါရ။
ပရိုၚ်−သြၚ်လောန်တိုၚ်(မ်)